Ndaka u ya ka menu ya wumbidi

Ndaka u ya ka dijanela da mndani

Tifakazi ta Jehovha

Txitxopi

Muwoneleli—Wa txigondo  |  Dezembro wa 2016

Jehovha a na ku katekisa

Jehovha a na ku katekisa

“Se hahanze ka likholo kha ti koteki ku txi tsakisa Txizimu, nguko, awule a tshuketelako hafuhi ka Txizimu, a fanete kukholwa ti to txona txi ho, ni ti to txa ninga txhatxhazelo ka vale va txi lavako.” —VAHEBHERU 11:6.

TINDANDO: 85, 134

1, 2. a) Lirando li yelana ngu nzila yihi ni likholo? b) Ngu sihi siwotiso si hi no si xolisisa ka msungu mhaka wuwa?

TATE wathu Jehovha, a thembisa ku katekisa malanda akwe. Ayiya i nzila yi Jehovha a kombisako lirando lakwe ngu ngathu, ni ku athu ha mu randa “nguko ngene a nga khata ehi randa.” (1 Johane 4:19) Mbimo yi hi yako hi randa Jehovha, lirando lathu ngu ngene ni lona li ya li kula. Ni ku hi nga tsaniseka ti to ene wa katekisa avale va mu dhundako.—Lera Vahebheru 11:6.

2 Jehovha wa ninga txhatxhazelo ka vale va mu lavako! Eto ti maha txienge txa wuthu wakwe. Kambe ngako hi si tsaniseki ti to Jehovha a na hi katekisa, hi fanete hi tsanisa likholo lathu. Ngu txani? Nguko “likholo njitsaniso txa kumana simaha si hi si rinzelako.” (Vahebheru 11:1) Ngu toneto likholo ti womba kuthemba ti to Jehovha a na hi katekisa. Ngu ku txani kurinzela ku katekiswa txi hi wuyelisa? Jehovha a ma katekisile ngu nzila yihi malanda akwe a kale ni a konkuwa? Ahi woneni.

 JEHOVHA WA HI KATEKISA MBIMO YOTSHE

3. Jehovha a hi thembisile txani ka Malakiya 3:10?

3 Jehovha a hi ningile txirambo. A wombile tiya: “Ni dukeni”. Hi nga ti mahisa ku txani toneto? Ngu kumaha totshe ti hi nga ti kotako kasi ku mtsakisa. Kambe Jehovha a thembisile ti to hi txi maha eto, a ‘na tula majanela a nzumani, a txi hangalasa makatekwa o tala txitimwi kwathu.’ (Malakiya 3:10) Ngaku hi txi tumela txirambo txa Jehovha, hi na va hi txi kombisa ti to ha mthemba.

4. Ngu ku txani hi di fanete kuthemba ti Jesu a nga ti womba ka Matewu 6:33?

4 Jesu a txi ti ziva ti to mbimo yotshe, Jehovha wa hetisisa sithembiso sakwe. (Isaya 55:11) Ngu toneto, ene a gete vagondiswa vakwe ti to ngaku va txi thangetisa Mfumo kukhata, Txizimu txi ndina va vhuna. (Lera Matewu 6:33.) Ngu ku txani hi di fanete kuthemba ti Jesu a nga ti womba ka Matewu 6:33? Nguko Jehovha nene a thembisile ka Vahebheru 13:5: “Kha ni nambi thuka ni ku leka, kha ni nambi nga va ni ku ku tshotsha.” Ngu toneto, ngaku hi txi kombisa likholo ka Jehovha, hi nga tsaniseka ti to ene a na hi vhuna.

Jesu a gete vagondiswa vakwe ti to va ndina katekiswa ngu mhaka ya totshe ti va nga ti tshuralela (Wona ndimana 5)

5. Ngu kona ha ka txani hi txi tsaka ngu tixamulo ti Jesu a nga ti ningela Pedro?

5 Mpostoli Pedro a ta nga wotisa Jesu a txi khene: “Athu hi lekile sotshe, hi txi ku londisa, se hi na dihelwa ngu txani kani?” (Matewu 19:27) Jesu kha nga m’henyela Pedro ngu mhaka ya txiwotiso txonetxo. Makhaloni yeto, Jesu a gete Pedro ni vagondiswa vamwane ti to va ndi na katekiswa ngu kuva va di tshuralete so tala. Wumwane wa mikateko i ti ku na fuma kumweko ni  Jesu nzumani. Kambe ti si se na nga maheka toneto, va ndi na amukela makatekwa mamwane. Jesu a tshumete e womba tiya: “Se wuhi ni wuhi, a nga leka tinyumba, vanawe, tindiyakwe, tate, mame, msikati, vanana mwendo tithembwe ngu mhaka ya ditina dangu, a na amukela sa kupinda ngutu asile, se ngu msana a na mana thomba ya wutomi wo mbi guma.” (Matewu 19:29) Dibanzani, hi ni va tate, va mame, vanathu, tindiyathu, vasikati, vanana. Ngu ditshuri eto ti hi ninga litsako, ni ku ti ni lisima ngutu kupinda tithomba totshe ti hi nga ti tshuralela ngu ndava ya Mfumo.

TXITHEMBISO TXI FANA NI HANGI YA MOYA

6. Ngu ku txani Jehovha a di thembisile ku katekisa Malanda akwe?

6 Jehovha a thembisile ti to a na katekisa otshe malanda akwe. Ene a mahile toneto ti to e hi vhuna ku hi kota kutimisela masiku oneyo o karata. Ditshuri ti to Jehovha wa hi ninga so tala nyamsi. Kambe hi ti rinzete ngu maso o bhilivila ku na ta amukela makatekwa a hombe ka mbimo yi yi tako. (1 Timoti 4:8) Ku tsaniseka ti to Txizimu “txa ninga txhatxhazelo ka vale va txi lavako” ta hi vhuna ti to hi simama hi di thembekile ka txona.— Vahebheru 11:6.

7. Ngu ku txani txithembiso txi txi fana ni hangi?

7 A ti mmangoni Jesu a ti khene: “Tsakani tatinene mi txi nengela, nguko nja hombe hakhelo yanu nzumani. Nguko va va xanisisile toneto vaprofeti va va nga mi thangela.” (Matewu 5:12) Vamwane va ni themba yo hanya nzumani ni ku toneto ta va tsakisa. Kambe wungi wathu hi ni themba yo ta hanya paradhiseni ha mafuni, ni ku eto ni tona ti hi ninga litsako la hombe. (Masalmu 37:11; Luka 18:30) Ti singa ni mhaka ni ti to themba yathu njo ya hanya hayi, yona yi “fana ni hangi ya moya, ayi i ku ya kutsana ni kuthembeka”. (Vahebheru 6:17-20) Ti mahisa ku txani toneto? Ha ti ziva ti to hangi yi thumela kutsanisa txitimela txa mati ti to txi si pengiswi ngu txingulu. Kufana ni hangi, themba ya hi vhuna ti to hi simama hi di tsani ka ditshuri ni kwa mbi guma mtamo ka masiku awa o karata.

Jehovha a thembisile ti to a na katekisa otshe malanda akwe. Ene a mahile eto ti to e hi vhuna kutimisela masiku awa o karata

8. Kurinzela ka sithembiso sa Txizimu ta hi vhuna ngu nzila yihi ti to hi hunguta kuvilela?

8 Kurinzela sithembiso sa Txizimu ti fana ni mrende wu wu holisako mbilu. Kualakanya ngu themba yoneyo ti nga hi vhuna ti to hi hunguta kuvilela. Ta tsakisa kuziva ti to hi nga henjeleta mivilelo yathu ka Jehovha ene a na hi khatalela. (Masalmu 55:22) Ha tsaniseka ti to Txizimu txa ti kota “kumaha sasingi ngutu kupinda asi hi txi kombelako mwendo asi hi si pimisako, ngu mtamo wu, txi thumako ngu wona kwathu”. (Vaefesu 3:20) Alakanya ngu tiya! Jehovha a nga hi vhuna hi sa tirinzela.

9. Nji txani txi hi fanelako ku txi maha ti to hi amukela makatekwa a Jehovha?

9 Ti to hi amukela kateko, ti lava hi va ni likholo ka Jehovha ni kuengisa mkongomiso  wakwe. Mosi a gete vathu va ka Israeli a txi khene: “MKOMA, a na ku katekisa, ka ditiko dile MKOMA, Txizimu txako, a no ku ninga, kasiku u txi di fuma, di txi maha thomba yako. Eto ti na maheka, ngaku u txi engisa dipswi da MKOMA, Txizimu txako, u txi khatala ngu kuxayisa sotshe sirumo si nyamsi ni ku leletako sona. MKOMA, Txizimu txako, a na ku katekisa, ngati a nga kuthembisa.” (Dheuteronome 15:4-6) Jehovha a thembisa ti to a na hi katekisa, ngaku hi txi simama hi kombisa likholo kwakwe. Hi na ni sivangelo si si pfalako ti to hi kholwa ka toneto.

JEHOVHA A VA KATEKISILE

10, 11. Jehovha a mkatekisile ngu nzila yihi Josefa?

10 Bhiblia yi bhaletwe ku hi vhuna. Ka yona hi mana sikombiso so tala sa nzila yi Txizimu txi nga katekisa ngu yona Malanda a txona ka mbimo yi yi nga pinda. (Varoma 15:4) Wona ti ti nga maheka ngu Josefa. Txo khata, ene a xavisilwe kota txibotxhwa ngu vakoma vakwe. Ngu msana, msikati wa Faru a sikile makhuhu a txi hembela Josefa a ti ti nga maha ti to e khotelwa txitokisoni. Ina Jehovha a mdivate Josefa mbimo yi a nga ti khotetwe? Ahim-him! Bhiblia yi khene: “Jehovha a simamile ni Josefa, a txi kombisa lirando lo thembeka ngu ngene” ni “ku a ti vhuna Josefa ti to e humelela ka totshe ti a nga txi ti maha.” (Genesisi 39:21-23) Josefa a ti themba ti to a ti na mvhuna hambi a txi tshangana ni siemo so karata.

11 Msana ka malembe o kari, Josefa a katekisilwe. Msana kova Faru a ti mu humesile txitokisoni, Josefa a vite wa wumbidi ka vafumi va va nga di ni txitulu txo guleka kheya Gibita. (Genesisi 41:1, 37-43) Ngu magwito, Josefa a txhadhile e tshumela eva ni vanana. Genesisi 41:51, 52 yi khene: Josefa a to raya mwanana wa matiwula ditina da ku i Manase, a txi khene: “Txizimu txi mahile ti to ni divala sixaniso sangu ni wotshe m’ti wa tate wangu.” Mwanana wa wumbidi, ene a m’rayile ditina da ku i Efrayime, a txi khene: “Txizimu txi ni ningile liveleko ditikoni muwa ka kuxupheka kwangu.” Josefa a txi ti ziva ti to a ti ko katekiswa ngu Jehovha. Makhaloni yeto, Josefa a vile ni lungelo yo vhuna ditiko da Israeli ni da Egipta mbimo yi ma ngava ni nzala ya hombe.

Ngu ditshuri Jesu wa tsaka ngu ku lwela ditina da Txizimu

12. Nji txani atxi txi nga vhuna Jesu ti to e simama e thembeka mbimo yi a nga txi dukwa?

12 Jesu nene a pindile ngu ka sikarato sa singi kambe a simamile e engisa Txizimu, ni ku Jehovha a mkatekisile. Nji txani txi txi nga vhuna Jesu ti to e simama e thembeka? Bhiblia yi khene: ‘Nguku leka “litsako li a nga velekwa ka lona, a txi langa mixaniso ya kurwala txihambano (phande ya xanisa), a si khatali ngu kurukwa.”’ (Vahebheru 12:2) Ngu ditshuri ene a tsakile nguku a nga lwela ditina da Txizimu. Kambe yi ve yihi wuyelo? Jehovha a ti guletile ngu Jesu e tshumela e m’ninga malungelo a mangi. Bhiblia yi womba ti to ene a “khalahatshile txineneni ka txikhalo txa wukoma txa Txizimu.”  I singeto basi, “Txizimu txi mu guletile ngutu,txi mu ninga ditina di di ku txitimwi ka otshe matina.”—Vafilipiya 2:9.

JEHOVHA KHA DIVALI ATI HI TI MAHAKO

13, 14. Jehovha ati pfisa ku txani ngu ti hi m’mahelako?

13 Tsaniseka ti to tximwane ni tximwane atxi u txi mahako Jehovha atxi teka i di txa lisima. Ene wa ti ziva ti to mbimo yimwane u nga tipfa u sa tsana mwendo ku va ni mapimo a ti to txi walo ni txa tximwetxo u txi kotako kumaha i ku txa txinene. Ti nga maheka u txi tshangana ni txiemo txo karata mthumoni mwendo ngu ti to u na wu khatalelisa kutxani mwaya. Kambe u nga zumba u di thuthile nguku Jehovha adi dhawani kwako. Hahanze keto, ngako u txi lwala aha ko za u si tikoti kumahela Jehovha ati u nga ti mu mahela kaleko, khumbula ti to ene wa txi pfisisa txiemo txako. U nga thuke u kanakana lisima li Jehovha ahi ningako lona ngu kuva vathumeli vakwe vo thembeka hambi hi txi manana ni sikarato.—Lera Vahebheru 6:10, 11.

14 Khumbula kambe ti to Jehovha “wa engisa mikombelo.” Hi nga tsaniseka ti to ene wa hi engisa mbimo yi hi kombelako. (Masalmu 65:2) I singeto basi Jehovha i “Txizimu txa kotshe kuthavelela”. Ene wa hi ninga sotshe si hi si lavako. Mbimo yimwane a thumisa vanathu ti to ve hi vhuna kusimama hi va vangana vakwe. (2 Vakorinto 1:3) Kambe ti lava nathu hi maha to kari. Bhiblia yi khene: “Awule a vhunako txisiwana a txeneka MKOMA, se ene a na m’tshumetela txivhuno txakwe.”(Mavingwa 19:17; Matewu 6:3, 4) Mbimo si hi kombisako wuha ka vanathu, ti fana ni ku hi txo mahela Jehovha. Ene a thembisa ku hi hakela ngu mhaka ya toneto.

MAKATEKWA A KONKUWA NI A MBIMO YI YI TAKO

15. Ngu yihi hakelo ayi u yi rinzelako ngu maso o bhilivila ti to u ta yi amukela ka mbimo yoneyo? (Wona mfota wu wu ku makhatoni.)

15 Makristu ya i ku vasawuleki ma ni themba yo a mukela “m’bhoti wo lulama,” i ku makatekwa o ta ngu ka Jesu. (2 Timoti 4:7, 8) Kambe Jehovha a tshumete e ningela themba yo tsakisa ka vale va mahako txienge txa “dibutho da hombe” da Jesu. Ene a thembisile ti to hakelo yawe ku na va ku ta “hanya ngu ha kusi gumiko ka paradhise ya ha mafuni ngu litsako ni kuthutha.”—Johane 10:16; Masalmu 37:11.

16. Dibhuku da 1 Johane 3:19, 20 di nga hi vhuna ngu nzila yihi?

16 Mbimo yimwane hi nga pimisa ti to ati hi ti mahako ndi dotho ka Jehovha. Ti nga maha hi kanakana ti to mwendo Jehovha wa tsaka ngu ti hi ti mahako. Hi nga alakanya kambe ti to kha hi fanelwi ngu makatekwa akwe. Ngu toneto nda lisima ku mbimo yotshe hi khumbula ti to Jehovha “mbwa hombe kupinda mbilu yathu, futsi kambe txona txa ziva totshe” (Lera 1 Johane 3:19, 20.) Kwathu ati hi ti mahelako Jehovha ti nga wonekisa ku nga bha ndidotho, kambe ene wa katekisa totshe ti hi ti mahako ngu likholo ni lirando.—Marku 12:41-44.

17. Ngu yahi makatekwa ya hi ma manako konku?

17 Athu hi hanya ka masiku o gwita a mafu awa o biha a Sathani. Hambi keto, Jehovha a hi ninga makatekwa o tala. Hi nga pimisa, hi ni wuzivi wo tala kupinda wu hi nga ti nawo kukhatani. (Isaya 54:13) Kambe nga  ha Jesu a nga womba ngu kona, Jehovha wa hi katekisa konkuwa nguku hi ni mwaya wa vanathu ni tindiyathu mafuni kotshe. (Marku 10:29, 30) I si ngeto basi, ava va thumelako Txizimu ngu mbilu yotshe, va hanya ngu kudikha ni ku, va ni sotshe si va si lavako ti to ve kota kutsaka. Eto ti kombisa ti to se ha katekiswa ngu Jehovha.—Vafilipiya 4:4-7.

18, 19. Vanathu vamwane va tipfa ngu nzila yihi ngu nzila yi Jehovha a va khatalelako ngu yona?

18 Ha mafuni kotshe, vanathu vo tala va amukela makatekwa a Jehovha. Ngu txikombiso, Bhianka, wa Alemanha a wombile tiya: “Ani kha ni ti zivi ti to ni nga mbongisa ku txani Jehovha. Ene wa ni vhuna ka sikarato sangu ni ku mbimo yotshe wa ni seketela. Vathu hahanze kheya vo penga ni ditiko. Kambe mbimo yi wungana wangu wu yako wu kula ni Jehovha, niya ni tipfa ni di vhikelekile ngutu. Ti fana ni ku va a txo maha ngu ku ni beleka. Mizamo yimwane ni yimwane ayi ni yi mahako ngu ngene kha yi dinganiswi ni makatekwa ya a ni ningako.”

19 Hi nga wona kambe txikombiso txa Paula wa ditikoni ka Canadá, awu a ku ni 70 wa malembe. Ene a ni malwati a nyamakazi, a ya ma nga tshingela ha txiwunu. A womba ti to ta m’karatela kuthuma, kambe kha ti mvhaleli kutxhumayela. Ene a wombile tiya: “Ni txhumayela ngu telefone, kambe ni ningela wufakazi wa txitxhuketi. Atxi txi ni vhunako kumaha toneto, ngu bhala tindimana ta Bhiblia ni mibhalo yimwane yi ku ka mabhuku ka mkadherno ti to ngu msana ni ti gonda. Mkadherno wonewo ni wu dhana ti to i ‘mkaderno wa kuhanya kwangu’. Kupandiseka ka pinda mbimo yi hi pimisako ngu sithembiso sa Jehovha. Ene wa khatala ngu ngathu mbimo yotshe, ti singa ni mhaka ni ti to hi ka txiemo txihi.” Wotshe wubihi wu hi tshanganako nawo konkuwa hi nga wa txilo wu txi dinganiswa ni makatekwa ya hi ma manako ka Jehovha. Ti ha kubasani ti to Txiemo txako txi nga va txi txi hambana ni txa Paula ni Bhianka. Kambe anawe u nga pimisa ngu nzila yi Jehovha a ku khatalelako ngu yona ni nzila yi a khatalako ngu va u va dhundako. Kualakanya ngu makatekwa ya hi ma manako konku ni a mbimo yi yi tako ti nga hi vhuna ngutu.

20. Nji txani txi hi no txi mana ngu kuya masoni hi maha kudhunda ka Jehovha?

20 U nga leke ku phofula ti ti ku mbiluni kwako ka Jehovha ngu mkombelo. Tsaniseka ti to u na mana makatekwa o tala nga ku u txi maha kudhunda ka Jehovha. (Vahebheru 10:35, 36) Ngu koneho, ti lava hi tsanisa likholo lathu ka Jehovha ni kumaha ti hi nga tikotako ti to hi mthumela. Ngu ditshuri Jehovha a na hi katekisa!—Lera Vakolosa 3:23, 24.