Ndaka u ya ka menu ya wumbidi

Ndaka u ya ka dijanela da mndani

Tifakazi ta Jehovha

Txitxopi

Bhiblia yi nga hi gondisa txani?

 NDIMA 17

Lungelo ya mkombelo

Lungelo ya mkombelo

“M’vangi wa nzuma ni mafu” a lava kuengisa mikombelo yathu.”—Masalmu 115:15

1, 2. Ngu ku txani u txi alakanya ti to mkombelo i ningo yo sawuleka, ni ku ngu ku txani hi txi lava kuziva ati Bhiblia yi ti gondisako mayelana ni mkombelo

MA TXI dinganiswa ni wuako wotshe, mafu i madotho ngutu. Ngako Jehovha a txi wona ha mafuni, vathu votshe va woneka nga dithotho da mati amu ka dibhaketi. (Masalmu 115:15; Isaya 40:15) Hambiku athu hi ku va vadothu ngutu hi txi pimaniswa ni wuako wotshe, Masalmu 145:18, 19 yi womba tiya: “Mkoma a hafuhi ni vale va m’dhanako, avale va m’dhanako ngu ditshuri. Ene a enelisa txilaveko txa va va m’thavako; ene wa engisa sidilo sa va va lavako kuvhunwa, se ene wa va khulula.” Hi nga wona lungelo yiya yo xamalisa! Jehovha M’vangi wo guleka ngutu, a lava ku va hafuhi ni nathu, ni ku ene wa tilava kuengisa mikombelo yathu. Ngu ditshuri mkombelo i lungelo, i ningo ayi Jehovha a nga hi ninga hotshethu.

2 Kambe Jehovha a na hi engisa ngako hi txi wombawomba nayo ngu nzila ayi a yi amukelako. Hi nga ti mahisa ku txani? He woni ti to Bhiblia yi womba txani ngu mkombelo.

NGU KU TXANI HI TXI KOMBELA KA JEHOVHA?

3. Ngu ku txani u di fanete ku khongela ka Jehovha?

3 Jehovha a lava ti to u kombela kwakwe, mwendo kubhula nayo. Hi ti zivisa ku txani toneto? Hi kombela u lera Vafilipiya 4:6, 7Alakanya ngu txirambo txonetxo txa wunene. Mfumeli wa wuako wotshe wa khatala ngutu ngu ngawe ni ku a lava ti to u m’gela nzila yi u tipfako ngu yona ni sikarato sako.

4. Kumaha mkombelo mkama ni mkama ti wu tsanisisa ku txani wungana wanu ni Jehovha?

 4 Txikhongelo txi hi vhuna ku hi va ni wungana wa hafuhi ni Jehovha. Ngako vangana va txi gelana ta ha khana, ati va ti lavako ni matipfelo awe, wungana wawe wa tsana. Eto ta fana ni kukhongela ka Jehovha. Amu ka Bhiblia, Jehovha a bhate mapimo akwe ni ti a ti pfisako tona ngu ngawe, e tshumela e hi gela ati a ku na timaha mbimo yi yi tako. Awe u nga gelana ni nene matipfelo ako ngu kubhula nayo mkama ni mkama. Ngu kumaha tiya wungana wanu ni Jehovha wu na kula wu di tsani.—Jakobe 4:8.

HI FANETE HI MAHA TXANI TI TO HI PFIWA NGU TXIZIMU?

5. Hi tizivisa ku txani ti to Jehovha kha engisi mikombelo yotshe?

5 Ina Jehovha a engisa mikombelo yotshe? Ahim-him, kha engisi. Ka mbimo ya mprofeti Isaya, Jehovha a gete va ka Israeli: “Mi nga sikota kuandisa mikombelo yanu, kambe ani kha ni nambi yi engisa.” (Isaya 1:15) Kambe hi si ti woni kha kwati, hi nga maha timhaka ati ti nga hi tshuketisako kule ni Jehovha, ti maha ti to Jehovha asi engisi mikombelo yathu.

6. Ngu ku txani likholo i di la lisima? Hi ti kombisisa ku txani ti to hi ni likholo?

 6 Hi txi lava ti to Jehovha e engisa mikombelo yathu, hi fanete hi va ni likholo kwakwe. (Marku 11:24) Mpostoli Paulo a txhamusete: “Se hahanze ka likholo kha ti koteki ku txi tsakisa Txizimu, nguko, awule a tshuketelaku hafuhi ka Txizimu, a fanete kukholwa ti to txona txi ho, ni ti to txona txa ninga txhatxhazelo ka vale va txi lavako.” (Vahebheru 11:6) Kambe kuwomba ti to hi ni likholo kha ti eneli. Hi lava ku kombisa ha kubasani likholo lathu ngu kuengisa Jehovha ditshiku ni ditshiku.—Lera Jakobe 2:26.

7. a) Ngu ku txani hi di fanete ku ti veka hahatshi ni txithavo ngako hi txi khongela ka Jehovha? b) Hi nga ti kombisisa ku txani ti to hi ti emisete mbimo yi hi khongelako?

7 Hi fanete hi ti veka hahatshi ni ku va ni txixonipho ngako hi txi khongela ka Jehovha. Ngu ku txani? Ngako hi txi lava ku ya wombawomba ni mkoma mwendo prezidente, ti lava hi kombisa txithavo txa hombe. Jehovha i Txizimu txo Guleka nguto, ina kha hi faneli ku kombisa txithavo ni kutiveka hahatshi ngako hi txi wombawomba nayo? (Genesisi 17:1; Masalmu 138:6) Hi fanete kambe hi tiemisela ni kukhongela ka Jehovha ngu mbilu yathu yotshe, i singa kuwuyeletela mapswi.—Matewu 6:7, 8.

8. Mbimo yi hi mahako mkombelo, nji txani atxi hi fanelako ku txi maha?

8 Ngu magwito, mbimo yi hi khombelako somaha, hi fanete kumaha totshe ati hi nga ti kotako ti ti yelanako ni ti hi nga tikombela. Ngu txikombiso, ngako hi txi kombela silaveko sa ditshiku ni ditshiku, kha hi na ku khalahatshela mawoko hi txi emela ti to Jehovha a na hi ninga sotshe hambi i txo va m’pawu. Hi fanete hi tikarata ni kutumela mthumo wumwane ni wumwane awu hi wu kotako ku wu maha. (Matewu 6:11; 2 Vatesalonika 3:10) Mwendo ngako hi txi kombela ka Jehovha ti to e hi vhuna kuleka kumaha to kari to  biha, hi fanete hi vayilela txihi ni txihi atxi txi nga hi dukako. (Vakolosa 3:5) He xolisise siwotiso asi si nga toloveleka mayelena ni mkombelo.

SIWOTISO SI SI NGA TOLOVELEKA MAYELANA NI MKOMBELO

9. I mani hi fanelako kukhongela kwakwe? Johane 14:6 yi hi gondisa txani ngu txikhongelo?

9 I mani awu hi fanelako kukhongela kwakwe? Jesu a gondisile valondeteli vakwe kukhongela ka “Tate wathu wa nzumani”. (Matewu 6:9) A tshumete atxi khene: “Ani ngani Nzila ni Ditshuri ni Wutomi. Kha nga ho wule a tako ka Tata, i singa ngu ngani.” (Johane 14:6) Se hi fanete hi khongela basi ka Jehovha ngu Jesu. Ti womba txani kukhongela ngu Jesu? Ti to Jehovha e tumela mikombelo yathu, ti lava hi kombisa txithavo ka txiavelo txo sawuleka atxi Jehovha a nga ninga Jesu. Nga ha hi nga gonda ngu kona, Jesu a tile ha mafuni ti to e ta hi khulula ka txi wonho ni lifo. (Johane 3:16; Varoma 5:12) Jehovha a tshumete e sawula Jesu kota Mprista wa Hombe ni Mlamuli.—Johane 5:22; Vahebheru 6:20.

Awe u nga maha mkombelo mbimo yotshe

10. Ina hi fanete hi va ka txiemo txo sawuleka ngako hi txi maha txikhongelo? Txamusela.

10 Ina ku laveka maemelo o kari mbimo yi hi mahako mkombelo? Ahim him, Jehovha kha hi kombeli ti to hi khizama, hi nama mwendo kukhukha hi ema mbimo yi hi khongelako. Bhiblia yi hi gela ti to hi nga wombawomba ni Jehovha hi di ka txiemo txihi ni txihi txa txixonipho. (1 Matimu 17:16; Nehemiya 8:6; Dhanieli 6:10; Marku 11:25) Ati i ku ta lisima ka Jehovha hi nga ti hi emisako tona mbimo yi hi khongelako, kambe ngu ti to hi wombawomba nayo hi di ni txikongomelo txa txienene. Hi nga khongela ngu dipswi do guleka mwendongu mbiluni ku singa ni mhaka ni ti to hi hani mwendo wusiku  mwendo mitshikari. Hi txi khongela ka Jehovha hi nga themba ti to a na hi engisa ku singa ni mhaka ni ti to i mani a ku ho.—Nehemiya 2:1-6.

11. Ngu tihi ati hi nga wombawombako ngu tona ni Jehovha?

11 Nji txani atxi hi nga txi kombelako? Hi nga kombela txihi ni txihi atxi txi tumelekako ka Jehovha. Bhiblia yi khene: “Ngako hi txi txi kombela txo maha, mayelano ni kuranda ka Txizimu, txona txa hi engisa.” (1 Johane 5:14) Ina hi nga kombela silo sathu hi pune? Inna. Kukhongela ka Jehovha ti nga fananiswa ni kubhula ni mngana wa hombe. Jehovha hi nga m’gela tihi ni tihi ati ti ku ka mialakanyo ni timbiluni kwathu. (Masalmu 62:9) Hi nga kombela ti to e hi ninga moya wakwe wo sawuleka wa mtamo ti to wu hi vhuna kumaha ti i ku ta tinene. (Luka 11:13) Hi nga kombela kambe ka Jehovha ti to e hi ninga wuzivi wo maha sisungo sa sinene, ni ku hi nga kombela ti to e hi tsanisa ti to hi kota kuwonisana ni sikarato. (Jakobe 1:5) Hi nga kombela Jehovha ti to e hi divalela siwonho sathu. (Vaefesu 1:3, 7) Hi nga tshumela hi khongelela ni vamwane, ku fana ni mwaya wathu, vanathu va dibanzani.—Mithumo 12:5; Vakolosa 4:12.

12. Ngu tihi ti ti fanelako ku va ta lisima ka mikombelo yathu?

12 Ngu tihi ati ti fanelako ku va ta lisima ka mikombelo yathu? I Jehovha ni kuranda kwakwe. Hi ndina m’bonga ngu mbilu yotshe ngu ti ahi mahelako. (1 Matimu 29:10-13) Eto hi ti ziva nguko mbimo yi Jesu a nga ti ha mafuni a gondisile vagondiswa vakwe nzila yo khongela. (Lera Matewu 6:9-13.) Ene a wombile ti to va ti fanete ku kombelela ti to ditina da Txizimu di txi sawulekiswa, i ku ti to di tekwa di di sawulekile mwendo kubasa. A tshumete atxi khene hi nga khombelela ti to Mfumo wa Txizimu wu ta ni ti to kuranda ka Txizimu ku mahwa ha mafuni kotshe. Se magwito ka ku va hi di kombelete totsheto hi nga kombelela ngu silaveko sathu hi pune. Ngako hi txi veka Jehovha ni kuranda kwakwe  ka wukhalo wo khata ka mikombelo yathu, hi kombisa ti to ene mbwa lisima ngutu kwathu.

13. I mbimo muni ayi hi fanelako kuheta hi txi khongela?

13 I mbimo muni ayi hi fanelako kuheta hi txi khongela? Bhiblia kha yi wombi txilo. Mikombelo yathu yi nga koma mwendo yikulapha ngu kuya ngu txiemo. Ngu txikombiso, hi nga maha mkombelo wo koma hi txi lava kudya mwendo wo lapha mbimo yi hi bongako Jehovha ni ku m’gela ta mbiluni. (1 Samueli 1:12, 15) Kha hi lavi  kuheta dilembe hi txi maha mkombelo ti to hi wonwa ngu vamwane, nga ha vathu vamwane va nga ti mahisa toneto ka masiku a Jesu. (Luka 20:46, 47) Jehovha kha tsaki ngu mikombelo yo nga toneto. Txa lisima ka Jehovha ngu ti to mkombelo wu ta ngu mbiluni.

14. Hi nga khongela ku ngahi, ni ku eto ti hi gondisa txani ngu Jehovha?

14 Hi nga khongela ku ngahi? Jehovha a hi kombela ti to hi wombawomba nayo mkama ni mkama. Bhiblia yi womba ti to hi nga “yana masoni mi khongela”, “simamisa kukhongela” ni ku “khongelani mi si karali”. (Matewu 26:41, Tradução do Novo Mundo; Varoma 12:12; 1 Vatesalonika 5:17) Mbimo yotshe Jehovha a ti emisete kuengisa mikombelo yathu. Hi nga m’bonga ditshiku ni ditshiku ngu lirando ni wuha wakwe. Hi nga kombela mkongomiso wakwe ni mtamo wo tsanisela. Ngako hi txi ninga lisima lungelo yi  hi ku nayo yo khongela ka Jehovha, hi wombawomba nayo yi txa nga tulekelwa ngu mbimo.

15. Ngu ku txani hi di fanete kuwomba ku “amen” ngu magwito ka mkombelo?

15 Ngu ku txani hi di fanete kugwita mkombelo wathu ngu “Amen”? Kuwomba ku “amen” ti womba “ngu ditshuri” mwendo “ti na mahisi toneto”. Eyo i nzila yo kombisa ti to ati hi nga ti womba ka txikhongelo ha tsaniseka ngu tona. (Masalmu 41:14) Bhiblia yi hi gondisa ti to nda tinene ti to nathu hi womba ku “amen”, mwendo ngu dipswi da hombe mwendo ngu mbiluni mbimo yi ku gwitako mkombelo wa ha kubasani ti to hi kombisa ti to ha tumela ti ti nga wombwa.—1 Matimu 16:36; 1 Vakorinto 14:16.

TXIZIMU TXI YI XAMULISA KU TXANI MIKOMBELO YATHU

16. Ina ngu ditshuri Jehovha wa xamula mikombelo yathu? Txhamusela.

16 Ina ngu ditshuri Jehovha wa xamula sikhongelo sathu? Inna, wa xamula. Bhiblia yi womba ti to Jehovha i “Muengisi wa Mikombelo”. (Masalmu 65:3) Jehovha a engisa mikombelo ya timiliyoni ta vathu, se ene maha toneto ngu tinzila to hambana.

17. Jehovha a ti thumisisa ku txani tingelozi ni malanda akwe ya ha mafuni ti to e xamula sikhongelo sathu?

17 Jehovha a thumisa tingelozi ni malanda akwe ya ha mafuni ti to e xamula mikombelo yathu. (Vahebheru 1:13, 14) Ku ni sikombiso so tala sa vathu ava va kombela ku vhunwa kupfisisa Bhiblia se ngu txikuluveta va endetwe ngu yimweyo ya Tifakazi ta Jehovha. Bhiblia yi kombisa ti to tingelozi ti ho ka mthumo wo nuwela “mahungu a manene” ha mafuni kotshe. (Lera Mtuletelo 14:6.) Na kambe, wungi wathu se hi khongete ngu mhaka yo kari se ngu magwito hi amukela txivhuno txa mwanathu awu i Mkristu txa si hi si lavako.—Mavingwa 12:25; Jakobe 2:16.

Jehovha a nga xamula mikombelo yathu hambi ku hi vhuna ngu kuthumisa Makristu mamwane

18. Jehovha a wu thumisisa ku txani moya wo sawuleka ni Bhiblia ti to e xamula sikhongelo sathu?

 18 Jehovha a thumisa moya wakwe wo sawuleka ti to e xamula mikombelo. Mbimo yi hi khongelako ti tu hi xula txikarato txo kari, ene a nga hi ninga moya wakwe wo sawuleka ti to e hi ninga mkongomiso ni ku hi tsanisa. (2 Vakorinto 4:7) Jehovha a tshumela e thumisa Bhiblia ti to e xamula sikhongelo sathu ni ku hi vhuna ti to hi maha sisungo sa wutxhari. Mbimo yi lerako Bhiblia, ti nga maha hi mana mibhalo ayi yi nga hi vhunako. Jehovha a nga tshumela e thumisa xamulo ya m’thu mmwane hi di mitshanganoni ti to hi pfa ati hi nga ti ti lava, mwendo kuthumisa didhota ti to di alakanyisisa ni nathu ngu mhaka yo kari ya Bhiblia.—Vagalatiya 6:1.

19. Ngu ku txani ti nga wonekako nga Jehovha kha xamuli mikombelo yathu?

19 Mbimo yimwane hi nga xamala, ‘Ngu ku txani Jehovha a si xamuli mikombelo yangu?’ Khumbula ti to ene wa tiziva ti to a na mahisa ku txani ni ku i ditshiku a no xamula mikombelo yathu. Ene wa ti ziva ati hi tilavako. Ku tilava ti nga lava ti to hi simama hi khongela ti to hi mkomba ti to hi tsanisile ngu ditshuri ni ku mkomba ti to hi ni likholo kwakwe ngu ditshuri. (Luka 11:5-10) Ku tilava Jehovha a xamula mikombelo yathu ngu nzila ayi hi nga ti sa yi emela. Ngu txikombiso, hi nga kombelela sikarato sathu, kambe hahanze ko Jehovha e thavisa sikarato sathu, wa hi tsanisa ni ku hi maha hi tsanisela.—Lera Vafilipiya 4:13.

20. Ngu ku txani hi di fanete kukhongela ko tala ka Jehovha?

20 Hi nga wona lungelo yo xamalisa ayi hi ku nayo yo khongela ka Jehovha! Hi nga tsaniseka ti to ene a na engisa mikombelo yathu. (Masalmu 145:18) Se ngako hi txi khongela ngutu ka Jehovha ngu timbilu tathu wungana wathu ni nene wu na tsana.