¿La kʼo jun mul anaʼon chi majun awetaman ta achike rubʼanik natoʼ jun winäq ri xkäm jun rachʼalal? Rikʼin bʼaʼ man awetaman ta achike nabʼän o nabʼij, ruma ke riʼ nanaʼ majun achike ta nabʼän o nabʼij. Ja kʼa rat kʼo yatikïr nabʼän richin yatoʼon.

Kʼo mul, xa xe rikʼin yatapon chuqaʼ nabʼij: «Man ayon ta at kʼo, in kʼo awikʼin». E kʼo tinamït xa xe rikʼin naqʼetej ri winäq o nayaʼ apo aqʼaʼ chi re najin nabʼij chi nawajoʼ natoʼ. We ri winäq ri xkäm rachʼalal nrajoʼ ntzijon, tayaʼ axkïn chi re. O ri más ütz, tabʼanaʼ jun samaj ri man jamäl ta nubʼän rijaʼ. Achiʼel nabʼän ruway, yeʼachajij ri akʼwalaʼ o yatoʼon rikʼin ri nkʼatzin chi rij muquj we rijaʼ nuyaʼ qʼij chawe. Ri nabʼän riʼ kʼo más ruqʼij chuwäch ri atzij.

Toq yeqʼax ri qʼij, rikʼin bʼaʼ nawajoʼ natzijoj ri winäq ri xkäm chi ke ri rachʼalal. Ütz natzijoj ri runaʼoj xubʼän awikʼin o jun chi ke ri junan xibʼän rikʼin ri winäq toq kʼa kʼäs na. Ri nabʼän riʼ kʼo utzil nukʼäm pe, rikʼin bʼaʼ yatikïr nabʼän chi re ri winäq ri nbʼison chi ntzeʼen. Ja riʼ xbʼanatäj rikʼin ri Pam, toq xkäm ri Ian, ri rachijil pa waqiʼ junaʼ kan. Rijaʼ nubʼij: «Toq ri winäq nkitzijoj chwe ri utzil xerubʼän ri Ian, utzil ri majun wi wetaman ta rïn, nubʼän chwe chi yikikot».

E kʼo etamanelaʼ nkibʼij chi toq jun winäq nkäm jun rachʼalal, pa nabʼey kʼïy toʼïk nyaʼöx chi re. Ja kʼa toq ri rachibʼil yetzolin chik pa kisamaj, nkimestaj qa chi ri winäq riʼ kʼa nrajoʼ na rutoʼik. Ruma riʼ man tamestaj qa ri winäq ri najin nuqʼaxaj ri kʼayewal riʼ. * (Tatzʼetaʼ ri nota). Kʼïy chi ke ri winäq ri yebʼison, nkimatyoxij chi yetikïr nkitzijoj ri nkinaʼ toq xqʼax yan jun tiempo.

Tatzʼetaʼ ri xubʼän ri Kaori, jun xtän aj Japón. Rijaʼ janila xbʼison toq xkäm ruteʼ chuqaʼ jun junaʼ rikʼin oxiʼ ikʼ chi rij riʼ, xkäm ri runimal. Ja kʼa ri utziläj taq rachibʼil majun xkiyaʼ ta kan, xkikanoj rubʼanik richin xkitoʼ. Ri Ritsuko, jun rachibʼil ri Kaori, ri kʼïy junaʼ qʼaxnäq chuwäch rijaʼ xubʼij chi xtubʼän chi re achiʼel jun ral. Ri Kaori, nubʼij: «Qitzij na wi, man xqa ta chi nuwäch ri xubʼij chwe. Rïn man ninwajoʼ ta chi jun chik ixöq nkʼojeʼ pa rukʼexel ri nuteʼ. Ja kʼa ri rubʼanik runaʼoj ri Ritsuko wikʼin, xubʼän chwe chi xintzʼët achiʼel nuteʼ. Ronojel semana junan wi nbʼeqatzijoj ri Ruchʼabʼäl ri Dios, junan wi yojbʼe ri pa taq molojriʼïl, junan wi chuqaʼ nqatïj té. Chuqaʼ rijaʼ nukʼäm wi pe nuway, yerutzʼibʼaj wi tarjetas chuqaʼ cartas chwe. Ronojel ri xubʼän ri Ritsuko wikʼin janila xirutoʼ».

Xqʼax yan 12 junaʼ tkäm ri ruteʼ ri Kaori. Wakami, rijaʼ chuqaʼ ri rachijil kʼïy tiempo nkiyaʼ chi rij rutzijoxik ri Ruchʼabʼäl ri Dios. Ri Kaori nubʼij: «Ri Ritsuko kʼa yiruchajij na. Toq yibʼe pa nutinamit, ninbʼetzʼetaʼ kan ri Ritsuko chuqaʼ yikikot yikʼojeʼ rikʼin».

Ri Poli, jun testigo de Jehová aj Chipre, rijaʼ nubʼij chi rilon chuqaʼ rutoʼik kikʼin ri más winäq. Ri Sozos ri rachijil ri Poli, jun achin ri janila ütz runaʼoj chuqaʼ jun utziläj ukʼwäy bʼey pa congregación. Rijaʼ yerukʼwaj wi ri mebʼaʼ chuqaʼ malkaʼn taq ixoqiʼ ri e kʼo pa congregación richin yebʼewaʼ chi rachoch, ke riʼ konojel yekikot (Santiago 1:27). Ja kʼa, toq ri Sozos 53 rujunaʼ, xkäm ruma jun tumor pa rujolom. Ri Poli nubʼij: «Xkäm ri utziläj wachijil, 33 junaʼ chi re ri nukʼaslem xikʼojeʼ rikʼin».

Takanoj rubʼanik richin nakuqubʼaʼ rukʼuʼx jun winäq ri xkäm jun rachʼalal

Toq xmuqüx yan ri rachijil, ri Poli chuqaʼ ri Daniel, ri ral, xebʼekʼojeʼ pa Canadá. Ri Daniel 15 wi rujunaʼ. Toq e kʼo chik pa Canadá, rijeʼ xebʼe chik pa kimolojriʼïl ri testigos de Jehová. Ri Poli nubʼij: «Stapeʼ ri qachʼalal pa congregación man ketaman ta wi chi rij ri kʼayewal qaqʼasan, xkikuqubʼaʼ qakʼuʼx kikʼin utziläj taq tzij. Chuqaʼ xkibʼij chi yojkitoʼ. ¡Kan ütz xubʼän chi re ri wal ri toʼïk riʼ, ruma majun chik rutataʼ ta! Ri ukʼwäy taq bʼey pa congregación  xkikanoj rubʼanik richin xkitzʼët achike xkʼatzin chi re ri Daniel. Jun chi ke rijeʼ nukʼwaj wi ri Daniel richin nkʼojeʼ kikʼin utziläj taq achibʼil o richin yebʼeʼetzʼan pelota». Wakami, ri Poli chuqaʼ ri Daniel ütz kibʼanon chuqaʼ yekikot.

Qitzij na wi, kʼo kʼïy rubʼanik yeʼatoʼ chuqaʼ nakuqubʼaʼ kikʼuʼx ri winäq ri nkäm jun kachʼalal. Wakami tqatzʼetaʼ qa achike rubʼanik ri Biblia nukuqubʼaʼ qakʼuʼx. Chuqaʼ ri nubʼij chi rij ri xtbʼan pa kiwiʼ ri kaminaqiʼ chi qawäch apo.

^ parr. 6 E kʼo winäq nkitzʼibʼaj chuwäch jun calendario ri fecha xkäm ri winäq, ke riʼ nkikuqubʼaʼ kikʼuʼx ri rachʼalal toq napon ri fecha riʼ, ruma ja riʼ toq más nkajoʼ kitoʼik.