¿Awetaman achike qʼatbʼäl tzij achoj chi rij yojchʼon wi?... Jaʼ, chi rij ri Rajawaren ri Dios, ri xtkotzʼijan ruwäch ri Ruwachʼulew. ¿Nawajoʼ nawetamaj más chi rij ri Ajawaren riʼ?...

Konojel ri qʼatbʼäl taq tzij kʼo jun kiqʼatöy tzij. Ri qʼatöy tzij nsamäj pa kiwiʼ ri ruwinaq. ¿Awetaman achike ri Ruqʼatöy Tzij ri Rajawaren ri Dios?... Ja ri Jesucristo. Rijaʼ chi kaj kʼo wi. Xa bʼaʼ chik, rijaʼ ri xtqʼaton tzij pa kiwiʼ konojel ri winäq. ¿Achike nabʼij rat, xtkʼojeʼ kami kikotem toq ri Jesús xtqʼaton tzij?...

¿Achike narayibʼej rat xtatzʼët chuwäch ri Tikʼasäs Ulew?

Jaʼ, ¡janila kikotem xtkʼojeʼ! Chuwäch ri Tikʼasäs Ulew, ri winäq majun chik chʼayonïk ta xtkibʼän. Chuqaʼ majun chik winäq ta xtbʼe pa taq oyowal (o chʼaʼoj), konojel xtkajoʼ kiʼ. Chuqaʼ majun chik achike ta xtyawäj chuqaʼ xtkäm. Ri man yetzuʼun ta, xkebʼetzuʼun; ri man nkakʼaxaj ta, xtbʼejaqatäj ri kixkïn; ja kʼa ri man yebʼiyin ta, xkebʼebʼiyin chuqaʼ xkeropin. Majun winäq ta xtwayijan. Chuqaʼ ri chikopiʼ ütz xtkikʼwaj kiʼ chi kiwäch, chuqaʼ röj kikʼin rijeʼ. Ja kʼa ri kaminaqiʼ xkekʼastäj chik. E kʼïy achiʼaʼ chuqaʼ ixoqiʼ ri e qasikʼin pe chupam ri qawuj,  achiʼel ri Rebeca, ri Rahab, ri David chuqaʼ ri Elías, xkekʼastäj chik. ¿Nawajoʼ rat nawetamaj kiwäch rijeʼ?...

Ri Jehová janila yarajoʼ chuqaʼ nurayibʼej chi yakikot. We rat man xtayaʼ ta kan retamaxik chi rij rijaʼ chuqaʼ xtabʼän ri nubʼij, xtuyaʼ akʼaslem man kʼisel ta chuwäch ri Tikʼasäs Ulew. ¿Narayibʼej yakʼojeʼ chi riʼ?...