¿ACHIKE RUMA NKʼATZIN?

We ri evolución kan qitzij, nel chi tzij chi ri kʼaslem xa xe richin jun kayoxiʼ junaʼ. Ja kʼa we kʼo jun xojbʼanon, xtqïl ruqʼalajrisaxik achike ruma oj kʼäs chuqaʼ ri xtbʼanatäj chi qawäch apo.

¿ACHIKE KAMI XTABʼÄN RAT?

Tachʼobʼoʼ (tanukuʼ) reʼ: Ri Alex kan runiman wi pe chi ri Dios xbʼanon ri universo. Ja kʼa wakami man retaman ta chik achike nunimaj, ruma ri rutijonel chi rij ri Biología nubʼij chi ri científicos kilon chik pruebas chi rikʼin ri evolución xpe ronojel. Ri Alex man nrajoʼ ta nbʼïx nakanïk chi re, ruma riʼ nubʼij qa chuwäch: «Si ri científicos nkibʼij chi ri evolución kan qitzij, ¿in achike rïn richin man ninnimaj ta?».

Xa ta rat at Alex, ¿nanimaj kami ri evolución xa xe ruma e kʼo wuj nkibʼij chi kan qitzij?

NABʼEY TATZʼETAʼ RI XTABʼÄN

E kʼo winäq chanin nkibʼij chi nkinimaj ri evolución o chi kʼo jun ri xbʼanon ronojel, ja kʼa man ketaman ta nkiqʼalajrisaj achike ruma nkinimaj riʼ.

  • E kʼo jujun nkinimaj chi kʼo jun xbʼanon ronojel, ruma ja riʼ kʼutun chi kiwäch pa ki-iglesia.

  • E kʼo chik jujun nkinimaj ri evolución, ruma ja riʼ kʼutun chi kiwäch pa tijobʼäl.

 WAQIʼ KʼUTUNÏK RI ÜTZ NABʼÄN QA CHAWÄCH

Ri Biblia nubʼij: «Ronojel jay xa winäq ri nbʼanon, ja kʼa ronojel ri yeqatzʼët, ja ri Dios ri bʼanayon» (Hebreos 3:4, CO). ¿Achike nabʼij rat? ¿La ütz kami ri naʼoj nuyaʼ ri Biblia?

Ri nqabʼij chi majun jun bʼanayon ronojel, xa achiʼel ta nqabʼij chi re jay reʼ ruyon xunükʼ qa riʼ. Ri ke riʼ yojchʼobʼon (yojnukun), achiʼel majun qanaʼoj ta.

RI NBʼÏX: Ronojel ri kʼo chuwäch ri universo xkʼojeʼ pe ruma jun nimaläj explosión.

1. ¿Achike xbʼanon ri explosión riʼ?

2. ¿Achike ri más ütz nqanimaj: ja ri chaq kʼateʼ xtzʼukutäj pe ronojel, o ja ri kʼo jun xbʼanon richin?

RI NBʼÏX: Ri winäq oj petenäq kikʼin ri chikopiʼ.

3. We ri winäq xa kikʼin ri chikopiʼ oj petenäq wi, achiʼel ri kʼoyiʼ, ¿achike ruma röj kʼo más qanaʼoj chi kiwäch rijeʼ?

4. ¿Achike ruma ajun ri chʼutiʼ taq celulas, achiʼel ta majun kejqalem, kan kʼayew nqʼax chawäch kibʼanik?

RI NBʼÏX: Xnikʼöx yan chi ri evolución kan qitzij.

5. Ri winäq yebʼin riʼ, ¿la kan rijeʼ ri xenikʼon chi ke riʼ?

6. ¿Jaruʼ winäq nkinimaj ri evolución xa xe ruma nbʼïx chi ke chi konojel ajnaʼoj taq winäq nkinimaj riʼ?

«Tabʼanaʼ chi re chi at bʼenäq pa jun juyuʼ y nawïl jun jebʼël jay ri bʼanon chi cheʼ. Rat man xtabʼij ta: ‹Waweʼ xebʼetzaq pe kayoxiʼ cheʼ y chaq kʼateʼ xunükʼ qa riʼ re jun jay reʼ›. Ri ke riʼ yojchʼobʼon (yojnukun) majun rubʼeyal ta. Ruma riʼ, ¿achike ruma kʼo chi nqanimaj chi ri universo chaq kʼateʼ xbʼanatäj?» (Julia).

«We kʼo ta jun winäq nubʼij chawe chi xbʼanatäj jun explosión pa jun imprenta, chi ri tinta xa bʼa akuchi (apeʼ) xtïx wi y ke riʼ chaq kʼateʼ xbʼanatäj jun diccionario, ¿la xtanimaj rat riʼ?» (Gwen).

 ¿ACHIKE RUMA NINNIMAJ CHI KʼO JUN DIOS?

Ri Biblia nubʼij chi takusaj ri anaʼoj (1 Tesalonicenses 5:21). Nel chi tzij, chi rat nanimaj chi kʼo jun Dios man xa xe ta ruma:

  • RI NANAʼ: «Ri wanima nubʼij chwe chi kʼo jun Dios».

  • RI NKINIMAJ RI MÁS WINÄQ: «Ri winäq akuchi (apeʼ) in kʼo rïn nkinimaj chi kʼo jun Dios».

  • RI KIKʼUTUN PE CHAWÄCH: «Chi wachoch nkibʼij chwe chi kʼo chi ninnimaj chi kʼo jun Dios».

Pa rukʼexel xa xe nanimaj ri nkibʼij chawe, kʼo ta chi natzʼët achike qas ruma ri nanimaj.

«Toq ri tijonel nutzijoj chi qawäch ri rubʼanik nsamäj ri qachʼakul, más ninnimaj chi kʼo jun Dios. Kʼo peraj chi re ri qachʼakul, stapeʼ kan koʼöl ok, nimaläj samaj ri nubʼän. Y röj nixta nqanabʼej ri nbʼanatäj pa qachʼakul. ¡Kan jebʼël rubʼanik nsamäj!» (Teresa).

«Toq nintzʼët jun mamaʼ jay, jun mamaʼ barco o jun chʼichʼ ninkʼutuj qa chi nuwäch: ‹¿Achike xbʼanon richin laʼ?›. Jun tzʼetbʼäl, jun chʼichʼ kʼïy koköj taq samajibʼäl kʼo chupam richin ütz rubʼanik nsamäj. Richin nbʼan riʼ najowatäj jun winäq ri janila runaʼoj. Ruma riʼ, we jun chʼichʼ kʼo jun nbʼanon richin, ri winäq chuqaʼ kʼo jun xbʼanon kichin» (Richard).

«Toq más xintijoj wiʼ chi rij ri ciencia, man kan ta xinnimaj chik ri evolución. Rïn ninbʼij chi más kʼayew rubʼanik nanimaj ri evolución ke chuwäch ri kʼo jun xbʼanon ronojel» (Anthony).

TACHʼOBʼOʼ (TANUKUʼ) REʼ

Stapeʼ ri científicos kʼïy junaʼ kinikʼon pe rij ri evolución, jujun wi ri nkibʼij chi rij. Ri científicos nimaläj taq etamanelaʼ nbʼïx chi ke, ja kʼa nixta rijeʼ man junan ta ri nkibʼij chi rij ri evolución. Ruma riʼ, ¿kan xajan kami chi rat man nanimaj ta ri evolución?