Toq kʼa riʼ nqatikirisaj jun qasamaj, rikʼin bʼaʼ nqabʼän qa chi qawäch re jun kʼutunïk reʼ: «¿Achike utzil xtukʼäm pe pa nuwiʼ?». ¿La itzel nqabʼän re kʼutunïk reʼ chi rij ri chʼonïk rikʼin ri Dios? Manäq. Qonojel nqajoʼ nqetamaj achike utzil nqïl toq yojchʼon rikʼin ri Dios.

Chupam ri jun kan tzijonem xtqatzʼët chi nqabʼän ri qachʼonïk rikʼin ri Dios, man xa xe ta ruma kʼo qanimabʼäl kʼuʼx o richin nqanaʼ uxlanem pa qanima. Röj yojchʼon rikʼin ri Dios ruma qetaman chi yojrakʼaxaj toq pa ruchojmil yojchʼon rikʼin chuqaʼ toq nqa chuwäch ri nqakʼutuj. Chuqaʼ rijaʼ nbʼin chi qe chi kojjel apo rikʼin (Santiago 4:8). Tqatzʼetaʼ jujun chi ke ri utzil nukʼäm pe pa qawiʼ ri chʼonïk rikʼin ri Dios.

Uxlanem pa awanima

Toq nqïl jun kʼayewal kʼo mul nqanaʼ chi achiʼel ta majun chik achike yojtikïr nqabʼän. ¿Anaʼon rat riʼ? Ri Loqʼoläj Wuj nubʼij: «Jantapeʼ kixchʼon rikʼin ri Dios» chuqaʼ «tikʼutuj chi re ri nkʼatzin chiwe» (1 Tesalonicenses 5:17; Filipenses 4:6). Chi ke ri nkikʼutuj kitoʼik, ri Loqʼoläj Wuj nubʼij: «Ri uxlanem ri npe rikʼin ri Dios [...] xtuchajij ri iwanima y xkixrutoʼ chuwäch ri chʼobʼonïk» (Filipenses 4:7). Toq nqabʼij ronojel chi re ri Qatataʼ chi kaj, más uxlanem xtqanaʼ pa qanima chuqaʼ kan achiʼel ta nel el jun ejqaʼn chi qij. Ri Loqʼoläj Wuj nubʼij: «Tayaʼ pa ruqʼaʼ ri Jehová» ri akʼayewal, ke riʼ rijaʼ «xtubʼän chawe chi kow xkakʼojeʼ» (Salmo 55:22).

«Tayaʼ pa ruqʼaʼ ri Jehová ronojel ri rukʼayewal ri kʼaslem, y rijaʼ xtubʼän chawe chi kow xkakʼojeʼ» (Salmo 55:22).

 Chi ronojel ruwachʼulew, pa millón ri winäq kinaʼon ri uxlanem riʼ. Ri Hee Ran, jun ixöq aj Corea, nubʼij: «Stapeʼ kʼo nimaʼq taq nukʼayewal, toq nukʼutuj nutoʼik chi re ri Dios, ninaʼ chi nel el jun ejqaʼn chwij chuqaʼ ninaʼ chi kʼo wuchuqʼaʼ». Chuqaʼ ri Cecilia, jun ixöq kʼo pa Filipinas, nubʼij: «Rïn kʼo chi yenchajij ri wal chuqaʼ ri nuteʼ ri man nretamaj ta chik nuwäch. Matyox chi re ri chʼonïk rikʼin ri Dios yitikïr ninbʼän ri nusamaj richin ri jujun qʼij. Wetaman chi ri Jehová yirutoʼ richin yenchajij ri wal chuqaʼ ri nuteʼ».

Nukuqubʼaʼ akʼuʼx chuqaʼ nuyaʼ awuchuqʼaʼ toq nawïl jun kʼayewal

¿Kʼo jun kʼayewal awilon o poynäq akʼuʼx ruma ri akʼaslem chawäch apo? We yachʼon rikʼin ri Dios,  ri «nukuqubʼaʼ kikʼuʼx» ri winäq, xtanaʼ uxlanem pa awanima. Ri Loqʼoläj Wuj nubʼij chi ri Dios nukuqubʼaʼ qakʼuʼx toq qilon «tijoj poqonal» (2 Corintios 1:3, 4). Kʼo jun qʼij, ri Jesús poynäq rukʼuʼx «xxukeʼ qa [...] y xuchäp kʼa chʼowen rikʼin ri Dios». ¿Achike xbʼanatäj? «Jun ángel [...] xoruyaʼ qa ruchuqʼaʼ.» (Lucas 22:41, 43.) Ri Nehemías, jun chik utziläj achin, xrïl chuqaʼ kʼayewal ruma ri itzel taq winäq xkajoʼ chi xuyaʼ kan ri Dios. Rijaʼ xukʼutuj ruchuqʼaʼ chi re ri Dios. Rikʼin ri xbʼanatäj chi rij riʼ, xqʼalajin chi ri Dios xutoʼ richin man xuxibʼij ta chik riʼ chuqaʼ richin xubʼän ri rusamaj (Nehemías 6:9-16). Chuqaʼ ri Reginald, jun achin aj Ghana, nubʼij: «Toq yichʼon rikʼin ri Dios, más toq wilon kʼayewal, ninnaʼ chi achiʼel ta nintzijoj ri nukʼayewal chi re jun winäq ri ntikïr yirutoʼ chuqaʼ nubʼij chwe chi man tpoʼ nukʼuʼx». Nqʼalajin kʼa chi toq yojchʼon rikʼin ri Dios, rijaʼ nukuqubʼaʼ qakʼuʼx.

Nuyaʼ qanaʼoj

Kʼo ri achike nqabʼän nujäl ri qakʼaslem röj chuqaʼ kikʼaslem ri qachʼalal. ¿Achike nqabʼän richin xtqachaʼ ri ütz? Ri Loqʼoläj Wuj nubʼij: «We e kʼo qachʼalal chi ikojöl ri nkajoʼ chi nkʼojeʼ kinaʼoj [más toq kilon jun kʼayewal], tkikʼutuj chi re ri Dios. Y rijaʼ kan man xtupoqonaj ta xtuyaʼ pe kʼïy chi ke» (Santiago 1:5). We nqakʼutuj qanaʼoj chi re ri Dios, rijaʼ xtukusaj ri loqʼoläj ruchuqʼaʼ richin xkojrutoʼ, ke riʼ xtqachaʼ ri ütz pa qakʼaslem. Ri Jesús xubʼij chi ri Dios nuyaʼ ri «Loqʼoläj Espíritu chi ke ri kan nkikʼutuj» chi re (Lucas 11:13).

«Xinkʼutuj nunaʼoj chi re ri Dios richin xinchaʼ jun ütz samaj.» (Kwabena, aj Ghana)

Ri Jesús xukʼutuj runaʼoj chi re ri Rutataʼ toq kʼo wi chi nubʼän jun samaj ri janila nkʼatzin. Toq xeruchaʼ ri 12 apóstoles, «jun aqʼaʼ [...] xkʼaseʼ chi chʼowen» (Lucas 6:12).

Achiʼel ri Jesús, e kʼïy winäq nkinaʼ uxlanem pa kanima toq nkitzʼët chi ri Dios xerutoʼ pe richin xkichaʼ ri ütz pa kikʼaslem. Ri Regina, jun ixöq kʼo pa Filipinas, nutzijoj ri kʼayewal rilon: ruyon yerilij ral ruma xkäm rachijil chuqaʼ majun chik rusamaj ta. ¿Achike xtoʼon richin? Rijaʼ nubʼij: «Ri chʼonïk rikʼin ri Dios ja riʼ ri toʼïk wilon». Ri Kwabena ri kʼo pa tinamït Ghana, nubʼij achike ruma nukʼutuj rutoʼik chi re ri Dios: «Kʼo wi jun utziläj nusamaj, ja kʼa man xyaʼöx ta chik chwe. Toq xinkanoj jun chik, ronojel mul xinkʼutuj nunaʼoj chi re ri Dios richin ninchaʼ jun ütz samaj. Wetaman chi ja ri Dios xitoʼon richin xinwïl jun samaj ri nuyaʼ ri nkʼatzin chwe chuqaʼ nuyaʼ qʼij chwe ninyaʼ ruqʼij ri Dios». Rat chuqaʼ ütz nakʼutuj atoʼik chi re ri Dios toq kʼo jun akʼayewal ri nanaʼ chi nritzelaj ri awachibʼilanik rikʼin ri Dios.

Chupam re tzijonem reʼ xa xe xqatzʼët kayoxiʼ chi ke ri utzil yeqïl ri yojchʼon rikʼin ri Dios. (Richin natzʼët más, tasikʼij ri recuadro « Ri utzil nukʼäm pe ri yachʼon rikʼin ri Dios».) Richin nukʼäm pe utzil pa awiʼ ri chʼonïk rikʼin ri Dios, nabʼey kʼo chi nawetamaj ruwäch ri Dios chuqaʼ ronojel ri rusujun chi qe. Kachʼon rikʼin jun ruqʼalajrisanel ri Jehová richin nawetamaj más chi rij ri Loqʼoläj Wuj. * Ja riʼ ri nabʼey rubʼanik richin yajel apo rikʼin ri Dios ri nakʼaxan «ronojel ri chʼowen» (Salmo 65:2).

^ parr. 14 We nawajoʼ nawetamaj más, kachʼon kikʼin ri ruqʼalajrisanelaʼ ri Jehová o tatzʼetaʼ ri qakʼojlibʼal pa Internet www.jw.org.