Ir al contenido

Tatzʼetaʼ ri rucholajem

TANAJ 3

Rubʼanik nasöl jun kʼayewal

Rubʼanik nasöl jun kʼayewal

«Tiwajowalaʼ iwiʼ [...], ruma ri ajowabʼäl kan nutzʼapej ruwiʼ ri janila chi mak» (1 Pedro 4:8).

Toq ri winaqiʼ yekʼuleʼ kʼïy kʼayewal nkïl pa kikʼaslem. Rikʼin bʼaʼ ruma man junan ta ri rubʼanik e kʼiytisan pe rikʼin ri kikʼulaj. Chuqaʼ man junan ta ri achike nkinaʼ chuqaʼ ri kichʼobʼonïk. Chuqaʼ kʼo mul, ri kʼayewal npe rikʼin jun chik winäq o achike chik na jun ruma.

Toq kʼo jun kʼayewal, rikʼin bʼaʼ, röj más ütz nqanaʼ choj ke riʼ nqayaʼ kan. Ri Biblia nubʼij kʼa chi keqasoloʼ ri qakʼayewal (Mateo 5:23, 24). Chuqaʼ yojrutoʼ richin ütz kisolik nqabʼän chi ke.

1 KIXTZIJON CHI RIJ RI KʼAYEWAL

RI NUBʼIJ RI BIBLIA: «Kʼo ruqʼijul» richin yachʼon (Eclesiastés 3:1, 7). Ruma kʼa riʼ, ütz nubʼän najäm aramaj richin yatzijon rikʼin ri akʼulaj chi rij ri kʼayewal. Tatzijoj chi re ri achike nanaʼ chuqaʼ ri rubʼanik natzʼët ri kʼayewal. Majun achike tawewaj chuwäch (Efesios 4:25). We nanaʼ chi npe awoyowal, taqʼataʼ awiʼ richin man ninimïr ta más ri kʼayewal. Ri pa rubʼeyal natzolij jun tzij, nubʼän chi jun koʼöl kʼayewal man xtnimïr ta el (Proverbios 15:4; 26:20).

Stapeʼ kʼo jun ri man nqa ta chawäch ri nubʼij ri akʼulaj, mani npe awoyowal chi rij. Takʼutuʼ chi nawajoʼ chuqaʼ chi nayaʼ ruqʼij (Colosenses 4:6). Takanoj rubʼanik richin nasöl yan ri kʼayewal chuqaʼ mani nibʼän chi majun chik yixchʼon ta chiwäch (Efesios 4:26).

RI ÜTZ NABʼÄN:

  • Takanoj jun ramaj ri ütz nubʼän richin yixtzijon chi rij ri kʼayewal

  • Toq nchʼon ri akʼulaj, stapeʼ rat nawajoʼ yachʼon apo, tayaʼ qʼij chi tchʼon na rijaʼ. Xtapon ri ramaj toq xkachʼon chik rat

2 TAYAʼ AXKÏN CHI RE RI AKʼULAJ

RI NUBʼIJ RI BIBLIA: «Tiwajoʼ iwiʼ rikʼin ronojel iwanima y tiyalaʼ iqʼij chi iwachibʼil iwiʼ» (Romanos 12:10CO). Janila ruqʼij nayaʼ axkïn chi re ri akʼulaj chuqaʼ nqʼax chawäch ri nubʼij. «Xa jun iwäch tibʼanaʼ» chuqaʼ «man tinimirisaj iwiʼ» (1 Pedro 3:8; Santiago 1:19). Toq yatzijon rikʼin ri akʼulaj, kan qitzij tayaʼ axkïn chi re. Tayaʼ kan rubʼanik ri najin nabʼän, ke riʼ tawakʼaxaj ri nubʼij o takʼutuj chi re we ütz nubʼän chuwäch yixtzijon jun chik ramaj. We rat natzʼët ri akʼulaj achiʼel jun winäq ri achoj rikʼin nitoʼ iwiʼ chi rij jun samaj, man xtpe ta awoyowal chi re (Eclesiastés 7:9).

RI ÜTZ NABʼÄN:

  • Tayaʼ axkïn chi re ri akʼulaj, stapeʼ man nqa ta chawäch ri nubʼij

  • Tawakʼaxaj achike qas nrajoʼ nubʼij ri akʼulaj. Tatzʼetaʼ ri rupaläj toq nchʼon chuqaʼ ri ruqul nubʼän

3 MAN TPOʼ AKʼUʼX

RI NUBʼIJ RI BIBLIA: Ronojel samaj kʼo chʼakïk nukʼäm pe; ja kʼa ri xa xe xabʼij y man xabʼän ta, majun utzil ta xtukʼäm pe (Proverbios 14:23). Majun achike ta xtkʼatzin we xa xe xtibʼij achike rubʼanik xtisöl ri ikʼayewal, kʼo chi yixsamäj chi rij. Qitzij na wi, rikʼin bʼaʼ kʼayew nubʼän, ja kʼa kʼo utzil xtukʼäm pe (Proverbios 10:4). We chi ix kaʼiʼ xkixsamäj chi rij, xtukʼäm pe kikotem pa iwiʼ (Eclesiastés 4:9).

RI ÜTZ NABʼÄN:

  • Tatzʼetaʼ achike ütz nibʼän chi ijujunal richin nitoʼ iwiʼ chi rusolïk ri kʼayewal

  • Chi jantäq, titzʼetaʼ achike rubʼanon chiwäch rusolik ri kʼayewal