E kʼo winäq yebʼin ri nanimaj chi xkekʼastäj ri kaminaqiʼ xa at qʼolotajnäq. Ja kʼa ri apóstol Pablo man ke riʼ ta chuwäch, ruma riʼ xubʼij: «We ri oyobʼenriʼïl rikʼin ri Cristo xa xe ta richin» re kʼaslem reʼ «kan rukʼamon ta chi más njoyowäx qawäch röj ke chi kiwäch konojel ri winaqiʼ. Ja kʼa ri Cristo kan xkʼastäj wi el. Ja rijaʼ ri nabʼey ri xkʼastäj el chi kikojöl ri chʼaqa chik kaminaqiʼ» (1 Corintios 15:19, 20). Chuwäch ri Pablo, ri kikʼasojixik ri kaminaqiʼ kan qitzij wi. ¿Achike ruma? Ruma ri Jesús kan qitzij wi xkʼastäj yan (Hechos 17:31). Ri Pablo xubʼij chi ri Jesús ja riʼ «ri nabʼey ri xkʼastäj» richin xyaʼöx rukʼaslem man kʼisel ta. Ruma riʼ toq nbʼïx chi ja ri Jesús ri nabʼey, nel chi tzij chi e kʼo más kaminaqiʼ xkekʼastäj.

Ri Job xubʼij chi re ri Dios: «Rat kan janila nawajoʼ natzuʼ chik ri abʼanon rikʼin aqʼaʼ». (Job 14:14, 15)

Kʼo chik jun ruma nqabʼij chi qitzij xkekʼastäj ri kaminaqiʼ. Ri Jehová, jun «Dios kan nubʼän wi ri rubʼin» (Tito 1:2). Rijaʼ majun bʼey rubʼanon ta jun tzʼukun tzij chuqaʼ majun bʼey xtubʼän ta. Ruma riʼ ¿ütz kami nqakuqubʼaʼ qakʼuʼx chi rij ri Dios ri nubʼij chi xkerukʼasoj ri kaminaqiʼ chuqaʼ kʼo ruchuqʼaʼ richin nubʼän riʼ, kʼa riʼ man nubʼän ta? Ri Dios kan xtubʼän ri nubʼij, rijaʼ majubʼey xkojruqʼöl ta.

¿Achike ruma ri Jehová xkerukʼasoj ri kaminaqiʼ? Ruma ri rajowabʼäl. Ri Job xukʼutuj chi re: «We jun winäq nkäm, ¿ntikïr nkʼaseʼ chik jun mul?» (Job 14:14, TNM). Chi rij riʼ xubʼij chik, rat «xkinawoyoj, y rïn kan xtinkʼulubʼaʼ apo ri achʼabʼäl, ruma rat kan janila nawajoʼ natzuʼ chik ri abʼanon rikʼin aqʼaʼ» (Job 14:15). Ri Job kan qitzij chuwäch chi ri nimaläj Rutataʼ chi kaj nurayibʼej xtuyaʼ chik rukʼaslem. ¿Kʼa ja riʼ na ri rurayibʼal ri Dios wakami? Jaʼ, rijaʼ nubʼij chupam ri Loqʼoläj Wuj: «Rïn majun bʼey yijalatäj ta» (Malaquías 3:6). Qitzij na wi, rijaʼ kan nurayibʼej wi yerukʼasoj  ri kaminaqiʼ richin xkekikot pa kikʼaslem. Xa bʼa achike tataʼaj nrajoʼ riʼ pa kiwiʼ ri ralkʼwal. Ri ütz chi re ri Dios, man xa xe ta nurayibʼej, rijaʼ kʼo chuqaʼ ruchuqʼaʼ richin nubʼän riʼ (Salmo 135:6).

Ri kamïk achiʼel ta majun chik rusolïk, ja kʼa ri Dios man kʼayew ta xtuyaʼ rusolïk

Ri Jehová xtuyaʼ pa ruqʼaʼ ri Rukʼajol ri kikʼasojinik ri kaminaqiʼ. Konojel ri winäq ri kaminäq el jun kachʼalal janila na wi xkekikot toq xkekʼastäj pe ri kaminaqiʼ. Ri Jesús chuqaʼ nkikot xtubʼän ri samaj riʼ. ¿Achike ruma nqabʼij riʼ? Ruma toq majani wi tukʼasoj ri Lázaro, rijaʼ xutzʼët chi ri ranaʼ ri Lázaro chuqaʼ ri más winäq yeʼoqʼ, rijaʼ chuqaʼ «xoqʼ» (Juan 11:35). Jun chik qʼij, toq xutzʼët jun malkaʼn ixöq xkäm ral, janila «xujoyowaj ruwäch, y xubʼij chi re: Man katoqʼ», chi rij riʼ xukʼasoj ri ral (Lucas 7:13, CR). Kikʼin re tzijonem reʼ nqetamaj chi ri Jesús nqʼaxon chuqaʼ ranima toq nutzʼët ri qʼaxomal nuyaʼ ri kamïk. Ri Jesús kan janila na wi xtkikot xkerukʼasoj ri kaminaqiʼ, pa rukʼexel ri bʼis xa xtkʼojeʼ ¡jun nimaläj kikotem kikʼin ri winäq!

¿La kʼo jun awachʼalal rat kaminäq el? Rikʼin bʼaʼ rat nabʼij chi ri kamïk majun chik rusolïk ta. Ja kʼa ri Dios majun kʼayew ta nubʼän chuwäch yerukʼasoj chik ri kaminaqiʼ. Rijaʼ ruyaʼon chik ri samaj riʼ pa ruqʼaʼ ri Rukʼajol. Toqa chawe chi ri Dios nrajoʼ chi rat xkeʼakʼül apo ri awachʼalal toq xkekʼastäj pe. ¿Achike nabʼij riʼ chi rat junan chik at kʼo kikʼin ri awachʼalal chuqaʼ yixtzijon chi rij ri xtibʼän pa ikʼaslem man kʼisel ta? Qitzij na wi, rat kan xkakikot ruma majun bʼey chik xtijäch ta iwiʼ kikʼin ri awachʼalal.

Ri Lionel, ri achin ri xqabʼij kan pa nabʼey, nubʼij: «Toq xtzijöx chwe chi xkekʼastäj chik ri kaminaqiʼ, kʼayew xubʼän chi nuwäch xinnimaj. Ninbʼij wi rïn chi xa najin yinkiqʼol. Kʼa toq xintzʼët na chupam ri Loqʼoläj Wuj kʼa riʼ xinnimaj chi qitzij. Wakami, ¡rïn kan woyobʼen chik apo ri qʼij richin xtintzʼët chik ri numamaʼ!».

¿Nawajoʼ nawetamaj más? Ri ruqʼalajrisanelaʼ ri Jehová yekikot xtkikʼüt chawäch rikʼin ri Loqʼoläj Wuj achike ruma qitzij chi kiwäch rijeʼ chi xkekʼastäj ri kaminaqiʼ. *

^ parr. 9 Tatzʼetaʼ ri tanaj 7 chi re ri wuj ¿Achike nukʼüt ri Loqʼoläj Wuj?, riʼ kiwuj ri ruqʼalajrisanelaʼ ri Jehová.