1, 2. a) Nji txani atxi txi mahako ningo yi txi va ya lisima kwako? b) Ngu ku txani m’terulo i di ningo ya hombe ya Jehovha?

NGU yihi ningo ya lisima ayi u nga nga ningwa? Ningo kha yi ve ya lisima ngu ku va yi di dhute. Mbimo yi u amukelako ningo mwendo txo kari txa lisima txi u txi lavako, wa kombisa kubonga ngutu ngu yona.

2 Ka totshe tiningo ti Txizimu txi nga hi ninga tona, ku ni ningo yimweyo yi hi yi lavako ngutu ku pinda sotshe. Eyo i ningo ya hombe ngutu ya Txizimu ka vathu. Ka ndima yiya, hi na gonda ti to Jehovha a rumete mwanana wakwe, Jesu Kristu, se athu hi nga hanya ngu ha ku si gumiko. (Lera Matewu 20:28.) Ngu kurumela Jesu ha mafuni, Jehovha a kombisile ti to wa hi dhunda ngu ditshuri.

NJI TXANI M’TERULO?

3. Ngu ku txani vathu va txi fa?

3 M’terulo i nzila yi Jehovha a khululako vathu ka txiwonho ni lifo ngu yona. (Vaefesu 1:7) Kasi ku hi pfisisa ti to ngu ku txani ku di lavekile m’terulo, ti lava hi ziva ati ti nga maheka jaradhi ka Edheni ka malembe o tala ya ma nga pinda. Vaveleki vathu vo khata, Adhamu ni Evha, va gohile. Kambe a ku va nga onha, vona va fite. Ha fa nguko a nathu hi tshapetwe ngu txiwonho txa Adhamu ni Evha.—Wona Titxhamuselo to gwitisa 9.

4. I ti mani Adhamu ni ku i ti m’thu wo zumbisa ku txani?

4 Mbimo yi Jehovha a nga wumba m’thu wo khata, Adhamu, a mningile txo kari txa lisima ngutu. Ene a ningile  Adhamu wutomi wo hetiseka wa nyama. Adhamu a ti ni mapimo ni mmidi so hetiseka. Ene a si na kulwala, kukumba ni ku a si na kufa. A ku Jehovha a nga wumba Adhamu, kwakwe ene ati fana ni tate. (Luka 3:38) Jehovha mbimo yotshe a ti wombawomba nayo. Txizimu txi txhamusete Adhamu ati txi nga ti ti emete kwakwe ni ku txi mu ningile mthumo wo tsakisa ti to e wu maha.—Genesisi 1:28-30; 2:16, 17.

5. Yi womba txani mhaka yi yi ku Adhamu a mahilwe “ngu txifananiso txa Txizimu?”

5 Adhamu a mahilwe “ngu txifananiso txa Txizimu”. (Genesisi 1:27) Jehovha a mu ningile tifanelo to fana ni takwe ti ti patako, lirando, wutxhari, wululami, ni mtamo. Ene a ti ningile Adhamu mkhululeko wo ti sawulela. Ene a sa mahwa ku fana ni m’txhini. Txizimu txi ti mu wumbete ti to e kota kusawula ka ta tinene ni ka to biha. I di ku Adhamu a to sawula kuengisa Txizimu a di hanyile ngu ha ku si gumiko ka paradhise.

6. Mbimo yi Adhamu a nga mbi engisa Txizimu, nji txani atxi a nga txi luza? Toneto ti hi gwesa ngu nzila yihi?

6 Mbimo yi a nga mbi engisa Txizimu ene a mani tsayiselelo yo fa, Adhamu a hakete ku dhula. Ene a luzile wungana wo sawuleka ni Jehovha, wutomi wakwe wo hetiseka, ni m’ti wawe wa Paradhise. (Genesisi 3:17-19) Adhamu ni Evha va sawute kwa mbi engisa Txizimu ngu toneto kha ku nga ho kurinzela aku ku ku ho ngu vona. Ngu mhaka ya ti Adhamu a nga ti maha “Txiwonho txi wulete ha ditikoni ngu mhaka ya m’thu wa mmweyo, ngu msana ku txi wulela lifo, ngu toneto lifo ni lona li wulelete votshe vathu, nguko votshe va wonhile”. (Varoma 5:12) Mbimo yi Adhamu a nga wonha ene a ti “xavisile” ni nathu ka wukhumbi wa txiwonho. (Varoma 7:14) Ina yi ho themba kwathu? Inna yi ho.

7, 8. Nji txani m’terulo?

 7 Nji txani m’terulo? Dikungo da m’terulo di pata silo simbidi. Txo khata, m’terulo i mtengo wu wu hakelwako ku khulula m’thu mwendo kuxava txo maha da wumbidi kambe. Txa wumbidi, m’terulo i mtengo wo kari wo vhaleta mwendo wo hakela mtengo wa txo maha.

8 A walo m’thu wu a ndino hakela ati Adhamu a nga moxa mbimo yi a nga wonha ni ku hi tisela lifo. Kambe Jehovha a ningete nzila yo hi khulula ka txiwonho ni lifo. Konkuwa he gonde ngu ti to m’terulo wu thumisa ku txani ni ti to wu hi wuyelisisa ku txani.

JEHOVHA A WU HUMISISILE KU TXANI M’TERULO

9. M’terulo wu ti fanete ku hakelwa ngu nzila yihi?

9 Ku walo ni wa mmweyo wathu a ndino hakela wutomi wo hetiseka awu Adhamu a nga wu luza. Ngu ku txani ti si koteki? Nguko hotshethu kha ha hetiseka. (Masalmu 49:8, 9) Ngu toneto m’terulo wu fanete wu hakelwa ngu wutomi wa m’thu wu a nga hetiseka. Ngu toneto wu dhanwako ti to “m’terulo wu wu dinganako”. (1 Timoti 2:6, Tradução do Novo Mundo) M’terulo wu ti fanete wu va ni lisima lo nga la wutomi wu Adhamu a nga wu mwalata.

10. Jehovha a wu humisisile ku txani m’terulo?

10 Jehovha a wu humisisile ku txani m’terulo? Jehovha a rumete Mwanana wakwe wa lisima ngutu ha mafuni. Mwanana wa kona, Jesu, i ti txivangwa txakwe txo khata. (1 Johane 4:9, 10) Jesu a ti ti emisete kusiya Tate wakwe ni m’ti wakwe nzumani. (Vafilipiya 2:7) Jehovha a rumete Jesu ha mafuni a txi khukhela nzumani, se Jesu e velekwa kota m’thu wa nyama wo hetiseka, a singa ni txiwonho.—Luka 1:35.

Jehovha a ningete Mwanana wakwe wa lisima kota m’terulo kwathu

11. Ti nga kotekisa ku txani ti to m’thu wa mmweyo eva m’terulo ka vathu votshe?

 11 M’thu wo khata, Adhamu, a tshotshile wutomi wo hetiseka wa vathu votshe mbimo yi a nga mbi engisa Jehovha. Ina ti nga koteka ti to m’thu mmwane e thavisa lifo ka vanana votshe va Adhamu? Inna. (Lera Varoma 5:19.) Jesu wu a nga si khali kuwonha, a ningete ngu wutomi wakwe wo hetiseka ti to wu va m’terulo. (1 Vakorinto 15:45) Wutomi wakwe wo hetiseka wu ndina thumiselwa kuthavisa lifo ka vanana votshe va Adhamu.—1 Vakorinto 15:21, 22.

12. Ngu ku txani ti di lavile ti to Jesu e xaniseka ngutu?

12 Bhiblia yi kombisa nzila yi Jesu a nga xaniseka ngu yona a si nze kufa. Ene a kwapetwe ngu vathu va tshofu, e bethelwa ka phandi ya xanisa, e timisela xanisa ni lifo lo panda. (Johane 19:1, 16-18, 30) Ngu ku txani lifo la Jesu i nga ti lo panda ngutu? Nguko Sathane a ti khene ku walo m’thu a nga thembekako ngako a txi dukwa ngu sikarato. Jesu a kombisile ti to m’thu wo hetiseka a nga thembeka ka Txizimu hambi ti txi lava ku e xaniseka ngutu. Alakanya nzila yi Jehovha a nga tiguleta ngu yona ngu Jesu!—Mavingwa 27:11; wona Titxhamuselo to gwitisa 15.

13. M’terulo wu haketwe ngu nzila yihi?

13 M’terulo wu hakelisilwe ku txani? Jesu a ningete lisima la wutomi wakwe ka Tate wakwe. Ka dilembe da 33, ngu 14 ka Nisan ka kalendariyo ya Txijudha, Jehovha a tumelete valala va Jesu ti to ve m’daya. (Vahebheru 10:10) Msana ka masiku mararu, Jehovha a wusile Jesu, i di m’thu wa moya, i singa wa nyama. Mbimo yi Jesu a nga tshumelela ka Tate wakwe Nzumani, ene a ningete lisima la wutomi wakwe wo hetiseka kota m’thu wa nyama ka Jehovha kota m’terulo. (Vahebheru 9:24) M’terulo se wu  haketwe, athu hi ni mkhanjo wo khululwa ka txiwonho ni lifo.—Lera Varoma 3:23, 24.

M’TERULO WU NGA KU WUYELISA NGU NZILA YIHI?

14, 15. Hi fanete kumaha txani ti to siwonho sathu si divalelwa?

14 Se ha wuyelwa ngu ningo ya hombe ya Txizimu. He wone nzila yi hi wuyelwako ngu yona konkuwa ni yi hi no wuyelwa ngu yona ka mbimo yi yitako.

15 Ha divalelwa siwonho sathu. Kha ti hehuki ku maha ti i ku ta tinene mbimo yotshe. Ha maha sihoxo, ni ku ha womba ni kumaha to biha. (Vakolosa 1:13, 14) Hi nga divalelwa ngu nzila yihi? Hi fanete hi ti sola ngu ditshuri ngu ti hi nga maha to biha, se ngu ku ti veka hahatshi hi kombela ti to Jehovha e hi divalela. Se ngu magwito hi nga themba ti to siwonho sathu sa divalelwa.—1 Johane 1:8, 9.

16. Hi fanete kumaha txani ti to hi va ni livhalo la linene?

16 Hi nga va ni livhalo la linene. I di ti to livhalo lathu li hi gela ti to se hi mahile to kari to biha, ku ti pfa mnando, hambi ku gumelwa ngu themba ni ku ti pfa hi se vhuni txilo. Kambe toneto kha ti lavi hi tshumelela msana. Hi txi kombela kudivalelwa ka Jehovha, hi nga tsaniseka ti to ene a na hi engisa ni ku hi divalela. (Vahebheru 9:13, 14) Jehovha a lava ti to hi m’gela txikarato tximwane ni tximwane txathu ni dikhodho. (Vahebheru 4:14-16) Kota wuyelo hi na va ni kudikha ni Txizimu.

17. Ngu yahi makatekwa ya hi nga ma manako nguko Jesu a nga hi fela?

17 Hi ni themba yo hanya ngu ha ku si gumiko. “Ngukusa txhatxhazelo ya txiwonho ngu kufa, kambe txiningo txa Txizimu ngu wutomi wo mbina magwito, ngu ka Kristu Jesu Mkoma wathu.” (Varoma 6:23) Ngu kota ya ku Jesu a nga hi fela, athu hi nga hanya ngu ha ku si gumiko  ni ku tidila ngu dihanyo do hetiseka. (Mtuletelo 21:3, 4) Kambe nji txani txi hi fanelako ku txi maha ti to hi amukela makatekwa oneyo?

INA U NA WU TUMELA M’TERULO?

18. Hi ti zivisa ku txani ti to Jehovha wa hi randa?

18 Alakanya nzila yi u nga tipfako ngu yona ku nga ti u txi hiwa ningo ya lisima. M’terulo i ningo ya hombe ngutu kupinda totshe, ngu toneto ti lava hi bonga Jehovha ngu kona ha ka yona. Johane 3:16 yi womba ti to “Txizimu txi kombile lirando ka vathu, a ha txi nga za txi ningela Mwanana wa txona wa mmweyo ekha.” Inna, Jehovha wa hi randa ngutu a ha ko za e ningela ngu Mwanana wakwe wa lisima, Jesu. Ha ti ziva ti to nene Jesu wa hi randa, nguko ene a nga ti ti emisete ku ta hi fela. (Johane 15:13) Ningo ya m’terulo yi nga ku tsanisekisa ti to Jehovha ni Jesu va kuranda.—Vagalatiya 2:20.

Hi txi gonda mayelana ni Jehovha, hi na va mngana wakwe ni ku lirando lathu ngu ngene li na kula

19, 20. a) U nga mahisa ku txani ti to u va mngana wa Jehovha? b) U nga kombisa ngu nzila yihi ti to wa tumela m’terulo wa digandelo da Jesu?

19 Ngako se u nga gonda mayelana ni lirando la hombe la Txizimu, u nga mahisa ku txani ti to u va mngana wa txona? Kha ti hehuki kudhunda m’thu wu u si m’ziviko. Johane 17:3 yi womba ti to athu hi nga ziva Jehovha. Ngako mi txi maha tiya, lirando lako li na kula ngu ngene, awe u na maha ati ti m’tsakisako, ni ku u na va m’ngana wakwe. Kambe simama u gonda mayelana ni Jehovha ngu kugonda Bhiblia.—1 Johane 5:3.

20 Tumela m’terulo wa digandelo da Jesu. Bhiblia yi womba ti to “a wu a kholwako ka Mwanana , a na ni wutomi wo mbi guma”. (Johane 3:36) Ti womba txani ku kombisa likholo? Ti womba kumaha ti Jesu a nga hi gondisa ti to hi ti maha. (Johane 13:15) Kha ta enela kuwomba basi ti to ha kholwa ka Jesu. Ku tumela ka m’terulo, ti lava  hi maha to kari mayelana ni likholo lathu. Ka Jakobe 2:26, hi lera ti to: “likholo li fite ngako li singa ni mithumo.”

21, 22. a) Ngu ku txani hi di fanete ku maneka ka Txialakanyiso txa lifo la Kristu dilembe ni dilembe? b) Hi na ta bhula ngu txani ka tindima 6 ni 7?

21 Maneka ka Txialakanyiso txa lifo la Kristu. Ka wusiku wu Jesu a nga fa ngu wona, ene a hi gondisile ti to ti lava hi alakanya lifo lakwe. Hi maha toneto dilembe ni dilembe, toneto ti dhanwako ku Txialakanyiso mwendo “Txilalelo txa Mkoma”. (1 Vakorinto 11:20; Matewu 26:26-28) Jesu a lava ti to hi khumbula ti to ene a ningete ngu wutomi wakwe wo hetiseka kota m’terulo kwathu. Ene a wombile tiya: “Mahani tiya kasi ku ni alakanya ngu tona.” (Lera Luka 22:19.) U txi maneka ka txialakanyiso, u kombisa ti to wa khumbula m’terulo ni lirando la hombe li Jehovha ni Jesu va nga hi komba lona.—Wona Titxhamuselo to gwitisa 16.

22 M’terulo i ningo ya hombe yi hotshethu hi nga yi amukelako. (2 Vakorinto 9:14, 15) Ningo yoneyo ya lisima yi na wuyelisa hambi ni magidhi gidhi ya vathu va se va nga fa. Ka tindima 6 ni 7 hi na wona ti to ti kotekisa ku txani toneto.