Ri elëqʼ jun kʼayewal ri ojer riʼ titikïr pe. Ri pa 3.500 kan junaʼ janila wi rukiran riʼ. Reʼ nqʼalajin ruma chupam ri Loqʼoläj Wuj kʼo jun pixaʼ nubʼij chi man ütz ta yeʼapwaqij o natoj pa kiqʼaʼ ri yesamäj pa qʼatbʼäl taq tzij richin nkewaj ri amak (Éxodo 23:8). Ri pwaqixïk man xa xe ta riʼ rubʼanik ri elëqʼ. Kʼïy mul, ri yeleqʼan nkikusaj rubʼeyomäl ri qʼatbʼäl tzij, nkewaj kimak ri kachʼalal chuqaʼ ri kachibʼil chuqaʼ pa saqil nkeleqʼaj ri pwäq.

Ri elëqʼ xa bʼa achike moloj nbʼanatäj wi, ja kʼa ri akuchi (o apeʼ) más nbʼanatäj, ja ri pa qʼatbʼäl taq tzij. Ri wuj Barómetro Global de la Corrupción 2013, ri xrelesaj ri Transparencia Internacional, nubʼij chi ri winäq kitzʼeton chi kʼo woʼoʼ moloj ri más yeleqʼan: ri nkajoʼ yeʼok qʼatöy taq tzij, ri policía, ri samajelaʼ pa qʼatbʼäl taq tzij, ri yebʼanon ri pixaʼ, chuqaʼ ri juzgados. Tqatzʼetaʼ kayoxiʼ tzʼetbʼäl:

  • ÁFRICA: Ri pa 2013, pa Sudáfrica, e 22.000 winäq ri yesamäj pa qʼatbʼäl taq tzij xqʼat tzij pa kiwiʼ ruma elëqʼ.

  • SUDAMÉRICA: Ri pa 2012, pa Brasil, e 25 winäq xeyaʼöx pacheʼ ruma xkikusaj rupwäq ri tinamït richin xekitöj ri qʼatbʼäl taq tzij. Jun chi ke rijeʼ, jun achin ri janila ruqʼij xkʼojeʼ ri pa qʼatbʼäl tzij. Rijaʼ wi ri rukaʼn qa chi re ri qʼatöy tzij.

  • ASIA: Ri pa 1995, pa Seúl (Corea del Sur), xekäm 502 winäq ruma xwulutäj pe jun mamaʼ jay pa kiwiʼ. Reʼ xbʼanatäj ruma ri xebʼanon ri jay xekitöj ri qʼatöy taq tzij richin xekikusaj samajibʼäl ri man kan ta e ütz chuqaʼ qajnäq kajïl. Chuqaʼ man xkibʼän ta chi re achiʼel nkibʼij ri pixaʼ chi rij rubʼanik jun jay.

  • EUROPA: «Ri elëqʼ kan janila ruchuqʼaʼ rubʼanon ri pa Europa», xubʼij ri Cecilia Malmström, jun ixöq ri nsamäj rikʼin ri Asuntos de Interior de la Comisión Europea. Chuqaʼ xubʼij: «Richin nkʼuqutäj chi ruxeʼ ri elëqʼ, nkʼatzin chi qʼatöy taq tzij yetoʼon rikʼin riʼ, ja kʼa riʼ majun xtbʼanatäj ta».

¡Ri elëqʼ näj bʼenäq ruxeʼ! Ri Susan Rose-Ackerman, jun ixöq tijonel chuqaʼ ri kʼo retamabʼal chi rij elëqʼ yebʼanatäj, nubʼij chi richin nkʼis ruwäch ri kʼayewal riʼ, nkʼatzin chi ri «qʼatöy taq tzij nkijäl rubʼanik yeqʼaton tzij». Stapeʼ achiʼel ta majun rusolïk re kʼayewal reʼ, ri Loqʼoläj Wuj nubʼij chi kʼo jun qʼij xtsolotäj.