«Kʼo yan junaʼ wetaman ruwäch ri Mike. Rijaʼ jun testigo de Jehová, ja kʼa ri ru-religión rusachon nukʼuʼx. ¿Achike ri Jehová? ¿Achike ruma ri Testigos man nkibʼän ta nimaqʼij? Ninjoyowaj ruwäch ri Mike, rikʼin bʼaʼ, kʼo pa jun religión ri man ütz ta.» (Becky, aj California, Estados Unidos)

«Jun kʼulaj winäq ri e kʼo chunaqaj ri wachoch xkitikirisaj kitijonïk chi rij ri Loqʼoläj Wuj kikʼin ri Testigos. Ja kʼa rïn xinbʼij: ‹¡Testigos de Jehová! ¿Achike chi bʼiʼaj riʼ? Riʼ, achiʼel ta man ütz ta chi re rubʼiʼ jun religión›.» (Zenon, aj Ontario, Canadá)

«Rïn chuqaʼ ri wixjayil nqabʼij wi chi ri Testigos yeqʼax qikʼin xa xe richin itzel nqanaʼ qa ruma man yojbʼe ta pa iglesia. Chuqaʼ qabʼin we man qilon ta ri nqakanoj kikʼin ri religiones ri kan etaman kiwäch, ¿achike kʼa rubʼanik xtqïl kikʼin ri testigos de Jehová ri man kan ta etaman achike ri kinimanïk?» (Kent, aj Washington, Estados Unidos)

«Qitzij na wi, rïn majun wi wetaman ta achike ri testigos de Jehová o achike ri nkinimaj.» (Cecilie, aj Esbjerg, Dinamarca)

Rikʼin bʼaʼ rat atzʼeton chi ri Testigos nkitzijoj ri Ruchʼabʼäl ri Dios chi taq jay, pa taq bʼey, yekiyaʼ wuj chi ke ri winäq chuqaʼ nkisüj tijonïk chi rij ri Loqʼoläj Wuj ri man tojon ta. Rikʼin bʼaʼ ri wuj kʼo pa aqʼaʼ jun chi ke rijeʼ xyaʼon kan chawe. Chuqaʼ rikʼin bʼaʼ abʼin achiʼel kibʼin ri winäq xeqatzijoj yan kan, ke riʼ akʼutun qa chawäch, ¿achike qas ri testigos de Jehová o ruqʼalajrisanelaʼ ri Jehová?

¿Achike ütz nabʼän we nawajoʼ nawetamaj chi kij ri ruqʼalajrisanelaʼ ri Jehová? ¿Akuchi (apeʼ) nakʼutuj rutzijol ri kinimanïk? ¿Achike yeyaʼon ri pwäq richin yekibʼän ri jay richin nkiyaʼ ruqʼij ri Dios chuqaʼ ri samaj nbʼan chi rij rutzijoxik ri Loqʼoläj Wuj? ¿Achike ruma yeʼapon chi awachoch o yatkiqʼät pa bʼey?

Ri Cecilie, ri xqatzijoj yan kan, nubʼij: «Xinsikʼij kʼïy chi kij ri ruqʼalajrisanelaʼ ri Jehová pa Internet. Chuqaʼ xtzijöx molon taq tzij chuqaʼ tzʼukun taq tzij chi kij rijeʼ chwe. Ronojel riʼ xubʼän chi itzel xentzʼët». Ja kʼa toq rijaʼ xtzijon kikʼin ri ruqʼalajrisanelaʼ ri Jehová, ronojel ri man retaman ta xeqʼalajrisatäj chuwäch.

We rat nawajoʼ nawetamaj más chi kij ri ruqʼalajrisanelaʼ ri Jehová, más ütz chi ke rijeʼ nakʼutuj wi. Ruma rijeʼ man xkatkiqʼol ta toq xtkiqʼalajrisaj ri akʼutunïk, re wuj reʼ ja rijeʼ e bʼanayon (Proverbios 14:15). Nqarayibʼej kʼa chi ri tzijonem xkeqayaʼ apo xkatkitoʼ richin nawetamaj achike rijeʼ, achike nkinimaj chuqaʼ achike nkibʼän.