Keimon lidoun ariñahani

Keimon lidoun libiaman menú

Gefentiña luagu Heowá

Garifuna

Ligaburi lounigirún ariñahani le híchugubei gürigia hawougua

Ligaburi lounigirún ariñahani le híchugubei gürigia hawougua

Tidan hóundarun gefentiña luagu Heowá, falawati adundehani tídangiñeti Bíbülia luagu mosu lan inebewa lan haricha gürigia lun masubudirúniwa lan sun hawaguti. Ani lanwoun lira, gabaroun tumuti óundaruni to súdini lan tíchugun ariñahani furanguti houn tílana, teresibirun ariñahani furanguti hámagiñe, bürüwa ligíame dandu ariñahani le híchugubei hawougua (hiri, hanumerun, halía lan heredera o katei líbeina lira) kei ariñahani le híchugubei luagu habagari (harasan, habagari, hátuadi, le hasaminarubei o katei líbeina lira), gayara láamuga tetenirun lun hemegeirun gefentiña luagu Heowá gúnfuli hamaamuga lau sun le gánibei luma hani relihión luma híderaguniña gürigia háledi; gabaroun tumuti giñe moun lumuti lan tasubudiragüdüni katei aramudaguati le hani amu ani mosu lan tóunigiruni ariñahani buidu (Ariñawagúni 15:22; 25:9). Wéiriti lisudinin madimurehóun lan luagu katei aramudaguati le hani amu (Ariñawagúni 20:19).

Rúati lúrudu lidan saragu ageiraü lun lounigirúniwa haricha gürigia lun masubudirúniwa lan sun hawaguti. Íbini lubaragiñe lichugúniwa lúrudu burí le, barüharu hóundarun gefentiña luagu Heowá saragu irumu arufuda inebehabu lun haricha gürigia lun masubudirúniwa lan sun hawaguti luma ámanicha lau. Ani kei tadügüni hóundarun gefentiña luagu Heowá lúmagiñe binadu dan, tasigiramémeba óunigirei ariñahani le híchugubei gürigia hawougua tun kei lariñawagún tidan dugumedu to.

Halía lafalarúa?

Falawati le ariñawagúbei tidan dugumedu to tidan sun hani gefentiña luagu Heowá sukursáli lidan sun Ubóu.

Lounigirún ariñahani le híchugubei gürigia hawougua

Tidan hóundarun gefentiña luagu Heowá góunigiwati sun ariñahani le híchugubei gürigia hawougua, kei lariñawagún ya ǘnabu:

  1. Lauba irichaü luma úaraguni lahandilihóua ariñahani le híchugubei gürigia hawougua.

  2. Weresibirúbei, wóuserubei ani yusu wameime ariñahani le híchugubei gürigia hawougua lúnrügü le mégeiwabei lun hagunfulirun gefentiña luagu Heowá lau hani relihión luma lun híderawagun gürigia.

  3. Úaraguabei ariñahani le híchugubei gürigia hawougua luma inarüni ani wakipurubei le iseritimagilibei. Keime tíchugun óundaruni to fe anihein lan somu charati lidan ariñahani le híchugubei gürigia hawougua, taransehabei.

  4. Lerederuba ariñahani le híchugubei gürigia hawougua areidañu tidan óundaruni to luágurügü dan le mégeiwabei lun tagunfulirun lau le yuubei tun.

  5. Gabaroun tubéi óundaruni to lunti lan inebehabu tan lun haricha gürigia ha íchugubaña ariñahani hawougua tun.

  6. Tadügübei óundaruni to sun le lunbei ladügǘniwa lun mígirun tan lun ñein lan adüraaguti lúrudu lau laburuchaguagüdüni ariñahani hawaguti gürigia le túmabei lanagangiñe bena. Lakipurúba sun ariñahani le híchugubei gürigia hawougua woun tidan burí konputadora to láküwatu lau burí kódigu lun gürigiarügübaña lan ha garichatiña lun hebelurun tidoun ebelura arihei. Lárigiñe lóurate wadagimanu, lerederuba tubenari burí wani áfisi láküñu ani gürigiarügübaña ha ibihatiña üma ebelura.

  7. Móunahan wabéi ariñahani le híchugubei gürigia hawougua woun tídangiñe aban sukursáli tidoun amu ánheingubeirügü mégeiwa lun wagunfulirun lau wani relihión o lau wadagimanu le tadügübei hóundarun gefentiña luagu Heowá lun tíderaguniña gürigia, ánharaaña sun gefentiña luagu Heowá lun katei le lau desidírü hamá lau sun hagundan hadügagun houngua gefentiñame luagu Heowá luma lun hasubudirúniwa lau iri le.

Liricha gürigia le íchugubei ariñahani luougua

  1. Ligirúba gürigia le íchugubei ariñahani luougua lun lárügüdün luéigiñe liricha lun lounigirún, laranserawagún o lagidarúniwa ariñahani le líchugubei luougua úaragua luma ligaburi hadügüni gefentiña luagu Heowá katei ani kei lariñawagún tidan dugumedu to.

  2. Gürigia le amuriahati wama lun wígiruni lun ladügün furumiñeguarügü lídangiñe katei le ariñawagúbei lidan fánreinti le, mosu lachoururagüdüni woun lau burí katei le gayaraati líderaguniwa achoururei woungua, le lan lúgubu gürigia lan ligía íchugubei ariñahani woun luougua.

  3. Anhein amuriaha somu gürigia üma wama lun lebelurun arihei, asansirei o agidarei ariñahani le ru láalibei luougua o luagu libagari woun, takutihabei óundaruni to lau duari ka lan buiti o wuribati gayaraabei lanügüni lira dandu lun gürigia ligía kei tun óundaruni to luma lun tiricha lábugiñeti lúrudu, kéiburi hamuga anhein gayara lubéi ladügün le lamuriahabei gürigia ligía lun lásiñarun hasigirun tílana óundaruni to agunfulira lau hawadigimari keisi relihión lidan darangilaü.

  4. Busentu óundaruni to takipuruni sun ariñahani luáguti kada gefenti luagu Heowá lun súnwandan. Ladüraawaguña tilurudun óundaruni to lidan luáguti wadagimanu le tagunfulirubei luma hafiñen lílana relihión le anhein agidarúa ariñahani ligía ñéingiñe.

Liricha gürigia lun lanügüni likesin ligibugiñoun aban aguseragüdüti le íñutimati

Anhein sandí lubéi somu gürigia dügügua waali lan liricha, gayaraati labürühan houn lílana Sétanu le Arihibei tau Sukursáli to arihiboun lau lageira amuriaha láamuga hama lun harihin lau likesin. Mosu lóunahanu gárada tuguya lubaragiñe lásügürün bián dimaasu lúmagiñe lasuseredun turobuli le anügübalin abusenra lun amu lan ariha lau likesin.