Keimon lidoun ariñahani

Keimon lidoun libiaman menú

Gefentiña luagu Heowá

Garifuna

Fánreinguagüda hamutiña san gefentiña luagu Heowá iduheñu o óundaraguagüdarügü hamutiña?

Fánreinguagüda hamutiña san gefentiña luagu Heowá iduheñu o óundaraguagüdarügü hamutiña?

Nadagimeintiwa, wagía gefentiña luagu Heowá, lun lidan hamá úarani dandu waduheñu kei haduheñu wabesinanigu. Inebeti aransehani lánina ibagari keisi iduheñu woun ladüga gabaroun wamuti Bungiu lan adügübalin (Agumesehani 2:21-24; Éfesuna 3:14, 15). Rúati adundehani méiniti woun tidan Bíbülia le íderaguaalibei saragu gürigia ha lídangiñetiña sun fulasu ubouagu lun lidan hamá úarani lidan habagari kesi maríeitiña luma lun gunda hamá hámagua.

Ka hadügübei gefentiña luagu Heowá lun híchugun iderebugu lun ibagari keisi iduheñu?

Adüga wamuti sun wayaraati lun wafalaruni adundehani le tídanbei Bíbülia, le íderagubaliwa lun buídutima wamá kei maríeitiña luma kei agübürigu (Ariñawagúni 31:10-31; Éfesuna 5:22–6:4; 1 Timotéu 5:8). Íderagua tumutiña giñe Bíbülia íbini iduheñu ha ídanbei mama lan lídanñanu ligiaméme relihión sun lílana (1 Féduru 3:1, 2). Ariha huméi le hariñagubei maríeitiña ha mámabaña gefentiña luagu Heowá luagu le asuseredubei dan le ladügagunbei aban hádangiñe lungua gefentime luagu Heowá:

  • “Lidan furumiñeti sisi irumu le waubei úara sun meha oura wau ageindagua ani buin liña meha wabagari lau magundani. Lárigiñebei ábanharu lan gefentu luagu Heowá Ivete, aba hínsiñehabuhaaru lan gaguraasun tuguya. Seremei asansiruni le tadügübei awanhagua lubéi wámagua.” (Clauir, Brasilina)

  • “Dan le lagumuserunbei Chansa le nani weiriei aturiahoun Bíbülia hama gefentiña luagu Heowá, aba níchugun lidere dan lun lun lararamuni laturiahan ladüga meha samina nan fánreinguagüda hamaniña Gefentiña iduheñu. Gama lumoun, lau lásügürün dan aba níchugun fe íderagua táadiwa lan Bíbülia lidan wabagari kesi maríeitiña.” (Agness, from Zambia)

Lidan wani ministeriu, arufudahatiwa houn wabesinanigu ida liña lan tahuudun Bíbülia lidan luáguti:

  • Láluahani gürigia lau lichú aau kaba lan uma lamarieida

  • Hararamun lun lénrengunga le úmabei hagagibudagua maríeitiña lidan furumiñeti irumu

  • Hanügagun houngua buidu hama lagübürigu le aban

  • Hahandilihani seinsu lau lichú aau

  • Hararamuni sigenei

  • Gíchigadi hamá ferudun

  • Hererehan houn hasaanigu

Barüti san ladügagun aban hádangiñe maríeitiña lungua gefentime luagu Heowá lun ñein lan turobuli haganagua?

Anha, anihein dan barǘ lan turobuli. Arufudati akutihani le tadügübei kónpeni to gíriboun Sofres, lidan irumu 1998, belú lan óunwenbu burí turobuli lidoun habagari 1 hádangiñe kada 20 maríeitiña le ídanbei ladügagua aban hádangiñe lungua gefentime luagu Heowá.

Ariñaga lumuti Hesusu lidan aban profesía ñeinbei lan dan gaturóbulin hamá lánigu hama haduheñu (Matéu 10:32-36). Ariñagati Will Durant, aban abürühati libügürü dan le sügühalibei: “Íridahouatiña meha kristiánugu ha meha lábugiñebaña larúeihan Roma luagu fánreingua hamaniña iduheñu. * Ani uguñe weyu, íridahouatiwa giñe wagía gefentiña luagu Heowá luagu ligiaméme. Gefentiña funa san luagu Heowá agubuhabaña turobuli?

Liñun-agei Lúrudu Yuropana le Ageindagubei luagu Haricha Gürigia

Dan le layanuhóunbei haweigiñe gefentiña luagu Heowá lidan Liñun-agei Lúrudu Yuropana le Ageindagubei luagu Haricha Gürigia (Tribunal Europeo de Derechos Humanos), ariñawagúati liibe-agei lan dan haduheñu lan gefentiña luagu Heowá ha mámabaña Gefentiña agubuhabaña turobuli lau “mineben lan liricha haduhe houn lun lawinwandun según lani relihión”. Ariñawagúati giñe lídangiñe Liñun-agei Lúrudu le: “Gagibuguatiña sun iduheñu luma turobuliméme le dan le mámañanu lan lidan ligiaméme relihión sun lílana, mámarügüñein houn gefentiña luagu Heowá lasusereda”. * Íbini dan le magundan hamá waduheñu lau wani relihión, adüga wamuti wagía gefentiña luagu Heowá sun wayaraati lun wafalaruni adundehani tídangiñeti Bíbülia le: “Mafayeira humá wuribani luagu wuribani lun ni aban. [...] Adüga huméi sun le huáraati lun habagaridun lidan darangilaü hama súngubei” (Rómana 12:17, 18).

Ka uagu hafiñera gefentiña luagu Heowá hámarügüñein lan Gefentiña kei hagía gayara lan hamarieidun?

Gaganbaditiwa, wagía gefentiña luagu Heowá, lun gumadi le tídanbei Bíbülia libügürü gayara lan wamarieidun luma le úmati wabusenra “afiñetirügaali ligía luagu Kristu”, mini lan lira, lúmarügübei lan aban wíbiri lidan afiñeni wamarieida (1 Korintuna 7:39). Buiti lidin woun dan le gaganbadi wamá lun gumadi lúmagiñeti Bungiu le. Samina humá luagun le, lidan irumu 2010, fuati aban arütíkulu tidan garüdia to gíriboun Journal of Marriage and Family le ídanbei lariñawagúa: “Liibe-agei dan, buídutimati hanaagun maríeitiña houngua dan le ábanmeme lan hani relihión, hafiñen luma le hadügübei”. *

Gama lumoun, mínchahan hamutiña gefentiña luagu Heowá gürigia maríeitiña lun hafanreinragun hawariuagua ladügarügü mama lan Gefenti aban hádangiñe. Ariñagatu Bíbülia: “Anhein lan mafiñen tubéi lúmari aban le afiñeti luagu Kristu, ani gúndaatu lun tasigirun aganawa luma, moun lumuti lígirunu. Anhein giñe mafiñen lubéi túmari aban würi to afiñetu luagu Kristu, ani gúndaati lun lasigirun aganawa tuma, moun lumuti tígiruni” (1 Korintuna 7:12, 13). Gaganbaditiwa giñe lun gumadi le.

^ par. 17 Ariha humóun líburu César y Cristo, tomo II, páhina 405.

^ par. 18 Ariha huméi le desidíruabei lidan kesi Gefentiña luagu Heowá ha Moskubaña hama amu kóntüra Rusia, páhina 26 luma 27, párafu 111.

^ par. 20 Ariha humóun garüdia Journal of Marriage and Family, volumen 72, númeru 4, (widü-hati, irumu 2010), páhina 963.