Ndaka u ya ka menu ya wumbidi

Ndaka u ya ka dijanela da mndani

Tifakazi ta Jehovha

Txitxopi

Muwoneleli—Wa txigondo  |  Maio wa 2017

“Awe wa ni randa kupinda tiya kani?”

“Awe wa ni randa kupinda tiya kani?”

“Simoni, mwana Johane, awe wa ni randa kupinda [tiya, Tradução do Novo Mundo] kani?”—JOHANE 21:15.

TINDANDO: 128, 45

1, 2. Msana ko va va di hetile wusiko wotshe va txi zama kudaya sihaka, kuhumelete txani ngu Pedro?

KU TI pindile masikunyana Jesu a di fite. Ditshiku dimwane, vagondiswa va Jesu va mtxhanu ni vambidi va tsute govani kasiku ve ya daya sihaka ka linene la Galileya. Kambe va hetile wusiku wotshe va sa nga mana txilo. Kambe mbimo yi di nga txa, va woni Jesu a di lidhongani se ene a to va gela ku khene: “‘Betani likoka ka ditshelo da txinene ka ngalava, mi na si mana.’ Vona va to beta likoka, se ve tandeka ni ku li ndinda, ngu kutala ngutu ngu sihaka.”—Johane 21:1-6.

2 Jesu a ningile vagondiswa vakwe dipawu ni txihaka ti to ve susula. Se e gwita a txi khene ka Simone Pedro: “Simoni, mwana Johane, awe wa ni randa kupinda [tiya, NM] kani?” Jesu a ti ti ziva ti to Pedro a txo fa ngu kudaya sihaka. Ti nga maha Jesu a ti wotisela kuziva ti to ka ti a nga ti vagondisile  ni kudaya sihaka ngu tihi ati Pedro a nga txi ti dhunda ngutu. Se Pedro a to xamula a txi khene: “Mkoma, wa ti ziva ti to ani na ku randa.” (Johane 21:15) Kukhukhela koneho Pedro a ti kombisile ti to ati a nga womba hi nga makuhu. A kombisile ti to a ti randa Kristu ngu kusimama e ñoleka ka mthumo wo txhumayela ni ku ene a mahile to tala ka dibanza da Wukristu.

3. Hi fanete hi ti wonela ka txani?

3 Mapswi a Pedro ma hi gondisa txani? Ti lava hi ti wonela hi si leki lirando lathu ka Kristu li guma. Jesu a ti zivile ti to wutomi ka matsimbitiselo awa a sa mafu wu ndina va ni sikarato so tala. Ka txidinganiso txakwe txa mphayi, a ti khene vamwane va ndina tumela “dipswi da Mfumo” se makhatoni va ndina khutala. Kambe ngu kutsimbila ka mbimo, “kukhutalela sa mafu awa, ni kukanganyiswa ngu tithomba” ku ndina “kama dipswi”, se kukhutala kwawe ku guma. (Matewu 13:19-22; Marku 4:19) Ngako hi si ti woneli, sithikamezo sa ditshiku ni ditshiku singa khulumetela mthumo wathu ka Jehovha. Se Jesu a txharihisile vagondiswa vakwe a txi khene: “Ti woneleni, kasiku timbilu tanu ti si thuki ti nemelwa ngu ku ambi ti pimela ni wudevi ni kuvilela ngu sa wutomi wuwa.”—Luka 21:34.

4. Nji txani txi no hi vhuna kuziva ti to hi veka mthumo wo txhumayela ka wukhalo wo khata? (Wona mfota wu wu ku makhatoni.)

4 Nathu hi nga fana ni Pedro ngu kuveka mthumo wo txhumayela ka wukhalo wo khata ka wutomi wathu. Hi nga tizivisa ku txani ti to ha maha toneto? Ngu ku tiwotisa tiya: ‘Nji txani atxi ni txi dhundako ngutu ka wutomi wangu? Ni tsaka ngu kutxhumayela mwendo ngu kumana male?’ Ti to hi xamula siwotiso siya he woneni timhaka tiraru ati ti nga dayisako lirando lathu ka Kristu. 1) mthumo wo tihanyisa, 2) misakano ni 3) tithomba.

U NGA THANGETISI MTHUMO WO TI HANYISA

5. Ngu wuhi wutixamuleli awu Jehovha a nga ninga misungo ya timwaya?

5 Phela Pedro hi nga ti to a ti ko sakana ngu kudaya sihaka. Kambe, a tikhatalela mwaya wakwe ngu mthumo wonewo. Ni nyamsi Jehovha a ningile wutixamuleli misungo ya timwaya ti to ti khatalela timwaya. (1 Timoti 5:8) Ti lava ve dhunuka. Kambe ka masiku awa o gwitisa, mthumo wu nga va txikarato.

6. Ngu txihi txikarato txa mthumo wo tihanyisa?

6 Nkonkuwa mithumo ya kala, vathu vo tala kha va yi mani mithumo. Ngu toneto, vathu va palisana ti to ve mana mthumo. Vamwane va khona i tshuko ve thuma mbimo yo lapha hambi muholo wu si kweli. Vanyamabhindo va lava vathumi va vadotho ka mthumo wa hombe. Se mthumo wu nga juja mapimo a vathumi, wu va karalisa ni ku va lwata. Vathu vo tala, va thava kuluza mthumo se va tumela kumaha totshe ati mlungu wawe a ti lavako.

Ngako hi ku Makristu, ha thembeka ngutu ka Jehovha kupinda sotshe

7, 8. a) I mani wu hi fanelako kuthembeka kwakwe? b) Ngu tihi ati mwanathu mmwane wa Tailândia a nga ti gonda mayelano ni mthumo wakwe?

 7 Ngako hi ku Makristu, ha thembeka ngutu ka Jehovha kupinda vathu votshe kupata ni valungu vathu. (Luka 10:27) Ngu toneto, mthumo wo ti hanyisa o va nzila yo mana txo hanya dwe ni kuseketela wuthumeli wathu. Kambe ngako hi si ma tuli, mthumo wu nga thuka wu khulumetela wukhozeli wathu. Wona ti ti nga humelela mwanathu wa ditiko da Tailândia. A ti khene: “Ni ti thuma ka wukhalo wo lungisa makomputadhori. Ni ti tsaka ngu mthumo wonewo, kambe wu ti lava ni heta mbimo yo tala ni txi thuma. Se ni txo sala ni mbimo ya yidotho ka timhaka ta moya. Ngu magwito ni tiwoni ti to ti lava ni maha to kari ti to ni thangetisa timhaka ta Mfumo. Nji txani atxi mwanathu wuwa a nga txi maha?

8 Ene a ti khene: “Ni hetile dilembe ni txi wona ti to na mahisa ku txani. Ngu magwito ni woni i di tshuko kuxavisa sorvete ni di txitaratoni. Makhatoni ti ni vangete sikarato sa timale, se ti ni hetile mtamo. Mbimo yimwane ni txi manana ni va ni nga thuma navo ka ta makomputadhori, va txi ni seka va txi ngu ku txani ni nga leka kuthuma mu ko titila ni lava kuhya ngu lisani ni txi xavisa ma sorvete. Ni mahile mkombelo ni kombela ti to Jehovha e ni vhuna kumaha a ti ni ti lavako, i ku kuva ni mbimo yo maha timhaka ta moya. Ti yite ti tshukwala. Ni woni ti to vathu va tsaka ngutu, se ni yite masoni ni maha ma sorvete a manene ngutu. Ditshiku ni ditshiku ma ti guma. Ni ti mana male yo pinda yi ni nga ti yi mana mu ni nga ti thuma kona kukhatani. Ni zumba ni di tsakile, kha ni ngadi ni jujeka msungo kufana ni mbimo yi ni nga ti lungisa makomputadhori. To tsakisa ngutu, ngu ti to konkuwa ni ti pfa ni di hafuhi ni Jehovha.”—Lera Matewu 5:3, 6.

Ina ni dhunda ngutu mthumo wangu kambe ni wona mthumo wa Jehovha wu txi godholisa?

9. Hi nga mahisa ku txani ti to hi va ni mawonelo a manene ngu mthumo wo ti hanyisa?

9 Jehovha kha yi dhundi mikara. Kuthuma ta tsakisa. (Mavingwa 12:14) Kambe ti lava hi wonisisa ti to mthumo wathu wo tihanyisa hi nga wona wa lisima kupinda wa Jehovha. Jesu a ti khene: “Kukhata, lavani Mfumo wa Txizimu ni kululama ka txona, ani sotshe siya mi na engetelwa.” (Matewu 6:33) Kambe hi na ti zivisa ku txani ti to hi ni mawonelo a manene ngu mthumo wo tihanyisa? Ngu ku tiwotisa tiya: ‘Ina ni dhunda ngutu mthumo wangu kambe ni wona mthumo wa Jehovha wu txi godholisa?’ Txiwotiso txiya txi nga hi vhuna kuwona ti to ngu tihi ati hi ti dhundako ngutu.

10. Ngu yihi gondo ya lisima ayi Jesu a nga yi gondisa?

10 Jesu a hi gondisile ati ti fanelako ku va to khata ka wutomi wathu. Ditshiku dimwane a endete Maria ni Marta. Marta a  to tekela kukhukha e khata kulungisela so susula, kambe Maria a txo engisela mbimo yi Jesu a gondisako. Marta a henyete Maria nguku a nga ti si mu vhuni. Se Jesu a ti khene: “Maria ngene a nga khedha txi i ku txa txinene ngutu, atxi a no mbi tekelwa ngu m’thu.” (Luka 10:38-42) Gondo yi Jesu a nga hi ninga ngu yiya: Ti to hi vayilela kukarateka ngu timhaka tathu ni kukombisa lirando lathu ka Kristu, ti lava hi sawula “txa txinene ngutu”. Eto ti womba txani? Ti womba ti to, mbimo yotshe wuxaka wathu ni Jehovha ngu wona wu fanelako wu va mhaka ya lisima ngutu ka wutomi wathu.

INA HI THANGETISA MISAKANO?

11. Ngu tihi ati Bhiblia yi ti wombako ngu kuhumula?

11 Txa wutomi txa nemela, ngu toneto ta laveka ti to hi va ni mbimo yo humula. Bhiblia yi khene: “Ka m’thu ku walo txa txinene txi palako kudya, ni kusela ni kutitsakela ngu sile a nga si mana ngu kutithumela apune.” (Eklesiaste 2:24) Jesu a ti ti ziva ti to vagondiswa vakwe va ti lava kuhumula. Ngu txikombiso, msana ka ku va va di thumile ngutu ka mthumo wo txhumayela, Jesu a va gete tiya: “Ngonani kheno anu mokha, he tsuleni txiwulani, mi na ya humula kudotho.”—Marku 6:31, 32.

12. Ngu ku txani ti txi lava hi ti wonela ka misakano? Ningela txikombiso.

12 Kusakananyana ti nga hi vhuna kuhumula kwati. Kambe hi fanete hi ti wonela ti to kusakana ku si ve kona i ku ka lisima ngutu ka wutomi wathu. Ka Mbimo ya vapostoli wungi wa vathu va ti ti khona: “He dyeni hi sela, nguko mangwana ha fa.” (1 Vakorinto 15:32) Moya wonewo wu nga di ho ni nyamsi. Ngu txikombiso, dijaha dimwane da ditiko da Europa di khatile kuya mitshanganoni. Kambe di ti dhunda ngutu misakano ha ko za di leka ni kuya mitshanganoni ni kugonda Bhiblia. Ngu kutsimbila ka mbimo di ti woni ti to misakano yi mu betile txibeheni. Di khatetile kugonda Bhiblia se di va muhuweleli. Di tshumete di bhabhatiswa, se di gwitile di txi khene: “Ati ni tisolako ngu tona ngu ti to ni hetile mbimo yo tala ni si thumeli Jehovha, ni si tizivi ti to ta tsakisa kupinda misakano ya ditiko diya.”

13. a) Womba txikombiso txa ti to kusakana ngutu hi nga ta tinene. b) Nji txani txi txi no hi vhuna kuwona ti to hi ni mawonelo a manene ngu misakano?

13 Kusakananyana ti nga hi vhuna kuhumula ni kuwiyisela mtamo. Kambe, i mbimo muni hi yi hetako hi txi sakana? Kasi hi xamula, he alakanyisiseni ngu tiya. Vathu vo tala va ti dhunda kudya tidhosa ni mabholo. Kambe ha ti ziva ti to hi txi dya ditshiku ni ditshiku, hi nga mana malwati. Hi txi lava ku va ni dihanyo da dinene ti lava hi dya sakudya sa sinene. Ngu toneto, ngako hi txi heta mbimo yo tala hi di ka ta misakano, wuxaka wathu ni Jehovha wu na fa. Hi nga ti zivisa ku txani ti to hi ni mawonelo a manene ngu misakano? Hi nga vhunwa ngu kusawula divhiki dimwedo, se hi bhala mawora ya hi mahetako hi di ka mthumo wa Jehovha, to fana ni mthumo wo txhumayela ni kugonda Bhiblia. Se hi nga gwita hi bhala mawora aya hi ma hetako hi txi xalela TV, ni misakano yimwane ka divhiki donedo. Hi wona txani  hi txi fananisa mawora awa? Ina ti lava hi txitxa to kari?—Lera Vaefesu 5:15, 16.

14. Nji txani txi no hi vhuna kusawula misakano ya yinene?

14 Jehovha kha hi sawuleli misakano. Misungo ya timwaya ngu yona yi nga sawulako misakano ya mwaya. Kambe Bhiblia yi hi komba mialakanyo ya Jehovha. Matshina onewo a milayo ma nga hi vhuna ti to hi maha txisungo txa txinene. * (Wona txhamuselo ya hahatshi.) Masakanelo a manene i ningo ya Jehovha. (Eklesiaste 3:12, 13) Ditshuri ti to vathu kha va dhundi misakano yi yi fanako. (Vagalatiya 6:4, 5) Kambe ti lava hi tiwonela ka yotshe misakano yi hi yi sawulako. Jesu a ti khene: “Nguko ahawa yi ku kona thomba yako, ni mbilu yako yi na va konaho.” (Matewu 6:21) Lirando li hi ku nalo ngu Mkoma wathu Jesu, li maha ti to mialakanyo yathu, mapswi athu ni simaho sathu si kombisa ti to Mfumo ngu wona i ku wa lisima ka wutomi wathu kupinda sotshe.—Vafilipiya 1:9, 10.

U NGA THANGETISI TITHOMBA

15, 16. a) Tithomba ti nga hi khulumeta kumaha txani? b) Ngu tihi ti Jesu a nga ti womba mayelano ni tithomba?

15 Nyamsi wungi wa vathu va lava silo so ngadi kuhuma, so fana ni siambalo, tifone, ti tablet. Eto ti maheka nguko vathu va teka silo sa nyama i di sona i ku sa lisima  ka wutomi wawe. Kota Mkristu tiwotise tiya: ‘Ngu tihi ti i ku ta lisima ngutu kwangu? Ina ni heta mbimo yo tala ni txi pimisa ngu simaha sa ngweno, mimovha yo ngadi kuhuma aha ko za ni pwata ni mbimo yo lulamisela mitshangano? Ina ni ñolekile ngu mithumo ya ditshiku ni ditshiku ha ko za ni pwata ni mbimo yo maha mkombelo ni gondo yangu ya Bhiblia?’ Ngako hi si tiwoneli lirando lathu ngu tithomba li nga kula ngutu kupinda lirando lathu ngu Kristu. Hi fanete hi khumbula mapswi a Jesu aya ma ku khene: “Ti woneleni tatinene ka hanyelo ya timbiti.” (Luka 12:15) Ngu ku txani a di wombile tiya?

Kha ti nge koteki kuthumela Jehovha ngu mtamo wotshe ni kulondisela tithomba ngu mbimo yimweyo

16 Jesu a ti khene “ku walo m’thu wu a si kotako kuthumela vakoma vambidi”, a engetile a txi khene: “Kha mi na ku si kota kuthumela Txizimu ni thomba ya mafu.” Kha ti nge koteki kuthumela Jehovha ngu mtamo wotshe ni kulondisela tithomba ngu mbimo yimweyo. Jesu a wombile ti to hi txo maha eto hi na ‘vengela mmweyo hi dhunda mmwane’. (Matewu 6:24) Kambe aku hi nga mbi hetiseka, hi fanete hi simama hi lwisana ni ‘minavelo ya mmidi,’ ayi yi patako tithomba.—Vaefesu 2:3.

17. a) Ngu ku txani vamwane ti txi va nemelela ku va ni mawonelo a manene ngu tithomba? b) Nji txani txi no hi vhuna kulwa ni kulava tithomba?

17 Vathu vo tala va ti karatela kumana asi va si lavako, ngu toneto ta va karatela ku va ni mawonelo a manene ngu tithomba. (Lera 1 Vakorinto 2:14.) Aku va ko lava soneso dwe, kha va ti zivi ta tinene ni to biha. (Vahebheru 5:11-14) Minavelo yawe ya tithomba, yi nga zima mikuluti. Se mbimo yi va ti manako tithomba, ti va ninga ku tilava ngutu. (Eklesiaste 5:10, NM) Kambe ti to hi lwa ni mialakanyo yiya hi fanete hi maha to kari. Kulera Bhiblia mbimo yotshe ti na hi tsanisa ni ku hi vhuna kuvayilela tithomba. (1 Pedro 2:2) Jesu a alakanyisile ngu wutxhari wa Jehovha, se eto ti m’vhuni ti to a si xulwi ngu siduko sa Sathane. (Matewu 4:8-10) Nanathu hi fanete hi londisela sialakanyiso sa Bhiblia, ti to hi kota kuvayilela tithomba. Se Jesu a na tiwona ti to ha m’dhunda kupala tithomba.

Ngu tihi ti i ku ta lisima ngutu ka wutomi wako? (Wona ndimana 18)

18. U ti emisete kumaha txani?

18 Mbimo yi Jesu a nga wotisa Pedro a txi khene “awe wa ni randa kupinda [tiya, NM] kani?” a ti lava ku mu gondisa ti to kuthumela Jehovha ku fanete ku va kona ka lisima ka wutomi wa Pedro. Txhamuselo ya ditina da Pedro yi wombako ti to “dirigwi”, kha yi hi xamalisi, ya yelana kwati ni tifanelo ta Pedro. (Mithumo 4:5-20) Nathu hi lava ti to lirando lathu ka Kristu li tsana. Ngu toneto, ti lava hi tsaniseka ti to mthumo wo ti hanyisa, misakano ni silo sa nyama hi nga sona si ku ka wukhalo wo khata ka wutomi wathu. Se kufana ni Pedro, hi na womba hi txi khathu: “Mkoma, wa ti ziva ti to ani na ku randa.”

^ par. 14 Wona msungo wa mhaka wu wu ku A sua recreação é benéfica?ka Sentinela, 15 de outubro de 2011, maphepha 9-12, tindimana 6-15.