Keimon lidoun ariñahani

Keimon lidoun libiaman menú

Gefentiña luagu Heowá

Garifuna

Ka uagu mádaragun habéi gefentiña luagu Heowá houngua lidoun polítika?

Ka uagu mádaragun habéi gefentiña luagu Heowá houngua lidoun polítika?

Gíbeti resun tíchugun Bíbülia woun, wagía gefentiña luagu Heowá, lun mádaragun wamá woungua lidoun polítika. Ligía madügüdarun wabéi hawagu polítiku lun wabihini le wabusenrubei, marabachun wagía luagun lóubadina ni aban sétanu le hani polítiku, mabuduhan wagía luagu ni aban, machüüragun wagía woungua lun wagunfulirun somu kárugu lidan polítika, mínchahan wamutiña giñe gürigia lun hadügün asansiruni hadan gumadimatiña. Darihadiwa saragu resun buiti tidan Bíbülia lun mádaragun wamá woungua lidoun polítika. Ariha wamá fiu:

  • Mosu wáyeihani lani Hesusu hénpulu, le meha máhabei lárügüdün ni aban kárugu lidan polítika (Huan 6:15). Ariñagati houn lani disipulugu moun lumuti lan “lánigu [hamá] ubóu”; ligía moun lumuti lubéi woudin luéigiñe lóubadina ni aban lidan polítika (Huan 17:14, 16; 18:36; Márükosu 12:13-17).

  • Mosu úaragua wamá lun Larúeihan Bungiu, arúeihani le uágubei layanuha Hesusu dan le lariñagunbei: “Lapurichihóuba uganu buiti le luáguti larúeihan Bungiu lidan sun ubóu” (Matéu 24:14). Kei inebe lubéi Larúeihan Bungiu woun ani rúaali gumadi woun lun wasubudiragüdüni aniteeli lan arúeihani le, mádaraguntiwa woungua lidoun polítika ni lidan wageira ni lidan amu (2 Korintuna 5:20; Éfesuna 6:20).

  • Ídehati mádaragun wamá woungua lidoun polítika lun ua lan eberesehatiwa dan le wayanuhan luagu uganu luáguti Larúeihan Bungiu houn furumiñeguarügü gürigia, meberesenga ka lan hasaminanbei. Dandu lau le wariñagubei kei lau le wadügübei áfaaguatiwa warufuduni afiñe wamá Larúeihanrügübei lan Bungiu aransehei sun turobuli le ubouagubei (Sálumu 56:11).

  • Lun hamuga wádaragun woungua lidoun polítika, wadügüña hamuga lun ua lan úarani hadan wíbirigu ha lídanbaña sun ubóu (Kolosana 3:14; 1 Féduru 2:17). Le linarün katei, adügati hádaragun lílana amu burí relihión houngua lidoun polítika lun ñein lan fánreinguaü hadan (1 Korintuna 1:10).

Inebetiña gumadimatiña woun. Lau sun mádaragun wamá woungua lidoun polítika, inebeti halurudun gumadimatiña woun. Ítara liña wagunfulirun lau gumadi tídangiñeti Bíbülia le ichugúbei woun lidan Rómana 13:1: “Lunti gaganbadi hamá houn gumadimatiña”. Ligía gúnfuli wabéi lau lilurudun wageira, fayei wamuti liseinsuna gumadi, ídeha wagía hama gumadimatiña lidan sun aransehani le hadügübei lun hanügün buiti houn lílana ageiraü. Móuchuntiwa wadügün lun heferidirun gumadimatiña lídangiñe habafu; lubaragiñe lira, falá wamuti adundehani le ichugúbei woun tidan Bíbülia libügürü lunti lan wafurieidun “hawagu sun [...] gumadimatiña, luma hawagu sun lúrudugu”, dántima le desidírübaña lan somu katei le gayaraabei lañawarihani darangilaü le aubei wagunfulira lau sun le lunbei wadügüni lidan wani relihión (1 Timotéu 2:1, 2).

Inebeti giñe liricha kada gürigia woun lun lanúadiruni kaba lan ladüga lidan luáguti polítika. Kéiburi lidan lidaani abuduhani, máluguntiwa weberesehani ladügǘniwa, meredehan waméi gürigia le busenbei labuduhan.

Iseriti san mádaragun wamá woungua lidoun polítika? Uá. Ítarameme liña meha hóuserun apostolugu hama ha híbiri kristiánugu lidan furumiñeti sígulu. Ariñagatu aban líburu to adimurehaboun luagu katei le: “Lau sun meha subudi hamani furumiñetiña kristiánugu mosu lan inebehabu hamá houn gumadimatiña, masaminaruntiña meha mosu lan hádaragun houngua lidoun polítika” (Beyond Good Intentions—A Biblical View of Politics [Le lanagangiñebei labusenrun gürigia ladügün buiti. Ligaburi tarufuduni Bíbülia polítika]). Abürühati aban aturiahati luagu Bungiu luma afiñeni luagu, le meha awinwandubei labadinagua sígulu II luma III gíriti Orígenes: “Máhatiña kristiánugu hagunfulirun lau somu kárugu lidan polítika”.

Féridigüda lumuti san ligaburi wóuserun darangilaü le hádanbei lílana ageiraü? Uá. Moun lumuti hanufudedun gumadimatiña lugundun darangilutiwa. Ariha waméi le ariñawagúbei lidan aban ariñahani le hasagarubei lílana Hóundarun Aturiahatiña luáguti Siensia le lídanbei ageiraü Ukrania lidan irumu 2001. Libügürü mádaragun wamá woungua lidoun polítika, ariñagati: “Másiñati gibe hamá gürigia magundantiña lau hóuserun gefentiña luagu Heowá ítara. Le linarün katei, anihán meha lébunabei hasiadirúniwa lábugiñe hagumadihan gumadimatiña ha ahandilihabalin sun le hadügübei lílana hageira, dandu lábugiñe lagumadihan Hítüler kei lábugiñe hagumadihan amu gumadimatiña ha óuyedubaña lau sun hamegen lílana hageira”. Ariñagati giñe ariñahani ligía: “Súnwandan meha inebehabu hamá Gefentiña ha lídanbaña burí ageiraü le Yuropabei luma Asia le meha ídanbei houserúa gürigia lau ufasinin lun herederun lábugiñe hererehan gumadimatiña [...] lau meha arumani ani masaminarunga hawouguounrügü hawadigimarida ábunagua, alubaha o tidan burí fábürika [...] meberesehan hamuti hagumadihan ha óuyedubaña lau sun hamegen lílana hageira”. Gumuti ariñahani ligía ariñageina madügün lan hafiñen luma le hadügübei gefentiña luagu Heowá ha uguñebaña weyu lun “leferidirun darangilaü luma úarani le lídanbei furumiñeguarügü ageiraü”.