Ri Jehová ja riʼ qas nbʼin achike ri ütz chuqaʼ ri man ütz ta. Jun tzʼetbʼäl. Rijaʼ rubʼin chi ri kʼulubʼïk jun achin rikʼin jun ixöq chuqaʼ chi majun xtjachon kichin (Mt 19:4-6, 9). Chuqaʼ nritzelaj ronojel ruwäch ri tzʼil taq bʼanobʼäl (1Co 6:9, 10). Richin nqʼalajin achike ri rusamajelaʼ ri Jehová, rijaʼ ruyaʼon chuqaʼ naʼoj chi rij ri rubʼanik nkiweq kiʼ chuqaʼ nkibʼän utzil kiʼ (Dt 22:5; 1Ti 2:9, 10).

Wakami e kʼïy winäq man nkajoʼ ta nkinimaj rupixaʼ ri Jehová (Ro 1:18-32). Pa rukʼexel riʼ, nkiweq kiʼ, nkibʼän utzil kiʼ chuqaʼ nkibʼän achiʼel ri nkajoʼ rijeʼ. Nkinimirisaj kiʼ ruma kikʼwan jun tzʼil kʼaslem chuqaʼ yekiyöqʼ ri man nkibʼän ta achiʼel rijeʼ (1Pe 4:3, 4).

Ja kʼa röj ri rusamajelaʼ ri Dios, man nqaqasaj ta ruqʼij ri nubʼij ri Jehová chi rij ri ütz chuqaʼ ri man ütz ta (Ro 12:9). ¿Achike rubʼanik nqabʼän riʼ? Ja ri pa rubʼeyal nqatzijoj chi ke ri winäq chuqaʼ nqasamajij pa qakʼaslem ri ütz achiʼel nubʼij ri Jehová. Jun tzʼetbʼäl. Toq nqaweq qiʼ chuqaʼ nqabʼän utzil qiʼ, ütz nqakʼutuj qa reʼ chi qawäch: «¿Achoj rutzij najin ninnimaj? ¿Rutzij ri Jehová o xa kitzij ri winäq? ¿Nqʼalajin chi rij ri nubʼanik chi in rusamajel ri Dios?». Jun chik tzʼetbʼäl. Toq nqatzʼët jun programa o película, ütz nqachʼöbʼ (nqanük) qa we nqa chuwäch ri Jehová ri nqatzʼët, o xa yojrunïm pa mak (Sl 101:3). Chuqaʼ ütz nqatzʼët achike nukʼäm pe pa ruwiʼ ri qa-familia chuqaʼ pa kiwiʼ ri más winäq ri nqachaʼ (1Co 10:31-33).

¿Achike ruma janila nkʼatzin ri man nqaqasaj ta ruqʼij rupixaʼ ri Jehová chi rij ri ütz chuqaʼ ri man ütz ta? Ruma ri Jesucristo xa xtuchüp yan kiwäch ri winäq ri man nkajoʼ ta nkisamajij rupixaʼ ri Jehová. Xa xe xkekolotäj kan ri yeniman tzij (Eze 9:4-7; 1Jn 2:15-17). Ruma riʼ, tqakʼwaj jun chʼajchʼöj kʼaslem achiʼel nrajoʼ ri Jehová. Ke riʼ, ri yetzʼeton qichin xtkiyaʼ ruqʼij ri Dios ruma ri qabʼanobʼal (1Pe 2:11, 12).

Ri rubʼanik ninweq wiʼ chuqaʼ ri rubʼanik ninbʼän utzil wiʼ, ¿nukʼüt chi nuniman rupixaʼ ri Dios?

TOQ XITZʼËT YAN RI VIDEO KATOK RACHIBʼIL RI JEHOVÁ: JUN ACHIN RIKʼIN JUN IXÖQ, KEʼIQʼALAJRISAJ RE KʼUTUNÏK REʼ:

  • ¿Achike ruma kʼo chi nqasamajij ri rupixaʼ ri Jehová?

  • ¿Achike ruma ri teʼej tataʼaj kʼo chi yekitijoj ri kalkʼwal chi rij ri rupixaʼ ri Jehová toq kʼa e koköj na?

  • Oj chʼutiʼq u oj nimaʼq, ¿achike rubʼanik yeqatoʼ ri winäq richin nkïl apo jun utziläj kʼaslem?