Imiero chanokon epoko

Imiero epoko piokoro wèʼchonon tonèmïngon meropotïʼpo

Jehoba poko Wòrupïatonon

Kariʼnia

Moro Ípyorono Uputïrï Se’paroman?

Moro Ípyorono Uputïrï Se’paroman?

Ípyorono? Otï poko? Amukonïmbo tuputïsangon paneroten kari’nyakon woturupoto’kon poko. Ambwako tïwonuminga’ma oweípyoma enïpangon woturupoto’kon poko:

  • Opoto Papa wane ta’roro kïponainye tuaropanan?
  • Wo’onokonïmbo, wo’chota’manokonïmbo uwaro wane neiyamba?
  • O’to kïseiyatomba kïrombïsando?
  • Jombï’masan wane nemainyatomba eropa?
  • Neara wopekatïsewan yeuran etato’me Opoto Papa’wa?
  • Nearane ya’ta towa’pore weijï sepoan yemamïrïta?

Owe katu enïkon eyu’to’kon mepoamba? Owïto’poto roripo kareta upu’namo’wa íjose’pa tambarakong’wa amume me’mepa kïneyusaton. Amukonïmbo eyu’topo ípyoro eneke kïnonean, koíyatï te ota’kupo’papai kïneiyamba.

Moropote o’wín amu karetama, morota tamï’charï ta’ronokon ípyoronokon eyu’to’kon íchama. Jesus tïkaman tïwopekatïrïta Opoto Papa’wa: «Oweuran ípyorono moro.» (John 17:17) Erome, mororo euran kïseyatoaton Opoto Papa Karetarïme. Íyepan chori’pyoto o’wa, meneapa neara moro kareta’wa takureme, ípyoro paneroten eropa morokon woturupoto’kon eyukurupa.

Opoto Papa Wane Ta’roro Kïponainye Tuaropanan?

Apïmye amukon weí’pyo ra’na amu kari’nya wesapoma’po

O’TONO’ME MORO WOTURUPOTOPONA? Ícha komando’kon we’chopota kombaijo nyimban poko woinyambano, ya’wame onenokon eropa kïnïsan. Amukon roten Opoto Papa poko worupwatonon omepato mandon kïwo’chota’marïkon wopïrï Opoto Papa weinyo

O’TO OPOTO PAPA KARETARÏ OMEPATONA? Opoto Papa asi ya’wame weinyokon onïpo’paroma. «Amumbo akoro asi ya’wame mo’ko ípyorono Opoto Papa weijï kapïngma. Mo’ko íjomboro cho’ponokon poripyin ekema’paroten amu poko ju’pwama!» tïka Job 34:10 ma. Ju’pwïn paneroten Opoto Papa nishanorïmema kari’nyakon ‘wanome. Íjokerote Jesus’wa tomepa kïweíshangma kïwopekatïrïkon poko enï pa’me: «Na’na yumï kapu tano, oro…oniyopotomarï no’nen. Oro íshe owe’chopo neinyen, kaputa yeijï pa’me roropa, enï nono ku’po.» (Matthew 6:9, 10) Cho’poro kïponainye tuaro tïweijïkero Opoto Papa tope tomaminya’ma yeípyoman tïkatopombo pya’mero ïporïpa poko. —John 3:16.

Eneko eropa Genesis 1:26-28; James 1:13; 1 Peter 5:6, 7.

Wo’onokonïmbo, Wo’chota’manokonïmbo Uwaro Wane Neiyamba?

Wo’otonon

O’TONO’ME MORO WOTURUPOTOPONA? Wo’onokon pyoropï’ma’pame apïmye paneroten kari’nyakon ma’kano. Íjomboro kïainye tu’kupa wo’chota’manoman.

O’TO OPOTO PAPA KARETARÏ OMEPATONA? Opoto Papa’wa tokarïshema tïpwanare weinyo ïporïpa tï’wa we’chopo wararo. Kaputano í’ya Yopotomarï upinyo kari’nyakon «ambore yomeparï kapïn wo’ono pokoman.» Morote, «tïwo’oto’konïmbo pipya’ko’matomba tïwoshangato’kong’me.» (Isaiah 2:4) Opoto Papa íjomboro ya’wame poko weinyokonïmbo maro wo’chota’manokonïmbo emimyanomba. Charetarï enïpa’me yeijïman ekarishan: «[Opoto Papa] íjomboro enu’ka’chïrïkon konanomba enurukon weinyo, moro eropa romo’nombo uwaro kïneiyamba, amu amorïmbo, wotï’chapo’nokonïmbo, ye’tunanokonïmbo eropa uwaro kïneiyamba. Morokon eímyasangonïmbo tïwepatopa yeípyoma.» Ícha eropama erome ya’wame onenokonïmbo, wo’chota’manokonïmbo eropa. -Revelation 21:3, 4.

Eneko eropa Psalm 37:10, 11; 46:9; Micah 4:1-4.

O’to Kïseiyatomba Kïrombïsando?

Amu omunano patï

O’TONO’ME MORO WOTURUPOTOPONA? Mo’karon amukon roten Opoto Papa poko worupwatonon omepato mandon neara kari’nya tokatonepa yeijï. Amukonïmbo kïnekanosaton mo’ko jombï’po’wa amu tonure we’choto o’to ïrïpa, íjose’pa Opoto Papa’wa tonurero ya’wangon kota’maporï wa’tota oronomero.

O’TO OPOTO PAPA KARETARÏ OMEPATONA? Tïrombï’poto kari’nya neke tomainyema. «Mo’ko jombï’po…otïro pona tuwaro’paroma,» tïka Ecclesiastes 9:5 ma. Jombï’masan tuwaro’papai yeijïkongke, mo’karon tonure we’chonon o’to ïrïkon kapïn í’yainyema íjose’pa a’ta epatomarïkon kapïngma. -Psalm 146:3, 4.

Eneko eropa Genesis 3:19; Ecclesiastes 9:6, 10.

Jombï’masan Wane Nemainyatomba Eropa?

Amu i’myimbo ′wa amu tapokuru tasakarï jombï’popa amorï

O’TONO’ME MORO WOTURUPOTOPONA? Komamïseinyepa kombaijo kïtaton kïweijïkongta kapokurukon kasakarïkon maro. Kïnishanorïkon ro moro jombï’masamba kasakarïkon enesepa eropa kïweijïkon.

O’TO OPOTO PAPA KARETARÏ OMEPATONA? Tïa’ropa poreneroten jombï’masamba kari’nyakon tawonga’marïkomba epoaton omangno’wa. Jesus tïka yeípyomboman: «Mo’karon [Jeoba wonumingarïta we’chonon] tumun tanokon…kïnepa’ka’matomba.» (John 5:28, 29) Opoto Papa íshe yeípyombo pa’mero, mo’karon awonga’masamba kari’nyakon kïnepoatomba amu po’cho sherï nono ku’po tomamïrïkon. (Luke 23:43) Moro ako amï’chanamo kari’nyakon anï’po’pa kïnemainyaton, moro eropa oronome tomamïrïkon epoatomba. Opoto Papa Karetarï ïngano: «Mo’karon ju’pwïngonïmboro moro nono apoiyatomba, oronome eropa í’chu’po kïnemainyaton.» —Psalm 37:29.

Eneko eropa Job 14:14, 15; Luke 7:11-17; Acts 24:15.

Neara Wopekatïsewan Yeuran Etato’me Opoto Papa’wa?

Opoto Papa ′wa amu kari’nya euranarï

O’TONO’ME MORO WOTURUPOTOPONA? Pa’poropa pore wokunamatopo tanokon kïneuranaton Opoto Papa’wa. She’merorote tourangon eyuku’papai yeijï eneaton.

O’TO OPOTO PAPA KARETARÏ OMEPATONA? Jesus’wa tomepa kïweíshangma Opoto Papa’wa kouranarïkon poko. Tïka yeípyomboman: «Owopekatïrïkon ako pya’me me’me kïsipya’kapo’ton.» (Matthew 6:7) Opoto Papa’wa kïwopekatïrïkon etasepa kïa’tainye apokurume yeijï pa’me kïwopekatïseinye kïtaton. Íjokerote kïwomepaseinyepa kïtaton otïne Opoto Papa nishanorïme yeijï poko, íjombote moro pa’mero kouranato’kong’me í’ya. «Orongerorïpo otïro poko kïwoturuporïkon ako [Opoto Papa] íshe yeípyo pa’me a’ta kïnetanompa,» tïka 1 John 5:14 ma.

Eneko eropa Psalm 65:2; John 14:6, 14; 1 John 3:22.

Nearane Ya’ta Towa’pore Weijï Sepoan Yemamïrïta?

Amu wori a towa’pore weinyo upijï Opoto Papa Karetarï eruparï pato

O’TONO’ME MORO WOTURUPOTOPONA? Apïmye amukon towa’pore tïweijïkon eporï ekanosaton tïpïratake tïweijïkon weinyo, nuse amukong’wa tonerïkon weinyo, po’chome tïweijïkon poko eropa. Íjokero tope kïne’kuaton enïkon watonon wekenarï poko.She’merorote ta’rono tïweijïkon oneporï’papai mandon.

O’TO OPOTO PAPA KARETARÏ OMEPATONA? Jesus’wa tokarïshema neara towa’pore weinyo eporï enï pa’me tïka’pomboto: «Towa’pore mandon mo’karon Opoto Papa poko tïwomepasangon.» (Matthew 5:3) Towa’pore kïweijïkon kïsepoatomba moro ípyorono upijï ako nero’kon kïainye Opoto Papa poko, moro ícha’mato’konïmbo poko eropa. Mororo ípyorono kïnosepoan Opoto Papa Karetarïta. Moro ípyorono uputïrï kopatomatomba upu’to’me otïne tonesangmepa yeijï poko omangnota. Kopatomatomba kïwonumingarïkon ekïrïrï poko, ju’pwa nekatu eropa komamïrïkon ïpoamba. -Luke 11:28.

Eneko eropa Proverbs 3:5, 6, 13-18; 1 Timothy 6:9, 10.

Enïrote sani’myeroten Opoto Papa Karetarï’wa o’wín yopimya’po woturupoto’kon eyuku’ma’po. Moro ko’pote uputïrïse’paroman? Ko’ye ambore uputïsepama. Ambwako monumingaye eropa amukon roten woturupoto’kon poko, enïpangon ro: Tuaro Opoto Papa kïponainye a’ta o’tono’me cho’poro paneroten ya’wame weinyokon enapoan, wo’chota’manokon eropa penaro weinyomboro? Neara ambore nekatu ju’pwa yasakarïkon maro yemamïrï sïpono’poamba? Opoto Papa Karetarï ju’pwa paneroten enïkon poko kïneyusamba, apïmye eropa amukon roten woturupoto’kon.

Morote, apïmye amukon erokongme kïnoi’pyoro’katon Opoto Papa Karetarï erupwarï poko. Opotome pane moro Kareta eneaton moro eropa tope amukonïmbopo uputïrïma. Owepatomarï se’paroma moro tanokon eyu’to’kon eporï poko? Jeoba poko Worupwatonon maro oko otïkongma owepatomanemba.

Koromonema, amu kareta totïnen Amoro Opoto Papa Panarïme Meiyapa! Enïrote tomaminyamo roripo epatomanomba eneto’me í’yainye neara Opoto Papa Karetarï’wa takureme tuputïsangongpa woturupoto’kon eyukurupa. Oko ye’chopoma, epe’mame owe’tï poro owemepaton Opoto Papa Karetarï poko. O’wín amu Jeoba poko Worupwatoto kïnïsan owe’tï’wa íjose’pa a’ta owe íshe oweípyoporo asi me’me owemepato’me ekema’pa sundaka. Apïmye neroten kari’nyakon tïwosepatomapa mandon we’chopo wararo enïpangon weinyo. Mo’karon eropa tïka’mainye mandon: «Seporïpya moro ípyorono!»

Uwaro ero ko’po ju’pwïn topomïngma. Opoto Papa weinyono ípyorono morokon í’chorïpono tamï’chamïngon maro morokon ya’wangon omenanokonïmbo ambore onamï’cha’popapai kïpoatomba. Etï’ka’papai eropa kïtaton. Kïwo’po’to’kon ïamba, pyoko komamïseinye kïwe’cho’kon, towa’pore kïweijïkon eropa. Jesus tïka yeípyomboman: «Moro ípyorono mupu’ta’ton, moro ípyorono eropa ombokatomba» í’chorïponokonïmbo omepato’kon weinyo. -John 8:32.

1. Amu Kari’nya womeparï Opoto Papa Karetarï ′wa omepato’kon poko; 2. Amu wori womeparï Opoto Papa Karetarï ′wa omepato’kon poko