Ri winäq kibʼanon chi ri kʼaslem más kʼayew xtubʼän apo. ¿La xtuyaʼ na qʼij ri Dios chi ri winäq xtkitzelaj más ri kʼaslem? Manäq. Achiʼel ri xqatzʼët kan, ri Dios xa xtuchüp yan kiwäch ri qʼatöy taq tzij chuqaʼ ri itzelal kibʼanon chi ke ri winäq. Ri Dios, ri xbʼanon kichin ri winäq chuqaʼ ri Ruwachʼulew, nrajoʼ chi nqetamaj chi xa xtukʼïs yan ruwäch ri itzelal. ¿Achike rubʼanik nuyaʼ pe rutzijol chi qe?

Jun tzʼetbʼäl. Tabʼanaʼ chi re chi rat yabʼe pa jun tinamït ri majun bʼey at bʼenäq ta. Richin riʼ rat nabʼey na wi xtanikʼoj jun mapa richin xtatzʼët achike bʼey xtakʼwaj. Toq at bʼenäq chik, nqʼalajin chawäch chi ronojel ri natzʼët, ja riʼ ri nubʼij ri mapa. Ja riʼ nbʼin chawe chi naqaj chik at kʼo chi re ri tinamït. Achiʼel ri mapa, ri Dios ruyaʼon ri Loqʼoläj Wuj chi qe. Chupam riʼ nutzijoj chi qe ri jalajöj taq bʼanobʼäl xkebʼanatäj toq xa xtapon yan ri rukʼisibʼäl qʼij. Ronojel junaʼ ri yeqʼax, nqatzʼët chi ronojel ri yebʼanatäj chi ruwachʼulew tzʼibʼatäl kan chupam ri Loqʼoläj Wuj. Ja riʼ nbʼin chi qe chi ri royowal ri Dios naqaj chik kʼo pe.

Ri Loqʼoläj Wuj nubʼij chi toq xa jubʼaʼ chik nrajoʼ man tapon ri qʼij richin royowal ri Dios, kʼïy kʼayewal xkebʼanatäj. Ri winäq xkekitzʼët jalajöj taq bʼanobʼäl ri majun bʼey e bʼanatajnäq ta pa jun bʼey. Tqatzʼetaʼ jujun chi ke riʼ.

1. JALAJÖJ TAQ KʼAYEWAL Ri capítulo 24 chi re ri Mateo nchʼon chi rij jun etal ri e kʼo jalajöj taq bʼanobʼäl chupam. Ronojel ri bʼanobʼäl riʼ retal chi oj kʼo rukʼisibʼäl taq qʼij, jun ramaj ri xtbʼekʼis rikʼin ri qʼij toq ri Dios xtukʼäm pe royowal (versículos 3 chuqaʼ 14). Jujun chi ke ri bʼanobʼäl riʼ ja ri nimaʼq taq oyowal (chʼaʼoj), wayijal, kabʼraqän, kamisanïk, ri winäq majun chik ajowabʼäl kikʼin chuqaʼ ri nimabʼäl taq kʼuʼx xa xe qʼoloj yekibʼän (vesículos 6 kʼa 26). Qitzij na wi, re bʼanobʼäl reʼ e bʼanatajnäq pe ri ojer kan. Ja kʼa majun bʼey wi e bʼanatajnäq ta achiʼel ri wakami. Chuqaʼ ri bʼanobʼäl riʼ junan xkebʼanatäj kikʼin re oxiʼ profecías reʼ.

2. XTITZELATÄJ KINAʼOJ RI WINÄQ Ri Loqʼoläj Wuj nubʼij chi chupam ri «rukʼisibʼäl taq qʼij» ri winäq xtitzelatäj kinaʼoj. Nubʼij chi «xa xe rijeʼ ri xtkipoqonaj qa kiʼ, kan xtbʼe kanima chi rij ri mero [pwäq], janila xtkinimirisaj kiʼ e yoqʼonelaʼ, man xtkinimaj ta kitzij ri kiteʼ kitataʼ, man xkematyoxin ta, man xtkiyaʼ ta ruqʼij ri Dios, [...] ni man xkekuyun ta, xketzʼukun tzij, xtikʼo ruwiʼ ri itzel ri xtkibʼän [...], jantapeʼ xkeʼoyowär, kan xtkitzelaj ri ütz, xkepiskolin chi kij ri kachibʼil, [...] más xtkajoʼ ri kikotem richin re ruwachʼulew, ke chuwäch xtkajoʼ ta ri Dios» (2 Timoteo 3:1-4). Qitzij na wi, ri naʼoj riʼ ojer riʼ e bʼanatajnäq pe, ja kʼa chupam ri «rukʼisibʼäl taq qʼij» xtqʼax ruwiʼ. Ruma riʼ, ri Loqʼoläj Wuj nubʼij ri qʼij riʼ kʼayew xtubʼän. ¿Nabʼij rat chi ja riʼ kinaʼoj ri winäq wakami?

3. RI WINÄQ XKITZELAJ RI RUWACHʼULEW Ri Loqʼoläj Wuj nubʼij chi ri Dios xtuchüp kiwäch ri yeʼitzelan ri Ruwachʼulew (Apocalipsis 11:18). ¿Achike rubʼanik najin nitzeläx ri Ruwachʼulew wakami? Achiʼel xbʼan chi re ri pa ruqʼij kan ri Noé: «Ri winaqiʼ chuwäch re ruwachʼulew kan yojtajnäq chik kʼa ri kibʼanobʼal [...] Y toq ri Dios xutzʼët ronojel reʼ, chi xa xe ri itzelal nkibʼän [...] ja riʼ toq rijaʼ xubʼij chi re ri Noé: Xinchʼobʼ chi yenkʼïs konojel ri kʼo kikʼaslem chuwäch ri ruwachʼulew, ruma ri ruwachʼulew kʼisnäq pa rukʼayewal» (Génesis 6:11-13). ¿Atzʼeton rat chi jujun qʼij nqʼax más itzelal yebʼanatäj? Chuqaʼ man xa xe ta riʼ, wakami kʼo jun ri nbʼanatäj ri majun bʼey tzʼeton ta: ri nimaläj taq qʼaqʼ e kibʼanon ri winäq yetikïr nkitzelaj ri Ruwachʼulew chuqaʼ yekikʼïs ri winäq. Chuqaʼ kʼo chik jun rubʼanik ri winäq najin nkitzelaj ri  Ruwachʼulew: najin nkitzelaj ri kaqʼiqʼ, ri yaʼ, ri tikoʼn chuqaʼ achike chik na jun ri nyaʼon ri kʼaslem.

Kachʼobʼon (kanukun) chi rij reʼ: ri pa jun cien junaʼ kan, ¿la yetikïr kami ri winäq nkikʼïs kiwäch ri winäq? Majun, ja kʼa ri wakami man kʼayew ta nubʼän chi kiwäch. Ri jampeʼ chi qʼaqʼ kʼo kikʼin chuqaʼ ri itzelal kibʼanon chi re ri Ruwachʼulew nubʼij chi yetikïr. Ri winäq majun kʼa yetikïr ta nkitzʼët chuqaʼ nkiqʼät ri achike xtukʼäm pe pa kiwiʼ ronojel ri nimaläj taq samajibʼäl yekibʼän pe. Ri Dios majun kʼa xtuyaʼ ta qʼij chi ri winäq xtkichüp ruwäch ri Ruwachʼulew. Ri Dios nubʼij chi xa rijeʼ xtchüp kiwäch.

4. XTITZIJÖX RI LOQʼOLÄJ WUJ RONOJEL RUWACHʼULEW Jun chik retal ri rukʼisibʼäl taq qʼij ri nubʼij ri Mateo ja ri xtitzijöx ri «loqʼoläj chʼabʼäl ri nchʼon chi rij ri Rajawaren ri Dios chuwäch ronojel ri ruwachʼulew [...]. Y kʼa riʼ toq xtapon ri rukʼisibʼäl qʼij» (Mateo 24:14, CO). Ri samaj riʼ man junan ta rikʼin ri samaj kibʼanon pe ri chʼaqa chik nimabʼäl taq kʼuʼx. Ri samaj nubʼij ri Mateo xtuyaʼ rejqalem ri utziläj taq rutzijol chi rij ri «Rajawaren ri Dios». ¿Achike nimabʼäl kʼuʼx najin nutzijoj ri Ajawaren chuwäch «ronojel ri ruwachʼulew»?

Ri utziläj taq rutzijol chi rij ri Rajawaren ri Dios ntzijöx ronojel ruwachʼulew pa jalajöj taq chʼabʼäl

Ri kikʼojlibʼal ri ruqʼalajrisanelaʼ ri Jehová pa Internet, jw.org, xbʼan richin nyaʼöx rutzijol ri Ajawaren. Chupam riʼ e kʼo wuj pa más 700 chʼabʼäl ri yetzijon chi rij ri Ajawaren. ¿Kʼo kami jun chik moloj ri ruxikʼon riʼ chi rij ri samaj riʼ? Ojer yan riʼ, toq majani tkʼojeʼ ri Internet, ri ruqʼalajrisanelaʼ ri Jehová etaman chik qawäch ruma nqatzijoj ri Ajawaren. Jun wuj ri nchʼon chi kij ri nimabʼäl taq kʼuʼx nubʼij chi rij ri qasamaj: «Ri samaj kibʼanon pe rijeʼ majun chik jun ri nbʼanon ke riʼ». Chuqaʼ kan xa xe chupam pe ri junaʼ 1939, chi rij jujun wuj La Atalaya kʼo pe re tzij reʼ: «Nuyaʼ rutzijol ri Rajawaren ri Jehová». Jun chi ke ri utziläj taq rutzijol ri nqatzijoj chi rij ri Ajawaren, ja ri xtuchüp yan ruwäch ri itzelal.

WAKAMI OJ KʼO RUKʼISIBʼÄL TAQ QʼIJ

¿Atzʼeton rat chi e bʼanatajnäq pe ri bʼanobʼäl xeqatzijoj chupam re tzijonem reʼ? Jun yan cien junaʼ, re wuj reʼ ntzijon chi kij ri kʼayewal yebʼanatäj chuwäch ronojel ri Ruwachʼulew. Ri  yesikʼin ri qawuj nqʼalajin chi kiwäch chi ronojel ri kʼayewal riʼ retal chi oj kʼo rukʼisibʼäl taq qʼij. Ja kʼa ri winäq ri majun achike ta nkinimaj, nkibʼij chi ronojel xa chojmirisan rubʼixik chuqaʼ man qitzij ta e kʼiyirnäq ri itzelal. Nkibʼij chi ruma wakami e kʼo jalajöj taq samajibʼäl yojtikïr yeqakʼaxaj ri kʼayewal ri majun wi yeqakʼaxaj ta ojer kan. Xa bʼaʼ achike na kʼa xtkibʼij ri winäq riʼ, ri choj kanima nqʼalajin chi kiwäch chi ri kʼayewal majun bʼey e bʼanatajnäq ta achiʼel ri yebʼanatäj wakami.

Ronojel qʼij nqʼalajin chi kʼïy achike najin yejalatäj ri pa qakʼaslem. Ri pa 2014 jun molaj etamanelaʼ xekitzijoj ri kʼayewal ri yetikïr nkichüp ruwäch ri kʼaslem. Rijeʼ xkibʼij: «Ruma ri runikʼoxik xqabʼän chi kij ri nimaläj taq kʼayewal, nqabʼij chi rikʼin ronojel ri kitzʼukun o kibʼanon ri winäq wakami yetikïr nkikʼïs ruwäch ri kʼaslem». Achiʼel re tzʼetbʼäl reʼ chuqaʼ ri chʼaqa chik nubʼän chi e kʼïy winäq nqʼalajin chi kiwäch chi qitzij oj kʼo rukʼisibʼäl taq qʼij chuqaʼ chi xtchup yan ruwäch ronojel. Ri e bʼanayon re wuj reʼ chuqaʼ e kʼïy chi ke ri yesikʼin ri wuj, ja riʼ chuqaʼ ri nqʼalajin chi kiwäch. Ja kʼa majun ruma nqaxibʼij qiʼ, xa kojkikot, ¿achike ruma? Ruma yojtikïr yojkolotäj.