Keimon lidoun ariñahani

Keimon lidoun libiaman menú

Gefentiña luagu Heowá

Garifuna

Gidá wamaali iyereehabúni tídangiñe wanigi hawagu amu rasa

Gidá wamaali iyereehabúni tídangiñe wanigi hawagu amu rasa

Furendeihadiwa, wagía gefentiña luagu Heowá, aban lan labu larihini Bungiu sun rasa (Adügaü 10:34, 35). Lau arufudahani tídangiñeti Bíbülia le wíchugubei íderagua wamutiña gürigia lun hagidaruni iyereehabúni le hasandirubei tidan hanigi hawagu amu rasa, ka lan yebe luéirinbei iyereehabúni ligía.

Mídintiwa giñe luéigiñe hóubadina lílana furumiñeguarügü sétanu ha iñuragutiña houngua hawagun amu ladüga iyereegu hamá houn luagu harasan. Samina humá luagun le: lidan meha lidaani lagumadihan Hítüler, máhatiña meha gefentiña luagu Heowá ha Yámanibaña ni ha lídanbaña amu ageiraü houdin luéigiñe lóubadina lidan áfarahani le ladügübei ladüga iyereegu hamá amu rasa lun. Afarúatiña saragu san hádangiñe gefentiña luagu Heowá ladüga hóuserun ítara.

Aban katei ítarati asuseredubei dan meha le háfarawagunbei saragu gürigia luagu harasan ageiraü Ruanda lidan irumu 1994. Mídehantiña gefentiña luagu Heowá lidan áfarahani ligía. Le linarün katei, añahein meha hádangiñe ru hamuti habagari lidan denchaü, o féridi hamuti, lun híderaguniña ha anurahabaña luéi háfarawagun.

Kei busén wabéi wíderaguniña gürigia ha lídanbaña sun fulasu ubouagu, ligía wadügünbei ani afanreinha wagía agumeiraguagüdüni tídangiñetu Bíbülia lidan kéiburi sedü-san iñeñein. Uguñe weyu, gíbetiña gürigia ha “lídangiñetiña sun fulasu, sun rasa, sun iñeñein luma néchani” asandiragutiña houngua buidu lidan hani gefentiña luagu Heowá damuriguaü (Arufudúni 7:9).