Ndaka u ya ka menu ya wumbidi

Ndaka u ya ka dijanela da mndani

Tifakazi ta Jehovha

Txitxopi

Muwoneleli—Wa txigondo  |  Janeiro wa 2017

“Timhaka tiya ti vekilwe manzani ka vavamna vo thembeka”

“Timhaka tiya ti vekilwe manzani ka vavamna vo thembeka”

“Ati u nga ti engisa . . . ti veke manzani ka vavamna vo thembeka, ava va si kotako kugondisa vamwane”.—2 TIMOTI 2:2.

TINDANDO: 123, 53

1, 2. Ngu yahi mawonelo a vathu ngu mthumo awu va wu mahako?

KA VATHU vamwane, mthumo wu va wu mahako va wona nga ngu wona wu kombisako ti to va ni lisima mwendo ahim-him. Ngu toneto, ka matiko mamwane, ti tolovelekile ti to u txi manana ni m’thu u mu wotisa ti to ngu wuhi m’thumo awu a wu kotako kumaha.

2 A mu ka Bhiblia, mbimo yimwane ku txi wombawombwa ngu m’thu, kukhata kuwombwa mthumo wakwe. Ngu txikombiso, yi khene “Matewu, i nga ti mkhupisi”, “Simoni mtxhuki wa madhowo” ni “Luka, mngana wathu wa [dhokodhela, Tradução do Novo Mundo].” (Matewu 10:3; Mithumo 10:6; Vakolosa 4:14) Yimwane mbimo ku wombwa ni txiavelo txakwe ka mthumo wa Jehovha. Ngu txikombiso, Mkoma Dhavhidha, mprofeti Elija ni mpostoli Paulo. Vona va dhundile siavelo asi Jehovha a nga va ninga. Nathu hi nga maha toneto.

3. Ngu ku txani vathu va hombe va di fanete kugondisa vaphya? (Wona mfota wu wu ku makhatoni.)

 3 Ha m’dhunda Jehovha ni m’thumo wu a nga hi ninga wona. Wungi wathu hi tidila ngu mthumo wu hi nga ningwa, ni ku hi navela ti to hi ya masoni hi maha toneto. Kambe, ngako m’thu a txi kumba, kha ngadi e sikota kumaha ati a nga txi ti maha i di ngadi mphya. (Eklesiaste 1:4) Etxo ngu txona txikarato txa vathu va Jehovha. Nyamsi, mthumo wo txhumayela wu ya masoni, se sengeletano ya Jehovha yi thumisa mitxhini ya ngweno ti to yi hokisa mahungu a manene ka vathu votshe. Kambe toneto ti nga va karatela ngutu vathu va hombe. (Luka 5:39) Se kha ti xamalisi ngako vathu va hombe va gumelwako ngu mtamo wawe. (Mavingwa 20:29) Hambiketo, ndinene ngako va hombe va txi gondisa vaphya ku ve va ni malungelo ka sengeletano ya Jehovha.—Lera Masalmu 71:18.

4. Womba ti to ngu ku txani vamwane ti txi va karatela kuninga vamwane mithumo. (Wona dibhokiso di di ku “ Nji txani txi nga hi mahako hi si ningi vamwane mthumo?”)

4 Kha ti hehuki ka va va ku ni wutixamuleli kuninga vaphya mthumo. Vanathu vamwane ti nga va karatela kualakanya ngu kuningela mthumo awu va wu dhundako ngutu. Ti nga va henyisa kualakanya kuleka mthumo wo sawuleka awu wu va tsakisako. Tinga maha ve alakanya ti to ngako va si wukongomisi, ku nga moxekela to tala. Mwendo va txi khona kha va na mbimo yo gondisa vamwane. Yimwane mbimo, vaphya ti lava ve timisela ngako va txi wona ti to kha va ningwi txilo.

5. Ngu sihi siwotiso asi hi no si xolisisa ka msungo wuwa wa mhaka?

5 Ka msungo wuwa wa mhaka hi na bhula ngu siwotiso siya: Ngu ku txani va hombe va di fanete kuninga malungelo ava va vaphya? Va nga ti mahisa ku txani? (2 Timoti 2:2) Ni ku, ngu ku txani vaphya va di fanete ku va ni mawonelo a manene mbimo yi va thumako ni vanathu va i ku va hombe kasi ve va gondisa? He khate hi wona ti to Dhavhidha a m’gondisisile ku txani mwanana wakwe.

DHAVIDHA A GONDISILE SALOMONI

6. Dhavhidha a ti tsakela kumaha txani? Se Jehovha a ti khene txani?

6 Kupindile malembe o tala Dhavhidha a txi hanya nga mhuti. Kambe mbimo yi a nga ta va mkoma a ti zumba ka nyumba ya yinene. Se ene a to gela mprofeti Natani a txi khene: “Wona, ani ni zumba ka nyumba ya wukoma, yo akwa ngu mikedhari, kambe Mtundu wa Txitumelelano txa MKOMA wu maneka hahatsi ka ditenda.” Dhavhidha a ti tsakela kuaka nyumba yo tshura ya Jehovha. Se Nathani a ti khene: “Maha atile mbilu yako yi ku rumako tona, nguko Txizimu txi ni nawe.” Kambe Jehovha a si lavi tona. Jehovha a gete Natani ti to e ya gela Dhavhidha ku khene: “Hi nga awe u no ni akela nyumba kasiku ani ni zumba ka yona.” Hambiku Jehovha a nga ti thembisile ti to Dhavhidha a ndina va ni nene. Dhavhidha a gondile ti to mwanana wakwe ngene a no aka dithepele. Dhavhidha a ti khene txani?—1 Matimu 17:1-4, 8, 11, 12; 29:1.

7. Dhavidha a ti khene txani ngu mkongomiso wa Jehovha?

 7 Ngu ditshuri Dhavhidha a ti tsakela kuaka dithepele da Jehovha, kambe se timhaka ti ti jikile. Hambiketo ene a seketete mthumo awu wu nga ndino thumwa ngu Salomoni. Dhavidha a lulamisete vathumi, e sengeletela, tisimbi, silivhela, nzalama ni tiphande. Kha nga za e vilela ngu ti to yi na manwa hani male yo aka dithepele adi di no ziwa kota dithephele da Salomoni. Hahanze keto a gete Salomoni a txi khene: “Ni na tsanisa yotshe mbimo txikhalo txa wukoma wakwe txitimwi ka Vakaisraeli. Ti di ngeto, ni navela ti to MKOMA a na ve ni nawe, mwanangu, kasi ku u txi zumba kudikhani, u txi sikota kuaka dithepele da MKOMA, Txizimu txako, madingano ni ti Ene a nga womba ngu ngawe.”—1 Matimu 22:11, 14-16.

8. Ngu ku txani Dhavhidha a di alakanyile ti to Salomoni kha na ku sikota kuaka dithephele? Kambe Dhavhidha a mahile txani?

8 Lera 1 Matimu 22:5. Ka mhaka yoneyo, Dhavidha adi pimisile ti to Salomoni i ngadi mwanana. Dithepele di ti fanete di va da “hombe” ni ku Salomoni i ti “dizambi.” Kambe Dhavhidha a ti ti ziva ti to Jehovha a ndina vhuna Salomoni kuthuma mthumo wonewo wo sawuleka. Se ene a ndina m’vhuna kulongisela mthumo wonewo wa hombe.

TSAKELA KUVHUNA VAMWANE

Ta tsakisa hi txi wona vaphya va txi teka wutixamuleli wo tala (Wona ndimana 9)

9. Vathu va hombe va fanete ve tipfisa ku txani mayelano ni kuningela malungelo ka vamwane? Womba txikombiso.

9 Vanathu va i ku va hombe, kha va fanela ve va ni tingana to ninga malungelo mamwane ava i ku ngadi vaphya. Nyamsi, mthumo wa Jehovha ngu wona i ku wa lisima. Se kugondisa vaphya ti na maha ti to mthumo wonewo wu thumwa  kwati. Ngu txikombiso, ti nga maha u txi khala kuwona, tate wako a txi tsimbitisa mmovha. Se mbimo yi u kulako e kukomba ti to a mahisa ku txani. Ngu kutsimbila ka mbimo, nawe u mana dipasi dako do tsimbitisa ngu dona. Kambe tate wako kha na mbi leka ku kuninga silayelo. Mbimo yimwane a ninga awe u tsimbitisa. Kambe ngako tate a txiya e kumba, awe u nava se u di tsimbitisile makhambi o tala. Ina toneto ta m’henyisa? Ahim-him, ene wa tsaka. Ngu ha ku fanako vanathu ava i ku va hombe va tsaka va txi wona vaphya ava va nga va gondisa va txi thumisa wutixamuleli awu va ku nawo ka sengeletano ya Jehovha ngu nzila ya yinene.

10. Mbimo yi vathu vamwane va nga katekiswa ngu Jehovha Mosi a ti pfisile ku txani?

10 Kha ha fanela kuoma ni malungelo. Hi nga gonda ka txikombiso txa Mosi. (Lera Mitengo 11:24-29.) Mbimo yi Vaisraeli vamwane va nga khata kuprofeta, Joxuwa a lavile ku va lekisa, kambe Mosi a ti khene: “U lava kumaha wukhuxu ngu ndava yangu? Sikwawe idiku votshe vathu va MKOMA vo ningwa kuprofeta, va txi mana kuthelwa moya wa MKOMA txitimwi kwawe!” Mosi a ti ti ziva ti to Jehovha ngene a tsimbitisako timhaka. Hahanze ko lava ti to ku va ene dwe, Mosi a lavile ti to votshe ve mana siavelo. Athu ko? Ina ha tsaka mbimo yi vamwane va ningwako siavelo ka mthumo wa Jehovha?

11. Peter a khene txani mayelano ni kuninga vamwane siavelo?

11 Ku ni vanathu vamwane ava va se va ku ni malembe o tala va txi thumela Jehovha, ni ku va gondisa vaphya ku va ni wutixamuleli wo tala. Ngu txikombiso, mwanathu Peter awu a ku ni 74 wa malembe adi ka mthumo wa mbimo yotshe, a thumile bhetele 35 wa malembe a di ka hofiso ya mthumo ani Europa. Malembe a mangi, ene i ti muwoneleli wa Hofiso ya Mthumo. Kambe ku hokile mbimo yi txiavelo txonetxo txi nga ningwa Paulo awu a nga nga mu gondisa mthumo wonewo. Ina Peter ti mu henyisile? Ahim-him. A ti khene: “Ni tsakile ngutu kuwona ti to va ho vanathu ava va nga gondiswa ti to ve amukela wutixamuleli wa hombe ni ku wu thuma kwati mthumo wuwa.”

 ENGISA VATHU VA HOMBE

12. Txikombiso txa Robhoamu txi nga hi gondisa txani?

12 Mbimo yi Robhoamu mwanana wa Salomoni a nga va mkoma, a wotisile vathu va hombe mayelano ni mthumo wakwe. Ene kha thumisa ati a nga gelwa ngu vathu va hombe kambe a thumisile ati a nga gelwa ngu vafana kulowe. Wuyelo kha ya nga va ya yinene. (2 Matimu 10:6-11, 19) Hi nga gonda txani? Ndinene ku wotisa vathu va hombe. Hambiketo, kha ti sungi ti to vaphya ve gelwa txihi ni txihi atxi va fanelako ku txi maha. Kambe va fanete ve xonipha mawonelo a vathu va hombe i singa ti to ve tutumela kuwomba ti to ti pindetwe.

13. Vaphya va va thumako ni vathu va hombe va nga maha txani?

13 Yimwane mbimo, vaphya va ningwa mthumo wo wonelela m’thumo wa vathu va hombe. Ti nga va tinene kugonda to kari ka vanathu vonevo. Paulo wu hi nga wombawomba ngu ngene kukhatani awu i ku muwoneleli wa Hofiso ya Mthumo Bhetele a ti khene: “Ni lavile mbimo yo mana txivhuno txa Peter, se ni kuzeta vamwane ti to ve maha toneto.”

Paulo a tekile mbimo yo tala ti to e gondisa Timoti ni ku Timoti a gondile kwati

14. Hi gonda txani ka Timoti ni Paulo aku va nga thuma votshe?

14 Timoti i ti m’dotho ngutu ka mpostoli Paulo, kambe va thumile votshe malembe o tala. (Lera Vafilipiya 2:20-22.) Mpostoli Paulo a gete Vakorinto: “Ni mi rumete Timoti, i ku mwanana wangu wo randeka ni kuthembeka ngutu ngu ka Mkoma; ene a na mi alakanyisa tinzila tangu ta likholo ka Kristu, nga ti ni nga gondisisa tona ka otshe makhalo, ka otshe mabanza.” (1 Vakorinto 4:17) Hi nga wona ti to Paulo ni Timoti va thumisanile ni kuvhunana. Paulo a tekile mbimo yo tala ti to e m’gondisa “tinzila . . . ta likholo ka Kristu.” Se Timoti a gondile kwati. Paulo a ti themba ti to Timoti a na va khatalela kwati vanathu va Korinto. Madhota ma nga gonda ti to ndinene kugondisa vaphya ti to ni vona ve thangela dibanza.

HOTSHETHU HI VA LISIMA

15. Dibhuku da Varoma 12:3-5 di nga hi vhunisa ku txani ti to hi wonisana ni kutxitxa ka timhaka?

15 Hi hanya ka timbimo to karata. Sengeletano ya Jehovha ya ha mafuni yi ya yi kula ngu tinzila to hambana-hambana. Eto ti womba ti to timhaka ti na ya ti txitxa. Timhaka timwane ta hi gwesa mbimo yi ti txitxako ni ku kha ti hehuki. Hi nga vhunwa ngu txani? Ngu kutiveka hahatshi ni kuwona ta tinene ati Mfumo wa Txizimu wu ti mahako i singa ati athu hi ti lavako. Hi txi maha toneto, hi na va hi di ni wumwewo. Paulo a bhalete Makristu a Roma a txi khene: “Na laya mmwane ni mmwane a ku hagari kwanu ti to a  si thuki a txi ti alakanyela kupinda mpimo wa fanelo yakwe.”—Varoma 12:3-5.

Votshe vathu va Jehovha va lava kuseketela Mfumo wakwe ni kumaha totshe ati va gelwako

16. Nji txani atxi hotshethu hi nga txi mahako ti to hi simama ni wumwewo ka sengeletano ya Jehovha?

16 Votshe vathu va Jehovha va lava kuseketela Mfumo wakwe ni kumaha totshe ati va gelwako. Vathu va hombe va nga gondisa va vaphya. Vaphya va nga amukela wutixamuleli wo tala ngu kudinganisela ni txixonipho. Se vanathu va va nga teka va txi bonga txivhuno txa vasikati vawe hambi siemo si txi txitxa. Vavasikati vonevo va nga tekelela txikombiso txa Prisila awu a nga thuma ngu kuthembeka ni mwamna wakwe Akila.—Mithumo 18:2.

17. Ngu tihi ati Jesu a nga gondisa vagondiswa vakwe ku timaha?

17 Ka mhaka yo gondisa vamwane, Jesu a vekile txikombiso txa txinene. Ene a ti ti ziva ti to vamwane va ndina sala ve thangela mthumo. Ditshuri ti to a ti ti ziva ti to vagondiswa vakwe va sa hetiseka. Kambe a ti tsaniseka ti to vona va ndina txhumayela mahungu a manene kupinda ati ene a nga ti mahisa tona. (Johane 14:12) A va gondisile kha kwati, se vona va ti emekile kutxhumayela ka matiko otshe ay ava nga ndina ma kota ku ma hokela.—Vakolosa 1:23.

18. Ngu tihi ati hi no ta timaha mbimo yi yi tako? Ngu wuhi mthumo hi ku nawo konkuwa?

18 Mbimo yi Jesu a nga fa, Jehovha a mu wusile se e mninga mthumo wo tala ni wulawuli wa “txitimwi ka votshe va va nga ningwa kufuma ni mtamo ni wuhombe ni wukoma.” (Vaefesu 1:19-21) Kota malanda o thembeka a Jehovha, hambi hi txo fa ku si se hoka Armagedhoni, hi na tshumela hi hanya, hi tidila ngu mthumo wa wunene ka mafu a maphya. Kambe konkuwa, hi na simama ni txiavelo txathu txo txhumayela mahungu a manene ni kumaha vagondiswa. Mwendo hi vaphya, mwendo hi va hombe, hotshethu hi nga simama hi ‘khutala hi txi ya masoni ka m’thumo wa Mkoma’.—1 Vakorinto 15:58.