Lidan nefu-hati, irumu 2012, daruwatu tóugiñe 20 sukursáli hani gefentiña luagu Heowá lun ámuba lan sukursáli to wéiritimatu ariha lau wadagimanu lánina apurichihani le adügǘbei ñein.

Gama lumoun, adügǘwatu aban iseri sukursáli lidan ageiraü Serbia luma Masedónia. Biámañein lébuna ladügǘniwa asansiruni le.

1. Adügati teknolohía lun ménrengun lan wadagimanu

Lidan lagumuhóun burí irumu le sügühalibei, adügaali lawanserun teknolohía luma ligaburi imprimírua tan agumeiraguagüdüni lun mibe hamá gürigia emegeirúatiña tidan fiu sukursáli. Adügati katei le lun ñein lan ubaraü houn íbirigu ha awadigimaridubaña tidan burí sukursáli to ñǘraütimatu.

Uguñe weyu, añahein saragu gefentiña luagu Heowá ha derebuguhaña lidan hafiñen ariha lau wadagimanu lánina arufudahani tídangiñeti Bíbülia le adügǘbei lidan ámuñegueinarügü ageiraü. Aban hénpulu, guentó sukursáli to Méhikuboun arihiboun lau wadagimanu lánina apurichihani le adügǘbei Indura, Kosu Rísiti, Nigarawa, Panamá, Salu luma Wadimalu. Ligíati daruwa lubéi sukursáli to meha lídanboun sisi ageiraü le.

Ounahóuatiña bián-wein gefentiña luagu Heowá tídangiñe sisi sukursáli to eseriwida tidan sukursáli to Méhikuboun, ani óunahoutiña kéiburi 95 íbirigu apurichihei uganu buiti lidan dan dayarüti hageira.

Añahein amu, gumeseeña eseriwida lábugiñe taríaahan sukursáli to Lamidanboun Meriga tidan burí muna to ídanboun tásügürawagüdüwa agumeiraguagüdüni lidoun amu iñeñein. Kei hénpulu, añahein kéiburi wein íbirigu ásügüragüdoun wani agumeiraguagüdüni lidoun burí iñeñein le ayanuhóubei Panamá. Tidan binadu sukursáli to Wadimaluboun, añaheinhaña 16 íbirigu ídeha lidan tásügüragüdüniwa agumeiraguagüdüni tídangiñetu Bíbülia lidoun iñeñein le ayanuhóubei ñein. Hádangiñe 300 íbirigu ha meha eseriwidubaña tidan ámuñegueinarügü sukursáli to meha Lamidanboun Meriga, añahagua kéiburi 75 eseriwida tidan somu sukursáli.

2. Mégeiwatiña apurichihatiña lidan dan dayarüti

Lau tóundarawagun saragu tirahüñü sukursáli lidan aban, gayaraahali hásügürün saragu íbirigu ha derebuguhaña lidan hafiñen, ha meha eseriwidubaña tidan, saragu dan apurichihei uganu buiti.

Abürühati aban íbiri le eseriwidubei Áfürika ani ounahóuati apurichiha lidan dan dayarüti: “Dan le nagumeserunbei, güreweiti meha nasandiruni iseri ligaburi neseriwidun, sügüti fiu hati lubaragiñe néchudun. Gama lumoun, íderagua lumutina napurichihan sagü weyu lun nibihin ugundani luma saragu abiniruni, aban katei le meha masaminarungubei numuti nibihinbei lan. Guentó, níchuguña aturiahani tídangiñeti Bíbülia houn 20 gürigia ani saragu hádangiñe gumeseeña adamuridagua.