«Titzolöj pe ikʼuʼx wikʼin y rïn xkitzolöj chik iwikʼin» (ZACARÍAS 1:2, 3).

BIX: 89, 86

1-3. a) ¿Achike wi najin nkibʼän ri israelitas toq ri Dios xutäq ri Zacarías richin xbʼeruyaʼ rutzijol chi ke? b) ¿Achike ruma ri Jehová xubʼij chi ke ri israelitas chi ttzolin pe kikʼuʼx rikʼin?

JUN wuj nxikʼan pa kaqʼiqʼ, jun ixöq tzʼapäl pa jun chakäch chuqaʼ e kaʼiʼ ixoqiʼ ri kʼo mamaʼ taq kixikʼ yexikʼan pa kaqʼiqʼ. Re wachibʼäl reʼ yeqïl chupam ri wuj xutzʼibʼaj ri profeta Zacarías (Zacarías 5:1, 7-9). ¿Achike ruma ri Jehová xubʼän chi ri Zacarías xerutzʼët re wachibʼäl reʼ? ¿Achike wi kibʼanon ri israelitas ri qʼij riʼ? ¿Achike utzil nukʼäm pe pa qawiʼ röj ri nqetamaj chi kij ri xerutzʼët ri Zacarías?

2 Ri junaʼ 537, toq majani tpe ri Jesús, ri israelitas janila wi yekikot ruma xekolotäj el pa ruqʼaʼ ri Babilonia, 70 junaʼ xekʼojeʼ chi riʼ. Pa nabʼey, ri israelitas yekikot wi ruma xketzolin chubʼanik ri templo pa Jerusalén. Ke riʼ xtbʼekiyaʼ chik ruqʼij ri Dios. Jun junaʼ chi rij riʼ, pa 536, xkiyaʼ ruxeʼ ri templo. Ri Biblia nubʼij chi janila xekikot, ruma riʼ ‹janila raqoj chiʼij ri xkibʼän. Y kan janila näj xkʼaxatäj wi› (Esdras 3:10-13). Ja kʼa  ri itzel taq winäq xa xekiyaʼ pe kʼayewal richin npabʼäx ri samaj. Ruma ri kʼayewal riʼ, ri israelitas xa kaʼiʼ kikʼuʼx xkibʼän, ke riʼ eqal eqal xkiyaʼ kan rubʼanik ri templo. Pa rukʼexel riʼ xa xbʼe kanima chi rij rubʼanik ri kachoch chuqaʼ kitikoʼn. Xeqʼax 16 junaʼ, ri templo majun chik achike ta xsamajin, xa xe ri ruxeʼ xyaʼöx kan. Ruma riʼ, ri Jehová kʼo chi xunataj (xukʼuxlaj) chi ke chi tkiyaʼ kan rubʼanik ri kirayibʼal rijeʼ chuqaʼ chi ketzolin rikʼin. Chuqaʼ xubʼij chi ke chi tkiyaʼ ruqʼij rikʼin ronojel kanima.

3 Ruma riʼ, ri pa junaʼ 520, ri Jehová xutäq ri profeta Zacarías richin xunataj (xukʼuxlaj) chi ke ri israelitas achike ruma xeruköl pe pa Babilonia. Ri bʼiʼaj Zacarías nel chi tzij «Ri Jehová Xunataj Pe». Reʼ rikʼin bʼaʼ xubʼän chi ri israelitas xoqa pa kijolom chi, stapeʼ rijeʼ xkimestaj ri xubʼän ri Jehová pa kiwiʼ, rijaʼ man e rumestan ta (tasikʼij Zacarías 1:3, 4). Ri Jehová rikʼin ajowabʼäl xubʼij chi ke chi xkerutoʼ richin xtkiyaʼ chik ruqʼij, xa xe tkibʼanaʼ rikʼin ronojel kanima. Tqatzʼetaʼ achike rubʼanik xerutoʼ rikʼin ri waqiʼ chuqaʼ ri wuquʼ wachibʼäl ri xekʼutumär chuwäch ri Zacarías. Chuqaʼ tqatzʼetaʼ achike naʼoj nkiyaʼ kan chi qawäch röj.

RI JEHOVÁ NUYAʼ RUTOJBʼALIL PA KIWIʼ RI YEʼELËQʼ

4. a) ¿Achike xutzʼët ri Zacarías chupam ri waqiʼ wachibʼäl? b) ¿Achike nel chi tzij chi ri wuj tzʼibʼatäl chi kaʼiʼ ruwäch? (Tatzʼetaʼ ri wachibʼäl jun).

4 Ri capítulo 5 chi re ri wuj Zacarías ntikïr el rikʼin jun wachibʼäl ri majun tzʼeteyon richin (tasikʼij Zacarías 5:1, 2). Ri Zacarías nutzʼët jun wuj ri nxikʼan pa kaqʼiqʼ, 9 metros raqän, ja kʼa ri ruwäch 4,5. Ri wuj man bʼoron ta, nel chi tzij chi nkʼatzin nsikʼïx yan qa. Chuqaʼ tzʼibʼatäl chi kaʼiʼ ruwäch (Zacarías 5:3). Ri winäq xa xe wi jun ruwäch ri wuj nkitzʼibʼaj. Ruma riʼ, we ri wuj xutzʼët ri Zacarías tzʼibʼatäl chi kaʼiʼ ruwäch, nel chi tzij chi kan kʼo ruqʼij ri nubʼij. Jaʼ, reʼ jun rutzijol ri rukʼamon pe kʼayewal.

Ri nimanelaʼ majun elëqʼ ta nkibʼän. (Tatzʼetaʼ ri chʼutitanaj 5 kʼa 7).

5, 6. ¿Achike rubʼanik nutzʼët ri Jehová ri elëqʼ?

5 (Tasikʼij Zacarías 5:3, 4). Qonojel kʼo chi xtqajäch chuwäch ri Dios ri achike xtqabʼän. Ja kʼa ri qakʼwan rubʼiʼ ri Dios nkʼatzin chi nqachajij más qiʼ. Qonojel ri nqajoʼ ri Dios qetaman chi ronojel elëqʼ, nuqasaj ruqʼij ri nimaläj rubʼiʼ rijaʼ (Proverbios 30:8, 9). E kʼo winäq nkibʼij chi man itzel ta ri yatelëqʼ toq kʼo jun ruma nabʼän. Ja kʼa ri winäq ri nelëqʼ xa nuyaʼ más ruqʼij ri bʼeyomäl chuwäch ri Jehová, ri rubʼiʼ chuqaʼ ri rupixaʼ.

6 Ri Zacarías 5:3 chuqaʼ 4 nubʼij chi ri rukʼayewal kʼa xtapon pa rachoch ri eleqʼom, xtkʼojeʼ chi riʼ kʼa xtukʼïs na ruwäch. Reʼ nel chi tzij chi ri Jehová ntikïr nuqʼalajrisaj pe kimak ri rusamajelaʼ chuqaʼ nuqʼät tzij pa kiwiʼ. Rikʼin bʼaʼ kʼo jun winäq ntikïr nrewaj ri rumak chi kiwäch ri qʼatbʼäl taq tzij, ri ukʼwäy taq bʼey pa congregación, ri ruteʼ rutataʼ o chuwäch ri ukʼwäy bʼey pa rusamaj. Ja kʼa man xtitikïr ta xtrewaj chuwäch ri Dios, ri nbʼin chi ronojel elëqʼ xkeqʼalajin pe (Hebreos 4:13). Ri rusamajelaʼ ri Dios yojkikot ruma oj kʼo kikʼin winäq ri nkixïkʼ kiʼ richin pa ruchojmil nkibʼän chi re ronojel (Hebreos 13:18).

7. ¿Achike nqetamaj chi rij ri wuj xkʼutumär chuwäch ri Zacarías?

7 Ri Jehová itzel nutzʼët ronojel ruwäch elëqʼ. Ri rusamajelaʼ ri Dios nqanaʼ kikotem ruma e qetaman chuqaʼ yeqasamajij ri rupixaʼ rijaʼ. Chuqaʼ ruma nqabʼän chi re ri qakʼaslem chi nuyaʼ ruqʼij rubʼiʼ ri Dios. Ke riʼ man xtqïl ta ri kʼayewal xtukʼäm pe pa kiwiʼ ri chubʼanik man nkibʼän ta ri nubʼij ri rupixaʼ.

 TQABʼANAʼ RI XQABʼIJ

8-10. a) ¿Achike ri najikibʼaʼ atzij? b) ¿Achike xubʼän ri Sedequías?

8 Ri wuj ri xutzʼët ri Zacarías nuyaʼ chuqaʼ jun rutzijol chi ke ri nkijikibʼaʼ kitzij pa rubʼiʼ ri Dios, ja kʼa man nkibʼän ta ri nkibʼij (Zacarías 5:4). Jun jikibʼäl tzij nchʼon chi rij jun tzij ri nqabʼij richin nqayaʼ retal chi qitzij ri xqabʼij chuqaʼ nchʼon chi rij xa bʼa achike na jun ri nqasüj chi xtqabʼän.

9 Ri najikibʼaʼ atzij pa rubʼiʼ ri Jehová kʼo nukʼäm pe pa awiʼ we man nabʼän ta ri nabʼij. Tqatzʼetaʼ ri xbʼanatäj rikʼin ri Sedequías, ri rukʼisibʼäl qʼatöy tzij pa Jerusalén. Rijaʼ xujikibʼaʼ rutzij pa rubʼiʼ ri Dios chi xtubʼän ri nubʼij ri qʼatöy tzij pa Babilonia. Ja kʼa man xubʼän ta ri xubʼij chuqaʼ «man xutaqej ta ri jikibʼäl tzij ri xubʼän rikʼin ri rey». Ruma riʼ, ri Dios xubʼij chi xtkäm pa Babilonia (Ezequiel 17:16).

10 Ri Jehová royobʼen wi chi ri Sedequías xtubʼän ri xubʼij (2 Crónicas 36:13). Ja kʼa xa xuqäj ri rutzij, xa xukʼutuj rutoʼik pa Egipto richin xuköl riʼ chi kiwäch ri babilonios. Ri xubʼän majun achike ta xkʼatzin (Ezequiel 17:11-15, 17, 18).

11, 12. a) ¿Achike ri kʼo más ruqʼij nqasüj? b) ¿Achike kʼo ta chi nqabʼän ronojel qʼij ruma ri xqasüj chi re ri Jehová?

11 Ri Jehová nrakʼaxaj chuqaʼ ronojel ri yeqasüj röj. Ronojel ri nqasüj röj kʼo ruqʼij chuwäch rijaʼ. Ruma riʼ, richin nkikot qikʼin, kʼo chi nqabʼän ri nqasüj (Salmo 76:11). Ri nqasüj chi re ri Dios toq nqajäch qiʼ pa ruqʼaʼ, kʼo ruqʼij. Ruma toq nqabʼän riʼ nqabʼij chi re chi ronojel ri qakʼaslem xtqayaʼ ruqʼij, stapeʼ xkeqïl kʼayewal.

12 ¿Achike rubʼanik xtqabʼän ri xqasüj chi re ri Dios toq xqajäch qiʼ pa ruqʼaʼ? Ri xtqabʼän toq xtukʼüt pe riʼ jun nïm o  jun koʼöl kʼayewal chi qawäch, xtukʼüt we qitzij qayaʼon rikʼin qanima chi ronojel qakʼaslem nqayaʼ ruqʼij ri Jehová (Salmo 61:8). Achiʼel toq kʼo jun winäq nusüj pe riʼ chi qawäch pa qasamaj o pa tijobʼäl, ¿la xkojtzaq pa ruqʼaʼ o xtqakʼüt chi nqajoʼ nqanimaj rutzij ri Dios? (Proverbios 23:26). Chuqaʼ we xa xe röj oj rusamajel ri Dios pa qachoch, ¿la xtqakʼutuj qatoʼik chi re ri Dios richin ronojel mul xtqakʼüt chi oj rusamajel rijaʼ? Chuqaʼ ¿la ronojel qʼij yojchʼon rikʼin ri Dios richin nqamatyoxij ri rajowabʼäl chuqaʼ ri qanaʼoj nuyaʼ pe? ¿La nqajäm qawäch richin ronojel qʼij nqasikʼij ri Biblia? Qitzij na wi, toq xqajäch qiʼ pa ruqʼaʼ ri Dios xqabʼij chi re chi ronojel reʼ xtqabʼän. Toq nqabʼän ri xqasüj chi re, nel chi tzij chi nqanimaj rutzij. We rikʼin ronojel qanima xtqayaʼ ruqʼij, xtqakʼüt chi nqajoʼ rijaʼ chuqaʼ chi qitzij nqajoʼ nqabʼän ri xqasüj chi re. Ri nqayaʼ ruqʼij ri Jehová kʼo chi nqakʼüt pa qakʼaslem, man xa xe ta nqabʼij. Ri nqabʼän ri xqasüj chi re ri Dios kʼo utzil nukʼäm pe pa qawiʼ. Rijaʼ xtuyaʼ jun utziläj kʼaslem chi ke ri xtkinimaj rutzij (Deuteronomio 10:12, 13).

13. ¿Achike nqetamaj chi rij ri waqiʼ wachibʼäl ri xkʼutumär chuwäch ri Zacarías?

13 Ri waqiʼ wachibʼäl xkʼutumär chuwäch ri Zacarías yojrutoʼ richin nqatzʼët chi ri rusamajelaʼ ri Dios man ütz ta yojelëqʼ chuqaʼ kʼo chi nqabʼän ri xqabʼij. Ri Dios man xerumestaj ta ri israelitas stapeʼ xemakun chuwäch. Ri Jehová jebʼël wi nqʼax chuwäch chi e kʼïy winäq man xeʼajowan ta kichin, ruma riʼ xekïl kʼayewal. Rijaʼ nubʼän ri nubʼij, ja riʼ rubʼanik nuyaʼ jun tzʼetbʼäl chi qawäch ri kʼo chi nqabʼän röj. Chuqaʼ ütz nqayaʼ rikʼin qanima chi xkojrutoʼ richin xtqabʼän ri xqasüj. Jun rubʼanik yojrutoʼ, ja ri nubʼij chi qe chi xa xtuchüp yan ruwäch ri itzelal chi Ruwachʼulew. Ri jun chik wachibʼäl xkʼutumär chuwäch ri Zacarías nubʼij chi qitzij xtbʼanatäj ri rusujun ri Dios.

XTUKʼWÄX RI ITZELAL PA RUKʼOJLIBʼAL

14, 15. a) ¿Achike ri wuquʼ wachibʼäl xutzʼët ri Zacarías? (Tatzʼetaʼ ri wachibʼäl kaʼiʼ). b) ¿Achike nukʼexewachuj ri ixöq kʼo chupam ri chakäch? c) ¿Achike ruma ri ángel aninäq nutzʼapej qa ri ixöq chupam ri chakäch?

14 Toq xkʼutumär yan ri wuj chuwäch ri Zacarías, kʼo jun ángel xubʼij chi re chi tutzʼetaʼ ri «xtbʼekʼulun pe». ¿Achike ri wuquʼ wachibʼäl xutzʼët ri Zacarías? «Jun chakäch ri nukusäx richin etabʼäl» (tasikʼij Zacarías 5:5-8). Ri chakäch setesïk ruwiʼ chuqaʼ «bʼanon rikʼin plomo». Toq xjaq, ri Zacarías xutzʼët chi «tzʼuyül jun ixöq» chupam. Ri ángel xubʼij chi ri ixöq «nukʼexewachuj ri itzelal». Ri Zacarías xuxibʼij na wi riʼ toq xutzʼët chi ri ixöq nrajoʼ nel pe. Ri ángel aninäq «xunïm qa chupam ri chakäch, y xutzʼapej chik kan ruwiʼ». ¿Achike nel chi tzij reʼ?

15 Reʼ nel chi tzij chi ri Jehová man nrajoʼ ta chi yebʼanatäj itzelal pa rutinamit. We kʼo jun ri man ütz ta nbʼanatäj, rijaʼ aninäq nrelesaj el (1 Corintios 5:13). Ja riʼ nel chi tzij toq ri ángel aninäq nutzʼapej qa ruwiʼ ri chakäch.

Ri Jehová xubʼän ronojel richin xuchʼajchʼojrisaj ri rutinamit. (Tatzʼetaʼ ri chʼutitanaj 16 kʼa 18).

16. a) ¿Achike nutzʼët ri Zacarías chi nbʼanatäj rikʼin ri chakäch? (Tatzʼetaʼ ri wachibʼäl oxiʼ). b) ¿Akuchi (apeʼ) nkikʼwaj ri chakäch ri ixoqiʼ?

16 Chi rij riʼ xerutzʼët kaʼiʼ ixoqiʼ ri nimaʼq taq kixikʼ (tasikʼij Zacarías 5:9-11). Ri ixoqiʼ riʼ man e junan ta rikʼin ri ixöq ri «nukʼexewachuj ri itzelal», ri kʼo chupam ri chakäch. Ri Zacarías xutzʼët toq ri ixoqiʼ xkitzeqej el ri chakäch rikʼin ri kixikʼ. ¿Akuchi (apeʼ) nkikʼwaj wi? Pa tinamït Babilonia. ¿Achike ruma nkikʼwaj chi riʼ?

17, 18. a) ¿Achike ruma pa Babilonia ri ütz nukʼwäx ri itzelal? b) ¿Achike kʼo chi nqabʼän rikʼin ri itzelal?

 17 Chuwäch ri Zacarías chuqaʼ ri más israelitas ri xekʼojeʼ pa ruqʼij kan rijaʼ, ri Babilonia jun tinamït ri kan ütz richin nukʼwäx ri itzelal. Rijeʼ xekʼojeʼ chi riʼ, ja kʼa janila kʼayew xubʼän chi kiwäch, ruma ri winäq xa xe tzʼiläj taq bʼanobʼäl yekibʼän chuqaʼ yekiyaʼ kiqʼij ri tyoxiʼ. Ruma riʼ ketaman wi chi ruyon itzelal yebʼanatäj chi riʼ. Ri xkʼutumär chuwäch ri Zacarías xukuqubʼaʼ na wi kikʼuʼx, ruma xukʼüt chi kiwäch chi ri Jehová man xtuyaʼ ta qʼij chi xttzʼilbʼisatäj ri rutinamit.

18 Ri xkʼutumär chuwäch ri Zacarías xunataj (xukʼuxlaj) chuqaʼ chi kiwäch ri judíos chi kʼo chi yetoʼon richin man ntzʼilbʼisatäj ta rutinamit ri Dios. Ri itzelal man nyaʼöx ta qʼij chi re chi nkʼojeʼ pa rutinamit ri Dios. Rijaʼ oj rukʼamon pe chupam ri chʼajchʼojiläj rutinamit, ri akuchi (apeʼ) nqanaʼ ri rajowabʼäl chuqaʼ ri rutoʼik. Ja kʼa kʼo chi yojtoʼon richin man xttzʼilbʼisatäj ta. ¿La nqajoʼ yojtoʼon rikʼin riʼ? Chupam ri rutinamit ri Jehová majun rukʼojlibʼal ta ri itzelal.

JUN CHʼAJCHʼÖJ TINAMÏT NUYAʼ RUQʼIJ RI JEHOVA

19. ¿Achike nkikʼüt chi qawäch röj ri wachibʼäl xekʼutumär chuwäch ri Zacarías?

19 Ri waqiʼ chuqaʼ ri wuquʼ wachibʼäl xkʼutumär chuwäch ri Zacarías, nkibʼij chi kʼo kʼayewal xtpe pa kiwiʼ ri man pa ruchojmil ta najin nkibʼän pa kikʼaslem. Chuqaʼ nunataj (nukʼuxlaj) pe chi qe chi ri Jehová man nqa ta chuwäch ri itzelal. Ri rusamajelaʼ kʼo chi itzel nqatzʼët ri itzelal. Kikʼin ri wachibʼäl riʼ, ri Jehová nubʼij chi we röj xtqabʼän ri nqa chuwäch rijaʼ man xtqïl ta kʼayewal. Rijaʼ xkojruchajij chuqaʼ xtuyaʼ urtusanïk pa qawiʼ. Chuqaʼ xkojrutoʼ we xtqaxïkʼ qiʼ richin man xkeqabʼän ta ri itzel taq bʼanobʼäl. ¿Achike ruma qetaman chi ri qitzij nimabʼäl kʼuʼx majun bʼey xtchup ta ruwäch? ¿Achike ruma qetaman chi ri Jehová xtuchajij ri rutinamit wakami ri xa oj kʼo chik chunaqaj ri nimaläj tijoj poqonal? Chupam ri jun chik tzijonem xkeqatzʼët re kʼutunïk reʼ.