Ndaka u ya ka menu ya wumbidi

Ndaka u ya ka dijanela da mndani

Tifakazi ta Jehovha

Txitxopi

Mba Mani Ava Va Mahako Kudhunda ka Jehovha Nyamsi?

 GONDO 3

Ditshuri da diBhibhele di tshumete di tumbulwa ngu nzila yihi?

Ditshuri da diBhibhele di tshumete di tumbulwa ngu nzila yihi?

Vagondi va diBhibhele, ngu 1870

Xihondzo xo Rindza txo khata, ngu 1879

Xihondzo xo Rindza txa masiku a ngweno

DiBhibhele di profetile ti to msana ka lifu la Kristu, va ti na humelela vagondisi va makuhu hagari ka Makristu o khata, ava va nga ti na vhinganyisela ditshuri da diBhibhele. (Mithumo 20:29, 30) Ngu ku tsimbila ka mbimo, eto ti mahekile ngu ditshuri. Vona va dhivanyisete tigondo ta Jesu ni mawonelo a wukhongeli wa wuhedheni, koneho ku humelete Wukristu wa makuhu. (2 Timoti 4:3, 4) Hi nga tsaniseka ngu nzila yihi ti to nyamsi hi ni mapfisiselo a manene ya ti ngu ditshuri diBhibhele di ti gondisako?

Mbimo ya ti to Jehovha e xawutela ditshuri. Jehovha a profetile ti to ka ‘mbimo ya magwito wuzivi wa ditshuri wu ti na anda’. (Dhaniele 12:4) Ngu 1870, mtxawa wa wudotho wa vathu ava va nga txi lava ditshuri, wu ti pfisisile ti to tigondo ta titxhetxhe to tala ti sa seketelwa ka diBhibhele. Koneho va khatile ku maha wuxolisisi kasi ku na tumbula tigondo ta ditshuri ta diBhibhele, se Jehovha a va katekisile ngu didhawa da moya.

Vavamna vo thembeka va gondile kha kwati diBhibhele. Vagondi vo khata va diBhibhele ava va nga tiningetela, va ti londisela mamahelo o kari a gondo aya ni nyamsi hi ma thumisako. Vona va ti gonda diBhibhele, ve xolisisa mhaka ngu mhaka. Ku nga ti va txi mana txienge txo kari txa diBhibhele txi txi karatako ku txi pfisisisa, vona va ti lavetela titxhamuselo ka tindimana timwane. Mbimo yi va hokelelako magwito o kari aya ma nga txi tsimbitisana ni mibhalo yi yi mmwane yotshe, vona va txo yi funga. Ngu kuleka diBhibhele di titxhamusela dipune, vona va tshumete ve tumbula ditshuri mayelana ni ditina da Txizimu ni Mfumo wa txona, txikongomelo txa txona ngu vathu ni Mafu, txiemo txa vafi ni themba ya ku wuswa ka vakufa. Wuxolisisi wawe wu va khulute ka simaho so tala sa wukholwa wa makuhu.​—Johane 8:31, 32.

Ngu 1879, Vagondi va diBhibhele se va di tiwonile ti to se i ti mbimo yo pfalisa ditshuri ngu ha va nga kotako ngu kona. Ngu toneto, ka dilembe dileya va khatile ku humesa direvhista da Xihondzo xo Rindza Xi Huwelela Mfumo Wa Yehovha. Ka masiku a ngweno, ha sengela ka ku pfalisa ditshuri da diBhibhele ka vathu va matiko a 239 ni ngu konamu ka 700 wa tidimi. Wuzivi wa ditshuri kha wa nga va ni ku anda ngu nzila yiya!

  • Msana ka kufa ka Kristu, nji txani atxi txi nga maheka ngu ditshuri da diBhibhele?

  • Nji txani atxi txi nga hi vhuna ku tshumela hi tumbula ditshuri da Dipswi da Txizimu?