Xa kʼa riʼ bʼaʼ xeʼelesäx pe kʼïy wuj ri yetzijon chi rij ri runimanïk ri jun moloj rubʼiʼ Nuevo Ateísmo. Ri wuj riʼ e kʼïy winäq yesikʼin, e kʼo ütz yechʼon chi kij chuqaʼ e kʼo ri man nqa ta chi kiwäch. Kʼo jun neurocientífico rubʼiʼ David Eagleman xubʼij: «E kʼïy chi ke ri yesikʼin ri wuj riʼ nkibʼij chi ri ciencia retaman chik ronojel». Chuqaʼ xubʼij: «Ri nimaläj taq etamanelaʼ majun bʼey nkibʼij ta chi ketaman chik ronojel, ruma toq natzʼët ronojel ri rubʼanon pe ri ciencia kʼïy achike rujalon».

Chupam ronojel ri junaʼ e qʼaxnäq pe, achiʼaʼ chuqaʼ ixoqiʼ ri janila ketamabʼal kilon pe kiqʼalajrisaxik ri nimaläj taq kʼutunïk chi rij ri ciencia. Chuqaʼ kʼo mul e sachnäq. Achiʼel ri Isaac Newton xubʼij chi ri ruchuqʼaʼ ri gravedad ja riʼ ri nbʼanon chi ri planetas, ri chʼumil chuqaʼ ri tzobʼaj taq chumilaʼ man nkijäch ta kiʼ. Chuqaʼ rijaʼ xtzʼukun ri cálculo, ri jun ruqʼaʼ ri matemática ri nkʼatzin richin yebʼan samaj pa taq computadoras, richin yabʼe näj chi kaj chuqaʼ richin ri física nuclear. Stapeʼ kʼïy retamabʼal, ri Newton man xa xe ta ri ciencia xunimaj, rijaʼ xunimaj ri alquimia, jun naʼoj ri nukusaj ri magia chuqaʼ ri astrología richin nabʼän oro chi ke ri chʼichʼ achiʼel ri plomo.

Jun 1.500 junaʼ toq majani tkʼojeʼ ri Newton, jun astrónomo griego rubʼiʼ Tolomeo xtikïr xutzijoj achike kibʼanon ri planetas chi kaj. Rijaʼ majun samajibʼäl ta xukusaj, xa xe xunikʼoj ri kaj. Chuqaʼ xbʼeʼok jun bʼanöy mapas. Rijaʼ nubʼij wi chi ri Ruwachʼulew ja riʼ ri rukʼuʼx ri kajulew. Ri Carl Sagan, jun astrofísico, xubʼij: «Ri xubʼij ri Tolomeo chi rij ri Ruwachʼulew, 1.500 junaʼ xnimäx, reʼ nukʼüt chi qawäch chi stapeʼ jun winäq kʼo janila retamabʼal kʼo mul nsach».

Wakami, kʼo chuqaʼ kʼayewal yekïl ri etamanelaʼ. Qitzij na wi, ri ciencia kʼïy utzil rubʼanon pa qawiʼ, ja kʼa man tqamestaj chi kʼo ri man ntikïr ta nubʼän. ¿Kʼo kami jun qʼij xtqetamaj ronojel chi rij ri kajulew? Ri jun físico rubʼiʼ Paul Davies nubʼij: «Nawetamaj ronojel chi rij ri kajulew, majun bʼey xtbʼanatäj ta». Ri xubʼij rijaʼ qitzij, röj majun bʼey xkojtikïr ta xtqetamaj ronojel ri kʼo chi qij chuqaʼ chi qawäch. Ruma kʼa riʼ, toq jun winäq nubʼij chi ri ciencia ntikïr nuqʼalajrisaj ronojel, man tqanimaj ronojel.

Ri Loqʼoläj Wuj nuyaʼ ri man ntikïr ta nuyaʼ ri ciencia

Ri Loqʼoläj Wuj nubʼij chi rij ronojel ri nqatzʼët chi kaj chuqaʼ chi ruwachʼulew: «Ronojel reʼ xa kan xa xe ok ti ruchiʼ ri rubʼanobʼal ri Dios; reʼ kan man jun ok chi re ronojel ri ntikïr nubʼän rijaʼ» (Job 26:14). Röj winäq kʼo kʼïy ri man yojtikïr ta nqatzʼët chuqaʼ nqʼax chi qawäch. Ri rutzij ri apóstol Pablo, ri xa nubʼän yan jun 2.000 junaʼ kerubʼij kʼa kʼo kejqalem: «Ri Dios kan janila wi naʼoj, bʼeyomäl y etamabʼäl kʼo rikʼin. Röj kan man nqʼax ta chi qawäch ri ruchʼobʼonïk, y man nqʼax ta chuqaʼ chi qawäch ri rubʼey» (Romanos 11:33).