¿Achike nusüj ri Jefté chi re ri Jehová?

Stapeʼ kʼayew xubʼän chuwäch, ri rumiʼal ri Jefté xubʼän ri xusüj ri rutataʼ

¿Awetaman achike xtän kʼo chuwäch la wachibʼäl?... Ri Loqʼoläj Wuj majun nubʼij ta ri rubʼiʼ rijaʼ, xa xe nubʼij chi ri rutataʼ Jefté rubʼiʼ. La xtän laʼ kʼo jun xubʼän ri janila xukikotisaj ranima ri rutataʼ chuqaʼ ri Jehová. ¿Nawajoʼ nawetamaj más chi rij rijaʼ chuqaʼ ri rutataʼ?

Ri Jefté janila wi ütz runaʼoj. Nujäm wi ruwäch richin ntzijon rikʼin ri rumiʼal chi rij ri Jehová. Rijaʼ majun wi nuxibʼij ta riʼ chuqaʼ jebʼël wi ntikïr nukʼwaj rubʼey jun tinamït. Ruma riʼ ri israelitas xkibʼij chi re chi tukʼwaj kibʼey chi re ri oyowal (o chʼaʼoj) xtkibʼän kikʼin ri tinamït.

Ri Jefté xukʼutuj rutoʼik chi re ri Jehová. Xubʼij chi re: «We rat xtabʼän chi xkichʼakon, xtinyaʼ chawe ri nabʼey winäq xtel pe  ri pa wachoch chi nukʼuluxik toq xkitzolin pe». Ri winäq riʼ xtkʼojeʼ chuqaʼ xtsamäj ri pa tabernáculo chi jun rukʼaslem. Ri tabernáculo jun wi jay ri akuchi (o apeʼ) nyaʼöx ruqʼij ri Jehová. ¿La xchʼakon ri Jefté? Jaʼ, xchʼakon. Wakami, ¿awetaman achike ri nabʼey xel pe ri pa rachoch?...

Jaʼ, ¡ja ri rumiʼal ri Jefté! Ri Jefté xa xe wi jun rumiʼal. Wakami kʼo chi xtutäq el ri pa tabernáculo. Ruma riʼ janila nbʼison. Wakami, majun chik ntikïr ta nutzolij ri rutzij, kʼo chi nubʼän ri xusüj. Ruma kʼa riʼ ri rumiʼal xubʼij chi re: «Nataʼ, rat kʼo chi nayaʼ ri xasüj chi re ri Jehová».

Ri rumiʼal ri Jefté ronojel wi junaʼ nbʼetzʼetöx kan kuma chʼaqa chik xtaniʼ

Ri pa nabʼey, ri xtän xbʼison chuqaʼ ruma retaman wi chi toq xtbʼekʼojeʼ ri pa tabernáculo man xtitikïr ta chik xtkʼuleʼ chuqaʼ xkekʼojeʼ ral. Stapeʼ ke riʼ, rijaʼ nrajoʼ wi nubʼän ri xusüj ri rutataʼ chuqaʼ chi nkikot ri Jehová rikʼin. Ja riʼ wi ri más ruqʼij chuwäch rijaʼ. Ruma kʼa riʼ xbʼe ri pa tabernáculo, chi riʼ xkʼojeʼ chi jun rukʼaslem.

¿Xqa chuwäch ri Jefté chuqaʼ ri Jehová ri xubʼän ri xtän nabʼij rat?... ¡Jaʼ, xqa chi kiwäch! Rat chuqaʼ yatikïr nabʼän achiʼel rumiʼal ri Jefté. We nabʼän ri nbʼïx chawe chuqaʼ nawajoʼ ri Jehová, ri ateʼ atataʼ chuqaʼ ri Jehová xkekikot awikʼin.

TQASIKʼIJ CHUPAM RI LOQʼOLÄJ WUJ: