Keimon lidoun ariñahani

Keimon lidoun libiaman menú

Gefentiña luagu Heowá

Garifuna

Ida liña aturiahani tídangiñeti Bíbülia le híchugubei gefentiña luagu Heowá?

Ida liña aturiahani tídangiñeti Bíbülia le híchugubei gefentiña luagu Heowá?

Lidan aturiahani tídangiñeti Bíbülia le híchugubei gefentiña luagu Heowá ounabúati saragu álügüdahani. Anihán fiu lídangiñe:

  • Ka san Búngiubei?

  • Le san lúgubu berese lan Bungiu nau?

  • Ida luba nederebugudagüdüni namarieidun?

  • Ida luba nadarirun ugundani lidan nibagari?

Guentó, wóunabaali álügüdahani létima gabügürüguabei hadügüni gürigia luagu aturiahani tídangiñeti Bíbülia le wíchugubei.

Ida liña waturiahanu Bíbülia hama gürigia? Anúadahatiwa aban tema kéiburi hamuga “ligaburi Bungiu” o “ida luba lan gunda lan habagari maríeitiña hámagua”, ábati wakutihani bérusu burí le adimurehabei luagu burí katei le. Dan le wagoubadaguagüdüni lúmagua, ñein warihei sun le tarufudahabei Bíbülia luagu tema le wakutihabei, ánheinti ua lubéi gunfuranda wamá somu bérusu, íderagua lumutiwa amu bérusu tídangiñeti Bíbülia gunfurandei, ítara liña wígirun lun Bíbülia guánarügü lan afuranguagüdei le tarufudahabei.

Yusu wamutu líburu Kátima san tarufudahabei Bíbülia? keisi ídemuei lun waturiahanu Bíbülia. Afuranguagüda tumuti kátima lan tarufudahabei Bíbülia luagu Bungiu, luagu Hesusu, luagu dan le úagilibei luma luagu saragu amu katei.

Átiri haguburahan lun híchugun aturiahani tídangiñeti Bíbülia? Maguburahantiwa ni kata, ni luagu aturiahani ni tuagu agumeiraguagüdüni to wayusuruboun lun waturiahan.

Átiri lidura kada aturiahani? Gíbetiña gürigia aturiahatiña kéiburi aban oura kada dimaasu. Gama lumoun, gayaraati ladurarun aturiahani según habusenruni. Huguya lun harihini kátima lan dan buídubei hun.

Kaba asusereda ánhana amuriaha aban aturiahani tídangiñeti Bíbülia? Danme hamuriahan aban aturiahani tídangiñeti Bíbülia, lachülürüba aban gefenti luagu Heowá bisidaün lidan fulasu luma oura le buídutimabei hun lun larufuduni hun lidan fiu minutu ida liña lan wíchugun aturiahani tídangiñeti Bíbülia. Anhein hínsiñe aturiahani ligía hun, gayaraabei hasigirun aturiaha, lagiribuduba Gefenti ligía bisidaün lau sun lugundan.

Mosu san nadügagun nungua gefentime luagu Heowá ánhana ánhara naturiahanu Bíbülia hama? Uá. Wéiriti línsiñe woun, wagía gefentiña luagu Heowá, warufudahan tuagu Bíbülia houn gürigia, ani mafosurun wamutiña lun hadügagun houngua lílaname wani relihión. Afuranguagüdarügü wamuti houn, lau inebesei, ka lan tariñagubei Bíbülia, gabarounga waméi garicha lan kada gürigia lun lanúadiruni kaba lan lafiñera (1 Féduru 3:15).