“Ngutungutu khutalelani kurandana nguko lirando la fenengeta mtalo wa siwonho.”1 Pedro 4:8

Ku nga ti awe ni mkatako mi txi khata kuzumba motshe, mi na va ni sikarato so hambana hambana. Ti nga va ti txi mahwa ngu ku mi ku ni mialakanyo yo hambana, matipfelo, ni nzila yi mi nga kuliswa ngu yona. Mwendo ti nga va ti txi mahwa ngu vathu vamwane mwendo timhaka timwane ni ngu simahakalo so mbi si rinzela.

Mbimo yimwane hi nga tipfa hi txi navela kuvayilela kulwisana ni sikarato, kambe diBhibhele di hi kuzeta ti to hi lwisana ni sikarato sathu. (Matewu 5:23, 24) Nzila ya yinene yo lulamisa sikarato ngu thumisa matshina a milayo ya diBhibhele.

 1 BHULANI NGU TXIKARATO TXA KONA

ATI DIBHIBHELE DI TI WOMBAKO: “Ku ni . . . mbimo yo wombawomba.” (Eklesiasta 3:1, 7) Tsanisekani ngu ti to ma ti ninga mbimo yo wombawomba ngu txikarato txa kona. Ngu ku thembeka gela mkatako nzila yi u ti pfako ngu yona ni ti u ti pimisako ngu mhaka yoneyo. Mbimo yotshe ‘wombawomba ditshuri’ ni mkatako. (Vaefesu 4:25) Hambi mi di henyile vayilelani moya wo lava kulwisana. Xamulo yo rula ya tsivela mazunga.Swivuriso 15:4; 26:20.

Hambi mi singa ni mawonelo ya ma fanako, vanani ni wunene, kambe mi nga divale ku kombisana lirando ni txithavo. (Vakolosa 4:6) Ngu txikuluveta duketani kululamisa txikarato kambe mi nga lekeni ku bhulisana.Vaefesu 4:26.

NGU TIHI TI U NGA TI MAHAKO:

  • Vekani mbimo yi mi no bhula ngu txikarato atxi txi kuho

  • Ku nga ti idi mbimo yako yo engisela, vayilela ku m’bela mkanani mbimo yi a wombawombako. Anawe u na yi mana mbimo yo wombawomba

 2 ENGISELA U TSHUMELA U PFISISA

ATI DIBHIBHELE DI TI WOMBAKO: “Zumbani ngu kurandana . . . mi txi palisana ngu ku kombisa txithavo ka mmwane ni mmwane.” (Varoma 12:10) Nzila yi u engiselako ngu yona nja lisima. Duketa ku pfisisa mawonelo a mkatako u tshumela ‘u va ni wumbilu . . . ni ku tiveka hahatshi’. (1 Pedro 3:8; Jakobe 1:19) U nga mahi nga wa mu engisela na u si mu engiseli. Ti txi koteka leka ti u ti mahako u mu engisela kwati, mwendo ku mkombela ti to mi ta bhula ngu mhaka yoneyo ka mbimo yimwane. Ku nga ti mkatako u txi mmaha mngana wako, ‘dihika dako di na mbi henyiswa ngu txikuluveta’.Eklesiasta 7:9.

NGU TIHI TI U NGA TI MAHAKO:

  • Yana masoni u txi mu engisela na u si msolasoli, hambi ti a ti wombako ti si ku tsakisi

  • Pfisisa kwati mhaka ayi a yi wombako. Wona ati khohe yakwe yi wonekisako tona ni ti dipswi dakwe di pfalisako tona

3 MAHANI TI MI NGA PFANA KA TONA

ATI DIBHIBHELE DI TI WOMBAKO: “Ku ni wuyelo ya yinene ka kutikarata kumwane ni kumwane, kambe dipswi da txisofu basi kha di mani txilo.” (Swivuriso 14:23) Ku tumelelana ka mhaka yo kari kha ti eneli. Mi fanete ku maha ati mi nga pfanana ka tona. Eto ti nga lava ti to mi thuma ngutu ni kumaha mizamo, kambe ti nava ni wuyelo ya yinene. (Swivuriso 10:4) Ku nga ti mi txi thumisana, mi na mana “hakelo ya yinene” ya mthumo wanu wo tikarata.Eklesiasta 4:9.

NGU TIHI TI U NGA TI MAHAKO:

  • Wonani ti to ngu tihi ti mmwane ni mmwane wanu a nga ti mahako ti to mi lulamisa txikarato txanu

  • Mbimo yimwane ni yimwane xolisisani ti se mi nga kota kutimaha