OJER yan riʼ, ri sipanïk jun chi ke ri yebʼan richin nyaʼöx ruqʼij ri Jehová. Ri israelitas xekiporoj chikopiʼ chuwäch ri Jehová. Ri nimanelaʼ, chuqaʼ xekibʼän sipanïk richin xkiyaʼ ruqʼij ri Jehová. Chuqaʼ kʼo jun chik rubʼanik yojsipan chi re ri Dios (Hebreos 13:15, 16). Ri yebʼanon riʼ nkinaʼ kikotem chuqaʼ nkïl urtusanïk, achiʼel xbʼanatäj kikʼin ri winäq ri xtqatzijoj qa.

Ri Ana jun israelita ri man ntikïr ta nkʼojeʼ ral. Ruma nurayij wi nkʼojeʼ jun ral alaʼ, xubʼij chi re ri Jehová: «We rat [...] xtayaʼ pe jun ti wal alaʼ, y rïn kan xtinyaʼ kʼa chawe y kan xtok awichin chi jun rukʼaslem» (1 Samuel 1:10, 11). Ri Ana xyawäj chi rij jun akʼwal, toq xaläx ri akʼwal, Samuel rubʼiʼ xyaʼöx. Toq man xtzʼuman ta chik, xukʼwaj pa tabernáculo richin nuyaʼ ruqʼij ri Jehová, achiʼel xusüj chi re. Ri Jehová xuyaʼ urtusanïk pa ruwiʼ ri Ana ruma xubʼän riʼ. Rijaʼ xkʼojeʼ chik woʼoʼ ral. Ri Samuel xbʼeʼok profeta chuqaʼ jun chi ke ri xtzʼibʼan ri Biblia (1 Samuel 2:21).

Achiʼel ri Ana chuqaʼ ri Samuel, röj chuqaʼ yojtikïr nqajäch qakʼaslem pa ruqʼaʼ ri Dios. Ri Jesús xubʼij chi xtqakʼül kʼïy urtusanïk ruma ri nqabʼän richin nqayaʼ ruqʼij ri Jehová (Marcos 10:28-30).

Ri Dorcas jun ixöq ri xuyaʼ ruqʼij ri Dios pa nabʼey siglo. Rijaʼ «yerutolaʼ kʼa ri winaqiʼ ri man jun kʼo kikʼin». Kʼo kʼa jun qʼij rijaʼ xyawäj y xkäm. Ri nimanelaʼ ri e kʼo chupam ru-congregación janila xebʼison. Toq xkakʼaxaj chi ri Pedro xa naqaj kʼo wi, xkibʼij chi re chi tpe chanin. Qitzij na wi, rijeʼ janila xekikot toq xapon ri Pedro chuqaʼ xukʼasoj ri Dorcas. Ja reʼ ri nabʼey winäq nutzijoj ri Biblia ri xkʼasöx ruma jun apóstol (Hechos 9:36-41). Ri Dios majun bʼey xumestaj ta ri xubʼän ri Dorcas (Hebreos 6:10). Ri xubʼän rijaʼ xtzʼibʼäx kan chupam ri Biblia, wakami yojtikïr nqakʼäm qanaʼoj chi rij.

Chuqaʼ ri apóstol Pablo xuyaʼ kan jun utziläj naʼoj chi qawäch. Rijaʼ man xukʼekʼej ta riʼ xerutoʼ ri winäq. Xubʼij chi ke ri nimanelaʼ: «Rïn kan rikʼin kʼa janila kikotem xtinkusaj ri nubʼeyomal iwikʼin rïx, y chuqaʼ kan ninyaʼ wiʼ rïn ruma kan janila [...] yixinwajoʼ» (2 Corintios 12:15). Ri Pablo xretamaj chi ri yeqatoʼ ri qachʼalal nubʼän chi más kiʼ qakʼuʼx. Chuqaʼ ri Jehová xtuyaʼ urtusanïk pa qawiʼ chuqaʼ xkojrajoʼ, ja riʼ ri kʼo más ruqʼij (Hechos 20:24, 35).

Qitzij na wi, ri Jehová nrajoʼ chi nqakusaj quchuqʼaʼ chuqaʼ qaramaj richin nqayaʼ ruqʼij chuqaʼ richin yeqatoʼ ri qachʼalal. Ja kʼa, ¿la kʼo chik jun ri yojtikïr nqabʼän? Jaʼ kʼo. Röj yojtikïr nqayaʼ ruqʼij ri Jehová toq yojtoʼon rikʼin pwäq. Ri pwäq nqayaʼ nkʼatzin richin man nkʼis ta rutzijoxik ri Biblia. Reʼ nukusäx richin yetoʼöx ri misioneros chuqaʼ ri qachʼalal ri xa xe rusamaj ri Jehová nkibʼän pa kikʼaslem. Ri pwäq yeqayaʼ chuqaʼ nkʼatzin richin yebʼan traducir ri qawuj, yebʼan ri videos, richin yetoʼöx ri qachʼalal toq nbʼanatäj jun kabʼraqän chuqaʼ richin yebʼan ri Runimajay ri Ajawaren. Qitzij na wi, toq yojsipan chuqaʼ yojtoʼon xtqïl urtusanïk. Chuqaʼ xtqanimirisaj ruqʼij ri Jehová rikʼin ri qabʼeyomal (Proverbios 3:9; 22:9).