«Kow kixkʼojeʼ chupam ri ikuqubʼabʼäl kʼuʼx.» (1 CORINTIOS 16:13, CO)

BʼIX: 60, 64

1. a) ¿Achike xbʼanatäj rikʼin ri Pedro toq e bʼenäq pa ruwiʼ ri mar pa Galilea? (Tatzʼetaʼ ri wachibʼäl ri kʼo pe pa nabʼey chi re ri tzijonem.) b) ¿Achike ruma xbʼe qa chuxeʼ ri yaʼ ri Pedro?

KʼO JUN aqʼaʼ, ri Pedro chuqaʼ kayoxiʼ chik tijoxelaʼ e bʼenäq wi pa ruwiʼ ri mar pa Galilea, chaq kʼateʼ xpe jun nimaläj kaqʼiqʼ pa kiwiʼ. Xkitzʼët kʼa apo chi ri Jesús petenäq chi raqän pa ruwiʼ ri yaʼ. Ri Pedro xubʼij apo chi re we ütz nbʼe apo chuqaʼ rijaʼ pa ruwiʼ ri yaʼ. Ri Jesús xubʼij chi jaʼ. Ri Pedro xel pe chupam ri barco richin xbʼe apo rikʼin ri Jesús. Ja kʼa toq xbʼiyin yan jubʼaʼ, xbʼe qa chuxeʼ ri yaʼ. ¿Achike ruma? Ruma xuxibʼij riʼ toq xutzʼët apo ri nimaläj kaqʼiqʼ. Xukʼutuj kʼa rutoʼik chi re ri Jesús. Rijaʼ xuchäp (xutzʼäm) chi ruqʼaʼ chuqaʼ xubʼij: «¿Achike kʼa ruma jubʼaʼ ok xakuqubʼaʼ akʼuʼx wikʼin?» (Mateo 14:24-32).

2. ¿Achike xtqatzʼët chupam re tzijonem reʼ?

2 Chupam re tzijonem reʼ xtqetamaj oxiʼ naʼoj chi rij ri Pedro. Jun, achike rubʼanik xukʼüt chi rukuqubʼan wi rukʼuʼx rikʼin ri Jehová. Kaʼiʼ, achike ruma xkʼis qa ri rukuqubʼabʼäl kʼuʼx. Oxiʼ, achike xubʼän richin  xkʼojeʼ chik ri rukuqubʼabʼäl kʼuʼx. Ri nqetamaj chi kij reʼ yojkitoʼ richin kow xtubʼän ri qakuqubʼabʼäl kʼuʼx (1 Corintios 16:13).

TQAKUQUBʼAʼ QAKʼUʼX RIKʼIN RI JEHOVÁ

3. a) ¿Achike ruma ri Pedro xel pe chupam ri barco chuqaʼ xbʼiyin pa ruwiʼ ri yaʼ? b) ¿Achike qabʼanon röj ri junan bʼaʼ rikʼin ri xubʼän ri Pedro?

3 Toq ri Pedro xoyöx ruma ri Jesús, rijaʼ xel pe chupam ri barco chuqaʼ xbʼiyin pa ruwiʼ ri yaʼ. ¿Achike ruma xubʼän riʼ? Ruma xukuqubʼaʼ rukʼuʼx chi ri Jehová xtutoʼ achiʼel xubʼän rikʼin ri Jesús. Röj kʼo jun qabʼanon ri junan bʼaʼ rikʼin riʼ. Toq xqetamaj chi ri Jesús nubʼij chi qe chi kojok rutzeqelibʼey, xqajäch qiʼ pa ruqʼaʼ ri Jehová chuqaʼ xojqasäx pa yaʼ. ¿Achike ruma xqabʼän riʼ? Ruma xtqakuqubʼaʼ qakʼuʼx chi ri Jehová chuqaʼ ri Jesús xkojkitoʼ (Juan 14:1; tasikʼij 1 Pedro 2:21).

4, 5. ¿Achike ruma ri kuqubʼabʼäl kʼuʼx janila ruqʼij?

4 Ri kuqubʼabʼäl kʼuʼx janila ruqʼij ruma yojrutoʼ richin yeqabʼän bʼanobʼäl ri achiʼel ta man yojtikïr chi kij (Mateo 21:21, 22). Ri Pedro xtikïr xbʼiyin pa ruwiʼ ri yaʼ ruma ri rukuqubʼabʼäl kʼuʼx. Röj chuqaʼ janila oj rutoʼon ri qakuqubʼabʼäl kʼuʼx. Jun tzʼetbʼäl chi rij riʼ, kʼïy chi qe röj qajalon rubʼanik ri qanaʼoj. Ri winäq ri ketaman wi qawäch nkitzʼët chi wakami man oj junan ta chik. Röj xqajäl ri qanaʼoj ruma nqajoʼ ri Jehová chuqaʼ ruma rijaʼ xojrutoʼ (tasikʼij Colosenses 3:5-10). Chuqaʼ ruma ri qakuqubʼabʼäl kʼuʼx xqajäch qiʼ pa ruqʼaʼ ri Jehová chuqaʼ xojok rachibʼil. Ronojel riʼ xojtikïr xqabʼän ruma ri rutoʼik ri Jehová (Efesios 2:8).

5 Ri kuqubʼabʼäl kʼuʼx chuqaʼ janila ruqʼij ruma nuyaʼ quchuqʼaʼ richin nqapabʼaʼ qiʼ chi kiwäch ri rupataʼy ri Satanás chuqaʼ chi kiwäch ri kʼayewal yeqïl (Efesios 6:16). Ri Jehová nubʼij chi we xtqakuqubʼaʼ qakʼuʼx chi rij rijaʼ chuqaʼ xtqayaʼ pa nabʼey ri Ajawaren, xtuyaʼ ri xtkʼatzin chi qe (Mateo 6:30-34). Ruma ri qakuqubʼabʼäl kʼuʼx, ri Jehová xtuyaʼ qakʼaslem man kʼisel ta chuwäch ri kʼakʼaʼ ruwachʼulew (Juan 3:16).

MAN TQAYAʼ QʼIJ CHI NKʼIS RI QAKUQUBʼABʼÄL KʼUʼX

6, 7. a) ¿Achoj rikʼin ütz nqajunumaj ri kaqʼiqʼ chuqaʼ toq nbʼolqoʼt ri yaʼ? b) ¿Achike ruma qetaman chi xa bʼa achike chi qe röj rikʼin bʼaʼ nkʼis qa ri rukuqubʼabʼäl kʼuʼx?

6 Kojchʼon chik chi rij ri Pedro. ¿Achike ruma xuxibʼij riʼ toq xbʼiyin pa ruwiʼ ri yaʼ? Ri Loqʼoläj Wuj nubʼij chi ruma xerelesaj el ri runaqʼ ruwäch chi rij ri Jesús, ke riʼ xa ja ri nubʼän ri kaqʼiqʼ ri xutzʼët apo (Mateo 14:30). Ruma riʼ xkʼis qa ri rukuqubʼabʼäl kʼuʼx chuqaʼ xbʼe qa chuxeʼ ri yaʼ. Ri kaqʼiqʼ chuqaʼ toq nbʼolqoʼt ri yaʼ e achiʼel ri kʼayewal chuqaʼ ri pataʼy yeruyaʼ pe ri Satanás pa qakʼaslem. Stapeʼ e nimaʼq ri kʼayewal, ri Jehová nuyaʼ quchuqʼaʼ richin yeqaköchʼ. We röj xa chi kij ri kʼayewal xtqayaʼ qanima, ri qakuqubʼabʼäl kʼuʼx xtkʼis qa.

7 Xa bʼa achike na chi qe röj rikʼin bʼaʼ nkʼis qa ri rukuqubʼabʼäl kʼuʼx. ¿Achike ruma qetaman riʼ? Ruma ri Loqʼoläj Wuj nubʼij chi ri majun kuqubʼabʼäl kʼuʼx, ja riʼ ri «mak ri man kʼayew ta yojrutzäq» (Hebreos 12:1, TNM). We röj xa xe chi kij ri kʼayewal xkojchʼobʼon (xkojnukun), achiʼel xubʼän ri Pedro, xa xtkʼis qa ri qakuqubʼabʼäl kʼuʼx. ¿Achike rubʼanik nqetamaj chi najin nkʼis qa? Tqatzʼetaʼ jalajöj taq kʼutunïk ri yojkitoʼ richin nqetamaj.

8. ¿Achike nbʼanon chi rikʼin bʼaʼ xtkʼis qa ri qakuqubʼabʼäl kʼuʼx chi kij ri rusujun ri Jehová?

8 ¿La kʼa qakuqubʼan na qakʼuʼx chi rij ronojel ri rusujun ri Dios? Ri Jehová rubʼin chi xtuchüp yan ruwäch ri ruqʼatbʼäl tzij ri Satanás. We röj xa xtbʼe apo qanima chi kij ri kʼastajinïk e kʼo wakami, rikʼin bʼaʼ xa xtqamestaj chi xa xtchüp yan ruwäch ri itzelal (Habacuc 2:3). Chuqaʼ ri Jehová rubʼin chi yeruküy ri qamak ruma xkäm ri Jesús pa qawiʼ. Ja kʼa we röj man nqelesaj ta el pa qajolom jun mak ri qabʼanon ojer kan, rikʼin bʼaʼ xtqabʼij chi ri Jehová man oj rukuyun ta  (Hechos 3:19). Riʼ xtubʼän chi man xkojkikot ta chik xtqayaʼ ruqʼij ri Jehová chuqaʼ man xtqatzijoj ta chik ri Loqʼoläj Wuj.

9. ¿Achike xtbʼanatäj we röj xa jun chik ri xtqayaʼ más ruqʼij?

9 ¿La kʼa rikʼin na ronojel qanima najin nqayaʼ ruqʼij ri Dios? Ri nqayaʼ qanima chi rij ri qasamaj rikʼin ri Jehová, yojrutoʼ richin man nqamestaj ta ri kʼaslem man kʼisel ta. Ja kʼa ¿achike xtbʼanatäj we röj xa jun chik ri xtqayaʼ más ruqʼij? Achiʼel toq nqakʼäm jun samaj ri kʼïy ntoj chi qe chuqaʼ ri nubʼän chi man xtqayaʼ ta chik kʼïy qaramaj chi rij ri rusamaj ri Jehová. Reʼ rikʼin bʼaʼ xtubʼän chi xtkʼis qa ri qakuqubʼabʼäl kʼuʼx, ke riʼ man xtqayaʼ ta chik ruqʼij ri Jehová rikʼin ronojel qanima (Hebreos 6:10-12).

10. ¿Achike ruma nqabʼij chi toq nqaküy kimak ri winäq nqakʼüt chi kʼo qakuqubʼabʼäl kʼuʼx chi rij ri Jehová?

10 ¿La kʼayew nubʼän chi qawäch yojkuyun mak? Toq kʼo jun winäq nubʼän jun itzelal chi qe, ¿la npe qoyowal chuqaʼ man yojchʼon ta chik chi re? We nqabʼän riʼ rikʼin bʼaʼ más nqayaʼ ruqʼij ri achike nqanaʼ röj. Ja kʼa toq nqaküy kimak ri winäq nqakʼüt chi nqakuqubʼaʼ qakʼuʼx chi rij ri Jehová. ¿Achike ruma nqabʼij riʼ? Ruma qetaman chi ri Jehová xtuküy ri qamak röj, we nqaküy kimak ri winäq (Lucas 11:4). Toq yojkuyun mak nqakʼüt chi qakuqubʼan qakʼuʼx chi ri Jehová nkikot qikʼin chuqaʼ chi xtuküy ri qamak röj. Reʼ kʼo más ruqʼij chuwäch ri nabʼän chi winäq nkitöj ri kimak. Ri rutzeqelibʼey ri Jesús ketaman wi chi richin naküy rumak jun winäq nkʼatzin kʼo akuqubʼabʼäl kʼuʼx. Ruma riʼ toq ri Jesús xubʼij chi ke chi tkikuyuʼ chuqaʼ kimak ri man yeʼajowan ta kichin, xkibʼij chi re chi tuyaʼ más kikuqubʼabʼäl kʼuʼx (Lucas 17:1-5).

11. ¿Achike ri man ütz ta nqabʼän toq jun winäq nuyaʼ jun qanaʼoj?

11 ¿La npe qoyowal toq nyaʼöx jun qanaʼoj? Toq kʼo jun winäq nuyaʼ jun qanaʼoj, tqatzʼetaʼ ri rubʼanik xkojrutoʼ ri naʼoj. Ruma we xa ja ri rumak ri winäq xtqatzʼët o xa xtqakanoj achike ri man ütz ta xtubʼij pe chi qe, majun achike ta xtqetamaj (Proverbios 19:20). Más ütz nakuqubʼaʼ akʼuʼx chuqaʼ natzʼët ri naʼoj achiʼel jun atoʼik richin yachʼobʼon achiʼel ri Jehová.

12. ¿Achike nqakʼüt toq yojchʼon itzel chi kij ri e ukʼwayon bʼey pa congregación?

12 ¿Yojchʼon itzel chi kij ri e ukʼwayon bʼey pa congregación? Toq ri israelitas xkakʼaxaj ri itzel taq rutzijol xkiyaʼ ri lajuj nachanelaʼ, xechʼon itzel chi rij ri Moisés chuqaʼ ri Aarón. Ruma riʼ ri Jehová xubʼij chi re ri Moisés: «¿Kʼa jampeʼ kʼa xketaneʼ re winaqiʼ richin yinkitzelaj? ¿Kʼa jampeʼ xtapon ri qʼij richin chi rijeʼ nkikuqubʼaʼ ta kikʼuʼx wikʼin [...]?» (Números 14:2-4, 11). Toq ri israelitas xechʼon itzel chi kij ri achiʼaʼ ri e ruyaʼon ri Jehová pa kiwiʼ xkikʼüt chi majun kikuqubʼan ta kikʼuʼx chi rij rijaʼ. Ke riʼ chuqaʼ wakami, we röj yojchʼon itzel chi kij ri achiʼaʼ e ruchaʼon ri Jehová richin yeʼukʼwan bʼey pa congregación, nqakʼüt chi najin nkʼis qa ri qakuqubʼabʼäl kʼuʼx chi rij ri Jehová.

13. ¿Achike ruma man ütz ta npoʼ qakʼuʼx we nqʼalajin chi qawäch chi ri qakuqubʼabʼäl kʼuʼx najin nkʼis qa?

13 We kikʼin ri kʼutunïk xeqatzʼët qa, nqʼalajin chi qawäch chi ri qakuqubʼabʼäl kʼuʼx najin nkʼis qa, mani npoʼ qakʼuʼx. Toqa kʼa chi qe chi ri Pedro xuxibʼij riʼ chuqaʼ xkʼis qa ri rukuqubʼabʼäl kʼuʼx. Chuqaʼ ri Jesús kʼo mul xuyaʼ kinaʼoj konojel ri apóstoles ruma majun kʼïy ta kikuqubʼabʼäl kʼuʼx (Mateo 16:8). Ri xubʼän ri Pedro toq xkʼis yan ri rukuqubʼabʼäl kʼuʼx chuqaʼ toq xunaʼ chi bʼenäq qa chuxeʼ ri yaʼ, kʼïy nukʼüt kan chi qawäch.

KOW TQABʼANAʼ CHI RE RI QAKUQUBʼABʼÄL KʼUʼX

14, 15. a) ¿Achike xubʼän ri Pedro toq xbʼe qa chuxeʼ ri yaʼ? b) ¿Achike nqabʼän röj wakami richin nqatzʼët ri Jesús?

14 ¿Achike xubʼän ri Pedro toq xbʼe qa chuxeʼ ri yaʼ? Rijaʼ retaman wi nmuxan, xa ta rijaʼ xrajoʼ xtzolin ta apo chupam ri barco (Juan 21:7). Majun kʼa xubʼän ta riʼ. ¿Achike ruma? Ruma man xrajoʼ ta xutoʼ riʼ ruyon, rijaʼ xutzuʼ (xutzʼët) apo  ri Jesús richin xukʼutuj rutoʼik chi re. We röj nqatzʼët chi ri qakuqubʼabʼäl kʼuʼx najin nkʼis qa, tqakʼamaʼ qanaʼoj chi rij ri Pedro. ¿Achike rubʼanik?

15 Ri Pedro xutzuʼ apo ri Jesús. Röj chuqaʼ kʼo chi nqatzuʼ ri Jesús, achiʼel nubʼij ri Loqʼoläj Wuj (Hebreos 12:2, 3). (Tatzʼetaʼ ri recuadro «¿Achike nel chi tzij?».) Wakami röj man yojtikïr ta nqatzʼët ri Jesús achiʼel ri Pedro. Ruma riʼ, ¿achike rubʼanik nqatzʼët röj ri Jesús? Ja ri nqetamaj chi rij ri xubʼän, ri xukʼüt chuqaʼ nqakʼäm qanaʼoj chi rij. Ja riʼ xkojtoʼon richin kow chik xtubʼän ri qakuqubʼabʼäl kʼuʼx. Tqatzʼetaʼ jujun rubʼanik nqakʼäm qanaʼoj chi rij ri Jesús.

Toq nqayaʼ qanima chi rij ri tzʼetbʼäl xuyaʼ kan ri Jesús chuqaʼ nqasamajij, ri qakuqubʼabʼäl kʼuʼx más kow xtubʼän (Tatzʼetaʼ ri chʼutitanaj 15)

16. ¿Achike nqabʼän richin más kow xtubʼän ri qakuqubʼabʼäl kʼuʼx?

16 Tqakusaj ri Loqʼoläj Wuj richin nkʼojeʼ más qakuqubʼabʼäl kʼuʼx. Ri Jesús retaman wi chi ri Loqʼoläj Wuj rikʼin ri Dios petenäq wi chuqaʼ e kʼo utziläj taq naʼoj chupam (Juan 17:17). We nqajoʼ nqakʼäm qanaʼoj chi rij ri Jesús chuqaʼ kow nubʼän ri qakuqubʼabʼäl kʼuʼx, ronojel qʼij tqasikʼij ri Loqʼoläj Wuj chuqaʼ kojchʼobʼon chi rij ri nqasikʼij. Chuqaʼ tqakanoj kiqʼalajrisaxik ri qakʼutunïk. Achiʼel reʼ: ¿La qitzij chawäch rat chi oj kʼo rukʼisibʼäl taq qʼij? Keʼasikʼij ri profecías chi rij ri rukʼisibʼäl taq qʼij. ¿La qitzij chawäch rat chi ri Jehová xtubʼän ri rusujun? Keʼasikʼij chi kij ri profecías ri xebʼanatäj yan. ¿La qitzij chawäch rat chi ri naʼoj yeruyaʼ ri Loqʼoläj Wuj qitzij yojkitoʼ wakami? Tasikʼij chi rij kikʼaslem ri qachʼalal ri más ütz kibʼanon wakami ruma kisamajin ri naʼoj yeruyaʼ ri Loqʼoläj Wuj. We xtabʼän riʼ más kow xtubʼän ri akuqubʼabʼäl kʼuʼx (1 Tesalonicenses 2:13). *

17. ¿Achike xtoʼon ri Jesús richin xeruköchʼ ri nïm taq kʼayewal?

17 Kojchʼobʼon (kojnukun) chi rij ri rusujun ri Jehová chi qe. Ri Jesús xchʼobʼon chi rij ri xusüj ri Jehová chi re. Ja riʼ xtoʼon richin xeruköchʼ ri nïm taq kʼayewal (Hebreos 12:2). Rijaʼ majun xuyaʼ ta ranima chi rij ri yerusüj re jun kʼaslem reʼ  (Mateo 4:8-10). ¿Achike rubʼanik nqakʼäm qanaʼoj chi rij ri Jesús? Ja ri yojchʼobʼon chi rij ri rusujun ri Jehová chi qe. Kachʼobʼon chi rij ri kʼaslem chuwäch ri kʼakʼaʼ ruwachʼulew. Ütz natzʼibʼaj o nabʼän ruwachibʼäl ri xtawajoʼ xtabʼän chi riʼ. Chuqaʼ ütz natzʼibʼaj kibʼiʼ ri winäq ri xkekʼastäj ri achoj rikʼin xtawajoʼ xkatzijon, chuqaʼ ri xtawajoʼ xtatzijoj chi ke. Toqa pa ajolom chi ronojel ri rusujun ri Dios, chuqaʼ chawe rat rusujun wi.

18. ¿Achike yojtoʼon richin nkʼojeʼ más qakuqubʼabʼäl kʼuʼx?

18 Tqakʼutuj más qakuqubʼabʼäl kʼuʼx chi re ri Jehová. Ri Jesús xubʼij chi ke rutzeqelibʼey chi tkikʼutuj ri loqʼoläj espíritu chi re ri Jehová. Ri kuqubʼabʼäl kʼuʼx jun peraj chi re ruwäch ri espíritu (Lucas 11:9, 13). Chuqaʼ ütz nqakʼutuj chi re ri Jehová chi kojrutoʼ richin nqapabʼaʼ qiʼ chi kiwäch ri yeqasan ruchuqʼaʼ ri qakuqubʼabʼäl kʼuʼx. Achiʼel toq nqanaʼ chi kʼayew nqaküy rumak jun winäq, tqakʼutuj chi re ri Jehová chi kow tubʼanaʼ chi re ri qakuqubʼabʼäl kʼuʼx chuqaʼ kojrutoʼ richin yojkuyun mak.

19. ¿Achike winäq ütz yeʼok qachibʼil?

19 Keqachibʼilaj ri kow kikuqubʼabʼäl kʼuʼx. Ri Jesús xuchaʼ achike xeʼok rachibʼil. Ri utziläj taq rachibʼil ja ri apóstoles, ruma majun xkiqʼäj ta rutzij ri Dios chuqaʼ xkinimaj rutzij rijaʼ (tasikʼij Juan 15:14, 15). Röj chuqaʼ nkʼatzin yeʼok qachibʼil ri kow rubʼanon ri kikuqubʼabʼäl kʼuʼx chuqaʼ nkinimaj rutzij ri Jesús. Ri utziläj taq achibʼil majun achike ta xtqewaj chi qawäch. We nkʼatzin nkiyaʼ jun qanaʼoj, xtkiyaʼ chi qe. Chuqaʼ xkojkakʼaxaj we ja röj ri kʼo chi xkojyaʼon kinaʼoj (Proverbios 27:9).

20. ¿Achike ruma kʼo chi nqakʼäm runaʼoj ri Jesús?

20 Keqatoʼ ri winäq richin kow nubʼän ri kikuqubʼabʼäl kʼuʼx. Ri Jesús kʼïy achike xubʼän chuqaʼ xubʼij richin más kow xubʼän ri kikuqubʼabʼäl kʼuʼx ri rutzeqelibʼey (Marcos 11:20-24). Röj kʼo chi nqakʼäm runaʼoj ri Jesús. Ke riʼ más kow xtubʼän ri qakuqubʼabʼäl kʼuʼx röj chuqaʼ ri winäq (Proverbios 11:25). ¿Achike rubʼanik yeqatoʼ ri winäq? Toq nqatzijoj ri Loqʼoläj Wuj tqatzijoj achike ruma nqanimaj chi kʼo ri Dios, chi yojrajoʼ chuqaʼ chi rijaʼ bʼanayon ri Loqʼoläj Wuj. Chuqaʼ ütz yeqatoʼ ri qachʼalal pa congregación richin nkʼojeʼ más kikuqubʼabʼäl kʼuʼx. Achiʼel toq jun qachʼalal nchʼon itzel chi kij ri ukʼwäy taq bʼey, mani nqayoqʼ chuqaʼ mani nqabʼän chi man yojchʼon ta chik rikʼin. Ütz nqatoʼ richin nkʼojeʼ más rukuqubʼabʼäl kʼuʼx chi rij ri Jehová chuqaʼ man nuqasaj ta kiqʼij ri qachʼalal (Judas 22, 23). ¿At jun kʼajol o jun xtän ri kʼo pa tijobʼäl? We ri atijonel nchʼon chi rij ri evolución, mani naxibʼij awiʼ natzijoj apo chi ronojel ja ri Dios bʼanayon. Mani nachʼöbʼ chi ri atijonel chuqaʼ ri awachibʼil xkatkiyoqʼ. Rikʼin bʼaʼ xa xtqa chi kiwäch ri xtatzijoj.

21. ¿Achike qatoʼik xtuyaʼ chi qajujunal ri Jehová?

21 Achiʼel xqatzʼët qa, ri Jehová chuqaʼ ri Jesús xkitoʼ ri Pedro richin xel el ri ruxibʼirïk chuqaʼ richin kow xubʼän ri rukuqubʼabʼäl kʼuʼx. Chi rij riʼ, ri Pedro xbʼeʼok jun nimaläj tzʼetbʼäl chi rij ri kuqubʼabʼäl kʼuʼx. Ri Jehová xkojrutoʼ chuqaʼ chi qajujunal röj richin kow xtubʼän ri qakuqubʼabʼäl kʼuʼx (tasikʼij 1 Pedro 5:9, 10). Stapeʼ kʼo chi xtqaxïkʼ qiʼ, we xtqabʼän kʼo utzil xtukʼäm pe chi qe.

^ parr. 16 Tatzʼetaʼ ri peraj «Ri Loqʼoläj Wuj xujäl rubʼanik ri kikʼaslem» chupam wuj ri Nyaʼon Rutzijol.