DITSHURI mayelana ni txani? Mayelana ni siwotiso sa lisima asi vathu va talisako ku ti wotisa. Kutilava awe u ta nga tiwotisa to nga tiya:

  • Ina ngu ditshuri Txizimu txi ni mhaka ni nathu?

  • Tiyimbi ni kuxaniseka si na guma kani?

  • Ku maheka txani hi di fite?

  • Ina yiho themba ngu va va nga fa?

  • Ni nga wu mahisa ku txani mkombelo ti to wu pfiwa ngu Txizimu?

  • Ni nga limanisa ku txani litsako ka wutomi wangu?

U nga timana hayi tixamulo ta siwotiso soneso? U txo tsula ka mabhibhiliyoteka mwendo wukhalo wo xavisa mabhuku, ti nga maheka u ya mana mabhuku a mazana aya ku wombwako ti to ma ni tixamulo. Kambe ngu txitalo mabhuku oneyo ma kanetana. Mamwane ma nga woneka ma di ni ditshuri ku dingana mbimo ya yidotho se ngu txikuluveta me pindelwa, me lava ku wusetwa mwendo ku txitxwa.

Kambe, diho dibhuku adi di ku ni tixamulo to thembeka. Hi womba dibhuku da ditshuri. Atxi kombela ka Txizimu, Jesu a ti khene: “Dipswi dako ngu dona ditshuri”. (Johane 17:17) Nyamsi Dipswi donedo di ziwa kota diBhibhele do Basa. Ka diphepha di di londiselako u na mana tixamulo ti ti nga kongoma ta mu ka diBhibhele ta siwotiso si si ku txitimwi.

 Ina ngu ditshuri Txizimu txi ni mhaka ni nathu?

TXIVANGELO TXA TXIWOTISO: Hi hanya ka mafu aya ma nga tala ngu wubihi ni ku pwata wululami. Wungi wa titxhetxhe ti gondisa ti to sikarato asi hi mananako naso, ngu dhunda ka Txizimu.

NGU TIHI ATI DIBHIBHELE DI TI GONDISAKO: Txizimu kha txi khali ka nga vanga wubihi. Jobe 34:10 yi khene: “Ti na ve kule ni nawe Txizimu txa ditshuri kuangula ngu nzila yo biha, ni ka wa Mtamo Wotshe kumaha to biha!”. Ngu toneto Jesu a nga gondisa ma mahelo a mkombelo a txi khene: Tata wathu a ku nzumani, . . . Wu nate kwathu Mfumo wako. Ku na maheke kuranda kwako amuwa mafuni nga nzumani”. (Matewu 6:9, 10) Txizimu txi ni mhaka ngutu ni nathu, futshi txi thembisa ku hetisisa sotshe sithembiso sa txona.Johane 3:16.

Wona kambe Genesisi 1:26-28; Jakobe 1:13; ni 1 Pedro 5:6, 7.

Tiyimbi ni kuxaniseka si na guma kani?

TXIVANGELO TXA TXIWOTISO: Tiyimbi ti ya masoni ti txi daya magidhi gidhi ya vathu. Hotshethu ha manana ni kuxaniseka.

NGU TIHI ATI DIBHIBHELE DI TI GONDISAKO: Txizimu txi womba ti to txi na tisa kudikha ha mafuni kotshe. Mbimo yi se ku no fuma Mfumo wa txona, i ku wukoma wa nzumani, vathu va nambi swa “ve gonda yimbi”. Kuhambana ni toneto, va na “hindula matxhari awe me va misuka”. (Isaya 2:4) Txizimu txi na gumisa wubihi ni ku xaniseka. DiBhibhele di khene: “[Txizimu] txi na bahulela yotshe mirongo tikhoheni kwawe, kha ku nambi swa ku tximaneka kambe lifo, hambi kudila, hambi tihuwa, hambi kupandiseka. Nguko so khata [kupata ni wubihi ni ku xaniseka ka nyamsi] si pindile.”Mtuletelo 21:3, 4.

Wona kambe Masalmu 37:10, 11; 46:9 [NM] ni Mika 4:1-4.

Ku maheka txani hi di fite?

TXIVANGELO TXA TXIWOTISO: Wungi wa titxhetxhe, ti gondisa vathu ti to loko m’thu a txi fa ku ni txi txi si fiko. Vamwane va womba ti to vakufa va nga xanisa va va hanyako ni ti to Txizimu txa xanisa vathu mdiloni ko mbi na magwito.

NGU TIHI ATI DIBHIBHELE DI TI GONDISAKO: Ngako m’thu a txi fa, o leka ku va ho. Eklesiasta 9:5 yi womba tiya: “vafi kha va zivi txilo ni kudothu”. Aku vafi va si ziviko txilo, va si pfiko txilo nem hambi kumaha txilo, ti ha kubasani ti to kha va na kusikota—kuvhuna—ava va hanyako.Masalmu 146:3, 4.

Wona kambe Genesisi 3:19 ni Eklesiaste 9:6, 10.

 Ina yiho themba ngu va va nga fa?

TXIVANGELO TXA TXIWOTISO: Hi tsakela ku va ni wutomi, ni kuhanya ni vathu ava hi va dhundako. Kulava ku wona vafi vathu va hi va dhundako va txi tshumela ve hanya kambe, i mhaka ya mtumbuluko.

NGU TIHI ATI DIBHIBHELE DI TI GONDISAKO: Wungi wa va va nga fa va na wuswa. Jesu a wombile ti to “ava va ku mayivani va na . . . huma.” (Johane 5:28, 29 [NM]) Ngu kuya ngu txikongomelo txo khata txa Txizimu, avale va nga wuswa va na va ni lungelo yo hanya ka mafu a paradhise. (Luka 23:43) Themba yiya ya mbimo yi yi tako yi pata ni dihanyo do hetiseka ni wutomi wo mbi guma wa vathu ava va engisako. DiBhibhele di khene: “Vathu vo lulama va na dya thomba ya mafu, va na xayiseka ka ona yotshe mbimo”.Masalmu 37:29.

Wona kambe Jobe 14:14, 15; Luka 7:11-17; ni Mithumo 24:15.

Ni nga wu mahisa ku txani mkombelo ti to wu pfiwa ngu Txizimu?

TXIVANGELO TXA TXIWOTISO: Votshe va va khongelako va maha mkombelo. Hambi keto, va vangi va khona mikombelo yawe kha yi xamulwi.

NGU TIHI ATI DIBHIBHELE DI TI GONDISAKO: Jesu a hi gondisile kuvayilela ku wuyeletela mapswi o nga ndando ka mikombelo yathu. Ati khene: “Ngako mi txi khongela, mi nga tateni mapswi nga vamatiko”. (Matewu 6:7) Hi txi lava ti to Txizimu txi engisa mikombelo yathu, hi fanete ku khongela ngu nzila yi txi yi tsakelako. Ti to hi maha toneto, ti lava hi gonda ti to ngu kuhi kudhunda ka Txizimu se hi gwita hi mahisa toneto. Johane wo khata 5:14 ya txhamusela: “Ngako hi txi kombela txo maha, mayelana ni kuranda ka txona Txizimu, txona txa hi engisa”.

Wona kambe Masalmu 65:2 [NM]; Johane 14:6, 14; ni 1 Johane 3:22.

Ni nga limanisa ku txani litsako ka wutomi wangu?

TXIVANGELO TXA TXIWOTISO: Vathu vamwane va tumela ti to u di ni male, nduma mwendo u di tshurile u zumba u di tsakile. Ngu kota yeto, va tikaratela ku si mana—kambe loko se va di simanile, sa va tona litsako.

NGU TIHI ATI DIBHIBHELE DI TI GONDISAKO: Jesu a kombisile khiya yo mana litsako ngu ku womba tiya: “Va tsaka ava va khatalako ngu txilaveko txawe txa moya”. (Matewu 5:3 [NM]) Litsako la ditshuri li nga manwa ngu loko txilaveko txonetxo txi txi khatalelwa—i ku nzala yathu ya moya ya ditshuri mayelana ni Txizimu ni txikongomelo txa txona ngu ngathu. Edo ngu dona ditshuri adi di manwako a mu ka diBhibhele. Kuziva ditshuri donedo ti na hi vhuna ti to hi kota ku alakanyisisa ngu ti ngu ditshuri i ku ta lisima ni ti i ku si nga ta ditshuri. Ku tumelela ditshuri da diBhibhele di kongomisa sisungo sathu ni simaho sathu ti kongomisa timhaka ta tingi ka wutomi wathu.Luka 11:28.

Wona kambe Mavingwa 3:5, 6, 13-18 ni 1 Timoti 6:9, 10.

 Eto tixamulo ta mu ka diBhibhele ta siwotiso sa mtxhanu ni tximwetxo. Ina wa tilava kuziva ta tingi to pinda toneto? I di ti to anawe u hagari ka va “va khatalako ngu txilaveko txawe txa moya”, kha ti kanakanisi ti to wa ti lava. Ti nga maheka ti to anawe u ta nga ti wotisa ti to: ‘I di ti to Txizimu txa khatala ngu ngathu, ngu ku txani txi txi tumelela wubihi ngu mbimo yo lapha ngutu yo nga tiya? Ni nga wu tshukwatisa ngu nzila yihi wutomi wa mwaya wangu’? DiBhibhele di nato tixamulo ta tinene ta siwotiso soneso ni simwane sa singi.

Hambi keto, vathu va vangi kha va gondi diBhibhele. Va khona nda hombe futshi da karata ku di pfisisa. Ina wa ti tsakela kuvhunwa kumana tixamulo ta mu ka diBhibhele? Tifakazi ta Jehovha ti ni silo simbidi asi si nga ku vhunako.

Txo khata i ku dibhuku di di ku Xana Bibele Yi Dyondzisa Yini Hakunene? di nga mahelwa kuvhuna vathu ti to ve wona tixamulo ta mu ka diBhibhele ta siwotiso sa lisima. Txa wumbidi i gondo ya diBhibhele ya m’tini. Awu a zumbako hafuhi ni nawe, a nga tsakela ku gonda ni nawe diBhibhele m’tini ka wena ngu mbimo ayi u yi lavako. Timiliyoni ta tingi ha mafuni kotshe ti vhunekile ngu gondo yoneyo. Vamwane va gwitisa ngu ku womba tiya: “Se ni manile ditshuri!”

Kha ku nga ni txuma tximwane atxi txi nga manwako. Ditshuri da diBhibhele da hi khulula amu ka kuhembelwa, kukarateka ni kuthava ka hombe. Dona di hi ninga themba, txikongomelo ni litsako. Jesu a ti khene: “Mina ziva ditshuri se ditshuri di na mi khulula”.Johane 8:32.