¿Achike ruma oj kʼo chi ruwachʼulew?

¿Awetaman rat achike ruma man kʼïy ta junaʼ yojkʼaseʼ?

¿La kʼo jun mul akʼutun qa chawäch rat achike ruma oj kʼo chi ruwachʼulew? ¿Xa xe kami richin yojetzʼan, yojsamäj, yojkʼuleʼ, nkʼojeʼ qalkʼwal chuqaʼ yojrijïx? (Job 14:1, 2.) Ri Loqʼoläj Wuj nubʼij ajun ri nimaläj taq etamanelaʼ kibʼanon qa chi kiwäch ri kʼutunïk riʼ (tasikʼij Eclesiastés 2:11).

Richin nqetamaj achike ruma oj kʼo chi ruwachʼulew, nabʼey kʼo chi nqetamaj achike rubʼanik xtikïr pe ri qakʼaslem. E kʼïy winäq toq yechʼobʼon (yenukun) chi rij rubʼanik ri qajolom chuqaʼ ri qachʼakul, qʼaxnäq chi kiwäch chi kʼo jun Winäq oj bʼanayon. Ri Winäq riʼ kan janila retamabʼal (tasikʼij Salmo 139:13, 14). We ke riʼ, kʼo na wi jun achoj ruma toq xojrubʼän. Toq nqetamaj riʼ, yojrutoʼ richin xtqayaʼ más ruqʼij ri qakʼaslem.

¿Achike ruma xojrubʼän ri Dios?

Toq ri Dios xerubʼän ri nabʼey taq winäq xuyaʼ jun utziläj samaj pa kiwiʼ. Rijaʼ nrajoʼ wi chi ri winäq riʼ xkinojisaj ta ruwäch ri Ruwachʼulew kikʼin ri kalkʼwal chuqaʼ xkikotzʼijaj ta ruwäch. Ke riʼ xekʼojeʼ ta jantapeʼ (chi jumul) chi ruwachʼulew (tasikʼij Génesis 1:28, 31).

Toq ri nabʼey taq winäq xkiqʼäj rutzij ri Dios, rijaʼ man xumestaj ta qa ri rurayibʼal pa kiwiʼ. Ri Loqʼoläj Wuj nubʼij chi ri Dios kan xa xe kʼa riʼ samajinäq pe richin yeruköl ri utziläj taq rusamajelaʼ chuqaʼ richin xtbʼanatäj ri rurayibʼal chi ruwachʼulew. Ri Dios chuqaʼ nrajoʼ chi rat yakikot pa akʼaslem, jun kʼaslem ri rajowan wi rijaʼ pa qawiʼ (tasikʼij Salmo 37:29). Ri Loqʼoläj Wuj nubʼij achike kʼo chi nqabʼän richin chi ri rubʼanik ri qakʼaslem nuxïm riʼ rikʼin ri rurayibʼal ri Dios.