1. Ina ti ni lisima ku txhadha ngu mlayo ti to timwaya wa wena wu va ni litsako?

Jehovha, Txizimu txa mahungu a manene, Txizimu txi txi nga tsaka, txi navela ti to mimwaya yi tsaka ni yona. (1 Timoti 1:11) Ngene a nga vanga mtxhadho. Ku txhadha ngu mlayo ti ni lisima ku na mahela ti to mwaya wu tsaka ni ku vhuna vatekani ni vanana ku kulela ka m’ti wu wu nga vhikelwa.​—Gonda Luka 2:1, 4, 5.

Ngu yahi mawonelo a Txizimu ngu mtxhadho? Txona txi lava ti to mwamna ni msikati ve va di bhuluko ni libhandi. Makristu ma fanete me xonipha milayo ya ditiko yo bhalisa mtxhadho. Jehovha a lava ti to mwamna ni msikati ve xoniphana. (Vahebheru 13:4) Jehovha wa ku vengela ku daya wukati. (Malakiya 2:16) Kambe a tumelela ti to ve hambana ve ya tekana ni mmwane ku nga ti mngana a di mahile wugango.​—Gonda Matewu 19:3-6, 9.

2. Ngu yihi nzila ayi mwamna ni msikati va fanelako ve ñolana ngu yona?

Jehovha a mahile wamwamna ni wamsikati wo khata ti to ve vhunana ka wukati wawe. (Genesisi 2:18) A ku wamwamna i ku ene msungo wa mwaya a fanete ku khatalela mwaya ngu didhawa da nyama ni ku wu gondisa ku ziva Txizimu. Ene a fanete e randa ngutu msikati wakwe. Mwamna ni msikati va fanete ku randana ni ku xoniphana. Nga ku votshe va nga mbi hetiseka, ku gondela ku divalelana ti ni lisima ku na tisa litsako ha mwayani.​—Gonda Vaefesu 4:31, 32; 5:22-25, 33; 1 Pedro 3:7.

 3. U si tsaki wukati ka wena, nda tinene ku leka mngana wa wena?

Ku nga ti awe ni mngana wako mi di ni sikarato ka wukati wanu zamani ku ñolana ngu lirando. (1 Vakorinto 13:4, 5) Dipswi da Txizimu kha di kuzeti vatekani ti to ve lekana kasi ku na lulamisa sikarato si si nga toloveleka makati.​—Gonda 1 Vakorinto 7:10-13.

4. Vanana ina Txizimu txi mi navelela txani?

Jehovha a lava ti to mi tsaka. Ene a mi ninga silayelo sa lisima sa nzila yo londola wuphya wanu. A lava ti to mi mana wuzivi ni wutxhari wa vaveleki vanu. (Vakolosa 3:20) Jehovha, mvangi wathu a tsakela ti to mi maha ku randa kwakwe ni ka mwanana wakwe.​—Gonda Eklesiaste 11:9–12:1; Matewu 19:13-15; 21:15, 16.

5. Vaveleki mi nga maha txani ti to vanana vanu ve mana litsako?

Mi fanete mi tikaratela ku mana sakudya, ko otela ni siambalo sa vanana vanu. (1 Timoti 5:8) Hambi keto, ti to ve tsaka mi fanete ku va gondisa ku randa Txizimu ni ku gonda ngu txona. (Vaefesu 6:4) Txikombiso txa wena txo randa Txizimu txi nga gwesa mbilu ya vanana va wena. Ku nga ti mi txi va ninga gondo ya Dipswi da Txizimu yi nga va ninga mapimo a manene.​—Gonda Dheuteronome 6:4-7; Mavingwa 22:6.

Vanana va nga vhuneka ku nga ti mi txi va ndunduzela ni ku va kuzeta ku maha tatinene. Va fanete ku laywa ni ku tsayiswa. Gondo yoneyo yi nga va vhikela ka dihanyo a di di nga tsulupetelako litsako lawe. (Mavingwa 22:15) Hambi keto, u nga mahisi ku nga wo wa ngonyamo.​—Gonda Vakolosa 3:21.

Tifakazi ta Jehovha ti humisa mabhuku o tala o vhuna vaveleki ni vanana. Mabhuku oneyo ma seketelwa mu ka diBhibhele.​—Gonda Masalmo 19:7, 11, NM.