“Vekani masoni ka Txizimu kotshe kukarateka kwanu, nguko Txizimu ngu txona txi mi khatalelako.”—1 PEDRO 5:7.

TINDANDO: 60, 23

1, 2. a) Ngu ku txani mbimo yimwane hi txi karateka? (Wona mfota wu wu ku makhatoni ka gondo.) b) Hi na xolisisa txani ka msungo wa mhaka wuwa?

NYAMSI, wutomi wathu wu nga hi nemelela. Kambe hambi wu a thumelako Txizimu mbimo yimwane wa vilela. Eto ta maheka nguko Sathane “wa horolokela nga ngonyamo yi yi bhongako, yi txi lava wo mkakatxula”. (1 Pedro 5:8; Mtuletelo 12:17) Malanda mamwane a Txizimu a mbimo yi yi nga pinda, mbimo yimwane ni ona ma ti karateka. Mmwane wawe i ti mkoma Dhavhidha (Masalmu 13:3) Mpostoli Paulo nene a ti “karateka ditshiku ni ditshiku ngu kota ya kukhatalela otshe Mabanza.” (2 Vakorinto 11:28) Kambe hi nga maha txani ti to hi si karateki?

2 Jehovha Tate wathu wa lirando, a ti vhuna Malanda akwe a mbimo yi yi nga pinda ti to me va ni kuthutha mbimo yi ma nga ti karateka. Ni ku ene a lava ku hi mahela ti ti fanako nyamsi. Bhiblia yi khene: “Vekani masoni ka Txizimu kotshe  kukarateka kwanu, nguko Txizimu ngu txona txi mi khatalelako”. (1 Pedro 5:7) Ka ndima yiya hi na xolisisa silo sa mune asi si hi kuvhuna ti to hi si karateki. (1) Kumaha mkombelo, (2) kulera Bhiblia ni ku alakanyisisa ngu yona, (3) leka moya wo basa wa Jehovha ti to wu kuvhuna ni (4) kubhula ni m’thu wu u mthembako ngu matipfelo ako. Ka silo siya sa mune ina ku ni txi u lavako kutshukwatisa ka txona?

GELA JEHOVHA KUKARATEKA KWAKO NGU MKOMBELO

3. U nga maha txani ti to u si vileli ngutu?

3 Nzila yo khata ayi yi nga kuvhunako ti to u si karateki ngutu ngu khongela ka Jehovha. Mbimo yi u mananako ni txikarato Tate wathu wa nzumani a lava ti to u m’zivisa ngu kumaha mkombelo. Mpisalema Dhavhidha a wombile tiya ka Jehovha: “Engisa, Txizimu, mkombelo wangu.” A tshumete e womba tiya: “Veka kuvilela kwako ka Jehovha, ene a na ku xayisa.” (Masalmu 55:2, 23) Kambe msana ko maha totshe ti u nga ti kotako ti to u txhatxha sikarato sako, kombela ka Jehovha ti to e kuvhuna ti to u xula kuvilela. Mkombelo wu nga hi vhunisa ku txani ti to hi xula ku karateka?—Masalmu 94:18, 19.

4. Ngu ku txani i di ta lisima kumaha mkombelo mbimo yi hi karatekako?

4 Lera Vafilipiya 4:6, 7Jehovha a yi xamula ngu nzila yihi mikombelo yathu ngaku hi txi kombela ti txi huma mbiluni, kambe hi si leki ku kombela txivhuno kwakwe? Ene wa hi vhuna ti to hi va ni ku thutha, ni ti to hi si vi ni mialakanyo yo tipfa hi singa va txilo. A na hi vhuna ku hi va ni kurula ka mbilu aku hi nga si kupfi makhatoni. Vanathu va vangi va ku pfite kurula koneko, ni nawe u nga va nako. “Kurula ka Txizimu” ku nga kuvhuna ti to u kota ku tsanisela txiduko txihi ni txihi txo karata. Awe u nga tsaniseka ngu txithembiso txa Jehovha: “U nga thave txilo, nguko ani ni Txizimu txako. Ani ni na ku tsanisa ni ku ku vhuna.”—Isaya 41:10.

MANA KURULA AKU KU TAKO NGU KA DIPSWI DA TXIZIMU

5. Dipswi da Txizimu di nga hi vhunisa ku txani ti to hi si vileli ngutu?

5 Nzila ya wumbidi yi yi nga hi vhunako ti to hi si karateki ngutu, ni ku va ni kurula ka mbilu ngu gonda Bhiblia. Ngu ku txani i di ta lisima? Nguko yona i Dipswi da Txizimu. Yona yi ni mikongomiso ya wutxhari ayi yi nga txitxako wutomi wathu. Ni ku yona yi nga ku vhuna ti to u xula kuvilela mwendo ku hi si nge ngadi hi vilela. Jehovha a womba ti to ngako hi txi lera Dipswi dakwe hi na ‘tsana, hi va ni mtamo’ wo xula kuvilela, ni ku hi nambi ‘thava mwendo ku dhudhumela.’—Joxuwa 1:7-9.

Likholo lo tsana ka Jehovha li na hi vhuna ku themba ti to ene a na hi ninga asi hi si lavako

6. Mapswi a Jesu ma nga ku vhuna ngu nzila yihi?

6 Bhiblia yi kombisa ti to Jesu a txi wombawomba ni vathu. Vona va txi dhunda ku engisela Jesu. Nguko mapswi akwe  ma txi va tsakisa kumweko ni kuva thavelela, ngutungutu loko va di karatekile mwendo kuva ni dikhodho. (lera Matewu 11:28-30.) Jesu a txi khatala ngutu ngu matipfelo a vathu. (Marku 6: 30-32) Ene a thembisile vapostoli, ava a nga txi tsimbila tsimbila navo ti to a ndina va vhuna, ni nathu a nga hi vhuna ni nyamsi. Kha ti lavi hi tsimbila tsimbila ni Jesu ti to hi mana txivhuno. Ene i Mkoma wathu wa nzumani ni ku wa hi dhunda ngutu. Mapswi akwe ma nga hi tsanisa, me hi ninga themba ni ku hi vhuna kuxula ku karateka. Tsaniseka ti to ene adi dhawani kwako, ni ku a na kuvhuna ngu mbimo ya kona.—Vahebheru 2:17, 18; 4:16.

TUMELELA MOYA WO SAWULEKA WA TXIZIMU TI TO WU KUVHUNA

7. Moya wo sawuleka wa Jehovha wu na hi wuyelisa ngu nzila muni?

7 Jesu a thembisile ti to hi txi kombela moya wo sawuleka wa Txizimu txona txi na hi ninga. (Luka 11:10-13) Nzila ya wuraru ayi yi nga hi vhunako ti to hi si vileli ngutu, ngu tumelela moya wo sawuleka wa Txizimu ti to wu hi vhuna. Ngu nzila yihi? Hi fanete hi tikarata ti to hi va ni tifanelo to fana ni ta Txizimu txa mtamo wotshe. (Vakolosa 3:10) Ka Bhiblia tifanelo toneto ti dhanwa ku “mihando ya moya”.(Lera Vagalatiya 5:22, 23.) Mbimo yi hi sakulelako tifanelo toneto ti na hi vhuna ku tsanisa wungana wathu ni vamwane, ni ku vona va na hi vhuna kuvayilela siemo si singa hi mahako hi karateka. He wone nzila yi ti thumako ngu yona.

8-12. Mihando ya moya wo sawuleka wa Jehovha yi kuvhuna ngu nzila yihi?

8 “Lirando, litsako, kudikha.” Hi txi ñola vamwane ngu nzila ya txixonipho ti na hi vhuna kuxula kukarateka. Mbimo yi u ñolako vamwane ngu txixonipho ni ngu lirando ti na ku vhuna kutshuralela siemo si singa kumahako hi pandiseka, mwendo ku dzolonganeka mapimo. Kambe eto ti na hi vhuna ku hanya ngu kudikha ni vamwane.—Varoma 12:10.

Hi txi sakulela ku va ni tifanelo ta Jehovha ti na hi vhuna ku thumisana kwati ni vamwane

9 “Kutimisela, wunene, kuthembeka.” Bhiblia yi womba tiya: “Zumbani mi di vavanene, mi txi pfelana wumbilu.” (Vaefesu 4:32) Nguku maha eto u na thumisana kwati ni vamwane ni ku u na tshuralela siemo si singa ku mahako u karateka. Aku hi nga mbi hetiseka hi na welwa ngu sikarato. kambe u txo thumisa mkongomiso wuwa wu na kuvhuna kuziva ti u nga ti mahako u txi thuka u manana ni txiemo txo fana txonetxo.

10 “Likholo.” Nyamsi ti tolovekile kuzumbela kukarateka ngu mhaka ya male ni ngu silo sa nyama. (Mavingwa 18:11) Hi nga maha txani ti to hi vayilela txiemo txo fana ni txonetxo? Hi fanete kumaha ati mpostoli Paulo a nga ti womba a txi khene, “tsakani ngu si mi ku naso.” Likholo lo tsana ka Jehovha li nga hi vhuna kuthemba ti to ene wa hi dhunda ni ku a na hi ninga asi hi si lavako. Jehovha a hi thembisa tiya: “Kha ni  nambi thuka ni ku leka, kha ni nambi ku tshotsha.” Nathu hi nga womba kufana ni Paulo: “Mkoma ngene txivhuno txangu, kha ni nambi thava txilo; m’thu a nga ni maha txani, kani?”—Vahebheru 13: 5, 6.

11 “Kuthutha, kutipimela.” Alakanya ngu nzila yi ti tifanelo ti ti nga txitxako wutomi wako ngu yona. Ti nga kuvhuna ti to u si mahi mwendo kuwomba timhaka ati ti nga ku mahako u karateka. Kambe hi nga toneto basi. Ti nga kuvhuna ti to u zumba kule ni “mabava, kuhenya, txitsikivi maguwa ni kuruka.”—Vaefesu 4:31.

12 Ti lava u ti veka hahatshi ti to u themba “diwoko da mtamo da Txizimu” ni “kuveka kukarateka kwathu ka txona.” (1 Pedro 5:6, 7) I di ti to wa tiveka hahatshi tsaniseka ti to Jeovha a na ku vhuna ni ku kukhatalela. Eto ti na kuvhuna ti to u themba Jehovha hahanze ko ti themba upune. Mbimo yi u wonako ti to Jehovha wa ku dhunda ni ku wa khatala ngu ngawe, u na ti kota kuzumba u di thuthile ni ku u si karateki ngutu.—Mika 6:8.

“MI NGA KARATEKENI”

13. Kambe Jesu ati la kuwomba txani ngu mapswi awa: “mi nga karatekeni”?

13 Ka Matewu 6:34 (Lera), Jesu ahi ningile mlayo wa wutxhari. Ati khene: “Mi nga karatekeni.” Eto mbimo yimwane ti nga woneka ti txi karata. Kambe Jesu ati la kuwomba txani ngu mapswi awa? Ene a si lavi kuwomba ti to dilanda da Txizimu kha di nambi karateka. Ngu txikombiso, mbimo yimwane Dhavhidha ni Paulo va ti karateka. Se Jesu a ti lava ti to Vagondiswa vakwe ve pfisisa ti to kukarateka kupinda mpimo mwendo ti singa ni txilaveko kha ti vhuni txilo. Ditshiku dimwane ni dimwane hi ni to ti maha. Toneto ti nga hi maha hi vilela. Ngu toneto, ina ta vhuna kuzumbela kukarateka ngu sikarato si singa pinda mwendo sa mangwana? He woneni ti to mlayo wa Jesu wu nga hi vhunisa ku txani ti to hi si karateki.

14. Kufana ni Dhavhidha, u nga maha txani ti to u hungula ku karateka?

14 Vamwane va zumbela kukarateka ngu silo si va nga si maha mbimo ya kale. Hambi ku ti pindile dilembe, va zumbela ku tipfa mnando. Mbimo yimwane Dhavhidha a karatekile ngu siwonho si a nga ti si mahile kale. Ene a phefemute atxi khene: “mbilu yangu yi ti tura khanani kwangu”. (Masalmu 38:3, 4, 8, 18) Mbimo ti nga txi humelela toneto Dhavhidha ati maha txani? Ene  a ti khumbula ti to Jehovha i Txizimu txa wuxinji ni ti to txona se txi ti mu divalete. Kualakanya ngu mhaka eyo ti ti mu mahile e zumba adi thuthile ni ku tsaka.—Lera Masalmu 32:1-3, 5.

15. a) Hi nga gonda txani ka txikombiso txa Dhavhidha? b) Hi nga maha txani ti to hi hungula kukarateka? (Wona dikwadru di di ku khene “ nzila yo hungula kukarateka”.)

15 Kambe vamwane va karateka ngu silo si va si mahako ngu mbimo yoneyo. Ngu txikombiso, mbimo yi Dhavhidha a nga bhala Disalmu 55, ene ati thava kudawa. (Masalmu 55:2-5) Kambe ene kha tumelela kukarateka ku gumisa themba yakwe ngu Jehovha. Dhavhidha a kombete txivhuno ka Jehovha ti to e txhatxha sikarato sakwe, kambe atxi ti ziva ti to ati fanete kumaha to kari ti to e kota kuvhunwa. (2 Samueli 15:30-34) U nga gonda txani ka txikombiso txa Dhavhidha? Hahanze ko tumelela kukurateka ku hi dyiseta, he maheni ti hi nga ti kotako ti to hi lulamisa sikarato sathu.

16. Ngu ku txani kuziva txhamuselo ya ditina da Jehovha ti no hi vhuna ti to hi si karateki ngutu?

16 Mbimo yimwane hi nga karateka ngu silo si kutilava si nga hi humelelako mangwana wa ditshiku. Kambe kha ti laveki kuzumbela kukarateka ngu ti ti si nzi ku maheka. Ngu txani? Nguko timhaka ti nga maheka ngu nzila yi hi nga sa yi emela ku ti maheka ngu yona. Hahanze keto, ditina da Jehovha di maha hi pfisisa ti to ene “wa tikombisa i di ti a lavako kuva tona.” (Eksodha 3:14, NM) Ngu toneto kha ti lavi hi karateka ngu ta mangwana. Hi nga tsaniseka ti to Jehovha a na katekisa malanda akwe o thembeka. Ene a na hi vhuna ti to hi si karateki ngu ti ti nga maheka, ati ti mahekako, mwendo ti ti no maheka.

WOMBAWOMBA NI M’THU WU U M’THEMBAKO

17, 18. Kubhula ni m’thu wu u m’thembako ti nga kuvhunisa txani ti to u xula kukarateka?

17 Nzila ya wumune ayi yi nga hi vhunako ti to hi si karateki, ngu wombawomba ni m’thu wu u m’thembako ngu totshe ti ti ku karatako. Mwamna, msikati, mngana wako, mwendo didhota da dibanza va nga kuvhuna ti to u wonisana ni txiemo txako ngu nzila ya yinene. Bhiblia yi khene: “Kukarateka ka rerekisa mbilu ya m’thu aniko dipswi da dimwedo da dinene da mu wuyisela litsako.”(Mavingwa 12:25) Bhiblia yi tshumela yi txi khene: “Ahawa ku ku singa ni wusungukati, makuhu ma hangalaka, aniko  ahale ku ku ni valayeli vo tala mixuvo ya m’thu ya tsaniswa.”—Mavingwa 15:22.

18 Mitshangano ya dibanza ni yona yi hi vhuna kuhungula kukarateka. Kona hi heta mbimo yo tala hi ti ni vanathu va va khatalako ngu ngathu ni ku hi tsakisa. (Vahebheru 10:24, 25) Ngu toneto “txikhutazo” txawe txi nga tsanisa likholo lathu ni ku hi vhuna kusimama hi tsanisa wungana wathu ni Jehova ti to hi si vileli ngutu.—Varoma 1:12.

TSANISA WUXAKA WAKO NI TXIZIMU

19. U nga tsaniseka ngu nzila yihi ti to wuxaka wako wo tsana ni Jehovha wu nga kuvhuna ti to u wonisana ni sikarato?

19 Mwanathu mmwane a wu i ku didhota wa Canadá a gondile ti to ngu ku txani i di ta lisima ku veka kuvilela kwakwe ka Jehovha. Hahanze ko va ni mthumo awu wu karalisako wo fana ni kuva m’gondisi, ene ati ni txikarato txa dihanyo atxi txi nga ti mahela kukarateka. Nji txani atxi txi nga mu vhuna kutsanisela? Ngu va ni wuxaka wu wu nga tsana ni Jehovha. Vangana va ditshuri va ti mu vhuna mbimo yi a nga ti manana ni txikarato, ni ku di txi bhula ni msikati wa dona mayelano ni matipfelo a dona. Hahanze keto, a vhunwi ngu madhota mamwane ni m’woneleli wa txigava ti to e wona silo ngu kuya ngu mawonelo a Jehovha. Mwanathu wuwa a vhunwi ngu dhokodhela ti to e ziva kutshukwala txiemo txakwe txa dihanyo. Ngu txikuluveta a mahile ku txitxa ko kari, e ti ha mbimo yo humula ni kumaha wutiololi wa mmidi. Eto ti mu vhuni ku a si karateki ngutu, ni kuziva ti to ati asi ti kotiko ku timaha a nga kombela txivhuno ka Jehovha.

20. a) Hi nga veka kuvilela kwathu ka Jehovha ngu nzila yihi? b) Hi na gonda ngu txani ka msungu wu wu londiselako?

20 Ka msungo mhaka wuwa hi gondile ti to hi nga veka ku vilela kwathu ka Jehovha ngu kumaha mkombelo, kugonda Bhiblia ni kualakanyisisa ngu ti hi nga ti gonda. I singeto basi kuleka moya wo sawuleka wa Txizimu wu hi vhuna, kubhula ni m’thu wu hi m’thembako, ni kuya mitshanganoni ti nga hi vhuna ti to hi si karateki. Ka msungu wa mhaka wu wu londiselako hi na gonda ti to Jehovha a nga hi vhuna ngu ku hi ninga themba.—Vahebheru 11:6.