RI KʼAYEWAL. E kʼïy ukʼwäy taq bʼey pa taq política chuqaʼ pa taq religiones man xkibʼän ta ri nubʼij ri Biblia. Kʼïy mul, ruma rijeʼ e kʼo pa kiwiʼ ri winäq, man xkajoʼ ta chi xkʼojeʼ ri Biblia kikʼin ri más winäq. Chuqaʼ xkikanoj rubʼanik chi man xebʼan ta más o nqʼasäx pa jun chik chʼabʼäl. Tqatzʼetaʼ kaʼiʼ tzʼetbʼäl:

  • Ri pa taq junaʼ 167 toq majani tpe ri Jesús chi ruwachʼulew, ri Antíoco Epífanes, jun qʼatöy tzij, xubʼij chi tchupüx kiwäch konojel ri ru-copias ri Escrituras Hebreas. Rijaʼ nrajoʼ wi chi konojel ri judíos nkisamajij ri religión griega. Ri Heinrich Graetz, jun historiador, xubʼij chi ri rusamajelaʼ ri qʼatöy tzij «xekirëtz chuqaʼ xekiporoj ri rollos kichin ri Pixaʼ toq xekïl. Chuqaʼ xekikamisaj ri winäq toq xekitzʼët chi nkisikʼij ri Biblia ruma nkikanoj kitoʼik chupam».

  • Ri pa jun 800 junaʼ kan, e kʼïy chi ke ri ukʼwäy taq bʼey pa taq religiones, npe wi koyowal toq nkitzʼët chi jun chi ke ri kiwinaq man nutzijoj ta ri kinimanïk ri católicos, pa rukʼexel riʼ xa nutzijoj ri Biblia. Yekiyöqʼ ri kʼo ri Biblia kikʼin. Xa xe wi nkiyaʼ qʼij chi nkʼojeʼ ri Salmo pa latín kikʼin. Kʼo jun concilio eclesiástico xubʼij chi konojel ri parroquias kekitaqaʼ achiʼaʼ richin nkibʼän reʼ: «Kekikanoj konojel ri winäq ri nkitzijoj ri Biblia pa rukʼexel ri kinimanïk ri católicos [...]. Kekikanoj pa taq kachoch chuqaʼ pa taq jay ri e bʼanon chuxeʼ ulew. [...] Ri jay akuchi (apeʼ) xtkïl jun winäq ri nbʼanon riʼ, xtkichüp ruwäch».

Xa ta ri winäq xetikïr xkichüp ruwäch ri Biblia, xkʼis ta ri naʼoj e kʼo chupam.

Ri Biblia ri xqʼasäx pa inglés ruma ri William Tyndale kʼa kʼo wakami, stapeʼ kʼïy ru-copias xeporöx chuqaʼ xkamisäx ri Tyndale pa 1536.

RUBʼANIK RUTOʼON PE RIʼ RI BIBLIA. Ri Antíoco, ri qʼatöy tzij, xa xe pa Israel qas xrajoʼ xuchüp ruwäch ri Biblia. Ri judíos man xa xe ta chik pa Israel e kʼo wi. Ri etamanelaʼ nkibʼij chi ri pa nabʼey siglo, más 60% chi ke ri judíos man e kʼo ta chik pa Israel. Ri pa taq sinagogas e kʼo wi copias chi re ri Escrituras. Ja riʼ xekikusaj ri más winäq toq xeqʼax ri junaʼ. Chuqaʼ xkikusaj na ri nimanelaʼ (Hechos 15:21).

Ri pa jun 800 junaʼ kan, ri winäq ri yeʼajowan ri Biblia xkiqʼasaj pa jun chik chʼabʼäl chuqaʼ xkibʼän ru-copia, stapeʼ kʼo wi kʼayewal. Toq majani wi tel ta ri imprenta móvil ri pa taq runikʼajal chi re ri siglo quince, nawïl chik jujun peraj chi re ri Biblia pa 33 chʼabʼäl. Ja riʼ toq más aninäq xqʼasäx pa jalajöj chʼabʼäl chuqaʼ xbʼan imprimir.

RI XUKʼÄM PE RONOJEL RIʼ. Stapeʼ ri qʼatöy taq tzij chuqaʼ ri ukʼwäy taq bʼey pa taq religiones xkajoʼ xkichüp ruwäch ri Biblia, wakami ja riʼ ri wuj ri más kʼo kikʼin ri winäq chuqaʼ ri más kʼïy chʼabʼäl nawïl. Chuqaʼ kʼïy tinamït kikusan ri wuj riʼ pa taq kipixaʼ chuqaʼ kichʼabʼäl. Chuqaʼ rujalon rubʼanik kikʼaslem pa millón chi winäq.