Ndaka u ya ka menu ya wumbidi

Ndaka u ya ka dijanela da mndani

Tifakazi ta Jehovha

Txitxopi

Muwoneleli—Wa txigondo  |  Maio wa 2017

Litsako li li tiswako ngu kuhanya wutomi wo hehuka

Litsako li li tiswako ngu kuhanya wutomi wo hehuka

DANIEL NI MIRIAM va dhoropani ka Barcelona ka ditiko da Espanha va txhadhile ngu Setembro wa 2000. Mtini kwawe va ti dya atxi va nga ti txilava. Daniel a khene: “Male yi hi nga ti hola, yi ti hi tumelela kubela ka ma restaurante a nduma, hi tsimbila hi sakana matikoni kumwane ni kuxava siambalo so dhula. Kambe mbimo yotshe hi ti hisekela mthumo wa thembwe.” Kambe ku ni ti ti nga humelela.

Ka mtshangano wumwane wa m’ganga ngu 2006, Daniel a pfite m’wombawombo wu wu nga gwesa mbilu. M’wombawombi a ti khene: “Ina ha maha totshe ati hi nga tikotako ti to hi vhuna ava va ku ka nzila yo ya kufani ti to ve ta ka nzila ya wutomi?” (Mavingwa 24:11) Koneho ku txhamusetwe ti to hi ni wutixamuleli wo txhumayela, nguko toneto ti maha ti to vathu ve huluka. (Mithumo 20:26, 27) Daniel a khene: “Jehovha a ti ko nga o wombawomba ni nani.” Kutshumetwe kuwombwa ti to ngako hi txi maha to tala ka mthumo wa Jehovha hi na tsaka. Daniel a si kanakani toneto nguko aku Miriam i nga ti nyaphandule a ti ti wona ti to a zumba a di tsakile.

M’wombawombo wonewo wu mu gwesile ngutu Daniel. Se ene a ti woni ti to ku ti laveka e txitxa to tala ka wutomi wakwe. Ene a hungute mbimo yi a nga ti yi heta a di mthumoni ni kuteka wunyaphandule. Ene a khatile kupimisa ngu litsako li va ndino va nalo ngako ene ni msikati wakwe va txi ya thuma ha ku ku ni txilaveko.

SIKARATO NI KUMANA LITSAKO

Ngu Maio wa 2007, Daniel ni Miriam va lekile mthumo wawe se ve rura ve ya ka ditiko da Panama, i ku ditiko di va nga di endela masiku msana. Wukhalo wonewo i ti sitondolo so tala sa Bocas del Toro si ku ka linene la Caribe. Wungi wa vathu va kona i ti Vagwaymi. Daniel ni Miriam va alakanyile ti to male yi va nga ti nayo yi ndino enela mtxhanu wa mitxima ni yiraru.

Vona va ti tsimbila ngu tingalava ni mabhasikeni. Va ngadi va txi khumbula mbimo yi va nga ti tsimbila 30 wa makilometro ngu bhasikeni ka wukhalo wa mimango na ku di ni lisani. Daniel a karate ha ko za e va ni dikhodho. Kambe Vagwaymi mbathu vo ziva kuamukela vapfhumba. Vagwaymi va va khatalete ngu nzila ya yinene ngutu ngutu mbimo yi va nga gondanyana lidimi la wukhalo wule. Kha ta swela, Daniel ni Miriam va ti ni 23 wa sigondo.

Nji txani txi nga humelela mbimo yi va nga heta male yawe? Daniel a khene: “Hi khatile kudila hi pimisa ni kutshumela hi ya mtini kwathu Espanha. Kambe hi si tilavi kuleka sigondo sathu.” Se mbimo yi ku nga guma mtxima, va amukete madungula o tsakisa. Miriam a khene: “Hi rambilwe ti to hi va vanyaphandule vo sawuleka. Hi tsakile ngutu nguku hi ndino mbi khukha Panama!”

LITSAKO LA HOMBE NGUTU

Ngu 2015, mbimo yi sengeletano yi nga txitxelela siavelo sa vanathu vo tala, Daniel ni Miriam va emile ku va vanyaphandule vo sawuleka. Va ndina maha txani? Va thembile mapswi a Masalmu 37:5: “Ningela ka MKOMA wutomi wako, themba ene, se ene a na ku vhuna.” Va sikoti kumana mthumo wu va ndino tihanyisa na i di vanyaphandule. Nyamsi, vona va ka dibanza da Veraguas kona Panama.

Daniel a khene: “Mbimo yi hi nga ti si se khukha ditikoni kwathu, hi si kholwi ti to hi nga sikota kuhanya wutomi wo hehuka. Kambe nyamsi ha sikota, txiwalo txa lisima atxi hi txi pwatako.” Ngu tihi timwane to tsakisa ngutu? Vona va khona: “Kuvhuna vathu va timbilu ta tinene ti to ve gonda ditshuri ngu Jehovha, kha ti dinganiswi ni txilo!”