Ndaka u ya ka menu ya wumbidi

Ndaka u ya ka dijanela da mndani

Tifakazi ta Jehovha

Txitxopi

Mwaya wako wu nga mana litsako

 TXIENGE 9

Khozelani Jehovha kota mwaya

Khozelani Jehovha kota mwaya

“Khozelani awule a nga maha nzuma ni mafu.”Mtuletelo 14:7

Ngu ha mi nga gonda ngu kona ka dibroxura diya, diBhibhele di ni matshina a mangi a milayo aya ma no mi vhuna ka mwaya wanu. Jehovha a mi navelela ti to mi tsaka. Ene a thembisa ti to ngako mi txi veka wukhozeli wakwe ka wukhalo wo khata ‘sotshe silo si simwane mi na engetelwa’. (Matewu 6:33) Ene ngu ditshuri a navela ti to mi va vangana vakwe. Londolani yotshe mikhanjo ti to mi kulisa wungana wanu ni Txizimu. A yiya i lungelo ya hombe yi m’thu a nga yi manako.Matewu 22:37, 38.

 1 TSANISANI WUXAKA WANU NI JEHOVHA

ATI DIBHIBHELE DI TI WOMBAKO: “‘Aniko ni na va tate wanu, anu mi na va vanana vangu va mazambi ni mahorana’, kuwomba Jehovha.” (2 Vakorinto 6:18) Txizimu txi lava ti to mi va vangana va txona va hombe. Nzila yimwane yo maha toneto ngu maha mkombelo. Jehovha a mi gela ti to “khongelani mi si karali”. (1 Vatesalonika 5:17) Ene a tiemisete kuengisela ati u ti xuvako. (Vafilipiya 4:6) Ngako u txi maha mkombelo kumweko ni mwaya wako, va na yi wona nzila yi Txizimu i ku txa txiviri ngu yona kwako.

Ku engetela ka kuwombawomba ni Txizimu ti lava mi txi txi engisa. Mi nga maha toneto ngu kugonda diBhibhele ni mabhuku aya ma nga seketelwa ka dona. (Masalmo 1:1, 2) Alakanyisisani ngu ti mi ti gondako. (Masalmo 77:11, 12, NM) I si ngeto basi, kuengisa Txizimu ti lava ti to mbimo yotshe u ya ka mitshangano ya Wukristu.Masalmo 122:1-4.

Nzila yimwane ya lisima yo tsanisa wuxaka wanu ni Jehovha ngu wombawomba ni vamwane ngu mahungu a manene. Mbimo yi mi hetako mbimo ya yingi mi di kutxhumayelani, mi na ti pfa mi di hafuhi ngutu nayo.Matewu 28:19, 20.

NGU TIHI TI U NGA TI MAHAKO:

  • Vekani mbimo ditshiku ni ditshiku yo lera diBhibhele ni kumaha mkombelo

  • Kota mwaya, tekani mithumo ya moya idi ya lisima ngutu ku pinda kuhungala ni kuhumula

2 TIDILENI NGU WUKHOZELI WANU WA MWAYA

ATI DIBHIBHELE DI TI WOMBAKO: “Tshuketani hafuhi ka Txizimu, kasi ni txona txi na tshuketa hafuhi kwanu.” (Jakobe 4:8) Vanani ni txiemiso txa wukhhozeli wa mwaya mi tshumela mi txi londisela. (Genesa 18:19) Kambe ku ngadi ku txi laveka timwane. Txizimu txi fanete ku va hagari kwanu ka ti mi ti mahako ditshiku ni ditshiku. Tsanisani wuxaka wa mwaya wanu ni Txizimu nguko wombawomba ngu txona ‘mi di zumbile nyumbani kwanu, mi di mu ku tsimbilani, mi txi otela ni loko mi txi wuka’. (Deteronoma 6:6, 7) Ngu mbilu yotshe, lava ku u fana ni Joxuwa a nga khene: “Idi ani ni mwaya wangu, hi na thumela Jehovha.”Yoxuwa 24:15.

NGU TIHI TI U NGA TI MAHAKO:

  • Vana ni txiemiso txa gondiselelo yo tsana ayi yi tsimbitisanako ni silaveko sa mmwane ni mmwane ha mwayani kwako