¿Achike nbʼanon chi jun sipanïk kʼo ruqʼij chawäch rat? Qitzij na wi, re kajiʼ naʼoj reʼ: 1) achike xyaʼon ri sipanïk, 2) achike ruma xuyaʼ chawe, 3) achike kʼo chi xubʼän ri winäq richin xuyaʼ chawe, 4) we ri sipanïk kan kʼo xkʼatzin chawe. Ri yojchʼobʼon (yojnukun) chi kij re kajiʼ naʼoj reʼ yojrutoʼ richin más xtqamatyoxij ri rukamik ri Jesús, ri sipanïk más ruqʼij ruyaʼon ri Dios.

¿ACHIKE XYAʼON RI SIPANÏK?

Jun sipanïk kʼo ruqʼij we jun winäq ri kʼo qʼatbʼäl tzij pa ruqʼaʼ ri xyaʼon chi qe o jun winäq ri kan kʼo ruqʼij chi qawäch röj. Chuqaʼ e kʼo sipanïk, stapeʼ man jotöl ta kajïl, nqayaʼ kiqʼij, ruma jun qachʼalal o jun utziläj qachibʼil ri xyaʼon chi qe. Ja riʼ xbʼanatäj rikʼin ri sipanïk xuyaʼ ri Russell chi re ri Jordan, ri xqatzijoj yan kan. ¿Achike ruma nqajunumaj reʼ rikʼin rukamik ri Jesús?

Nabʼey, ruma ri Biblia nubʼij chi ri «Dios [...] xutäq pe ri juney Rukʼajol chuwäch re ruwachʼulew richin xuyaʼ kʼakʼaʼ kʼaslem chi qe» (1 Juan 4:9). Ruma ja ri Dios xyaʼon ri sipanïk, kʼo ruqʼij. Majun chik jun winäq ri kʼo qʼatbʼäl tzij pa ruqʼaʼ kʼo más ruqʼij chuwäch ri Dios. Jun salmista hebreo xutzʼibʼaj: «Ri abʼiʼ rat, Jehová, y chi kan xa xe rat yaqʼaton tzij pa ruwiʼ ri ruwachʼulew» (Salmo 83:18). Majun chik jun winäq ri kʼo más ruqʼij chuwäch ri Dios nyaʼon jun qasipanïk.

Rukaʼn, ri Dios «qatataʼ» (Isaías 63:16). ¿Achike ruma nqabʼij reʼ? Ruma rijaʼ xyaʼon ri qakʼaslem. Rijaʼ yojruchajij chuqaʼ nuyaʼ ri nkʼatzin chi qe, achiʼel nubʼän jun utziläj tataʼaj kikʼin ri ralkʼwal. Ri Dios xubʼij chi re ri rutinamit ojer kan: «Rïx israelita ix achiʼel jun nukʼajol ri kan janila ninwajoʼ [...], kan jantapeʼ kʼa ix kʼo chi nukʼuʼx. Y ruma riʼ kan janila ninjoyowaj iwäch» (Jeremías 31:20). Wakami, ri Dios ja riʼ chuqaʼ nunaʼ chi kij ri rusamajelaʼ. Ri Dios Qatataʼ, jun utziläj qachibʼil chuqaʼ rijaʼ oj  bʼanayon. Ruma riʼ xa bʼa achike sipanïk nuyaʼ chi qe, janila ruqʼij.

¿ACHIKE RUMA XUYAʼ?

E kʼo sipanïk kʼo kiqʼij chi qawäch ruma rikʼin ajowabʼäl xyaʼöx chi qe, man ruma ta chi kʼo chi nyaʼöx chi qe. Jun winäq ri nqa chuwäch nsipan, man xtroyobʼej ta chi xtqayaʼ rukʼexel ri rusipanïk.

Ri Dios xuyaʼ pe Rukʼajol ruma yojrajoʼ. Ri Biblia nubʼij: «Ri Dios xukʼüt chi qawäch chi kan najowan, ruma riʼ xutäq pe ri juney Rukʼajol chuwäch re ruwachʼulew richin xuyaʼ kʼakʼaʼ kʼaslem chi qe» (1 Juan 4:9). Rikʼin reʼ nqʼalajin chi ruma ri rajowabʼäl xuyaʼ pe ri Rukʼajol pa qawiʼ. «Ruma ri rutzil ri Dios [...] ri Cristo Jesús xkäm richin xojtotäj» (Romanos 3:24).

¿Achike ruma ri sipanïk xuyaʼ ri Dios jun rubʼanik xukʼüt ri rutzil pa qawiʼ? Ri Biblia nubʼij: «Ri Cristo xkäm quma röj, stapeʼ oj ajmakiʼ. Y rikʼin riʼ, ri Dios xukʼüt chi qawäch ri rajowabʼäl» (Romanos 5:8). Ruma ri rajowabʼäl, ri Dios xubʼän jun utzil pa qawiʼ. Qayon röj majun wi achike ta yojtikïr nqabʼän, man yojtikïr ta nqatoʼ qiʼ chuqaʼ xa oj ajmakiʼ. Man rukʼamon ta nyaʼöx ri ajowabʼäl riʼ chi qe chuqaʼ man xkojtikïr ta xtqatöj chi re ri Dios. Rikʼin ri rusipanïk, ri Dios xukʼüt ri nimaläj rajowabʼäl.

¿ACHIKE RI XUYAʼ PE?

E kʼo sipanïk janila kiqʼij ruma ri winäq xyaʼon kʼo chi xutïj poqön richin xuyaʼ pe. Toq jun winäq man nukʼekʼej ta riʼ nusipaj chi qe ri más nrajoʼ, xtubʼän chi röj xtqayaʼ más ruqʼij ri rusipanïk, ruma man nukʼekʼej ta riʼ.

Ri Dios xuyaʼ pe «ri juney rukʼajol» (Juan 3:16). Majun chik jun ri más nrajoʼ rijaʼ chuwäch ri Jesús. Ri Jesús, Rukʼajol ri Dios ri «janila nrajoʼ». Ri Biblia nubʼij chi ri «Dios man tzʼetel ta, ja kʼa kan nqʼalajin ruma ri Jesucristo ri rukʼajol, ri kan kʼo pe nabʼey chuwäch ronojel ri xetzʼukutäj». Ruma riʼ pa mil chi millón junaʼ, ri Dios chuqaʼ ri Jesús, junan e kʼo chuqaʼ janila ütz kikʼwan kiʼ (Colosenses 1:13-15). Majun chik más winäq ri ütz kikʼwan kiʼ achiʼel ri Jesús rikʼin ri Dios.

Stapeʼ ke riʼ, ri Jehová man xupoqonaj ta xuyaʼ pe ri Rukʼajol (Romanos 8:32). Qitzij na wi, rijaʼ xuyaʼ pe ri más ütz kʼo rikʼin. Majun chik jun sipanïk ri más ruqʼij kʼo rikʼin ri Jehová.

¿ACHIKE RUMA JANILA NKʼATZIN?

E kʼo sipanïk janila kiqʼij ruma yekʼatzin richin yatel chuwäch jun kʼayewal. Tabʼanaʼ chi re chi rat kʼo jun ayabʼil. Ja kʼa richin man xkakäm ta, nkʼatzin natïj jun aqʼom ri man yatikïr ta nalöqʼ. ¿Achike kami xtanaʼ we kʼo jun winäq nubʼij chi xtutöj ri awaqʼom? Qitzij na wi, rat janila xtamatyoxij.

«Rikʼin kʼa ri Adán xqichinaj wi ri kamïk qonojel. Y ruma ri Cristo xkojkʼastäj chik el qonojel» (1 Corintios 15:22). Wakami, konojel ri ralkʼwal ri Adán najin yekäm, man yojtikïr ta nqaqʼät ri yabʼil chuqaʼ ri kamïk chi qij. Chuqaʼ man yojtikïr ta yojok rachibʼil ri Dios chuqaʼ nkuyutäj ri qamak. Ruma xa oj winäq, man yojtikïr ta nqayaʼ rukʼaslem jun winäq. Ri Biblia nubʼij chi majun winäq ntikïr «nuköl ri rachʼalal, ni man ntikïr ta nutöj chi re ri Dios ri rukolotajik» (Salmo 49:7, 8). Nkʼatzin qatoʼik ruma man yojtikïr ta nqatöj rajïl ri qakʼas. Qayon röj majun achike yojtikïr nqabʼän.

Ja kʼa ruma janila yojrajoʼ, ri Jehová xuyaʼ rajïl ri «aqʼom» nkʼatzin chi qe richin yojkolotäj, xuyaʼ rukʼaslem ri Jesús. ¿Achike rubʼanik nutöj qakʼas ri tojbʼäl? «Ri rukikʼel ri Jesucristo [...] nrelesaj ronojel ri qamak». Nel chi tzij chi ri qakuqubʼabʼäl kʼuʼx  chi rij rukikʼel ri Jesús nubʼän chi nkuyutäj ri qamak chuqaʼ xtqïl qakʼaslem man kʼisel ta (1 Juan 1:7; 5:13). Ri tojbʼäl xuyaʼ ri Dios kʼo chuqaʼ utzil nukʼäm pe pa kiwiʼ ri qachʼalal e kaminäq el. Ri Biblia nubʼij: «Ruma jun winäq qonojel xqaqa ri kamïk pa qawiʼ. Y chuqaʼ xa ruma jun chik winäq toq xkekʼastäj el ri kaminaqiʼ» (1 Corintios 15:21). * (Tatzʼetaʼ ri nota).

Ri rukʼaslem ri Jesús, ja riʼ ri más nïm sipanïk yaʼon chi ke ri winäq, ruma ja ri Dios xyaʼon chuqaʼ xuyaʼ ruma ri ajowabʼäl nunaʼ chi qij. Majun chik jun winäq bʼanayon ri xubʼän ri Jehová. Chuqaʼ majun chik jun sipanïk ri ntikïr yojruköl chuwäch ri mak chuqaʼ ri kamïk. Qitzij na wi, ri tojbʼäl xuyaʼ ri Dios majun achoj rikʼin junumatäl wi.

 

^ parr. 19 We nawajoʼ nawetamaj más chi rij ri xtubʼän ri Dios pa kiwiʼ ri kaminaqiʼ, tasikʼij ri tanaj 7 chi re ri wuj ¿Achike nukʼüt ri Loqʼoläj Wuj? Reʼ ja ri testigos de Jehová e bʼanayon chuqaʼ nawïl chupam ri www.jw.org.