Ndaka u ya ka menu ya wumbidi

Ndaka u ya ka dijanela da mndani

Tifakazi ta Jehovha

Txitxopi

Muwoneleli—Wa txigondo  |  Dezembro wa 2016

 MATIMU

Ni ti mahile “Sotshe ka votshe”

Ni ti mahile “Sotshe ka votshe”

“Hi nga kubhabhatiso, u na sala wekha!” Eto ngu ti tate a nga ti womba a txi gela mame ngu dilembe da 1941. Hambi keto mame a mahile txisungo txo e bhabhatiswa, ngu ditshuri tate a hi tsukute e khukha ha m’tini. Eto ti mahekile ni ti ni 8 wa malembe basi.

TI SI se ku maheka totshe eto, ani se ni txi di dhundha ditshuri. Mame a mani mabhuku o kari, kambe ani kha na nga sakana ngu ona. Ani ni txi dhunda kuwona sithombe basi. Tate a si ti lavi ti to mame e ni gondisa ati ene a nga txi ti gonda. Kambe ani ni txi lava kuziva to tala ni ku ni txi ti dhunda kumaha siwotiso. Mbimo yi tate a nga khukha ha m’tini, ni to khata kugonda Bhiblia ni mame. Koneho ni mahile txisungo txa ti to ni thumela Jehovha wutomi wangu wotshe. Ni bhabhatisilwe ngu 1943, ka didhoropa da Blackpool aniya Inglaterra, ni ti ni 10 wa malembe

NI KHATILE KU THUMELA JEHOVHA

Mbimo yotshe ni txiya ka mthumo wa thembwe ni mame. Ka mbimo yoneyo hi txi thumisa mtxhini wo kari ti to hi txhaya didhisku, awu wu dhanwako ku i fonogramu. I ti wa hombe ni ku wu txi peza 5 wa makilo. Hi nga pimisa, fanyana wo nga ani ni rwala mtundo wotshe wuleya?

Mbimo yi ni nga ti ni 14 wa malembe, ni navete kuva nyaphandule. Kambe mame a di khene ni ti fanete ku khata ngu kuwombawomba ni m’woneleli wa txigava, awuwa kale ka kona a  nga ti dhanwa ku “mthumeli wa vanathu”. Ene a di khene ni di fanete kukhata ngu ku gondela mthumo wo kari awu wu nga ti na ni vhuna ni ti ka mthumo wa wunyaphandule. Se ni m’engisile ni maha ti a nga tiwomba. Msana ka malembe mambidi, ni wotisile mwoneleli mmwane wa txigava ti to ina ti ndi na koteka ku ni txiva nyaphandule kani. Ene a wombile tiya: “Ina ti nga koteka fanyana!”

Ngu dilembe da 1949 ani ni mame hi lekile sotshe si hi nga ti naso ti to hi rura hiya didhoropani ka Middleton, hafuhi ni Manchester, ti to ni thuma kota nyaphandule. Msana ka mune wa malembe ni sawute mwanathu mmweyo ti to ni thuma nayo ka mthumo wa wunyaphandule. Bhetel yi hi gete ti to hi ti fanete kurura hiya thumela ka dibanza da diphya di ngadi-ngadi ku tulwa da Irlam. Mame a sate ni nyaphandule mmwane ka dimwane didhoropa.

Ni ti ni 17 wa malembe basi, kambe ani ni mngana wangu ti txi lava ti to hi tsimbitisa yotshe mitshangano. Ku singa ni vanathu vo tala dibanzani kwathu ti to hi thumisana navo. Msana ka mbimo yo kari ni rurete ka dibanza dimwane da Buxton, adi di nga ti ni vahuweleli va vadhotho, kambe di nga ti lava txivhuno. Totshe eto ti ni lulamisete ti to ni amukela wutixamuleli wumwane ka mbimo yi yi tako.

Hi ti ni vanathu vamwane aniya Rochester, Nova York ti to hi zivisa m’wombawombo

Ngu 1951, ni kombete ku ya txikolwani txa Giliyadhi. Kambe ngu Dezembro wa 1952, ni dhanwi ti to ni ya wusotxhwani. Ni kombete ti to ni si tsuli ngu kona ha ka ku ni nga ti mthumeli wa mbimo yotshe, kambe wukoma wu lambile txikombelo txangu, ni ku ti lavile ti to niya zumba jele txipimo txa mtxhanu wa mitxima. Ni ti kona jele kheya ni rambilwe ti to ni ya va ka mtxawa wa wu 22 wa txikolwa txa Giliyadhi. Ngu Julho ka 1953, mbimo yi ni nga huma ngu jele ni endile ni ya Nova York ngu ngalava ya Georgic.

Mbimo yi ni nga hoka Nova York, ni xalete mtshangano wa Sociedade do Novo Mundo, wa 1953. Ni gwitile ni bela txitimela ni ya didhoropani da South Lansing, aha txi nga txi ñolelwa kona txikolwa txa Giliyadhi. Ti txi lava ni bela txitimela mwendo txibhomba. Aku i nga ti kona ni nga huma ngu jele ni singa ni male. Ni lombile male ya 25 centavos ka wu ni nga ti khalahatshile nayo ti to ni hakela txibhomba.

 NI THUMILE KA DITIKO DIMWANE

Txikolwa txa Giliyadhi txi hi vhunile kuwona ti to hi nga ti kotisa ku txani ku ‘ti maha sotshe ka votshe’. (1 Vakorinto 9:22) Ni avetwe kuya thumela Filipinas ni Paul Bruun ni Raymond Leach. Kambe ti lavile ku hi emanyana mitximanyana yo tala ti to hi amukela diphepha da mtumelelo kasi ku hi bela ka ditiko donedo. Koneho hi bete ngalava hiya didhoropani ka Roterdã, aniya Holanda. Msana keto hi pindile ngu linene la Mediterrâneo, ngu mlonga wa Suez ni ngu linene la Indico hi hoka Malásia. Hi khukhile ngu kheya hi ya Hong Kong. Msana ka 47 wa masiku, se hi hokile Manila ngu 19 ka Novembro wa 1954.

Ani ni Raymond Leach hi tsimbite 47 wa masiku ngu ngalava ti to hi hoka Filipina

Ti lavile ti to hi tolovela vathu va ditiko dimwane ni lidimi limwane. Kambe makhatoni ka kona hi amukete txiavelo txo ya thuma ka dibanza di di nga di didhoropani ka Quezon ahawa vo tala va nga txi wombawomba txingiza. Ngu koneho, msana ka mitxima ya 6, hi si se na nga sikota kuwombawomba txilo ngu txitagalo, i ku limwelo la tidimi ti ti wombawombwako Filipina. Kambe eto ti ndina txitxa i si nga kale.

Ditshiku dimwane hi txi wuya ngu thembweni, ani ni mwanathu Raymond hi amukete dipasi adi di nga ti womba ti to hi ndina thuma kota vawoneleli sa sigava. Eto ti mahekile ngu maio wa 1955, ani ni to kova ni 22 wa malembe basi! Kambe txiavelo txonetxo txi ndina ni vhuna ti to ni pfisisa kwati ti to ti womba txani ku ‘ti maha sotshe ka votshe’

Hi txi ningela m’wombawombo ka mtshangano wa txigava ngu lidimi la bicol

Ngu txikombiso, ni ningete m’wombawombo wangu wo khata kota m’woneleli wa txigava masoni ka sitolo asi si ku ka txidhoropana txileya. Ka mbimo yoneyo, kheya Filipina, ku ti ni txitoloveto txa ti to miwombawombo yi mahelwa tiruwani! Mbimo yi ni nga endela mamwane mabanza ni txi veka miwombawombo mu sititxhini, makhaloni a mabhindu, kampuni ka bholwa, kambe makhalo a mangi ni txi mahela tiruwani. Kuve ni dikhambi kheya dhoropani ka San Pablo ku ngawa mati a hombe aya ma nga ni vhalela ni ku veka m’wombawombo kheya wuxaviseloni. Ani ni va site ni mawonelo a ti to vanathu va va ku ni wutixamuleli ve khata kuveka miwombawombo Nyumbani ya Mfumo. Madhota ma gwitile me wotisa ti to mwendo va ndina wu  teka kota mtshangano wa ha kubasani kota ku wu nga ti mahelwa ka makhalo a vathu votshe.

Mbimo yotshe ni txi zumba, m’tini ka vanathu. M’ti wa kona i singa wa va nombwe, kambe wu txi zumba wu di basile. Makhambi o tala ti txi lava ni otela ha didhowoni ni fenengela mpama. Ku txi sambwa hayi? Sisambelo si ti hahanze ka m’ti ha mtengelengani, ahawa ti nga ti hehuka kuxalelwa ngu vathu votshe va va pindako. Ti txi lava ku ni gondela kusamba ni sa ambula simaha ti to vathu va si xaleli wumbwiri wangu. Ni txi tsimbila ngu sibhomba. Mbimo yimwane ni txi bela ngalava ti to ni ya ka tximwani txa sitondolo. Ka malembeyo otshe ni si se kuxava mmovha.

Koneho ni khatile kuwombawomba txitagalo, kambe kha na nga va ni kuya txikolwani. Ni gondete ngu kuengisela vanathu va txi wombawomba hi di ka mthumo wa thembwe ni mbimo yi hi ku mitshanganoni. Vanathu va txi ti lava ku ni vhuna ngu toneto va txi ni vhuna ngaku ni txi tandeka kuwombawomba. Eto ti txi ni tsakisa.

Ku pindile mbimo yo kari, kambe ani ti txi lava niya ni tolovelana ni siavelo sa siphya. Ngu txikombiso, ngu 1956, mwanathu Nathan Knorr a endete ditikoni ka Filipina, kambe hi mahile mtshangano wa hombe wa m’ganga ni vanathu va dotshe ditiko. Ani ni sawutwe ti to ni thuma kota mu amukeli ni mtxhamuseli (repórteres e jornalistas) ka mbimo ya mtshangano. Ni si zivi kumaha mthumo wonewo, kambe vanathu va ni gondisile. Ka dilembe di di nga londisela, mwanathu Frederick Franz a endete mzinda wa Tifakazi ta Jehovha, ni ku ani ni gondile to tala kwakwe. Mbimo yi a nga ningela m’wombawombo a ti ambate siambalo si si nga toloveleka sa  Filipina, si si dhanwako ku i barong Tagalog. Eto ti tsakisile vanathu va ditiko dileya. Ati a nga ti maha mwanathu Franz ti ni gondisile ti to ti txi lava ni maha ti ti fanako ti to vathu ve tsaka.

Ngu msana ni mahile m’woneleli wa txigava. Ni woni ti to ti txi lava ni maha kutxitxa ko kari. Ka mbimo yoneyo, hi txi xalelisa filmi ya A Felicidade da Sociedade do Novo Mundo. Mbimo yotshe ti txi lava hi xalelisa filmi tiruwani, kambe sidodwani si txi hi karata. Si txi ndindwa ngu digezi da mtxhini wu hi nga txi xalelisa ngu wona, aha si nga txi hokela ha ko swira ngu kupomela digezi dotshe. Ti txi karata ku gwita hi thavisela sidodwani sileya. Ti si hehuki ku lulamisela mitshangano yileya, kambe ani ti txi ni tsakisa kuziva ti to vathu va txiya ve yi ziva kwati sengeletano ya Jehovha.

Ka makhalo mamwane, vapaderi va ti zumbela ku gela wukoma ti to wu si hi tumeleli kumaha mitshangano ya txigava. Ngaku hi txi maha mtshangano hafuhi ni txhetxhe, vapaderi va txi veta simbi yi maha ngutu likwaha ti to hi sipfi txilo ka m’wombawombo. Hambi keto vo tala ka wukhalo wuleya va gondile ditshuri, se nyamsi mba thumeli va Jehovha.

MTHUMO WA WUPHYA NI KURURA

Ngu 1959, ni ti ya thumela Bhetel. Ni di ya gonda to tala. Msana ka mbimo yo kari ni rambilwe ti to ni endela matiko mamwane kota mwoneleli wa txigava. Ka limwelo la maendo oneyo ni ti ya ziva misiyonario mmweyo wa txisikati ni di Tailândia, awu a dhanwako ku i Janet Dumond. Hi txi thumisa dipapilo ti to hi bhula, ngu msana hi gwitisile kutxhadha. Se hotshe hi thumela Jehovha hi di tsakile kudingana 51 wa malembe.

Ni ti ni Janete ka Txitondolo txa Filipina

Ni endete 33 wa matiko ni txi pfuxela vanathu. Na m’bonga Jehovha ngu siavelo sango so  khata, si ni gondisile ku thumisana ni vanathu va matiko o hambanelana, ni kumaha timhaka ngu tinzila to hambana-hambana. Maendo onewo ma ni mahile ni wona kwati ti to Jehovha a dhunda vathu va tixaka totshe.—Mithumo 10:34, 35.

Kuwona votshe va txi thumela Jehovha, eto ti hi maha hi tsaka

KU TXITXA KUYA MASONI

Ani ni Janet ti hi tsakisile ngutu kuthuma ni vanathu va Filipina. Kambe hi nga txi thumela Bhetel, ayi yi ku didhoropani ka Quezon. Mbimo yi ni nga hoka Filipina ka 60 wa malembe ya ma nga pinda, hi ti 20 mil wa vahuweleli. Kambe nyamsi hi konamu ka 200 mil. Hambiku hi nga heta malembe eyo otshe, ti lava ni ti toloveta ni totshe ti Jehovha a lavako ti to ni ti maha. Ngu txikombiso konkwanyana ti lavile ti to ni ti pfananisa ni kutxitxa ka kuphya ka sengeletano ya Jehovha.

Mbimo yotshe hi txiya ka mthumo wa thembwe

Hi ti karatela kumaha totshe ti Jehovha a ti lavako. Eto ngu ti ti mahako ti to wutomi wathu wu tsakisa ngu ditshuri. A nathu hi maha kutxitxa kumwane ni kumwane aku ku lavekako ti to hi thumela vanathu. Ngaku Jehovha a txi hi katekisa hi na simama hi tikaratela ku ‘timaha sotshe ka votshe’.

Hi nga txi thumela Bhetel ka Filipina