«Toq xtiqʼät tzij, kan tibʼanaʼ kʼa pa ruchojmilal. Kan xkixajowan kʼa y tkʼojeʼ kʼa joyowanïk chi ikojöl» (ZACARÍAS 7:9).

BʼIX: 125, 88

1, 2. a) ¿Achike wi nunaʼ ri Jesús chi rij Rupixaʼ ri Dios? b) ¿Achike ruma nqabʼij chi ri escribas chuqaʼ ri fariseos man pa rubʼeyal ta xkisamajij ri Pixaʼ?

RI Jesús janila ajowabʼäl xunaʼ chi rij Rupixaʼ ri Moisés. Kan ke riʼ na wi, ruma ri Pixaʼ riʼ xpe rikʼin ri Jehová, ri Rutataʼ chuqaʼ ri winäq más ruqʼij pa rukʼaslem. Ri Biblia rubʼin wi pe ri nimaläj ajowabʼäl xunaʼ ri Jesús chi kij ri rupixaʼ ri Dios. Rubʼin pe: «Nqa chi nuwäch richin ninbʼän ri arayibʼal rat nu-Dios rïn. Ri apixaʼ kan nuyakon kʼa pa wanima» (Salmo 40:8). Rikʼin ri xubʼij chuqaʼ ri xubʼän, ri Jesús xukʼüt chi ri Pixaʼ riʼ tzʼaqät rubʼanik, kʼo utzil nukʼäm pe chuqaʼ xtbʼanatäj ri nubʼij (Mateo 5:17-19).

2 Ri Jesús janila na wi xbʼison toq xutzʼët chi ri escribas chuqaʼ ri fariseos man pa rubʼeyal ta xkisamajij ri Rupixaʼ ri Rutataʼ. Rijaʼ xubʼij: «Rïx kan niyaʼ ri lajutäq chi re ronojel ri man kan ta janila rejqalem, achiʼel ri qʼayïs menta, ri anís y ri comino. Ja kʼa xa iyaʼon kan rubʼanik ri más rejqalem achiʼel nubʼij chupam ri pixaʼ chi choj tibʼanaʼ kikʼin ri winaqiʼ, chi tkʼojeʼ joyowanïk iwikʼin y qitzij chi kuqurnäq ta ikʼuʼx rikʼin ri Dios» (Mateo 23:23). Rijeʼ majun wi nqʼax ta chi kiwäch ri qas nrajoʼ nubʼij ri Pixaʼ chuqaʼ nkinimirisaj wi kiʼ. Ja kʼa  ri Jesús jebʼël xqʼax chuwäch achike qas nrajoʼ nubʼij ri Pixaʼ chuqaʼ ri nukʼüt chi rij ri Jehová.

3. ¿Achike xtqatzʼët chupam re tzijonem reʼ?

3 Ri nimanelaʼ man yaʼon ta chik ri Rupixaʼ ri Moisés pa qawiʼ (Romanos 7:6). We ke riʼ, ¿achike ruma ri Jehová kʼa xuyaʼ pe chupam ri Biblia? Xuyaʼ pe richin nqʼax chi qawäch chuqaʼ richin nqasamajij ri naʼoj nuyaʼ kan chi qawäch, man richin ta nbʼe qanima chi rij jujun pixaʼ. Jun tzʼetbʼäl, ¿achike naʼoj nqetamaj chi rij ri pixaʼ xeyaʼöx chi kij ri tinamït kichin tobʼäl? Chupam ri jun kan tzijonem xqatzʼët achike kʼo chi nubʼän jun winäq ri man chubʼanik ta xubʼän jun kamïk richin nkuy rumak. Chupam re tzijonem reʼ xtqetamaj achike nkikʼüt ri tinamït kichin tobʼäl chi rij ri Jehová chuqaʼ ri rubʼanik nqakʼäm qanaʼoj chi rij. Ruma riʼ xkeqatzʼët re kʼutunïk reʼ: ¿Achike nkikʼüt ri tinamït kichin tobʼäl chi rij rujoyowanïk ri Jehová? ¿Achike nkikʼüt chi rij ri rubʼanik nutzʼët rijaʼ ri kʼaslem? Chuqaʼ ¿achike rubʼanik nkikʼüt ri ruchojmilal rijaʼ? Toq xkojtzijon chi kij, tqatzʼetaʼ achike rubʼanik nqakʼäm qanaʼoj chi rij ri Qatataʼ chi kaj (tasikʼij Efesios 5:1).

KEʼICHAʼ KAN TINAMÏT RI ÜTZ NUBʼÄN CHI WE

4, 5. a) ¿Achike wi nbʼan richin man kʼayew ta napon ri makunel pa jun chi ke ri tinamït kichin tobʼäl chuqaʼ achike ruma? b) ¿Achike nukʼüt reʼ chi rij ri Jehová?

4 Ri Jehová xukanoj rubʼanik chi man kʼayew ta yeʼapon ri israelitas chi kipam ri tinamït kichin tobʼäl. Xubʼij chi kekʼojeʼ oxiʼ tinamït pa jujun ruxkïn ri raqän yaʼ Jordán. Ke riʼ chanin chuqaʼ man kʼayew ta xtapon ri kamisanel pa jun chi ke ri tinamït riʼ (Números 35:11-14). Ri israelitas kʼo wi chi yekibʼän utzil kibʼey ri tinamït kichin tobʼäl (Deuteronomio 19:3). Chuqaʼ ri judíos rukʼulun wi chi ke nkiyaʼ ketal ri bʼey richin man nsach ta ri makunel. Ruma e kʼo wi ri tinamït riʼ, ri makunelaʼ man yebʼe ta pa jun tinamït akuchi (apeʼ) nyaʼöx kiqʼij tyoxiʼ.

5 Kojchʼobʼon (kojnukun) chi rij reʼ: Ri Jehová xubʼij chi kekamisäx ri kamisanelaʼ, ja kʼa tkuy kimak chuqaʼ kechajïx ri man chubʼanik ta xekamisan. Kʼo jun etamanel chi rij ri Biblia xubʼij: «Kan ronojel wi ütz rubʼanon chuqaʼ man kʼayew ta nqʼax chawäch. Kan achiʼel rujoyowanïk ri Dios». Ri Jehová man achiʼel ta jun qʼatöy tzij ri itzel runaʼoj, ri xa xe tijoj poqonal nuyaʼ pa kiwiʼ ri winäq. Rijaʼ «nïm ri ajowabʼäl ri kʼo rikʼin» (Efesios 2:4).

6. ¿Achike runaʼoj ri Dios chuqaʼ achike kinaʼoj ri fariseos?

6 Ri Jehová man junan ta runaʼoj kikʼin ri fariseos, rijeʼ man nkijoyowaj ta kiwäch ri winäq. Jun tzʼetbʼäl, ri judíos man nkiküy ta rumak jun winäq ri más yan oxiʼ mul tubʼän ri mismo mak. Richin xukʼüt ri kinaʼoj, ri Jesús xtzijon chi rij jun fariseo chuqaʼ chi rij jun molöy pwäq ri yechʼon wi rikʼin ri Dios. Ri molöy pwäq xubʼij chi re ri Dios chi tukuyuʼ rumak. Ja kʼa ri fariseo xubʼij: «Dios, matyox ninyaʼ chawe ruma rïn man in junan ta kikʼin ri chʼaqa chik winaqiʼ. Ruma rijeʼ xa e eleqʼomaʼ, e kanöy  kichin chʼaqa chik ixoqiʼ, y man e choj ta chupam ri kikʼaslem. Ni man in junan ta kʼa chuqaʼ rikʼin la jun achin molöy mero laʼ». Ri fariseos nkibʼij chi rijeʼ majun ruma nkijoyowaj kiwäch ri winäq, ruma nkinaʼ chi más kiqʼij chi kiwäch (Lucas 18:9-14).

We nqaqasaj qiʼ man kʼayew ta xtubʼän chi kiwäch ri más xtkibʼij chi qe chi tqakuyuʼ kimak. (Tatzʼetaʼ ri chʼutitanaj 4 kʼa 8).

7, 8. a) Toq nbʼan jun itzelal chi qe, ¿achike rubʼanik nqakʼäm qanaʼoj chi rij ri Jehová? b) ¿Achike ruma nkʼatzin nqaqasaj qiʼ richin nqaküy kimak ri winäq?

7 Majun bʼey tqabʼän achiʼel ri fariseos. Xa tqakʼamaʼ qanaʼoj chi rij ri Jehová chuqaʼ tqajoyowaj kiwäch ri winäq (tasikʼij Efesios 4:32). Jun rubʼanik nqabʼän riʼ, ja ri nqabʼän chi ri winäq man kʼayew ta nkiküy kimak chi qawäch (Lucas 17:3, 4). Tqakʼutuj qa chi qawäch: «¿La ninkʼüt chi ninküy kimak ri winäq jujun mul toq nkʼatzin? ¿La ninwajoʼ ütz ninkʼwaj wiʼ kikʼin ri kʼo jun itzelal xkibʼän chwe?».

8 Richin yojkuyun mak kʼo chi nqaqasaj qiʼ. Ri fariseos man nkajoʼ ta wi nkiküy kimak ri winäq ruma nkinaʼ chi kʼo más kiqʼij chi kiwäch. Ja kʼa ri nimanelaʼ kʼo chi nqaqasaj qiʼ chuqaʼ nqayaʼ kiqʼij ri winäq chuqaʼ rikʼin ronojel qanima nqaküy kimak (Filipenses 2:3). Ütz nqakʼutuj qa chi qawäch: «¿La najin ninkʼäm nunaʼoj chi rij ri Jehová chuqaʼ ninqasaj wiʼ?». We xtqabʼän riʼ, man kʼayew ta xtubʼän chi kiwäch xtkibʼij chi qe chi tqakuyuʼ kimak chuqaʼ man kʼayew ta xtubʼän chi qawäch röj xkeqaküy. Tqakuyuʼ kimak ri winäq chuqaʼ mani chanin npe qoyowal (Eclesiastés 7:8, 9).

TQAYAʼ RUQʼIJ RI KʼASLEM, KE RIʼ MAN XTQA TA PA QAWIʼ KIMAK RI WINÄQ

9. ¿Achike rubʼanik xerutoʼ ri Jehová ri israelitas richin xkitzʼët chi ri kʼaslem kʼo ruqʼij?

9 Ri xeyaʼöx ri tinamït kichin tobʼäl, jun rubʼanik richin xetoʼöx ri israelitas richin man xekibʼän ta kamïk (Deuteronomio 19:10). Ri Jehová janila nuyaʼ ruqʼij ri kʼaslem, ruma riʼ itzel nutzʼët ri chubʼanik yekamisäx ri winäq (Proverbios 6:16, 17). Ruma rijaʼ jun Dios ri pa ruchojmil nubʼän ronojel chuqaʼ loqʼoläj, jun nimaläj mak chuwäch ri nkamisäx jun winäq, stapeʼ man chubʼanik ta. Qitzij na wi, xkuyüx kimak ri man chubʼanik ta xekamisan. Ja kʼa kʼo chi xkitzijoj chi ke ri ukʼwäy taq bʼey ri xkibʼän. Toq rijeʼ nkitzʼët wi chi man chubʼanik ta xbʼanatäj ri kamïk, ri makunel kʼo wi chi nkʼojeʼ chupam jun chi ke ri tinamït kichin tobʼäl kʼa toq xtkäm na ri sumo sacerdote. Rikʼin bʼaʼ ronojel ri rukʼaslem xtkʼojeʼ chi riʼ. Ja riʼ rubʼanik xukʼüt ri Jehová chi kiwäch ri israelitas chi ri kʼaslem kʼo ruqʼij. Richin xkiyaʼ ruqʼij ri Xyaʼon ri Kʼaslem, ri israelitas kʼo chi xkichajij kiʼ richin man xkikamisaj ta jun winäq rikʼin ri nkibʼän o ri man nkibʼän ta.

10. Rikʼin ri xubʼij ri Jesús, ¿achike rubʼanik xkikʼüt ri escribas chuqaʼ ri fariseos chi man xkiyaʼ ta ruqʼij kikʼaslem ri winäq?

10 Ri escribas chuqaʼ ri fariseos man xkikʼäm ta kinaʼoj chi rij ri Jehová. Jebʼël wi nqʼalajin chi man nkiyaʼ ta ruqʼij ri kikʼaslem ri winäq. Ri Jesús xubʼij chi ke: «Rïx iwetaman achike rubʼanikil richin chi jun winäq nok richin ri Dios, ja kʼa rïx man ix okinäq ta richin ri Dios y chuqaʼ yeʼiqʼät ri winaqiʼ ri nkajoʼ yeʼok richin ri Dios» (Lucas 11:52). Rijeʼ kʼo wi chi yekitoʼ ri winäq richin nqʼax chi kiwäch ri Ruchʼabʼäl ri Dios chuqaʼ richin nkïl kikʼaslem man kʼisel ta. Ja kʼa pa rukʼexel xekitoʼ, xa xekiqʼät richin  man xkitzeqelibʼej ta ri Jesús, ri «nkolon qichin» (Hechos 5:31). Ja riʼ rubʼanik xkitzelaj kikʼaslem ri winäq. Ri escribas chuqaʼ ri fariseos janila xkinimirisaj kiʼ chuqaʼ xa xe rijeʼ xkinaʼ kiʼ, majun xekitoʼ ta bʼaʼ ri winäq. ¡Kan janila itzel kinaʼoj!

11. a) ¿Achike rubʼanik xukʼüt ri Pablo chi xutzʼët ri kʼaslem achiʼel nutzʼët ri Jehová? b) ¿Achike yojtoʼon richin nqatzʼët ri rutzijoxik ri Biblia achiʼel xutzʼët ri Pablo?

11 We röj chi rij ri Jehová nqajoʼ nqakʼäm qanaʼoj kʼo chi nqayaʼ ruqʼij ri kʼaslem, ri qasipanïk. Ja riʼ xubʼän ri apóstol Pablo, rijaʼ xutzijoj ri Ruchʼabʼäl ri Dios chi ke konojel ri winäq xtikïr. Ruma riʼ xubʼij: «Man numak ta rïn we e kʼo ri xkebʼeqaqa kʼa chupam ri rukʼayewal» (tasikʼij Hechos 20:26, 27). Ri Pablo xutzijoj ri Ruchʼabʼäl ri Dios ruma xerajoʼ ri winäq chuqaʼ xuyaʼ ruqʼij ri kikʼaslem. Man ruma ta chi xtrejqalej kimak ri winäq o xa ruma xtaq ruma ri Jehová (1 Corintios 9:19-23). Röj chuqaʼ kʼo chi nqaxïkʼ qiʼ richin nqatzʼët ri kʼaslem achiʼel nutzʼët ri Jehová, ri najowan chi konojel winäq «ntzolin pe kikʼuʼx rikʼin» (2 Pedro 3:9). ¿La nawajoʼ chuqaʼ rat riʼ? We nqajoyowaj kiwäch ri winäq, rikʼin ronojel qanima xtqatzijoj ri Biblia chuqaʼ más kikotem xtqanaʼ.

12. ¿Achike ruma ri rusamajelaʼ ri Dios nkichajij ri kikʼaslem?

12 Jun chik rubʼanik nqakʼüt chi nqayaʼ ruqʼij ri kʼaslem, ja ri nqachajij qiʼ. Achiʼel toq nqabʼän jun jay o toq nqabʼän utzil, kʼo chi ütz rubʼanon ronojel richin man xtqasök ta qiʼ. Chuqaʼ ke riʼ chi rij jun chʼichʼ, toq yojbʼe pa jun molojriʼïl o jun nimamolojriʼïl kʼo chi ütz ütz rubʼanon. Ri nqachajij qiʼ chuqaʼ ri ütz qawäch, más ruqʼij chuwäch ri pwäq, ri ramaj chuqaʼ ri nqabʼän kʼïy samaj. Ri qa-Dios ronojel mul nubʼän ri choj chuqaʼ ri ütz, ruma riʼ tqakʼamaʼ qanaʼoj chi rij. Ri nabʼey ri kʼo chi yeyaʼon ri tzʼetbʼäl chi rij ri nachajij awiʼ, ja ri ukʼwäy taq bʼey (Proverbios 22:3). Ruma riʼ, toq jun ukʼwäy bʼey nunataj (nukʼuxlaj) pe chi qawäch jun rubʼanik nqachajij qiʼ, kʼo chi nqanimaj rutzij (Gálatas 6:1). We röj nqatzʼët ri kʼaslem achiʼel nutzʼët ri Jehová, man xtqejqalej ta kimak ri winäq.

KʼO CHI YEQʼATON TZIJ ACHIʼEL NUBʼIJ RI PIXAʼ

13, 14. ¿Achike kʼo wi chi nkibʼän ri ukʼwäy taq bʼey pa Israel richin nkikʼäm kinaʼoj chi rij ruchojmilal ri Jehová?

13 Ri Jehová xubʼij chi ke ri ukʼwäy taq bʼey pa Israel chi tkikʼamaʼ kinaʼoj chi rij ri ruchojmilal rijaʼ. Ri nabʼey ri kʼo wi chi nkibʼän, ja ri nkitzʼët achike xbʼanatäj. Chi rij riʼ, nkitzʼët we xtkuyüx rumak ri makunel o manäq. Richin riʼ kʼo wi chi nkitzʼët ri runaʼoj, ri rubʼanobʼal ojer kan chuqaʼ ri achike kʼo pa ranima. Richin nqʼalajin ruchojmilal ri Jehová, rijeʼ kʼo wi chi nkitzʼët we ri makunel xukamisaj ri winäq ruma itzel nutzʼët chuqaʼ we chubʼanik xubʼän (tasikʼij Números 35:20-24). Chuqaʼ we yekikusaj wi qʼalajrisanelaʼ, kʼo wi chi yekʼam pe jun e kaʼiʼ winäq richin xtqʼalajin we chubʼanik xubʼän ri rumak (Números 35:30).

14 Nqʼalajin kʼa chi toq ri ukʼwäy taq bʼey xkitzʼët yan ri xbʼanatäj, rijeʼ kʼo wi chi yechʼobʼon (yenukun) chi rij ri winäq, man xa xe ta chi rij ri xbʼanatäj. Rijeʼ kʼo wi chi nkikusaj ri kinaʼoj richin nqʼalajin chi kiwäch achike kʼo chi rij ronojel ri xbʼanatäj, ke riʼ man xa xe ta xkeqʼaton tzij chi rij ri nkitzʼët. Ruma riʼ nkʼatzin wi ri loqʼoläj ruchuqʼaʼ ri Dios richin nkikʼäm kinaʼoj chi rij ri rujoyowanïk chuqaʼ ri ruchojmilal (Éxodo 34:6, 7).

15. ¿Achike rubʼanik xerutzʼët ri makunelaʼ ri Jesús chuqaʼ achike rubʼanik xekitzʼët ri fariseos?

15 Ri fariseos xa xe wi nkitzʼët kimak ri winäq, ja kʼa man nkitzʼët ta ri kʼo pa kanima o ri achike qas kinaʼoj. Tqatzʼetaʼ achike xbʼanatäj toq ri Jesús xbʼe pa jun waʼin chi rachoch ri Mateo. Ri fariseos xkikʼutuj chi ke ri rutzeqelibʼey: «¿Achike ruma toq ri Jesús, ri itijonel, nwaʼ kikʼin la e molöy taq mero» chuqaʼ kikʼin ri makunelaʼ? Ri Jesús xubʼij: «Ri man e yawaʼiʼ ta man nkʼatzin ta aqʼomanel chi ke. [...] Rïn xipe chi kikanoxik ri man choj ta kikʼaslem richin  ntzolöj pe kikʼuʼx. Kixbʼiyin kʼa chi rukanoxik [...] ri nubʼij ri Dios: Rïn ninwajoʼ chi rïx kan ta rikʼin ronojel iwanima yiniwajoʼ y man ja ta ri kamelabʼäl ri nisujulaʼ pe» (Mateo 9:9-13). ¿La xubʼij ri Jesús riʼ richin xerutoʼ ri makunelaʼ? Manäq, rijaʼ xa nrajoʼ wi chi ntzolin pe kikʼuʼx. Ruma riʼ toq xutzijoj ri Ruchʼabʼäl ri Dios xubʼij chi ke ri winäq chi ttzolin pe kikʼuʼx (Mateo 4:17). Ri Jesús jebʼël wi nqʼalajin chuwäch chi e kʼo jujun chi ke ri «molöy taq mero» chuqaʼ ri makunelaʼ nkajoʼ nkijäl kinaʼoj. Rijeʼ man xa xe ta ruma ri waʼin xebʼe chi rachoch ri Mateo, kʼïy chi ke rijeʼ e rutzeqelibʼey chik ri Jesús (Marcos 2:15). Ri fariseos majun xekitzʼët ta ri winäq achiʼel xerutzʼët ri Jesús. Rijeʼ nkibʼij wi chi ri makunelaʼ man xttzolin ta pe chik kikʼuʼx. Ruma riʼ man junan ta ri kinaʼoj rikʼin ri Dios, ri pa ruchojmil nubʼän ronojel, ri nujoyowaj kiwäch ri winäq chuqaʼ ri nkibʼij chi nkiyaʼ ruqʼij.

16. ¿Achike kʼo chi nkitzʼët ri ukʼwäy taq bʼey ri xketzʼeton rumak jun winäq?

16 Wakami, ri ukʼwäy taq bʼey kʼo chuqaʼ chi nkikʼäm kinaʼoj chi rij ri Jehová, ri Dios ri «nqa chuwäch ri ruchojmilal» (Salmo 37:28). Richin riʼ kʼo chi nabʼey ütz ütz nkitzʼët we qitzij xbʼanatäj jun mak. We qitzij, rijeʼ kʼo chi xtkichojmirisaj ri kʼayewal achiʼel nubʼij ri Biblia (Deuteronomio 13:12-14). Ri ukʼwäy taq bʼey ri xketzʼeton rumak jun winäq kʼo chi nkitzʼët we ri makunel xtzolin pe rukʼuʼx chi re ri mak xubʼän. Reʼ kʼo mul kʼayew nubʼän. Kʼo chi nkitzʼët ri runaʼoj, achike nubʼij chi rij ri xubʼän chuqaʼ achike kʼo pa ranima (Apocalipsis 3:3). Richin xtkuyüx rumak, ri makunel kʼo chi ntzolin pe rukʼuʼx. * (Tatzʼetaʼ ri nota).

17, 18. ¿Achike rubʼanik nketamaj ri ukʼwäy taq bʼey we jun winäq qitzij xtzolin pe rukʼuʼx? (Tatzʼetaʼ ri wachibʼäl ri kʼo pe pa nabʼey chi re ri tzijonem).

17 Ri Jehová chuqaʼ ri Jesús yetikïr nkitzʼët achike kʼo pa qanima, ja kʼa ri ukʼwäy taq bʼey man yetikïr ta nkibʼän riʼ. Ruma riʼ ¿achike rubʼanik xtketamaj we jun winäq qitzij xtzolin pe rukʼuʼx? Nabʼey, kʼo chi nkikʼutuj kinaʼoj chuqaʼ ketamabʼal chi re ri Dios (1 Reyes 3:9). Rukaʼn, kʼo chi nkikusaj ri Biblia chuqaʼ ri qawuj ruyaʼon pe ri kuqül rukʼuʼx samajel richin nkitzʼët we qitzij xtzolin pe rukʼuʼx ri winäq (2 Corintios 7:10, 11). Kʼo chi nkitzʼët achike nubʼij ri Biblia chi rij ri runaʼoj jun winäq ri qitzij ntzolin pe rukʼuʼx chuqaʼ ri xa nqʼolon.

18 Rox, kʼo chi yechʼobʼon (yenukun) chi rij ri winäq chuqaʼ nkitzʼët ri rubʼanik ri rukʼaslem ojer kan, ri nrajoʼ nubʼän chuqaʼ ri achike man ntikïr ta nubʼän. Ri Biblia xubʼij pe chi rij ri Jesús, ri ukʼwäy bʼey pa congregación: «Rijaʼ man xtuqʼät ta tzij pa ruwiʼ xa xe rikʼin ri nutzʼët, ni xa xe rikʼin ri nrakʼaxaj. Xtuqʼät kʼa tzij pa ruchojmilal pa kiwiʼ ri man jun kʼo kikʼin, chuqaʼ kan pa ruchojmilal xtuqʼät tzij pa kiwiʼ ri man kinimirsan ta kiʼ» (Isaías 11:3, 4). Ri Jesús e ruyaʼon ri ukʼwäy taq bʼey richin yekichajij ri winäq chuqaʼ yerutoʼ richin yeqʼaton tzij achiʼel rijaʼ (Mateo 18:18-20). Janila nqamatyoxij ruma e kʼo ukʼwäy bʼey pa qawiʼ ri ütz kinaʼoj chuqaʼ nkixïkʼ kiʼ richin nkikʼäm kinaʼoj chi rij ri Jesús.

19. ¿Achike naʼoj chi kij ri tinamït kichin tobʼäl nawajoʼ nasamajij rat?

19 Chupam ri Rupixaʼ ri Moisés kʼo ri «etamabʼäl y kʼo ronojel ri qitzij» chi rij ri Jehová chuqaʼ chi kij ri rupixaʼ (Romanos 2:20). Achiʼel ri tinamït kichin tobʼäl nkikʼüt chi kiwäch ri ukʼwäy taq bʼey achike rubʼanik yeqʼaton tzij «pa ruchojmilal». Chuqaʼ nkikʼüt chi qawäch qonojel chi nkʼatzin yojajowan chuqaʼ nqajoyowaj kiwäch ri winäq (Zacarías 7:9). Stapeʼ wakami man kʼo ta chik pa qawiʼ ri Rupixaʼ ri Moisés, ri Jehová man rujalon ta, rijaʼ kʼa nuyaʼ na ruqʼij ri chojmilal chuqaʼ ri joyowanïk. ¡Jun nimaläj sipanïk ri yojtikïr nqayaʼ ruqʼij ri qa-Dios! Ruma riʼ, tqakʼamaʼ qanaʼoj chi rij chuqaʼ tqatoʼ qiʼ rikʼin rijaʼ.

^ parr. 16 Tatzʼetaʼ ri peraj «Preguntas de los lectores» chupam ri La Atalaya richin ri 15 de septiembre, 2006, ruxaq 30.