¿Achike nbʼanon chi e kʼïy winäq nkinimaj chi kʼo jun bʼanayon richin ronojel?

¿Pejaʼ kan jebʼël rubʼanik ri kʼaslem?

Kʼo yan 3.000 junaʼ jun etamanel achin xubʼij: «Kan xtinnimirisaj kʼa aqʼij, ruma kan jun meyel bʼanobʼäl ri xabʼän wikʼin» (Salmo 139:14). Qitzij na wi, ri ntikïr pe rukʼaslem jun neneʼ rikʼin jun chʼutiʼ célula, nubʼän chawe chi nayaʼ ruqʼij ri achike nyaʼon ri kʼaslem. E kʼïy winäq nkibʼij chi ronojel ri kʼo kikʼaslem, kʼo jun bʼanayon richin. (Tasikʼij Salmo 139:13-17; Hebreos 3:4.)

Ri xbʼanon ri kaj chuqaʼ ri Ruwachʼulew, ja riʼ chuqaʼ ri xyaʼon ri kʼaslem (Salmo 36:9). Rijaʼ chʼoynäq pe kikʼin ri winäq richin nqetamaj ruwäch (tasikʼij Isaías 45:18).

¿Qitzij chi kij chikopiʼ oj petenäq wi?

Kʼïy chi re ri qachʼakul röj winäq, junan rikʼin ri kichʼakul ri chikopiʼ. Ri Jehová ke riʼ rubʼanon chi qe ruma, junan kikʼin ri chikopiʼ, xojrubʼän richin yojtikïr yojkʼaseʼ chi ruwachʼulew. Toq rijaʼ xubʼän ri nabʼey winäq, man xukusaj ta jun chiköp, rijaʼ ulew ri xukusaj (tasikʼij Génesis 1:24; 2:7).

Kʼo kaʼiʼ qabʼanik röj winäq ri man junan ta kikʼin ri chikopiʼ. Jun, röj yojtikïr nkʼojeʼ qetamabʼal, yojajowan chuqaʼ nqayaʼ ruqʼij ri oj bʼanayon. Kaʼiʼ, röj man xojbʼan ta richin yojkäm, ja kʼa ri chikopiʼ xa jubʼaʼ ok kikʼaslem. Ri yojkäm wakami, ruma ri nabʼey taq winäq xkiqʼäj rutzij ri Dios. (Tasikʼij Génesis 1:27 chuqaʼ 2:15-17.)