Jaʼ, ri ruqʼalajrisanelaʼ ri Jehová jantapeʼ (chi jumul) yeqatoʼ ri winäq toq nbʼanatäj jun kabʼraqän, jun kaqʼiqʼ jöbʼ o achike chik na jun kʼayewal. Yeqatoʼ ri qachibʼil chuqaʼ chʼaqa chik winäq, nqabʼän achiʼel nubʼij ri Gálatas 6:10: «Toq nqatzʼët xa bʼa achike winäq ri kʼo nkʼatzin chi re, kan tqatoʼ kʼa. Ja kʼa kan nkʼatzin chi yeqatoʼ más ri e qachʼalal chik». Ruma riʼ toq kʼo jun achike nkʼulwachitäj yojkʼojeʼ kikʼin ri winäq chuqaʼ nqakuqubʼaʼ kikʼuʼx rikʼin ri Loqʼoläj Wuj (2 Corintios 1:3, 4).

Rubʼanik kinukʼun kiʼ

Toq nbʼanatäj jun kʼayewal, ri ukʼwäy taq bʼey pa kiwiʼ ri ruqʼalajrisanelaʼ ri Jehová chupam ri tinamït riʼ, nkikanoj rubʼanik richin yechʼon kikʼin konojel ri winäq pa ki-congregación. Ke riʼ nkitzʼët we majun achike ta xkikʼulwachij chuqaʼ nkitzʼët achike nkʼatzin chi ke. Chi rij riʼ, nkiyaʼ el rutzijol chi re ri sucursal richin netamatäj achike kibʼanon chupam ri tinamït riʼ chuqaʼ ri toʼïk kiyaʼon.

We ri congregaciones e kʼo chupam ri tinamït riʼ man yetikïr nkiyaʼ ri nkʼatzin chi ke ri winäq xkïl kʼayewal, ri Molaj Ukʼwäy taq Bʼey ri e paʼäl pa ruwiʼ kisamaj ri ruqʼalajrisanelaʼ ri Jehová, ja riʼ ri nnukʼun pe rubʼanik ri toʼïk xtyaʼöx chupam ri tinamït riʼ. Ri sucursal yeruyaʼ comités richin nkitzʼët achike rubʼanik yetoʼöx ri winäq. Chuqaʼ ri ruqʼalajrisanelaʼ ri Jehová aj jukʼan chik tinamït nkiyaʼ kiramaj chuqaʼ kipwäq richin yekitoʼ ri winäq (Proverbios 17:17). Ri pa nabʼey siglo, ke riʼ chuqaʼ rubʼanik xkibʼän ri rutzeqelibʼey ri Jesús toq xqʼax jun wayijal pa kitinamit (1 Corintios 16:1-4).

Pwäq richin yetoʼöx ri winäq

Jun tanaj chi re ri pwäq ntaq el pa sucursal kichin ri ruqʼalajrisanelaʼ ri Jehová nukusäx richin yetoʼöx ri winäq toq kʼo jun achike nbʼanatäj (Hechos 11:27-30; 2 Corintios 8:13-15). Chuqaʼ ruma man e tojon ta ri qachʼalal ri yebʼetoʼon, ri jun tanaj pwäq riʼ nukusäx ronojel richin yetoʼöx ri winäq ri nkïl kʼayewal. Chuqaʼ ri sucursal nutzʼët chi ri pwäq ütz ütz rukusaxik nbʼan chi re (2 Corintios 8:20).