¿ACHIKE RUMA NKʼATZIN?

E kʼo cosas más kejqalem chuwäch ri natzʼët rat pa espejo.

¿ACHIKE KAMI XTABʼÄN RAT?

Tachʼobʼoʼ (tanukuʼ) reʼ: Toq ri Julia nutzʼët riʼ pa espejo, nutzʼët chi janila tiʼoj, rijaʼ nubʼij qa chuwäch: «Kʼo chi yibʼaqïr». Ja kʼa ri ruteʼ rutataʼ chuqaʼ ri rachibʼil nkibʼij chi re chi rijaʼ choj chaqiʼj achiʼel jun xikʼaʼy.

Ri Julia kʼo yan qʼij rubʼin pe chi nrajoʼ nubʼän jun nimaläj dieta richin nbʼaqïr, stapeʼ xa xe jun woʼoʼ libras nqa. Xa xe nkʼatzin chi man nwaʼ ta kayoxiʼ qʼij...

Xa ta rat nanaʼ achiʼel ri Julia, ¿achike ta kami xtabʼän?

NABʼEY TATZʼETAʼ RI XTABʼÄN

Rikʼin bʼaʼ ri abʼanik natzʼët rat pa espejo, man ja ta riʼ ri abʼanik.

Man itzel ta ri nawajoʼ chi jebʼël ri abʼanik. Ri Biblia nutzijoj kayoxiʼ ixoqiʼ chuqaʼ achiʼaʼ ri kan jebʼël wi kibʼanik. Achiʼel ri Sara, ri Raquel, ri Abigail, ri Jose chuqaʼ ri David. Ri Biblia chuqaʼ nubʼij chi jun xtän rubʼiʼ Abisag «kan janila wi jebʼël ok» (1 Reyes 1:4).

Ja kʼa, e kʼïy xtaniʼ alabʼoniʼ kan xa xe chik ri kibʼanik kʼo pa kijolom. Ri jun naʼoj riʼ nukʼäm pe kʼayewal pa kiwiʼ. Tatzʼetaʼ reʼ:

  • Jun estudio ri xbʼan pa Estados Unidos, nubʼij chi 58% chi ke ri xtaniʼ nkinaʼ chi e janila e tiʼoj, ja kʼa xa xe 17% kan qitzij chi e tiʼoj.

  • Jun chik estudio ri xbʼan pa Estados Unidos chi kij ri ixoqiʼ ri nkʼatzin chi njoteʼ chik bʼaʼ kalal, nubʼij chi 45% chi ke ri ixoqiʼ riʼ nkinaʼ chi e tiʼoj.

  • Jujun xtaniʼ chuqaʼ alabʼoniʼ ruma nkitïj kiqʼij richin yebʼaqïr, e tzaqnäq chupam ri anorexia. Reʼ jun yabʼil ri yarunïm pa kamïk ruma nubʼän chawe chi man nawajoʼ ta chik yawaʼ.

 We rat nanaʼ chi kʼo anorexia chawe o jun chik yabʼil chi rij ri waʼin, takʼutuj atoʼik. Tatzijoj chi ke ateʼ atataʼ o jun chik winäq ri akuqubʼan akʼuʼx chi rij. Ri Biblia nubʼij: «Ri winäq ri kan qitzij achibʼil, kan nrajoʼ wi ri rachibʼil stapeʼ kʼo pa rutzil o rukʼayewal; jun achʼalalriʼïl xaläx chuwäch re ruwachʼulew richin chi nutoʼ ri rachʼalal toq napon pa rukʼayewal» (Proverbios 17:17).

RI ÜTZ NABʼÄN

Qitzij na wi, ri nbʼanon chawe chi kan at jebʼël, ja ri anaʼoj y man ja ta ri abʼanik. Tatzʼetaʼ ri nubʼij ri Biblia chi rij ri Absalón, ri rukʼajol ri David.

«Ri Absalón kan janila kʼa jebʼël ok. Y kan majun kʼa chi kikojöl ri israelita ri achiʼel ta rijaʼ. Kan chi jun ri rubʼanik kan jebʼël ntzuʼun» (2 Samuel 14:25).

Ja kʼa rijaʼ jun alaʼ ri kan itzel runaʼoj, janila xunimirisaj riʼ chuqaʼ xjakʼakʼin. Ruma riʼ, ri Biblia man ütz ta nchʼon chi rij ri Absalón, nubʼij chi rijaʼ jun kamisanel ri itzel yerutzʼët ri winäq.

Ruma riʼ, ri Biblia nubʼij chi qe:

«Tiweqaʼ iwiʼ kikʼin ri kʼakʼaʼ taq naʼoj» (Colosenses 3:10, TNM).

«Ri niweq iwiʼ» man ja ta «ri ruchojmirisaxik ri rusumal taq iwiʼ. Xa titijaʼ iqʼij richin ja ta ri iwanima jebʼël weqël chuwäch ri Dios» (1 Pedro 3:3, 4).

Man xajan ta chi rat nawajoʼ jebʼël ri abʼanik, ja kʼa ri anaʼoj, ja riʼ ri kʼo más rejqalem. Ri winäq más xtkitzʼët achike ri anaʼoj y man ja ta ri abʼanik. Jun xtän rubʼiʼ Felicia nubʼij: «We at jebʼël chanin nkitzʼët ri winäq, ja kʼa ri nbʼanon chi ke chi man yatkimestaj ta, ja ri rubʼanik ri anaʼoj».

TATZʼETAʼ BʼAʼ RI ABʼANIK

¿Man nqa ta chawäch ri abʼanik?

¿La kʼo jun mul abʼin chi nawajoʼ nabʼän jun nimaläj dieta richin nachojmirisaj ri abʼanik?

¿Achike nawajoʼ najäl chi re ri achʼakul? (Keʼajuchʼuʼ ri nawajoʼ najäl).

  • APALEN

  • AWALAL

  • AWIʼ

  • RUNAQʼ AWÄCH

  • APALÄJ

  • O JUN CHIK

We xajuchʼ «jaʼ» chupam ri kaʼiʼ nabʼey kʼutunïk y xachaʼ oxiʼ o más tzij chupam ri rox, kachʼobʼon (kanukun) chi rij reʼ: rikʼin bʼaʼ ri más winäq man kan ta itzel nkitzʼët ri abʼanik achiʼel natzʼët awiʼ rat. Ri ke riʼ natzʼët awiʼ, rikʼin bʼaʼ ruma xa xe chik ri abʼanik kʼo pa ajolom (1 Samuel 16:7).