Ndaka u ya ka menu ya wumbidi

Ndaka u ya ka dijanela da mndani

Tifakazi ta Jehovha

Txitxopi

Mba Mani Ava Va Mahako Kudhunda ka Jehovha Nyamsi?

 GONDO 19

I mani i ku txithumi txo thembeka na a di ni wutxhari?

I mani i ku txithumi txo thembeka na a di ni wutxhari?

Hotshethu ha wuyelwa ngu sakudya sathu sa moya

A di hafuhi ni kufa, Jesu a bhute ni vagondiswa vakwe va mune va di vokha​—Pedro, Jakobe, Johane ni Andrewu. A txi profeta ngu ta kuta kwakwe ka masiku o gwita, Jesu a mahile txiwotiso txa lisima: “I mani i ku txithumi txo thembeka na a di ni wutxhari, awu a nga vekwa ngu nyamne masoni ka sithumi sakwe, kasiku e si phamela sakudya ngu txikhati txi txi fanelako kani?” (Matewu 24:3, 45; Marku 13:3, 4) Jesu, kota “nyamne” wa vagondiswa vakwe, a ti va thembisa ti to a ndina sawula “txithumi” txi txi nga ndina ningela sakudya sa moya mbimo yotshe ka vapizani vakwe ka mbimo ya magwito. I mani txithumi txonetxo?

Txona mtxawa wa wudotho wa vapizani va Jesu va va nga sawulwa. “Txithumi” txonetxo txi ti kombile i di Mmidi wu wu Fumako wa Tifakazi ta Jehovha. Txi ningela sakudya sa moya ngu mbimo ka vakhozeli va Jehovha. Athu hi themba txithumi txo thembeka ti to txi hi ninga sakudya sathu ‘kasiku avela sakudya ngu mbimo yi yi lavekako’.​—Luka 12:42.

Txona txi khatalela mwaya wa Txizimu. (1 Timoti 3:15) Jesu a ningile txithumi wutixamuleli wa hombe, wo wonelela mthumo wu wu mahwako ngu sengeletano ya Jehovha ya ha mafuni​—txi khatalela silo sakwe asi si wonekako, txi wonelela mthumo wo txhumayela ni ku hi gondisa ngu ku thumisa mitshangano yathu. Ti to txi hi phamela sakudya si hi si lavako ngu mbimo yi hi si lavako ngu yona, ‘txithumi txo thembeka na txi di ni wutxhari’ txi ningela sakudya sa moya ngu ka mabhuko ya hi ma thumisako ka wuthumeli wathu, ku engetela ka mlongoloko wu hi ku nawo wa mitshangano ni ka tisengeletano tathu.

Txithumi txa thembeka ka ditshuri da diBhibhele ni ka mthumo wu txi nga ningwa wo txhumayela mahungu a manene, ni ku nja wutxhari ngu nzila yi txi khatalelako ngu yona kuranda ka Kristu ha mafuni. (Mithumo 10:42) Jehovha wa wu katekisa mthumo wonewo ngu ku engeteleka ka vathu ni makatekwa o tala a moya.​—Esaya 60:22; 65:13.

  • Jesu a ningile mani wutixamuleli wo phamela vagondiswa vakwe sakudya sa moya?

  • “Txithumi” txi thembekile ni ku txhariha ngu nzila yihi?