Keimon lidoun ariñahani

Keimon lidoun libiaman menú

Gefentiña luagu Heowá

Garifuna

Ka uagu maha habéi gefentiña luagu Heowá lun hitaü?

Ka uagu maha habéi gefentiña luagu Heowá lun hitaü?

Iyeeni luma inarüni

Iyeeni: Mafiñentiña gefentiña luagu Heowá luagu hagaranihan surusia ligía midin habéi houn.

Inarüni: Adüga wamuti sun wayaraati lun wadarirun surusia ha buítiña. Dan le lasandirun aban wádangiñe —o aban hádangiñe waduheñu— o mosu lan libugún, áluaha wamutiña surusia ha agaranihañahaaña mayusurunga hitaü. Ani wéiriti eteingiruni le wasandirubei luagu sun awanseruni le adügǘwaalibei lidan luwuyeri agaranihani le. Lidan saragu ageiraü, yúsuati agaranihani maganati hitaü le ayusurúbei lun lagaranihóun houn gefentiña luagu Heowá lun lagaranihóun houn amu gürigia. Uguñe weyu, gayaraahali hanúadiruni saragu gürigia luwuyeri agaranihani le úabei dencha lan kei lásügürawagüdüniwa hitaü lidoun úgubu le gayaraabei lanügün luriban sandi, láwiyuruni úgubu luáriua luma bulíeiguaü le gayaraabei hadügüni surusia.

Iyeeni: Yusu hamuti gefentiña luagu Heowá hafiñen lun hareidaguagüdüniña sánditiña.

Inarüni: Mareidaguagüdüntiwa sánditiña lau wafiñen.

Iyeeni: Wéiriyati liserun agaranihani le ayusurúbei leweñegua hitaü.

Inarüni: Lau sun buiti le lanügübei agaranihani le ayusurúbei leweñegua hitaü, gadüna lumuti lebegi. *

Iyeeni: Sagü irumu, hilatiña saragu gefentiña luagu Heowá, irahüñü haganagua, ladüga maha hamá lásügürawagüdün hitaü lidoun hágubu.

Inarüni: Mébunati lariñawagún lira. Uguñe weyu, gabügürüguaali hadügün surusia íbaaguni le güreweiti, kéiburi lun hagidarun somu danimaü hawéi gürigia, híbaagun somu sandi tuéi lanigi o hasansirun somu lumegegun úgubu kéiburi ubanaü, anigi, íhuaraü o katei líbeina lira, mayusurunga hitaü. * Areidaguatiña sánditiña ha uágubaña mayusurún lan hitaü, irahüñü haganagua, kei hareidagun ha uágubaña layusurúa hitaü, ani másiñati ha lan uágubaña mayusurún lan hitaü furusetimabaña areidagun. * Lanagangiñe lira, úati gayaraati lachoururuni lóunweba lan aban sánditi anhein maha lun hitaü o lasigiruba lan abagarida anhein ánhara lun.

Ka uagu maha habéi gefentiña luagu Heowá lun hitaü?

Mámatima luagu sandi le gayaraabei ladügüni hitaü woun wamahada lun, máhatiwa lun ladüga múaran lan luma wafiñen según le furendei wamaalibei tídangiñe Bíbülia. Dandu tidan Binadu Daradu kei Iseri rúati gumadi houn lubúeingu Bungiu lun meigin hamá hitaü (Agumesehani 9:4; Fádirigu 17:10; 2 Lúrudu 12:23; Adügaü 15:28, 29). Lun Bungiu, ibagari mini lubéi hitaü (Fádirigu 17:14). Kei inebehabu wabéi lun Bungiu le íchugubalin wabagari woun, ligía gaganbadi wabéi wagía gefentiña luagu Heowá, lun lugumadin libügürü moun lumuti lan wánharun lun hitaü.

Iseri ligaburi larihíniwa katei le

Uguñe weyu, gayaraahali ladügǘniwa ibugúni le güreweiti mayusurunga hitaü

Luagu meha aban dan, saminatiña meha surusia dencha lan ámuñegueinarügü katei le adügǘbei o árani le ayusurúbei luéi lásügürawagüdüniwa hitaü lidoun hágubu gürigia, darí lun hariñagun háluahaña lan sánditiña háfaragun houngua hilagubei dan le hamuriahan agaranihani le ídanti mayusurún lan hitaü. Gama lumoun, fiu irumu lubaragiñe le, sánsiti saminaü le. Ariñawagúati lidan aban arütíkulu le áfuachubei tidan aban garüdia lánina agaranihani le asagarúbei lidan irumu 2004: “Saragu lídangiñe katei le adügǘbei lun lagaranihóun houn sánditiña ha gefentiña luagu Heowá ligíaalime ayusurúa houn sun sánditiña yarafa madise”. * Ánheinti lidan irumu 2010, ariñawagúati tidan líburu Medicina transfusional seremei lan luwuyeri agaranihani le “lachülürüba dan lun kamanihali lanme ‘ibugúni le ídanti mayusurún lan hitaü’ ítara kei ibugúni le ídanbei memegeirun lan sánditi lálüdün háspitalirugu”.

Añahein saragu milu surusia lidan sun ubóu ha ayusurutiña ámuñegueinarügü katei lun hadügün ibugúni le güreweiti máwiyurunga saragu hitaü. Dariwati luwuyeri agaranihani le íbini lidan ageiraü le burí gudemeti, ani gíbetiña gürigia ha mama gefentiña luagu Heowá amuriahatiña lun layusurún dan le lagaranihóun houn.

^ par. 8 Medicina transfusional, páhina 14; Transfusion and Apheresis Science, bolumen 33, númeru 3, páhina 349.

^ par. 10 Revista Española de Cardiología, bolumen 59, númeru 5, páhina 507 darí 509; Acta Médica Colombiana, bolumen 26, númeru 5, páhina 261; The Journal of Thoracic and Cardiovascular Surgery, bolumen 134, númeru 2, páhina 287 luma 288; Texas Heart Institute Journal, bolumen 38, númeru 5, páhina 563; Basics of Blood Management, páhina 2; Continuing Education in Anaesthesia, Critical Care & Pain, bolumen 4, númeru 2, páhina 39.

^ par. 10 Revista de la Federación Argentina de Cardiología, bolumen 34, númeru 3, páhina 407 luma 408; Revista Española de Cardiología, bolumen 60, númeru 7, páhina 727 darí 731.

^ par. 14 Continuing Education in Anaesthesia, Critical Care & Pain, bolumen 4, númeru 2, páhina 39.