Keimon lidoun ariñahani

Keimon lidoun libiaman menú

Gefentiña luagu Heowá

Garifuna

Eresibihani númeru 134 tídangiñe Leskuela Galaadü: “Áyeiha huméi hafiñen”

Eresibihani númeru 134 tídangiñe Leskuela Galaadü: “Áyeiha huméi hafiñen”

Weyu samudi 9 lidan ǘrüwa-hati, irumu 2013, ligía ladügǘniwa Eresibihani númeru 134 tídangiñe Leskuela Galaadü to tani Watchtower lidan Fulasu lánina Arufudahani le hámabei gefentiña luagu Heowá uburugu Patterson, Newayoru. Adügǘwatu Leskuela to lun larufudahóun houn minisigu gefentiña luagu Heowá ha barühaña saragu irumu eseriwida ítara lúntima garufudahadi hamá. Chülütiña 9,912 gürigia lidoun eresibihani le, añahein haduheñu eresibihatiña hadan ítara kei hamadagu hama amu amisurahóutiña.

Íbiri Mark Sanderson, aban hádangiñe lílana Sétanu le Arihibei lau Hawadigimari Gefentiña luagu Heowá lidan sun Ubóu, eseriwidubei kei alidihati lidan programa. Haritaguagüda lumuti houn súngubei ida liña lan meha tagumeserun Leskuela to weyu 1 lidan bián-hati, irumu 1943, ǘrüwa-wein-diisi irumu lubaragiñe le. Lidan meha ókaasion ligía, ariñaga lumuti íbiri Nathan Knorr, le meha arihibei tau Leskuela to, ka lan tisuunibei, dan le lariñagunbei: “Ánhaña aganwounda apurichihatiña lidan fulasu, haganwounduba aganbuti [uganu buiti luáguti Larúeihan Bungiu] darí hóustarun saragu san hama saragu milu. Lau lídehan Aburemei, haganwounduba”. Labulieidaguña meha san?

Samina wamá luagun le: Murusun dan lárigiñe tagumeserun Leskuela to, aba laweiyasuhan íbiri Knorr Méhikun lun larihini haliñounba lan gayara lan hounahóun mísionerugu ha eresibihatiña tídangiñe Leskuela Galaadü. Lidan ókaasion ligía, amisurahóuatiña lílana sun damuriguaü le lídanbei 240 kilometuru (150 maili) fulasu uburugu Méhiku lidoun aban adamuridaguni le ídounbei hachülüra 400 gürigia. Lun hamuga ladügǘniwa adamuridaguniméme ligía guentó, yarafa lun 70 irumu lárigiñe hachülürün furumiñetiña eresibihatiña tídangiñe Galaadü Méhikun, másiñati hachülürüña hamuga lan hóugiñe 200,000 gürigia.

“Ka búhaburugubei?” Ligía líribei yanu le líchugubei íbiri Anthony Griffin, aban hádangiñe lílana Sétanu le Arihibei tau Beteli to Merigaboun, lídangiñe Áfuriduni 4:2 lasagarúa yanu le. Según bérusu le, álügüda lumuti Bungiu Moisesi: “Ka búhaburugubei?”, ábati lóunabun Moisesi: “Aban badun”. Yusu lumuti Heowá badun ligía keisi liseinin ubafu luma wadagimanu le líchugubei lun Moisesi (Áfuriduni 4:5). Buiti meha lidin lun Moisesi sun dan le layusurunbalin ubafu le ichugúbei lun lun líchugun uéiriguni lun Bungiu; gama lumoun, dan le layusurunbalin lun líchugun uéiriguni lúniwagua luma lun lǘnabudagüdüniña líbirigu, kei lasuseredun “Meribá”, aba lagañidun Bungiu luma (1 Lúrudu 20:9-13).

Ariñagati íbiri Griffin houn aturiahatiña ítara liña lan arufudahani le heresibirubei tidan leskuela Galaadü kei lubadun Moisesi. Lau lira leweridiraña moun lumuti lan hayusuruni habafu wuriba. Ábati lariñagun houn: “Yusu huméi le furendei humaalibei lun halawahani Heowá luma lun híchugun uéiriguni lun, ábanmeme humaamuga abiniruni houn sun ha úntiña heseriwida”.

“Haritagua humóun maná.” Afuranguagüdati íbiri Stephen Lett, aban hádangiñe lílana Sétanu le Arihibei lau Hawadigimari Gefentiña luagu Heowá lidan sun Ubóu, gádürü katei le gayaraabei wafurendeiruni lídangiñe milaguru le ladügübei Bungiu lidan fulasu mageirawati lau líchugunu maná houn ísüraelina.

  • Mosu wasigirun awadigimarida lau sun were (1 Lúrudu 11:8). Lun meha gayara lan héiginu ísüraelina maná, mosu meha habudunu lau lóufudagun, haransehanu luma hábougunu (Áfuriduni 16:21).

  • Maweiyasun wamá ekehara luagu le líchugubei Heowá woun (1 Lúrudu 11:5, 6). Dan meha hekeharunbei ísüraelina tuagu maná, barǘ lumuti Bungiu ekeharuni ligía kamá hamuga hanabaguñein. Másiñati giñe ñeinbei lan dan madaarun lan walama luagu ariñahani lúmagiñeti Heowá le weresibirubei le ítarabei woun kei éigini, gama lumoun, súnwandan líchuguba lan ariñahani ligía erei woun kei meha tíchugun maná erei houn ísüraelina. Mosu weteingiruni Heowá luagu sun le líchugubei woun lun wóunigiruni wamadagua luma.

  • Chouru waméi líchugubei lan Heowá sun le wemegeirubei woun. Sagü meha weyu líchuguni Bungiu maná houn ísüraelina. Ani lidan weyu le lubaragiñebei luéyuri emeraaguni ruti maná houn lubá bián weyu (Áfuriduni 16:22-26). Ítarameme, gayaraati giñe wachoururuni líchugubei lan Bungiu wemegeirun woun (Matéu 6:11).

  • Mabinirun lumutiña Heowá gürigia maganbaditiña (Áfuriduni 16:19, 20, 25-28). Gáñirügüti meha Heowá hama ísüraelina ha áfuridubaña áluaha maná lidan luéyuri emeraaguni, ánhañati ha areidahabaña maná lubá le larugan weyu, dan le ariñawagúaali houn lun mareidahan hamá, ábaha tañaladun hawéi, tabuinchun hau héweraü luma tíngidun.

Ariñagati íbiri Lett houn aturiahatiña anhein lan gabaroun wamá katei burí le wafurendeirubei lídangiñe milaguru tánina maná, lánhunrechubei lan Heowá “lubenari sielu lun [l]óunahani lubuidun-agei abiniruni” wawagun (Malakíasi 3:10).

“Aranse humá lubá hawinwandun lídanme iseri ubóu.” William Samuelson, íbiri le arihibei tau Leskuela burí to tíchuguboun Lóundarun Heowá, íchugubalin yanu le. Afuranguagüda lumuti agurabúa lan wéiribei lan wayumahan wawinwandun lidan iseri ubóu. Íbini ítara, súdinitimati wálügüdagun woungua anhein aranseediwa lubéi lun wawinwandun ñein. Lun lira, mosu wárügüdagun woungua (1 Féduru 4:7).

Arufudatiwa ragügua wamá woungua lau ligaburi warihini wachara. Míchugun wabéi duru luagun Satanási ni luagun ubóu le lábugiñebei lubafu luagu sun charati le wadügübei, háfuga lau wasaminarun lídanhali lanme iseri ubóu —lárigiñeme gumuhali Bungiu hau wuribatiña ha— wasansirei luriban igaburi le wawagubei. Agiribuhati íbiri Samuelson weiri lan lisudinin wageindagun, lúmagiñe guentó, lun wagidaruni luriban igaburi wawariua, kéiburi wasaminarun wawouguounrügü, daügua wamaamuga “lau iseri igaburi” (Éfesuna 4:24).

“Ígiragüda huméi abürühagülei.” Yusu lumuti íbiri Mark Noumair, aban hádangiñe arufudahati tidan Leskuela Galaadü, hénpulu luáguti aban abürühagülei lun layanuhan luagu anihein lan dan “wárügüdüni abürühagülei lun wabürühan luagu guánarügü wabagari”. Gama lumoun, ariñagati mosu lan “wígiragüdüni abürühagülei” lun wígirun lun Heowá lan abürüha luagu wabagari.

Buiti meha lagumeserun libagari urúei Saulu. Aban meha gürigia ǘnabuguti ligía dan le lagumeserunbei arúeiha ani manaagunti meha lungua (1 Samueli 10:22, 27; 11:13). Murusun dan lárigiñe, aba labusenrun ligía lan “abürüha luagu libagari”, lau ladügüni lérügü lasaminarubei, áluaha ligía uéiriguni lúniwagua. Adügati lira lun magundanhali lan buga Bungiu lau (1 Samueli 14:24; 15:10, 11).

Lau sun arufudaaña lan aturiahatiña ha lidan sun dan le luagu derebugu lan hafiñen, haritaguagüda lumuti íbiri Noumair houn megei hamá hasigirun adügei luadigimari Bungiu según ligaburi Bungiu. Ru lumuti eweridihani le houn: “Góunigi humá, mama luagu yusu lániwa Bungiu lun wasaminaruba lan gunda lan wau”. Kéiburi dan le madügün lubalin Moisesi katei kei lariñaguni Bungiu lun weyu le lasagarunbei duna lídangiñe dübü lau aban milaguru. Ésehati duna lídangiñe dübü kei lagurabúniwa, gama lumoun aba meha mabinirun laali lan Heowá Moisesi (1 Lúrudu 20:7-12).

“Óundara waméi wamalali lumoun lumalali ánheli le áhamahabei lamidangua sielu.” Ligía líribei yanu le líchugubei íbiri Sam Roberson, aban arufudahati tidan Leskuela Galaadü, lídangiñe Arufudúni 14:6, 7 lasagarúa. Lárigiñe, adundeha lumutiña aturiahatiña lidan harufuduni sügǘ burí le málügilibei lúmagiñe hawinwanduni lidan hapurichihani Larúeihan Bungiu. Kéiburi le lawinwandubei aban aturiahati le apurichihabei tun aban anosuhatu dan le lárügüdaguña lubéi lungua lárigiñe líbugun tidan aban háspitali. Kei lídangiñetu lubéi ageiraü Perú anosuhatu tuguya, arufuda lumutu iyawaü to áfuachuboun lidan páhina jw.org tun le ídanbei háfuacha íbirigu apurichiha Chachapoyas (Perú) lun lagumeserun adimureha tuma. Adügati katei le lun tagumeserun aturiahoun Bíbülia, dandu tuguya kei tani weiriei.

“Aba badaürünina [...] ani gañei bumutina.” (Heremíasi 20:7.) Álügüdaguati íbiri Allen Shuster, aban hádangiñe lílana Sétanu le Arihibei tau Beteli to Merigaboun, bián feru maríeitiña hádangiñe ha eresibihabaña. Sanditiña gádürü aturiahatiña ha daü lániña Heowá. Ida? Ariñagatiña samina hamá meha siñabei lan hagunfulirun lau sun le agurabúbei hámagiñe tidan Leskuela to, gama lumoun, ibiha hamani ídemuei le hemegeirubei eibu awansereina tan leskuela, ligía lan buidu lubéi lidin houn. Arufuda tumuti íbiri Marianne Aronsson weiri lan teteingiruni arufudahani le teresibirubei tidan Leskuela Galaadü, dan le tariñagunbei: “MámaaIime mosu nerederun áluaha kaba lan naturiaha, lugundun rúhadina fe ítara liña lan kada bérusu le tídanbei Bíbülia kei aban óunwenbu irisini”.

“Áyeiha huméi hafiñen.” Ru lumuti íbiri David Splane, aban hádangiñe lílana Sétanu le Arihibei lau Hawadigimari Gefentiña luagu Heowá lidan sun Ubóu yanu le méinitimabei lidan programa lánina eresibihani, sagawati lídangiñe Ebüréu 13:7, ñein lubéi lariñaga: “Haritagua humá hawagun ha adundehabalün, ha apurichihabalin luganute Bungiu hun; samina humá libügürü ida liña lan meha habagari ani áyeiha huméi hafiñen”. Ida liña harufuduni ha meha adundehabalin hawadigimari gefentiña luagu Heowá ha meha awinwandubaña 70 irumu lubaragiñe le gadüna lan lun láyeihoun hafiñen?

Lidan weyu 24 lidan nefu-hati, irumu 1942, óundaraguagüda lumutiña íbiri Nathan Knorr sun íbirigu ha meha arihibaña tau bián óundaruni to hayusuruboun gefentiña luagu Heowá lidoun dan ligía lun hadimurehan luagu tagumeserúniwa aban iseri leskuela: Galaadü. Ka un? Lun larufudahóun houn íbirigu seriwi hamaamuga kei mísionerugu ha anügüti ubaraü lidan wadagimanu lánina apurichihani lidan burí iseri fulasu. Gama lumoun, menegeti meha ligía lan dan buídutimabei lun tagumeserúniwa leskuela to. Lugundun lageindawagúña meha Libiaman Wuribu Wéiriti ani adügati meha lira lun gürewei lan, o lun siñá lan, hounahóun mísionerugu lidoun saragu ageiraü. Lanagangiñe lira, lawinwandúña meha aban maseinsuni ubouagu le meha aweiridagubei diisi irumu lubaragiñe ani lubarügüñein meha seingü irumu gaseinsun tan lóundarun Heowá lun tágüdahanu Leskuela to. Íbini ítara, aba harufuduni íbirigu hagía weiri lan hafiñen lau húaradun súngubei lun tagumeserúniwa Leskuela to.

Arufudatiña meha giñe furumiñetiña eresibihatiña tídangiñe Leskuela Galaadü aban afiñeni le gadünati láyeihoun. Furendeitiña meha agundaara lau hámati luma lun míchugun hamani hínsiñehabu luagun seinsu (Ebüréu 13:5, 6). Gíbetiña meha hádangiñe asaminarutiña marihindigia hamaaña lan haduheñu, ha meha wéiribei hagudemen ani siñabei meha hóunahan lebegi hapasein lun houdin bisidaña. Lárigiñehali meha 10 o 15 irumu habiha saragu hádangiñe mísionerugu ha harihiniñaya haduheñu. Chouru hamuti meha sun mísionerugu ha lasigiruba lan Hesusu óunigiraña, kei súnwandan, dandu hagía kei haduheñu (Ebüréu 13:8).

Furumiñetiña aturiahatiña tidan Leskuela Galaadü, irumu 1943

Lárigiñe lira, aba layanuhan íbiri Splane luagu burí sügǘ hénrenguti le hásügürübei fiu hádangiñe aturiahatiña ha meha eseriwidubaña bóugudi luéi hageira lubaragiñebei hamisurahóun tidoun Leskuela Galaadü, ábati lariñagun houn sun aturiahatiña: “Huguya, wügüriña hama würiña úaraguatiña ha eresibihabaña tídangiñe Leskuela Galaadü to, hasigiruñein le hagumeserubei wügüriña hama würiña ha meha aturiahabaña tidan Leskuela to dan le tagumeserunbei 70 irumu guentó [...]. Seriwi humá lau ugundani lun Heowá le ñeinhin lumuti hounahúa”.

Gumú lumuti íbiri Splane liyanun lau larufudúniwa aban bidéu tau burí hayawa 77 íbirigu ha eresibihaañabaña tídangiñe Leskuela Galaadü ani heseriwiduña guentó tidan sukursáli to hámaboun gefentiña luagu Heowá Meriga, bián hádangiñe, tídangiñetiña meha furumiñetu Leskuela to adügǘboun lidan irumu 1943. Sun meha anuha lan iyawaü arihúa aganbahóuati giñe burí lídangiñe uremu le meha hayusurubei gefentiña luagu Heowá lun halawahani Heowá lidan 70 irumu le sügühalibei.

Lárigiñe heresibirunu aturiahatiña hani diploma, aba laliihan aban hádangiñe eresibihatiña aban gárada to ídanboun heteingirei aturiahatiña arufudahani le resibi hamaalibei. Gumú lumuti íbiri Sanderson programa lau lariñagun gebegimémegili lan dimurei burí le meha lariñagubei íbiri Knorr, lau sun sügühali lan 70 irumu lúmagiñe lariñagun houn furumiñetiña eresibihatiña tídangiñe Leskuela Galaadü: “Meberesenga halíñoun lan hounahúa, haritagua huméi [...] apurichihatiña lan Larúeihan Bungiu huguya; ani resibi humaali lan chansi le buídutimabei lídangiñe sun chansi le gayaraabei leresibiruni aban gabagariti ubouagu: hasubudiragüdüni luéirigun Bungiu guentó, lubaragiñe lageindawagun Arümahedón [...]. Apurichiha humá sunme gayaraagili lan lapurichihóun”.