1. Ngu ku ka txani Txizimu txi di sengeletile Israyeli wa kale?

Txizimu txi sengeletile vatukulu va Abrahama ti to ve va ditiko ni ku va ninga milayo ya txona. Txona txi va dhani ti to mba “Israyeli” kambe txi va ningile wutixamuleli wo vhikela wukhozeli wa ditshuri ni Dipswi da Txona. (Masalmo 147:19, 20) Ngu koneho vathu va tixaka totshe va ndi na katekiswa ngu kona ha ka ditiko da Israyeli.​—Gonda Genesisi 22:18.

Txizimu txi sawute Vaisrayeli ti to ve va tifakazi ta txona. Matimu awe a kale ma kombisa txhatxhazelo ayi yi ku ho loko vathu va txi engisa milayo ya Txizimu. (Dheuteronome 4:6) Ngu koneho, vathu va ti na ziva Txizimu txa ditshuri ka Vaisrayeli.​—Gonda Isaya 43:10, 12.

2. Ngu ku ka txani Makristu a ditshuri i di mtxawa wumwewo?

Kambe ngu ku tsimbila ka mbimo Jehovha a va lekile Vaisrayeli, e va vhaleta ngu dibanza da Wukristu. (Matewu 21:43; 23:37, 38) Konkuwa, makhaloni ya Vaisrayeli, Makristu a ditshuri Tifakazi ta Jehovha.​—Gonda Mithumo 15:14, 17.

Jesu a gete vapizani vakwe ti to ve txhumayela ni ku maha vathu ve va vagondiswa ka matiko otshe. (Matewu 10:7, 11; 24:14; 28:19, 20) Mthumo wuwa i si nga kale wu na guma, ku gumani ka matsimbitiselo yawa ya sa mafu. I ti dikhati do khata ku Jehovha e sengeleta vathu va timiliyoni va matiko otshe ka wukhozeli wa ditshuri. (Mtuletelo 7:9, 10) Makristu a ditshuri ma lungiseletwe ku tsaniselana ni ku vhunana. Ka mafu otshe va mana mkongomiso awu wu fanako awu wu humako ka diBhibhele ka mitshangano yawe.​—Gonda Vahebheru 10:24, 25.

 3. Sengeletano ya ngweno ya Tifakazi ta Jehovha yi khatisile ku txani?

Ngu va 1870, mtxawa wa wudotho wa sigondi sa diBhibhele wu khatile ku mana ditshuri da diBhibhele a diya se i nga di kale di ti mwalate. Wutxi ti ziva ti to Jesu a gete dibanza da wukristu ti to di txhumayela, koneho wu khatile mthumo wo txhumayela ngu Mfumo ka matiko o hambana-hambana. Ngu 1931 wu amukete ditina di di ku khene, Tifakazi ta Jehovha.​—Gonda Mithumo 1:8; 2:1, 4; 5:42.

4. Tifakazi ta Jehovha ti lungiseletwe ngu nzila yihi?

Ka malembe a dizana o khata, ka matiko o tala mabanza a Wukristu ma mani wuyelo ka mmidi wu wu fumako a wu wu nga txi teka Jesu kota msungo wa dibanza. (Mithumo 16:4, 5) Ngu ha ku fanako nyamsi, Tifakazi ta Jehovha mafuni kotshe ti mana wuyelo ka Mmidi wu wu Fumako awu i ku mpatano wa madhota ya ma ku ni wusikoti. Wu wonelela madhavi ya Tifakazi ta Jehovha a ya ma hunduluxelako, ma ganjako ni ku ningela mabhuku oneyo ma nga seketelwa amu ka diBhibhele ngu tidimi ti ti pindako 600. Ngu koneho mmidi wu wu fumako wu ningela txivhuno atxi txi humako mu ka mibhalo ni mkongomiso ka mabanza aya ma pindako 100.000 ha mafuni kotshe. Mabanzani kotshe, vavamna ava va fanelekako va thuma kota madhota mwendo vawoneleti. Vavamna vonevo ngu ku dhunda kwawe va khatala ngu mtxhambi wa Txizimu.​—Gonda 1 Pedro 5:2, 3.

Tifakazi ta Jehovha ti lungiseletwe ku na txhumayela mahungu a manene ni ku maha vagondiswa. Ku fana ni vapostoli, ti txhumayela ngu m’ti ni m’ti. (Mithumo 20:20) Ti tshumela ti tiningela ku gonda diBhibhele ni va va tsakelako ditshuri. Hambi keto, Tifakazi ta Jehovha hi nga sengeletano dwe. Tona, i mwaya awu wu ku ni Tate wa lirando. Ha khatalelana hotshethu nga ku hi ku vanathu ni tindiyathu. (2 Vatesalonika 1:3) Aku vathumeli va Jehovha va nga lungiselelwa ku tsakisa Txizimu ni ku vhuna vamwane, ngu vona dwe ava i ku mwaya wu wu nga tsaka ha mafuni.​—Gonda Masalmo 33:12; Mithumo 20:35.