1. Ngu ku txani hi di fanete ku khozela Txizimu?

Txizimu txa ditshuri Mvangi wa simaha sotshe. Txona kha txa ngava ni makhato kha txi na mbi va ni magwito. (Masalmo 90:2) Njisima txa mahungu a manene aya hi mamanako ka diBhibhele. (1 Timoti 1:11) Aku txi nga hiha wutomi, hi fanete ku khozela txona basi.​—Gonda Mtuletelo 4:11.

2. Txizimu txi zumbisile ku txani?

Kha ku na m’thu wu a nga nga wona Txizimu nguko i Moya, eto ti womba to txi gulekile ku pinda sivangwa sotshe si si hanyako ha mafuni. (Johane 1:18; 4:24) Hambi keto, hi nga ziva wuthu wa Txizimu ngu ka si txi nga si vanga. Ngu txikombiso, mihando ni siluva so tala si hi komba lirando ni wutxhari wa txona. Wuhombe wa wuako wu hi komba mtamo wa txona.​—Gonda Varoma 1:20.

Hi nga tshumela hi ziva wuthu wa Txizimu ngu ku gonda diBhibhele. Dona, di hi gela ti Txizimu txi ti lavako ni ti txi si ti laviko, ni nzila yi txi ñolako vathu ngu yona ni ku thumisana navo ka siemo so tala.​—Gonda Masalmo 103:7-10.

3. Ina Txizimu txi ni ditina?

Jesu a ti khene: “Tate wathu u ku nzumane, ditina dako di na sawulwe.” (Matewu 6:9) Hambiku Txizimu txi ku ni sithopo sa singi kambe txova ni ditina dimwedo basi. Ka lidimi limwane ni limwane, ditina diya di dhanwa ngu nzila yo hambana. Ngu Txitxopi i “Jehovha.”​—Gonda Masalmo 83:18, NM.

Ditina da Txizimu di thavisilwe ka maBhibhele a mangi di tsivetwa ngu txithopo: Mkoma mwendo Txizimu. Kambe mbimo yi ku nga bhalwa diBhibhele, ditina da Txizimu di ti maneka konamu ka makhati a 7.000. Jesu a zivisile ditina da Txizimu mbimo yi a nga txi gondisa.​—Gonda Johane 17:26.

4. Ina Txizimu txa khatala ngu ngathu?

Ku fana ni tate wuwa wa lirando, Txizimu txi maha to kari to hi vhuneka ngu ha ku si gumiko

Ina aku vathu va xanisekako ti womba ti to Jehovha ova Txizimu txo mbi na mhaka ni nathu? Vamwane va womba ti to txi hi xanisela ku na hi duka, kambe eto hi nga ditshuri.​—Gonda Jakobe 1:13.

Txizimu txi mahile m’thu a di ni mkhululeko wo tisawulela. Ina kha hi wu bongi mkhululeko wu hi ku nawo wo sawula ku thumela Txizimu? (Joxuwa 24:15) Kambe vo tala va sawula ku mahela vamwane to biha, ngu toneto ti vangako ku xaniseka. Jehovha wa pandiseka a txi wona wubihi wonewo.​—Gonda Genesisi 6:5, 6.

Jehovha, Txizimu txi txi khatalako ngu ngathu. A lava ti to hi tsaka ngu wutomi. I si nga kale a na heta ku xaniseka ni va va ku vangako. Konkuwa, a ni txivangelo txo pfala txo tumelela ku kuxaniseka kuya masoni ngu mbimunyana. Txivangelo txa kona hi na gonda ngu txona ka Gondo 8.​—Gonda 2 Pedro 2:9; 3:7, 13.

5. Hi nga tshuketisa ku txani ka Txizimu?

Jehovha a hi ramba ti to hi tshuketa kwakwe ngu ku wombawomba nayo ngu mkombelo. A khatala ngu mmwane ni mmwane wathu. (Masalmo 65:2, NM; Masalmo 145:18) A ti emisete ku divalela. Wa yi wona mizamo yathu yo lava ku m’tsakisa, hambi mbimo yimwane hi txi tandeka. Ngu koneho, hambiku hinga mbi hetiseka, ta koteka ku aka wuxaka wa hombe ni Txizimu.​—Gonda Masalmo 103:12-14; Jakobe 4:8.

A ku Jehovha a nga hi ninga wutomi hi fanete ku mranda ngutu ku pinda vathu votshe. (Marku 12:30) Mbimo yi u yako masoni u txi kombisa lirando ka Txizimu ngu ku gonda ti ti nga engeteleka ngu txona, u na tshuketa hafuhi natxo.​—Gonda 1 Timoti 2:4; 1 Johane 5:3.