RI SACAPUNTAS ri kʼo pa ruqʼaʼ ri Jordan achiʼel jun koʼöl barco chuqaʼ achiʼel ta majun ruqʼij. Ja kʼa chuwäch rijaʼ, janila ruqʼij. Ri Jordan nubʼij: «Ja ri Russell xsipan chwe, rijaʼ jun achin ri janila ütz xukʼwaj riʼ kikʼin ri wachʼalal toq kʼa in koʼöl». Toq ri Russell xkäm, ri Jordan xretamaj chi ri achin riʼ janila ruqʼij chuwäch ri rumamaʼ chuqaʼ chi kiwäch ri ruteʼ rutataʼ. Janila xerutoʼ toq xekïl kʼayewal. Ri Jordan nubʼij: «Wakami, ruma wetaman más chi rij ri Rossell, ri koʼöl rusipanïk kʼo más ruqʼij chi nuwäch».

Reʼ nukʼüt chi jun sipanïk rikʼin bʼaʼ majun ruqʼij ta chuwäch jun winäq; ja kʼa chuwäch jun winäq ri nmatyoxin, kʼo ruqʼij chuqaʼ majun achoj rikʼin junumatäl wi. Ri Biblia ntzijon chi rij jun sipanïk ri majun achike ntikïr nloqʼon. Nubʼij: «Ri Dios kan janila wi kʼa yerajoʼ konojel ri winaqiʼ, y ruma riʼ kan xutäq kʼa pe ri juney rukʼajol richin chi xa bʼa achike kʼa ri nukuqubʼaʼ rukʼuʼx rikʼin, [...] kan xtkʼojeʼ kʼa rukʼaslem richin qʼasen» (Juan 3:16).

¡Reʼ jun sipanïk ri nuyaʼ kʼaslem man kʼisel ta! ¿La kʼo kami jun sipanïk más ruqʼij chuwäch reʼ? Stapeʼ e kʼo winäq man nkiyaʼ ta ruqʼij, chi kiwäch ri qitzij taq nimanelaʼ reʼ jun nimaläj sipanïk ri man yatikïr ta natöj (Salmo 49:8; 1 Pedro 1:18, 19). ¿Achike ruma ri Dios kan ja ri rukʼaslem Rukʼajol xusipaj pa kiwiʼ ri winäq?

Ri apóstol Pablo nubʼij: «Ri mak xa xe kʼa ruma jun achin rubʼiniʼan Adán toq xok kan chuwäch re ruwachʼulew. Y ri mak kan ja riʼ kʼa ri xkʼamon pe  ri kamïk. Ruma riʼ kan qonojel kʼa winaqiʼ ri kʼo chi yojkäm» (Romanos 5:12). Ri Adán, ri nabʼey achin, chubʼanik xmakun toq man xunimaj ta rutzij ri Dios. Ruma riʼ xpe ri kamïk pa ruwiʼ. Ruma ri Adán konojel ri winäq xkichinaj kan ri kamïk.

«Ri rutojbʼalil ri mak xa kamïk nukʼäm pe chi qe. Ja kʼa ri Dios nusipaj ri kʼaslem ri man kʼisel ta chi qe [...] ruma ri qajaw Cristo Jesús» (Romanos 6:23). Richin yeruköl ri winäq chuwäch ri kamïk, ri Dios xutäq pe ri Jesucristo, ri Rukʼajol, richin xuyaʼ ri tzʼaqät rukʼaslem pa kiwiʼ ri winäq. Matyox chi re ri sipanïk riʼ, konojel ri xtkikuqubʼaʼ kikʼuʼx chi rij ri Jesús xtkïl kikʼaslem man kʼisel ta (Romanos 3:24).

Ruma ri Jesús, ri Dios nuyaʼ urtusanïk pa kiwiʼ ri yeyaʼon ruqʼij. Ri Pablo xubʼij chi rij riʼ: «Matyox chi re ri Dios ruma ri rusipanïk ri kan janila nïm, ri man nilitäj ta achike rubʼixik rikʼin chʼabʼäl» (2 Corintios 9:15). Chi re ronojel ri rusipan ri Dios chi qe, ¿achike ruma ja ri tojbʼäl ri más nïm sipanïk ruyaʼon chi qe? ¿Achike nbʼanon chi man junan ta rikʼin jun chik sipanïk ri ruyaʼon ri Dios chi qe? * (Tatzʼetaʼ ri nota). ¿Achike rubʼanik nqamatyoxij ri sipanïk riʼ? Ri kaʼiʼ chik tzijonem xkechʼon chi kij re kʼutunïk reʼ.

^ parr. 8 Ri Jesús man xupoqonaj ta xuyaʼ ri rukʼaslem pa qawiʼ (1 Juan 3:16). Ja kʼa ruma ja ri Dios xyaʼon pe ri sipanïk riʼ, re tzijonem reʼ xkechʼon chi rij ronojel ri xubʼän ri Dios richin xqïl ri sipanïk riʼ.