RI John e kʼo wi pa Gujarat, jun koʼöl tinamït pa India. Ri rutataʼ xqasäx pa yaʼ pa taq junaʼ 1950, ke riʼ xok ruqʼalajrisanel ri Jehová. Ja kʼa ri John, ri ruteʼ, ri runimal, ri ruchaqʼ chuqaʼ ri oxiʼ ranaʼ e católicos wi. Rijeʼ itzel wi nkitzʼët runimabʼäl kʼuʼx ri kitataʼ.

Kʼo jun qʼij, ri rutataʼ ri John xubʼij chi re chi xtbʼeruyaʼ kan jun sobre chi re jun qachʼalal ri pa ru-congregación. Ri qʼij riʼ, ri John xusök (xuqʼät) jun ruwiʼ ruqʼaʼ toq xujäq jun kʼojlibʼäl ri chʼichʼ ruwiʼ. Ruma nrajoʼ wi nunimaj rutzij ri rutataʼ, xupïs el ri ruwiʼ ruqʼaʼ pa jun tzyäq. Ke riʼ xbʼe chi rachoch ri rachibʼil ri rutataʼ.

Toq xapon, ri rixjayil ri qachʼalal xukʼäm kan ri sobre. Rijaʼ chuqaʼ ruqʼalajrisanel ri Jehová. Toq xutzʼët chi ri John rusokon ruwiʼ ruqʼaʼ xubʼij chi re chi nrajoʼ nutoʼ. Xebʼerukʼamaʼ pe aqʼom, ke riʼ xuyaʼ jun desinfectante chi rij ri sokotajïk chuqaʼ xupïs kan ri ruwiʼ ruqʼaʼ. Chi rij riʼ xuyaʼ jun taza ru-té. Chuqaʼ chupam ronojel ri ramaj riʼ pa rubʼeyal xutzijoj ri Biblia chi re.

Ri itzel wi nutzʼët chi kij ri ruqʼalajrisanelaʼ ri Jehová, najin wi nel el pa rujolom ri John. Ruma riʼ xubʼän kaʼiʼ kʼutunïk chi re ri qachʼalal. Rijaʼ nubʼij wi chi ri Jesús ja riʼ ri Dios chuqaʼ kʼo chi yojchʼon rikʼin ri María. Ja kʼa ri rutataʼ man ja riʼ ta nubʼij. Ri qachʼalal, ruma rutijon wi riʼ chi rij ri chʼabʼäl gujarati, xuqʼalajrisaj pa ruchʼabʼäl ri John achike nubʼij ri Biblia chi kij ri rukʼutunïk. Chi rij riʼ, xuyaʼ ri wuj «Estas buenas nuevas del reino» chi re.

Toq xusikʼij ri wuj, ri John xqʼalajin chuwäch chi qitzij ri xubʼij ri qachʼalal. Ri John xbʼe rikʼin ri cura pa ru-iglesia richin xerubʼän chik ri kʼutunïk chi re rijaʼ. Ri cura xpe royowal, xutorij (xukʼäq) jun Biblia chi rij chuqaʼ royowal xubʼij chi re: «¡Xa xatok Satanás! ¿Akuchi (apeʼ) nubʼij ri Biblia chi ri Jesús man Dios ta? ¿Akuchi nubʼij chi mani yojchʼon rikʼin ri María? ¿¡Akuchi!?». Ri John man nunimaj ta chi ri cura ja riʼ xubʼän chi re. Xubʼij kan chi re: «Majun bʼey chik xkinok ta pa jun iglesia católica». Ke riʼ xbʼe.

Ri John xutijoj riʼ chi rij ri Biblia kikʼin ri ruqʼalajrisanelaʼ ri Jehová. Rijaʼ xrajoʼ ri qitzij chuqaʼ xuyaʼ ruqʼij ri Jehová. Chuqaʼ e kʼo más rachʼalal xeʼok ruqʼalajrisanel ri Jehová. Ri John kʼa kʼo na retal ri sokotajïk chi rij ri ruwiʼ ruqʼaʼ. Ja kʼa nunataj (nukʼuxlaj) pe chuwäch ri utzil ri xbʼanon chi xretamaj ri qitzij pa jun kan 60 junaʼ (2 Corintios 6:4, 6).