¿La kʼo mul kʼayew nanaʼ yatel chi rutzijoxik ri Ajawaren? We ke riʼ, man xa xe ta rat, oj kʼïy ri ke riʼ nqanaʼ. Rikʼin bʼaʼ ruma ri winäq man kan ta nkajoʼ yojkakʼaxaj o itzel kinaʼoj nkibʼän pe qikʼin, o röj ri kʼayew nubʼän chi qawäch yojtzijon kikʼin ri man qetaman ta kiwäch. Reʼ nubʼän chi man yojkikot ta chik nqatzijoj ri Ajawaren. Ja kʼa, man tqamestaj chi najin nqayaʼ ruqʼij ri Jehová, ri Dios ri kʼo kikotem rikʼin. Rijaʼ nrajoʼ chi rikʼin kikotem nqayaʼ ruqʼij (Sl 100:2; 1Ti 1:11, TNM). ¿Achike ruma kʼo chi yojkikot nqatzijoj ri Ajawaren? Tqatzʼetaʼ oxiʼ ruma.

Ri nabʼey ja ri yojtzijon chi rij jun utziläj kʼaslem. Ri winäq wakami janila yebʼison ruma ri kʼayewal, ja kʼa röj yojtikïr nqakikotisaj kanima toq nqatzijoj ri utziläj taq rutzijol chi ke (Isa 52:7). Chuqaʼ ri utziläj taq rutzijol nubʼän chi röj chuqaʼ yojkikot. Toq yojjel chi rutzijoxik ri Ajawaren, nabʼey kojchʼobʼon (kojnukun) el chi kij ri urtusanïk xtukʼäm pe ri ruqʼatbʼäl tzij ri Dios chi Ruwachʼulew.

Ri rukaʼn ja ri nukʼäm pe utzil pa kiwiʼ ri winäq. Yerutoʼ richin yetikïr nkiyaʼ kan ri itzel taq bʼanobʼäl chuqaʼ richin nkïl apo ri kʼaslem ri man nkʼis ta (Isa 48:17, 18; Ro 1:16). Tqabʼanaʼ chi re chi yojtaq el chi kikolik ri winäq ruma kʼo jun xkʼulwachitäj, stapeʼ e kʼo ri man nkajoʼ ta yekolotäj, man ruma ta riʼ xtqayaʼ kan kikanoxik ri qitzij nkajoʼ kikolik (Mt 10:11-14).

Ri rox ja riʼ ri más rejqalem, ruma nuyaʼ ruqʼij ri Jehová. Rijaʼ janila nuloqʼoqʼej ri samaj riʼ (Isa 43:10; Heb 6:10). Richin yojtikïr nqabʼän riʼ, ri Jehová nuyaʼ pe ri loqʼoläj ruchuqʼaʼ pa qawiʼ. Ruma riʼ, tqakʼutuj ri kikotem chi re ri nuyaʼ ri loqʼoläj ruchuqʼaʼ (Gál 5:22). Rikʼin rutoʼik ri Jehová, man xtqaxibʼij qiʼ xtqatzijoj ri Ajawaren (Hch 4:31). Ke riʼ, xa bʼa achike na ri nkibʼij pe ri winäq chi qe, röj xkojkikot xtqatzijoj ri Ruchʼabʼäl ri Dios (Eze 3:3).

Toq yatel chi rutzijoxik ri Ruchʼabʼäl ri Dios, ¿nawajoʼ yakikot o yabʼison? ¿Achike rubʼanik nakʼüt chi yakikot toq natzijoj ri Ajawaren?

TOQ XATZʼËT YAN RI VIDEO RI XITOʼON RICHIN XIKIKOT CHIK XINYAʼ RUQʼIJ RI JEHOVÁ, KEʼAQʼALAJRISAJ RE KʼUTUNÏK REʼ:

  • Stapeʼ ronojel ikʼ kʼïy ramaj nqayaʼ chi rij rutzijoxik ri Ajawaren, ¿achike ruma kʼo chi nqajäm qawäch richin nqatijoj qiʼ chi rij ri Ruchʼabʼäl ri Dios?

  • ¿Achike rubʼanik nqakʼäm qanaʼoj chi rij ri María?

  • ¿Achike ramaj yachʼobʼon (yanukun) rat chi rij ri Ruchʼabʼäl ri Dios?

  • ¿Achike más nqa chawäch toq yatel chi rutzijoxik ri Ruchʼabʼäl ri Dios?